Pannakilinea a Kadua dagiti Manangsalimetmet ti Kinatarnawda ken Jehova

“Ngem no siak, magnaakto iti kinatarnawko. . . . Kadagiti gimgimong idaydayawkonto ni Jehova.”​—SALMO 26:11, 12.

1, 2. (a) Kasano ti pananggun-od dagiti dadduma a relihion iti Kakristianuan kadagiti paspasurotda? (b) Ania a pamay-an ti panangisuro ti inusar ni Jesus? (Mateo 11:28-30)

IDI 1985 adda 189,800 a tattao a nabautisaran kas simbolo iti dedikasionda ken ni Jehova kas dagiti Kristiano a saksina. Dayta ti promedio a 520 iti kada aldaw. Kasano ti panangaramid amin dagita a tattao iti pangngeddengda a mabautisaran? Timmabunoda aya kadagiti panagtataripnong dagiti rineprep a tattao, a nagdengngegda iti maysa nga emosional a manangasaba, ket kalpasanna nagaramidda iti emosional a pangngeddeng a maipaay ken Kristo? Kasta ti panagan-andar ti sumagmamano kadagiti relihion a Protestante ken Ebanghelikal. Ngem kasta kadi ti pamay-an ni Kristo a nanggun-od kadagiti paspasurotna?

² No sukimatentayo a siaannad ti panangaskasaba ni Jesus iti publiko, ditay makita nga isut’ nangkiwkiw kadagiti emosionda. Kas pangarigan, inallukoyna aya dagiti nagdengngeg kenkuana babaen kadagiti panagkankanta? Wenno nagusar kadi kadagiti nasikap a sikolohia a mangipasdek iti maysa a panagrikna iti basol kadagiti agdengdengngegda ket kalpasanna tignayenna ida a kumaut kadagiti bulsada? Maigiddiat iti dayta, ti pamay-an ti panangisurona ket isu ti namagbalin kadagiti tattao nga agpanunot ken agrason. Yantangay kaaduan kadagiti managdengngegna ket Judioda, addaandan ti pannakaammo kadagiti Kasuratan a Hebreo. Mapagrasonna ida a maibatay kadagiti napalabas a pannakaammoda tapno mabigbigda nga isu ti Mesias.​—Mateo, kapitulo 5-7; Lucas 13:10-21.

3. Kasanotay nga ammo a ni Pablo saanna a basta kiniwkiwan dagiti emosion iti panangisurona?

³ Umas-asping iti dayta, ni Pablo, nupay imbilang dagiti dadduma kas agkurang iti abilidad nga agsao, isut’ nangawis iti kabaelan nga agrason. (Aramid 20:7-9; 2 Corinto 10:10; 11:6) Isut’ nagsurat: “Dawatek ngarud kadakayo, kakabsat, gapu kadagiti kaasi ti Dios, nga ipaayyo dagiti bagbagiyo kas daton a sibibiag, nasantuan ken makaay-ayo iti Dios, maysa a sagrado a serbisio a buyogen iti pannakabalinyo nga agrason. . . . Ket agbalbaliwkayo gapu iti pannakapabaro ti isipyo [“tapno ti intero a kababalin ti is-isipyo mabalbaliwan,” Phillips], tapno mapaneknekanyo no ania ti nasayaat ken makaay-ayo ken naan-anay a pagayatan ti Dios.”​—Roma 12:1, 2.

4. Sakbay a mabautisaran ti maysa a tao kas maysa kadagiti Saksi ni Jehova, ania dagiti addang a masapul nga alaenna?

⁴ Kasta met itatta, dagidiay mababautisaran ket isuda dagiti tattao a nakapagadalen iti Kasuratan ken nagrason a naimbag kadakuada sakbay nga innalada ti serioso nga addang iti bautismo, wenno ti naan-anay a pannakaitaneb iti danum. (Aramid 17:11, 12) Ti pangngeddeng ket saan a maysa a naganat, emosional a pangngeddeng. Maisupadi ketdi, sakbay ti pannakaawatda a maipaay iti bautismo, isudat’ regular a timmabuno kadagiti Nakristianuan a panaggigimong nga addaan panggep a manggun-od iti umiso a pannakaammo ken ni Jehova a Dios ken kadagiti pangpanggepna babaen ken Kristo Jesus. (Hebreo 10:25) Regular a makiramramanda met iti Nakristianuan a ministerio, nga iranranud ti naimbag a damag ti Pagarian kadagiti dadduma. (Aramid 5:42; 1 Corinto 9:16) Kalpasanna, kadagiti maudi a lawas sakbay ti bautismoda, siaannad a renepasoda a kadua dagiti nadumaduma a panglakayen ti kongregasion ti nasursurok ngem 120 a salsaludsod maipapan kadagiti Nakristianuan a pannursuro ken kababalin, agraman panangusig iti ginasgasut a mangsuportar a teksto ti Biblia​—amin dagitoy maaramid tapno maanamonganda a manangsalimetmet iti kinatarnawda sakbay ti bautismoda.​—Aramid 8:34-36.a

Ti Pagimbagan nga Ipaay ti Bautismo

5. Iti ania a kurso ti kababalin ti pakailasinan ti maysa a tao babaen iti bautismo?

⁵ Ania ti magapuanan ti maysa a tao babaen ti pannakabautisarna? Umuna, ipabpabigbigna ti bagina a kadua ti naindaklan a manangsalimetmet ti kinatarna a nagna pay laeng ditoy daga​—ni Kristo Jesus. Isu a mismo ti nangipakita iti ulidan babaen iti pannakabautisarna idi isut’ agtawen ti 30. (Lucas 3:21-23) Iti kamaudiananna pinilina dagiti paspasurotna a mangisuro ken mangbautisar iti isuamin a lubong. (Mateo 28:19, 20) Ngem kaipapananna kadi a dagiti ad-adalanna mangbautisarda kadagiti tattao nga awan ti panangidumdumana, a saandan nga ikukuenta dagiti agdama a kababalinda?

6, 7. (a) Aniat’ makalikaguman iti maysa a pudno a pasurot ni Kristo? (b) Ania ti ipasimudaag ti kinasanto?

⁶ Ipaay ni apostol Pedro iti umiso a panangmatmat idi a nagsurat: “Agsantokayo met iti amin a kita ti panagbiag, ta adda a naisurat: ‘Agsantokayo, ta siak santoak.’” (1 Pedro 1:15, 16) Ita, maipaay iti dedikado a Kristiano, aniat’ kaipapanan ti panagbalinna a “santo”?

⁷ Sigun iti W. E. Vine’s Expository Dictionary of New Testament Words, ti Griego a sao a haʹgi·os (a naipatarus a “santo”) “iti pamunganayanna kaipapananna ti pannakaisina . . . ket gapu itoy, iti Kasuratan iti moral ken espiritual a kaipapananna, naisina manipud basol ket ngarud nakonsagrar iti Dios.” Ti sabali pay a Griego nga eskolar kunana nga “iti kasisigudda dayta ti kinanadiosan.” Daytoy a pannakaawat ti mangipapilit iti nangato nga estandarte kadagidiay mabautisaran kas dagiti pudno a Kristiano. Dayta ti estandarte ti kinatarnaw, ket ti kinatarnaw isu ti ‘nainget a panangsalimetmet iti maysa a kodigo dagiti moral nga ipatpateg’​—iti kaso ti Kristiano, dagiti ipatpateg ni Kristo.​—Juan 17:17-19; 18:36, 37.

8. (a) Ania dagiti pagalagadan a naadda iti immuna a kongregasion Kristiano maipapan iti kababalin? (b) Sinurot kadi ti Kakristianuan dagidiay a pagalagadan? Mangted kadagiti pangarigan manipud kadagiti lokal a pasamak.

⁸ Ti pudno a kongregasion Kristiano ti masansan a mangipappapilit iti kinatarnaw, iti panangsalimetmet iti nadalus nga organisasion. Gapuna binilin ni Pablo dagiti immuna a Kristiano a “dikay makikadkadua iti uray siasino a managanan kabsat no isu mannakikamalala wenno naagum wenno agrukbab kadagiti ladawan wenno managsao iti dakes wenno managbartek wenno nagaramugam, iti kasta a tao, uray makipangan kenkuana, saan. . . . ‘Ikkatenyo ngarud daydiay a tao a dakes iti tengngayo.’” (1 Corinto 5:9-13; 2 Juan 10, 11) Iyap-aplikar kadi dagiti klero ti Kakristianuan dayta a nangato nga estandarte ti kinatarnaw kadagiti arbanda? Ti Kakristianuan aw-awatenda kas dagiti paspasaray wenno aktibo a miembro​—dagiti tattao a regular nga agar-aramid iti amin a kita ti nakaro a panagbasol ken krimen. Dagiti prinsipio ti Biblia dida ikkan iti aniaman a lugar ti kasta a kinalukay.​—Idiligyo iti Jeremias 8:5, 6, 10.

9. Aniat’ mangallukoy kadagiti adu a tattao iti dedikasion ken bautismo?

⁹ Apagpag-isu gapu iti daytoy nangato nga estandarte kadagiti Saksi ni Jehova, dagidiay agayat iti kinapudno ken kinatarnaw maallukoyda a mangidedikar iti bagbagida iti Soberano nga Apo iti uniberso, ni Jehova a Dios. (Habacuc 3:18, 19) Makitkitada ti nalawag a panaggiddiat ti kababalin dagiti nailubongan a relihion ken kadagiti Saksi ni Jehova. Pudno, kaaduan kadagiti tattao ti di mangipatpateg iti nadalus a panagdayaw. (1 Pedro 4:3, 4) Kaskasdi dagiti managayat iti kinatarnaw agturturongda iti kinapudno iti rinibribo. Ipakpakitada ti panagayatda iti Dios ken kadagiti estandartena no agpabautisarda iti danum.​—Idiligyo iti Marcos 1:10; Juan 3:23; Aramid 8:36.

Kinatarnaw a Naibatay iti Ayat ken Panagibtur

10. Aniat’ kasapulan a maipaay iti maysa a Kristiano tapno masalimetmetanna ti kinatarnawna?

¹⁰ Ti kinatarnaw adda bayadna. Pinagbalin ni Jesus a nalawag dayta idi inawisna dagiti tattao nga agbalin a paspasurotna. “No sinoman a tao ti mayat a sumurot kaniak paglikudanna koma ti bagina [“ibatina ti bagina iti likudan,” The New English Bible] ket alaenna ti kayona a pagtutuokan ket agtultuloy a surotennak.” (Marcos 8:34) Ti kurso ti Nakristianuan a kinatarnaw ramanenna dagiti suot ken sakripisio ken agpaay kadagiti isu met laeng a rason a naipaay dayta ken Kristo​—addaantayo iti maymaysa a kabusor, ni Satanas. (Efeso 6:11, 12) Gapuna kasapulan ti panagibtur tapno “agtultuloy” a masurottayo ni Jesus. Agpaay iti dayta a rason, ti dedikasion ramanenna ti saan a nalag-an a pangngeddeng; daytat’ rebbeng a saan koma a maysa a mabiit ti panaglabasna a panagayat. Kaskasdi adda sumagmamano a nagpanawanda ti kinapudno iti las-ud laeng ti sumagmamano a bulan wenno tawen manipud bautismoda. Kasanotayo a mailawlawag dayta?

11. Apay, nalabit, a dagiti dadduma saanda a nagtultuloy iti kurso ti kinatarnaw?

¹¹ Nalabit dadduma inasitganda ti bautismo iti maysa nga emosional imbes a maysa a nalawag a kasasaad ti panagpampanunot. Mabalin a dagiti dadduma agsapsapulda ti insigida a resulta ket mangaramidda iti maysa nga iniimut, apagbiit a dedikasion. Aniaman ti rasonda, napukawda ti napigsa a pannakirelasionda ken ni Jehova. Saanda a “kimmita a sipapasnek” iti Ulidanda, ni Jesus Kristo. (Hebreo 12:1, 2) Kas resultana, ti panagayatda iti Dios ket kimmapuy ket ti kinatarnawda ti apagbiit. Ket apay a ti ayat ti nasken unay a banag? Agsipud ta dayta ti kakaisuna a natibker a pamuon a maipaay iti napaut a dedikasion ken ni Jehova.​—Marcos 12:30, 31; 1 Juan 4:7, 8, 16; 5:3.

Panangkuenta iti Ngina ti Kinatarnaw

12. Ania ti nainsiriban a kurso nga alaen sakbay ti bautismo?

¹² Saan a pinaregta ni Jesus dagiti ad-adalanna a mangsurot a sibubulsek kenkuana a dida kinukuenta ti nginana. Binalakadanna ida: “Asino kadakayo ti idinto a kayatna ti mangbangon iti maysa a torre di agpanunot nga umuna kadagiti masapul a gastoen, tapno kitaenna no adda umanay a pangleppasna?” Wen, ti tao a natakneng siaannad a tingitingenna ti masanguanan a kurso ti panagtignayna. Masapul nga isut’ sigurado iti pakatignayanna sakbay nga awatenna ti naan-anay a responsabilidad ti Nakristianuan a dedikasion ken bautismo. Ket impakita ni Jesus no ania ti mabalin a kaipapanan dayta idi a kinunana: “No kasta ngarud, uray siasino kadakayo a dina paglikudan dagiti isuamin a kukuana saan a makapagbalin nga adalak.”​—Lucas 14:28-33.

13. No ti kababagas ti pannursuro ni Jesus isu ti ayat, aniat’ kayatna a sawen idi a nagsao maipapan iti ‘pananggura’ kadagiti miembro ti pamilia ti maysa? (Mateo 22:37-40)

¹³ Ti dedikasion ken ni Jehova sapulenna ti amin-kararua a kinatarnaw iti panagaramid iti nadiosan a pagayatan. Awan tattao wenno sanikua a mabalin a mapalubosan a mangringbaw iti ayat ti maysa iti Dios. Isut’ gapuna a direkta a kinuna ni Jesus: “No asinoman a tao ti umay kaniak ket dina guraen ni amana ken inana ken ti asawana ken dagiti annakna ken dagiti kakabsatna a lallaki ken babbai, ken ti biagna met laeng, saan a makapagbalin nga adalak.” (Lucas 14:26) Ket ania ti kayat a sawen ni Jesus idi a kinunana a guraen ti maysa dagiti mismo a kamkameng ti pamiliana ken uray pay ti bagina met laeng? Yantangay insurona kadagiti paspasurotna nga ayatenda uray dagiti kabusorda, iti ania a kaipapanan ti nangusaranna iti sao a pananggura ditoy? (Lucas 6:27, 35) Ti gura ditoy ket addaan ti kapanunotan a panangayat iti basbassit.​—Idiligyo iti Mateo 12:46-50.

14. Kasanot’ panagrikna ti dadduma a gagayyem ken kabagyan no ti maysa agbalin a saksi ni Jehova? (Juan 15:18, 19)

¹⁴ Pudno unay no agbalinen ti maysa a Kristiano a saksi ni Jehova, giddato a makitananto latta no asino dagiti pudpudno a gagayyemna. Mabalin a dagiti dadduma ti nalabit mangliklik kenkuana wenno mangilaksid kenkuana agsipud ta pinanawanna ti dati a relihionna, uray pay no isuda a mismo ket dida met al-alagaden a siuumiso ti aniaman a relihion. Ngem inkari ni Jesus nga addanto ti supapak ti aniaman a kasla pukaw, a kunkunana: “Awan ti tao a nangpanaw iti balay wenno kakabsat a lallaki wenno babbai wenno ama wenno ina wenno asawa wenno annak wenno dagdaga gapu kaniak ken gapu iti naimbag a damag a dinto umawat ita itoy nga aldaw ti maminsangagasut a balbalay . . . ken iti umay a sistema dagiti bambanag biag nga agnanayon.”​—Marcos 10:29, 30.

15. Apay a dagiti dadduma kitaenda nga ipababa dagiti Saksi ni Jehova?

¹⁵ Iti dadduma a kaso ti kurso ti dedikasion ken kinatarnaw ti mabalin a kaipapananna ti pannakapukaw ti dayaw iti imatang dagiti dadduma a tattao. (1 Corinto 4:12, 13) Apay a rebbeng a kasta? Agsipud ta al-alagadenyo ita ti maysa a relihion a maibilbilang a “saan a nadayaw.” (Idiligyo iti Marcos 2:15, 16.) Ngamin, saan a nadayaw ti ‘ipapan a mangis-isturbo kadagiti dadduma a tattao maipapan iti relihionmo iti balaybalay.’ Saan a nadayaw ti mabalud imbes a salungasingen ti maysa ti neutralidadna gapu iti nasionalismo ken patriotismo. (Juan 18:36) Saan a nadayaw ti panagkedked iti panangyalison iti dara gapu iti nasanay iti Biblia a konsiensia​—nupay iti agdama a pannaplit iti AIDS mangmangted iti dadduma a tattao iti agduadua a kapanunotan iti dayta a banag.​—Idiligyo iti Aramid 15:28, 29; 17:6, 7; 24:5.

16. Kasano a matulongantayo a mangsalimetmet iti kinatarnawtayo?

¹⁶ Nupay ti dalan ti Nakristianuan a kinatarnaw ket akikid ken makasuot, addaantayo ti agtultuloy a tulong. (Mateo 7:13, 14) Gapuna maikuna ni Pablo: “Mabalinak dagiti amin a bambanag gapu iti daydiay mamapigsa kaniak.” (Filipos 4:13) Ket magun-odantay dayta a pammigsa babaen iti agnanayon a panagkarkararag, babaen iti panagadal iti Sao ti Dios, ken babaen iti pannakilangen iti kongregasion Kristiano. Kas dagiti nabautisaran a manangsalimetmet iti kinatarnaw, makapagtalinaedtayo a matalek ken nasungdo, ket yaman pay iti pannakabalin nga ipapaay ti Dios.​—Efeso 4:11-13; 6:18; Salmo 119:105.

Dagiti Gunggona iti Panangsalimetmet iti Kinatarnaw

17. Kadagiti ania a bendision ti mabalin a pangiturongan ti bautismo?

¹⁷ Ti addang iti dedikasion ken bautismo ti mangiturong kadagiti adu a bendision. No maminsan, mabalin a kaipapanan dayta ti nasaksaknap ken ad-adda a makapnek a ministerio. Adda met dita ti namnama iti masanguanan a serbisio kas maysa nga auxiliary a payunir, nga iti sumagmamano a kaso mabalin a mangiturong iti trabaho a regular ken espesial a payunir, serbisio a kinamisionero, trabaho iti sirkito ken distrito, ken ti serbisio iti Bethel. (Kitaenyo ti kahon iti panid 26.) Para kadagiti nabautisaran a kakabsat a lallaki maluktan ti dalan nga agserbi kadagiti dadduma iti kongregasion kas ministerial nga adipen ken, inton agangay kas maysa a panglakayen. Ngem agpaay kadagitoy amin a pammendision, adda ti isu met laeng a pamunganayan a kasapulan​—ti kinatarnaw.​—1 Timoteo 3:1-10.

18. Kasanot’ rebbeng a panangapektar ti biagtayo a dedikado kadagiti dadduma a pakilangenantayo?

¹⁸ Dagiti gunggona iti maysa a panagbiag iti dedikasion ken kinatarnaw ti agsaknap a mangapektar met kadagiti dadduma. Kas bunga iti nasinged a panangsursurot iti ulidan ni Kristo, ti maysa agbalin a nasaysayaat nga asawa a lalaki wenno asawa a babai, ama wenno ina. (1 Pedro 2:21; Efeso 5:21-33; 6:4) Mapatanor met dagiti agtutubo ti makapabileg a pannakirelasion kadagiti dadakkelda, dagiti mannursuroda, ken kadagiti panglakayen iti kongregasion. (Tito 2:6, 7) Tunggal nabautisaran a Kristiano agbalin a nasaysayaat a kaarruba, agpatrabaho, wenno empleado. (Mateo 22:39; Efeso 6:5-9; Tito 2:9, 10) Ket kas ken Kristo, tunggal Kristiano rebbeng nga agbalin a makapabang-ar a pakilanglangenan para kadagiti dadduma, kas kinuna ni Jesus: “Alaenyo ti sangolko kadakayo ket agsursurokayo kaniak, ta siak naemmaak ken napakumbabaak iti panagpuspusok, ket makasarakkayto ti inana a maipaay kadagiti kararuayo.”​—Mateo 11:29.

19. Ania a dadduma pay a gunggona ti resulta ti panangala iti addang ti dedikasion?

¹⁹ Ti kadadakkelan a gunggona iti panangala ti addang ti dedikasion ken bautismo isu pananggun-od ti maysa a natalna a pannakirelasion iti Namarsua. Daytoy mangiturong iti talna ti isip. Kas imbalakad ni Pablo: “Dikay madanagan iti uray ania, no di ket kadagiti isuamin maipakaammo koma dagiti dawdawatyo iti Dios gapu iti kararag ken araraw agraman panagyaman; ket ti talna ti Dios a daeganna ti amin a pannakaawat aywanannanto dagiti puspusoyo ken dagiti panunotyo ken Kristo Jesus.”​—Filipos 4:6, 7.

20. (a) Iti ania a naibatay “ti talna iti Dios”? (b) Ania dagiti gundaway a mailukat a maipaay iti tao a mabautisaran?

²⁰ “Daytoy a talna iti Dios” ket naibatay iti nauneg a pannakaawat iti ulidan ken sakripisio ni Jesus. Daytoy a pannakaammo ken Kristo ti mangiturong kadagiti adu iti pudpudno a panagbabawi ken ti maysa a pudpudno a panagbalbaliw iti kababalin, wenno ti ‘panagtallikud’ manipud basol. (Aramid 3:19, 20) Gapu iti dayta, dagiti dedikado a tattao ti agkunkuna, kas iti salmista: “Ngem no siak, magnaakto iti kinatarnawko. . . . Kadagiti gimgimong idaydayawkonto ni Jehova.” (Salmo 26:11, 12) Ti tao a mabautisaran iti danum kas simbolo ti dedikasionna iti Dios ket ilinlineana ti bagina a kadua dagiti manangsalimetmet kinatarnawna ken Jehova iti intero a lubong. (1 Pedro 2:17) Isu met ti ‘mangpetpetpet iti biag a pudno,’ ti biag nga agnanayon, nga isut’ inkari ni Jehova baeten ken Kristo Jesus.​—1 Timoteo 6:19; Tito 1:2.

[Dagiti Footnote]

Kasanoyo a Sungbatan?

◻ Kasano a dagiti immuna a Kristiano naawisda idi damo iti kinapudno nga insuro ni Kristo kadagiti apostol?

◻ Kasano a mainaig ti kinasanto iti indibidual a Kristiano ken iti kongregasion?

◻ Iti ania ti masapul a pakaibatayan ti kinatarnaw?

◻ Aniat’ ramanen ti panangkuenta ti ngina ti kinatarnaw?

◻ Ania dagiti gunggona iti panangsalimetmet iti kinatarnaw?

[Kahon iti panid 26]

Dagiti pribilehio iti Amin-Tiempo a Ministerio

Auxiliary Payunir: Maysa a nabautisaran a ministro a mangbusbos ti kababaan a 60 oras iti panangaskasaba bayat iti makabulan.

Regular Payunir: Maysa a nabautisaran a ministro a mangbusbos iti promedio a 90 oras iti kada bulan iti panangaskasaba.

Espesial a Payunir: Maysa a nabautisaran a ministro a mangbusbos iti agarup 140 oras kada bulan iti ministerio ken umaw-awat iti bassit a binulan nga allowance a maipaay kadagiti kangrunaan a paggastuan. Dagitoy a payunir ti masansan a maidestino kadagiti naiputputong a grupo ken babassit a kongregasion.

Misionero ti Gilead: Maysa a nabautisaran a ministro a nasanay idiay Watchtower Bible School of Gilead a maipaay iti serbisio iti ballasiw-taaw ken mangbusbos met ti kababaan a 140 oras kada bulan iti ministerio.

Dagiti Manangaywan iti Sirkito ken Distrito: Dagiti agdaldaliasat a panglakayen a mangsarungkar kadagiti kongregasion ken sirkito a ti panggepna isut’ panangpabileg kadagiti kakabsat iti ministerioda ken panaggigimongda. Mangbusbosda iti adu nga oras iti tay-ak ti serbisio.

Serbisio iti Bethel: Ar-aramiden dagiti amin-tiempo a ministro iti aniaman kadagiti sanga nga opisina ken pagimprentaan ti Watch Tower Society iti intero a lubong.

[Ladawan iti panid 24]

Ti bautismo luktanna ti dalan . . .

[Ladawan iti panid 25]

. . . nga agturong iti manangsalimetmet-kinatarnaw a ministerio