Magmagnakayo Aya kadagiti Addang ti Manangisalakan?
MAYSA kadagiti kapipintasan a komplimento a maipaayyo iti maysa a tao isut’ panangtuladyo kenkuana. Dagiti annak masansan tuladenda dagiti dadakkelda. Dagiti tin-edyer ti mabalin a tumuladda kadagiti popular a managpabuya, dagiti natataengan tumuladda kadagiti prominente a papangulo iti tay-ak ti negosio ken politika. Ngem kasano kaadu ti mangpadpadas a mangtulad iti naindaklan unay a pangulo ti natauan a historia—ni Jesu-Kristo?
Ti nabiit pay a panagsaludsod nga indaulo ti organisasion a Gallup ti nangipanayag: “Walo iti tunggal 10 nga Americano ti nagkuna a pagregreggetanda met a suroten ti ulidan ni Jesus.” Maysa a “sangapulo ket dua a porsiento laeng ti nagkuna a mangar-aramid iti naindaklan a posible a panagregget.”
Ngem, ania, ti mamagbalin ken ni Jesus nga ad-adda a maikari a suroten ngem kadagiti dadduma a naimpluensia a tattao? Umuna, kas kinuna ti The World Book Encyclopedia, ni Jesu-Kristo “ti nalabit ad-adda a nakaimpluensia ti sangatauan ngem ti uray siasinoman a nagbiag pay laeng.” Ngem saan a kas kadagiti dadduma a naimpluensia a tattao, ni Kristo ti saan a nangidadaulo iti buyot iti tay-ak tapno mangaramid iti inkapilitan a panangkumberte. Isut’ saan a nagpannuray kadagiti nagastos a propaganda kas ar-aramiden dagiti nalalatak a managebanghelio itatta. Ket isu ti di met nangsuportar iti aniaman a napolitikaan a partido. Ti impluensiana ket gapu laeng iti pannakabalin ti mensahena ken iti wagas a panangisaona iti dayta.—Mateo 7:28, 29; Juan 7:46.
Tinignay ni Jesus dagiti tattao a makapagaramid iti dramatiko a panagbalbaliw iti panagbiagda, iti naespirituan ken ti moral. Asino pay a dadduma a naimpluensia a lalaki ti nakagunggona unay iti kasta a kaadu? Kasta met, asino a dadduma pay a natauan a lider ti nailadawan kas “santo, awan basolna, di natulawan, adayo kadagiti managbasol”? (Hebreo 7:26) Ti ngarud ulidan ni Jesus ket naa-anay—saan a kas ti asinoman a dadduma a tao a nagna iti daga!
‘Ngem, kasano, a ti maysa a nakurapay ken imperpekto a tao makasurot iti kasta nga ulidan?’ mabalin nga irason ti dadduma. Ti historiador a ni H. G. Wells iti librona a The Outline of History kunana a manipud iti pangrugian agtukiad dagiti tattao iti isusurot ken Kristo. “Ta ti panamati [ken Kristo] a sisiserioso,” kuna ni Wells, “isut’ iseserrek iti maysa a karkarna ken nakaam-amak a biag, ti panangtallikud kadagiti ug-ugali, ti panangkontrol kadagiti kasigudan a rikrikna, ti [panangpadpadas] iti maysa a di nakapappapati a ragsak.” Nagpatingga ni Wells: “Pagsidsiddaawan pay aya nga agingga iti daytoy nga aldaw daytoy a taga Galilea [ni Kristo] ket dakkel unay nga agpaay iti bassit a puspusotayo.”
Ngem pudno kadi dayta? Ipapanyon, a ti panangsurot a naan-anay ken Kristo ket maysa a banag nga imposible. Nupay kasta kinuna ni apostol Pedro a ni Kristo ‘nangibati kadakayo ti ulidan tapno surotenyo a sisisinged dagiti addangna.’ (1 Pedro 2:21) Kitaenyo, dina kinuna a “naan-anay” no di ket “sisisinged.” Ania a kita ti modelo, ngarud, ti imbati ni Jesus kadatayo? Kasanot’ panangtuladtayo iti dayta?