“Surotenyo a Sisisinged dagiti Addangna”—Kasano?
“NIKAANOMAN daytat’ saanto a perpekto a kas ken Jesus, agpapan pay kasano kaadu ti panagkararagko wenno kasano kapinget ti panangpadasko.” Kadagiti pinagsaludsodan ti U.S. Catholic, 89 porsiento ti immanamong iti dayta a sao. Pudno, ti namnama a magna kadagiti addang ni Kristo ti kasla aglablabes unay—nangnangruna no usigenyo ti ladawan ni Kristo nga iparparang dagiti iglesia. Kuna ti maysa a lalaki a Katoliko: “Ti kaaduanna pampanunotek ni Jesus kas maysa a nabara, naayat, nadungngo, manangpabus-ay a tao a di manginanama unay ti dakkel kaniak. Ngem no makagtengakon idiay simbaan, ni Jesus ti sisasanto unay a madaydayaw ket siak ti mapukawen ken mapagpakumbaba unay gapu kadagiti kinaimperpektok.”
Dagiti rekord ti Ebanghelio, nupay kasta, saanda la a ‘sisasanto a daydayawen’ ni Kristo. Ipakpakitada a ni Jesus ti naipasngay, saan a manipud kadagiti aristokrata, no di ket iti maysa a tumatrabaho a klase ti pamilia. Ti agsioman kenkuana a ni Jose ket maysa nga alluwagi. Numan pay bassit ti naammuan iti panagubing ni Jesus, adda maysa a pasamak a dakkel ti ipanayagna. Idi ni Jesus ti 12 años, dagiti dadakkelna ti nangikuyog kenkuana iti tinawen a panagsarungkar idiay Jerusalem maipaay iti Paskua. Iti daytoy nga okasion isu ti naigamer unay iti maysa a Nainkasuratan a pannakipatpatang, ket pimmanaw ti pamiliana nga isut’ awan. Da Jose ken ni Maria a kaawatan a madanaganen ti nakakita kenkuana tallo nga aldaw kamaudiananna idiay templo, “a situtugaw iti tengnga dagiti mamasirib a dumdumngeg ken agsalsaludsod kadakuada.” Mainayon pay, “amin dagiti nakangngeg kenkuana nasnasdaawda iti saririt ti isipna ken kadagiti sungbatna.” Panunotenyo, iti 12 años laeng isut’ saan laeng a makapagsaludsod kadagiti makasukisok, naipamaysa iti naespirituan a salsaludsod no di ket kasta met nangted kadagiti nasaririt a sungbat. Awan duadua nga isut’ natulongan babaen iti panangsanay dagiti dadakkelna!—Lucas 2:41-50.
No maysakay nga agtutubo, posible aya ti panangsurotyo iti ulidan ni Kristo? Pudno a kasta! Ta ni Kristo a mismo nangibati kadakayo “ti ulidan tapno surotenyo dagiti addangna.”—1 Pedro 2:21.
Ti kinaagtutubo ket maysa a nasayaat a tiempo nga intay pananggun-od kadagiti pamunganayan a pannakaammo iti Dios ken ti Saona. Pudno, mabalin a dagiti dadduma nga am-ammoyo ti mabalin a mangperperdi ti adu a tiempo kadagiti komiks ken TV. Ngem apay a dikay suroten, imbes ketdi, dagiti addang ni Jesus, a kas maysa nga ubing pakaay-ayuan ti panagad-adal maipapan ken ni Jehova? Gapu iti ayatna kadagiti naespirituan a bambanag, “ni Jesus dimmakkel iti kinasirib.” (Lucas 2:52) Kasta met kadakayo.
Kas panangiyilustrar: Iti maysa nga eskuelaan idiay Sud Africa, maysa a mannursuro ti napagsaludsodan no mabalinna a paneknekan no ti Biblia ket pudno. Inaminna a sannna a mabalinan dayta. Maysa nga agtutubo a lalaki a maysa kadagiti Saksi ni Jehova, ti situtured a nagkuna: “Sipipiho a mapaneknekak a ti Biblia ket pudno!” Kasano? Nalagipna ti impormasion a naadalna iti nabiit pay a ruar Ti Pagwanawanan. Gapuna kalpasan ti panangalana ti pammalubos a makapagsao, intultuloyna nga inlawlawag ti kaipapanan ti maysa a padto a nailanad iti kapitulo 2 ti Daniel. Nagsiddaaw ti klase ta impakitana no kasano nga impadto ti Biblia ti panagpangato ken pannakarba dagiti agsasaruno a gobierno ti lubong ken ti naan-anayto a pannakadadaelda babaen iti Pagarian ti Dios. Simmaruno iti nagsayaat a diskusion nga isut’ naaddaan gundaway a simmungbat kadagiti adu a salsaludsod.
Immay a Mangaramid ti Pagayatan ti Dios
Ti pundasion ti pannakaammo ken pannakaawat iti Biblia a naurnong ni Jesus iti kinaagtutubo ti nangtignay kenkuana iti kamaudianan a nangala iti serioso nga addang. Idi nadanon ti tiempona “ni Jesus . . . agingga iti Jordan napan ken Juan, tapno pabautisaran kenkuana.” Dimtengen ti panawen kenkuana nga ibaklayna dagiti responsabilidad a kas ministro ti Dios. Ti bautismo kaipapananna ti panangiparangna iti bagina a mangaramid iti pagayatan ti Dios.—Mateo 3:13-15.
Maikalikagum met kadagiti Kristiano a tuladen ni Kristo babaen ti pannakabautisarda. Ti bautismo ket maysa a sagrado a simbolo, maysa a makinruar a pagilasinan iti dedikasion. No umanamongtayo nga agtrabaho maipaay iti maysa a tao wenno iti maysa a kompania, umuna a siguruentayo dagiti kalikagumanda ken dagiti kondision ken masansan mapasurotan dayta babaen ti panangpirma iti maysa a kontrata. Ngem no awan ti pirma, dayta a kontrata ti awan mamaayna. Kasta met ti bautismo—pagbalinenna nga addaan kaipapanan ti dedikasiontayo iti Dios. Iti kaipapananna, kas ken Jesus kunaentayo: ‘Adtoy! Umayak tapno aramidek, O Dios ti pagayatam.’ (Hebreo 10:7) Iti kasta agbalintayo nga ad-adipen ti Dios, dagiti ministrona!—2 Corinto 3:5, 6.
Siempre, kas ken Jesus, umuna masapul a manggun-odkayo pay ti pamuon iti pannakaammo iti Dios. Ngem dagiti Saksi ni Jehova ti makatulong kadakayo—ken kadagiti annakyo—aramidenyo daytoy babaen iti sistematiko a panagadal iti Biblia.
Panangipangpangruna iti Ministerio
Kalpasan ti pannakabautisarna, simrek ni Jesus iti panagayunar, panagmennamenna, ken kararag. Awan duadua daytoy ti nangisagana kenkuana a maipaay iti pannakasulisog a sumaganad a naipasango kenkuana. Intukon ni Satanas a Diablo kenkuana ti panagturay iti “amin a pagpagarian ti lubong.” Anian a karera ti naadda koma ken ni Jesus no inawatna koma ti intukon ti Diablo! Ni Kristo, nupay kasta, nabigbigna a ti kasta a karera ket apagbiitto laeng. Dagdagus a tinungdayna ti Diablo ket imbes ketdi “rinugian ni Jesus ti nangaskasaba ken nagkuna: ‘Agbabawikayo, ta ti pagarian ti langit asidegen.’” (Mateo 4:2, 8-10, 17) Iti natda pay a paset ti naindagaan a panagbiagna, ni Kristo ti maysa nga amin-tiempo a ministro iti Pagarian ti Dios.
Umasping met itatta, ti maysa a Kristiano dina palubosan ti lubong ni Satanas a mangallukoy kenkuana a pagbalinen dagiti nangangato a pagsuelduan a trabaho ken dagiti karera kas panggepna iti biag. Ta, idi inawis ni Jesus dagiti immuna nga adalanna, “dagus a pinanawanda dagiti iketda ket simmurotda kenkuana.” (Marcos 1:17-21) Ngarud nainsiriban aya ti pannakaigalut iti maysa a sangal dagiti nailubongan nga ar-aramid? Binilin ni Jesus dagiti paspasurotna ita nga ‘ikasaba ti naimbag a damag ti pagarian.’ (Mateo 24:14) Pudno, mabalin nga addaankay ti pamilia wenno dadduma pay a responsabilidad nga aywanan. Gapu itoy adu kadagiti Saksi ni Jehova ti mangus-usar kadagiti rabii ken ngudo ti lawas a mangitungpal kadagiti Nakristianuan a responsabilidad a mangasaba. Dadduma ti makaiyurnos pay a mangaramid iti dayta iti amin a tiempo!
Idiay Sud Africa maysa nga agtutubo a lalaki ti nangiplano a mapan iti maysa nga unibersidad apaman nga agturpos iti eskuelaanda. Nupay kasta, kalpasan ti panangisimbolona ti dedikasionna ken ni Jehova babaen iti bautismo, nariknana ti obligasion a sumrek iti amin-tiempo a ministerio. Ni amana, a saan a Saksi, idi damo ti di immanamong. Ngem kalpasan iti adu a panangisalaysay, immanamong met laeng kamaudiananna iti panagserbi ti anakna idiay sanga nga opisina dagiti Saksi ni Jehova idiay Sud Africa.
Kalpasan ti siam a naragsak a tawtawenna sadiay, isu ti nangasawa ket simrek iti amin-tiempo a panangasaba a kadua ti asawana. Kalpasanna naaddaanda ti maysa nga anak. Nupay kasta, indawatda ken ni Jehova a tulonganna ida a makapagtultuloy kas amin-tiempo a ministro. Nalagipda ti kari ni Jesus a no ti maysa ipangpangrunana ti Pagarian ti Dios, “amin dagitoy dadduma a bambanag [material a kasapulan] mainayondanto kadakayo.” (Mateo 6:33) Daytoy ti pimmudno. “Nagbiagkami a nakaek-ekonomia iti adu a tawtawen,” kuna ti ama, “ngem naikkanmi ti anakmi a babai iti maysa a nasayaat a pagtaengan ken amin dagiti namaterialan a kasapulanna.”
“Naemma ken Napakumbaba iti Puso”
“Umaykayo kaniak, dakayo amin nga agrigrigat ken madagdagsenan,” kuna ni Jesus, “ta paginanaenkayto. Alaenyo ti sangolko kadakayo ket agsursurokayo kaniak, ta siak naemmaak ken napakumbabaak iti panagpuspusok, ket makasarakkayto ti inana a maipaay kadagiti kararuayo. Ta ti sangolko nalaka ken nalag-an ti awitko.”—Mateo 11:28-30.
Idi nga agar-aramid kadagiti datdatlag, kas ti panangparuar kadagiti sairo, saan nga innala ni Jesus ti pammadayaw nga agpaay iti bagina met laeng no di ket sipapanayag nga inaminna a naaramidanna dagita a bambanag “gapu iti espiritu ti Dios.” (Mateo 12:28) Ket numan pay no naallukoyna ti atension dagiti agdengdengngegna iti pamay-an a “pagsidsiddaawanda ti isursurona,” saanna a sinapul ti pannakaidayawna met laeng. (Lucas 4:32) Imbes ketdi, kunaenna: “Ti isursurok saanko a kukua, no di kukua ti nangibaon kaniak.”—Juan 7:16.
Dagiti pudno a Kristiano itatta padpadasenda met nga ipakita ti kasta met la a kinapakumbaba. Kas pangarigan, no mangisursuro kadagiti dadduma, saanda a padpadasen ti mangatrakar iti atension iti bagbagida. Imbes ketdi, nasiglatda a mangted iti pammadayaw ken ni Jehova ken ti organisasionna agpaay iti aniaman nga abilidadda a mangiyallatiw iti mensahe ti Sao ti Dios. “Ania ti adda kenka a dika inawat?” insaludsod ni apostol Pablo—1 Corinto 4:7.
Ti kinapakumbaba ni Jesus ti naipakita met iti kinatulokna a mangsaknap iti rinibo a milias, saan nga iti maysa a karwahe, no di ket babaen iti pannagna kas maysa nga agdaldaliasat a manangasaba. Naminsan isu ken dagiti adalanna nakabambannogda a kasapulanda ti “aginana bassit.” Ngem idi nagparang ti umariwekwek, a mabisin iti naespirituan a pannakaparegta, nalipatan ni Jesus ti bannogna ket “rinugianna a sinursuruan ida kadagiti adu a banag.”—Marcos 6:31-34.
Idiay Lesotho, Africa maysa nga agdaldaliasat a ministro dagiti Saksi ni Jehova (a maaw-awagan manangaywan ti sirkito) ken dua a kakaduana ti nangipakita iti umas-asping nga espiritu iti nabiit pay. Nagnada iti 22 oras a bimmalasiw iti kabambantayan a mangsarungkar iti sumagmamano a naiputputong a padada a Kristiano. Nabannog gapu iti panagdaliasatda, naikeddeng ti manangaywan ti sirkito ti aginana iti sumaganad nga aldaw. Ngem maysa a dakkel nga umariwekwek ti immay a nangablaaw kenkuana ken nagsalsaludsod, uray no isu ti nakabambannog, isu ti bimmangon ket sinursuruanna ida maipapan iti naimbag a damag ti Pagarian. Ti panangabrasada ti makaparegta unay a dagiti nabannog a managdaliasat nariknada a nagunggonaan unay ti bannogda.
Isu ti Tuladenyo!
Pinaregtanatayo ni apostol Pablo a “kitkitaenyo ti Kangrunaan nga Ahente ken Manangtungpal ti pammatitayo, ni Jesus.” (Hebreo 12:2) Daytoy ti maaramidantayo babaen ti kanayon a panangbasbasa kadagiti salaysay ti Ebanghelio ken ti panangmennamenna kadagiti pamay-an a mabalintay a pangtuladan ken ni Kristo. Kas pangarigan, impakita ni Jesus ti kinatured idi imbutaktakna dagiti kinamanaginsisingpet ken panaginlilinteg dagiti narelihiusuan a pangulo, uray pay ammona a napalalo ti pananggurada kenkuana ket kayatda a papatayen. (Mateo 23:1-36; 26:3, 4) Mabalinna ti agtalinaed a nalamiis ken matengngelna ti bagina no isu ti adda iti pannakasuppiat. (1 Pedro 2:23) Iti panangisursurona, impakitana ti pannakaawatna iti natauan a kasasaad ken ti abilidad a mangiyebkas kadagiti nauneg a kinapudno iti simple laeng a sasao.
Ngem ti kangrunaan a sagut ni Jesus isu ti ayatna. “Awan ti addaan dakdakkel nga ayat ngem daytoy, ti mangted ti biagna gapu kadagiti gagayyemna.” (Juan 15:13) Isu pay ti nanginayon iti baro a kaipapanan ti sao nga ayat babaen ti panangibagana kadatayo nga ayatentay dagiti kabusortayo.—Mateo 5:43-48.
Anian a nagtan-ok a modelo ni Jesus para kadatayo! Ti panangtulad kenkuana ket saan a nalaka, ket mabalin a sagpaminsan maitibkoltayo. Ngem ditay koma pulos sumuksuko. (Galacia 6:9) Adda minilmilion a sibaballigi a pagregreggetanda a suroten ni Jesus. Apay, dagiti mismo a nangiyeg iti daytoy a magasin kadakayo ket awan duadua a sumagmano kadakuada ket maragsakanda unay a tumulong met kadakayo a mangsurot kadagiti addang ni Jesus—A SISISINGED!
[Blurb iti panid 5]
Kas maysa nga agtutubo impakita ni Jesus ti nasged nga interesna kadagiti naespirituan a bambanag. Tultuladenyo met aya iti daytoy a pamay-an?
[Blurb iti panid 6]
Linaksid ni Kristo ti nailubongan a karera a maipaay iti ministerio