No Apay Binaybay-akon ti Ipapan Idiay Langit

​—Insalaysay ni Yuriko Eto

KAS maysa a Metodista a Haponesa, kasta unay ti panamatik nga awanen ti nagdakkel a ragsak ngem ti ipapan idiay langit. Maysa a dayaw ti maadda iti sibay ti Dios ken makipagtaeng a kadua ni Apo Jesu-Kristo iti agnanayon. Apay kadi a naaddaanak iti napasnek a panagtarigagay a mapan idiay langit? Ket apay nga insukokon dayta a kapanunotan? Bay-anyo a salaysayek kadakayo ti estoriak.

Ti laeng Shintoismo ken Budhismo ti maipalubos iti pagilianmi a Japan, iti adu a siglo. Naipasngayak idi 1911, 22 a tawen laeng kalpasan a naipalubos ti wayawaya ti relihion. Nagbalin ti pamiliami a Metodista. Ni amak ti adda iti panagtagtagilako a negosio. Ti inak ket anak ti maysa a klero. Ti kinapudnona a mamati unay ti inak iti Biblia ket maysa a bendision kaniak. Malaglagipko pay nangnangruna a ti gayyem ni nanangko, a maysa a maestra iti teolohikal nga eskuelaan dagiti babbai, ti masansan a bumisita kadakami. Isut’ masansan nga agsasao maipapan iti Biblia, ket pagay-ayatko unay ti dumngeg. Iti panagpatingga ti panagpapatang isu ti kanayon nga agkuna: “Saan kadi a nakalkaldaang a ti Biblia ket saan pay a nalukatan ken naawatan?” Kanayon a mangrirriribuk kaniak a yantangay impaisurat ti Dios ti Biblia kadagiti tattao, apay a saanna nga impaawat dayta kadagiti tattao?

Kalpasan ti panaggapuk idiay eskuelaan, awanen ti ad-adda pay a makaay-ayo kaniak ngem ti panagtugaw iti maysa a komportable a pagtugawan nga agbasbasa ti Biblia ken ar-arapaapen ti maipapan ti langit. Ti nangnangruna a nangtignay ti pusok a ta mabalin a ni Kristo ti umay a mangsabat kadakami bayat ti panagbibiagko. Inyasping ni Jesu-Kristo ti bagina kas maysa a nobio ket pinakdaarannatayo a kadagiti sangapulo a birhen lima kadakuada ti nakaturog ket saandanto a masabat ti nobio ket saandanto a makapan idiay langit! Gapuna tunggal aldaw, ikarkararagko ti tiempo inton ni Apo Jesus ket umay a mangayab kadakami, ket nagkararagak a ti maikadua a kaadda ni Kristo ti rebbeng a di liplipatan. Sinalsalimetmetak iti pusok ti kasuratan nga agkunkuna, “Nagasat dagiti nadalus ti pusoda: ta makitadanto ti Dios,” ket siak ti nagur-uray ken nangin-inanama. Kinapudnona, agbibiagak idi kas maysa a di maseknan nga agbambaniaga iti daytoy a lubong.​—Mateo 25:1-12; 5:8, King James Version.

Idi 1933 nakiasawaak, ket gapu ta masansan nga iririingko iti langit iti panagpatpatangmi, ni lakayko ti dati a mangkatkatawa kaniak a kunkunana, “Taga langitka, ngem siak ket taga lubongak.” Nupay kasta, ti ama ni lakayko ti debosionado iti Biblia ket masansan a kunana: “Ngangngani 2,000 a tawenen nanipud iyaay ni Apo Jesus Kristo, gapuna mabalintay a patien a ti maikadua a kaadda ni Kristo ti asidegen.” Ad-adda a ti pusok ti bumara a bumara.

Kalpasanna nangrugi ti Gubat Sangalubongan II, ket iti maudi a tawen ti gubat natay ni lakayko. Iti dayta tiempo napanunotko a no adda ti maysa a nakabutbuteng nga impierno rebbeng nga isu daytoy a lubong. Kalpasan ti gubat, innalak dagiti uppat nga annakko (a ti kaubingan ti pito bulanna laeng) ket immakarkami iti namin-adu a daras, ta ti Tokyo ket kaskasdi pay a nakagulgulo. Diak maibturan ti intero a Domingo a di mapan idiay simbaan, gapuna tunggal umakarkami, mapmapanak iti simbaan a kaasitgan iti balaymi. Diak pagan-ano uray no ania a simbaan dayta, ta ti pammatik ket adda laeng maymaysa a Dios ken maymaysa a Biblia. Kagurgurak ti kapanunotan nga agtalinaed iti maymaysa a relihion.

Ti Panangsapul iti Organisasion ti Dios

Gaput’ pannakakitak kadagiti panagduduma, nagin-inot a mangrugiak nga agpampanunot no kasano ti panangmatmat ti Dios a mismo kadagiti amin a sekta. Nagtengak ti konklusion a ti Dios pagaammona ti nasaysayaat ngem ti asinoman nga addada dagiti errado iti adu a relihion. Iti isu met laeng a pamay-an a mangted iti maysa a maestro iti papel ti eksaminasion iti sursuruanna, impagarupko a ti Dios ti mangted met kadagiti punto iti organisasion a makaawat nga apagpag-isu unay iti Biblia. Mangrugin a mariknak a masapul a birukek ti organisasion nga umiso iti imatang ti Dios. Kalpasanna simmilnag ti Mateo 7:9 iti panunotko. Kunana: “Asino ti tao nga adda kadakayo a no ti anakna dumawatto koma ti tinapay​—isu ikkannanto ti maysa a bato?” Agsipud ta birbirukek ti pudno a “tinapay,” namatiak iti daytoy a kasuratan ket nangrugiak nga agkararag a sipapasnek nga inaldaw-aldaw: “Pangngaasim ta palubosannak a makitimpuyog iti organisasion nga addaan iti umiso a pannakaawat iti Biblia.” Maysa a tawen kalpasan a mangrugiak nga agkararag iti kastoy a pamay-an, immakarak idiay Yokohama. Ditoy metten adda maysa a pannakisarsarita a nangparagsak kaniak.

Tunggal makakitaak kadagiti tattao nga agkuna a mapmapanda idiay simbaan, saludsodak ida nga insigida, “Adda aya am-ammoyo nga asinoman a makaawat a detaliado iti Biblia?” Maysa nga aldaw iti asideg nga ili, nasarakak ti maysa a miembro ti maysa a relihion ket sinaludsodko dayta met laeng a saludsod kenkuana. Uray pay no, agingga iti dayta a tiempo, diak pay immawat iti paborable a sungbat, simmungbat iti makakumbinsir a timek: “Wen. Adda ti kasta a tao. Idi naminsan nga aldaw maysa a misionera ti simmarungkar ditoy. Isu ti pinastrekko iti balay, ket insigida a linuktanna ti Biblia ket nagsasaruno nga inlawlawagna dagiti bambanag. Kunana sakbay a pimmanaw nga isut’ agtataeng idiay tuktok ti maysa a turod a pagtataengak.” Idi ngngngegko dayta, pinanawak ti balayna​—a maragsakan. Iti sumaganad nga aldaw sinarungkarak ti pagtaengan dagiti misionero a Saksi ni Jehova.

Maysa a Panawen ti Krisis

Iti kamaudianan naaddaanak met laengen ti detaliado a panagadal iti Biblia. Agarup makabulan ti napalabas​—ket kalpasanna addan bomba! Ti maestrak a misionera, a ni Jean Hyde (Nisbet itan), ti immisem ket kinunana: “Iti masanguanan nalabit agbiagkanto saan nga idiay langit no di ket ditoy daga.” Nakellaatak pay agsipud ta kasla siak ti naiduron manipud langit. Pudno a makapungtotak. “Damdamok pay ti makasarak iti maysa a misionero nga agsasao a sipapangas a kas kenka,” ti sisasakit nga insaok kenkuana. “Nakababain nga agpapan pay iti gagarko a pasursuruan iti Biblia kenka, dayta a rikna itan napukawen. Nupay kasta, agsipud ta sapsapulek ti pudno nga organisasion itatta, ken nagsuskribirak Ti Pagwanawanan ken addaanak met ti libro a ‘Mapapati Coma ti Dios,’ mangaramid iti naannad a panagsukimat a sisiak. Inton mapatalgedak a daytoy ti kinapudno, agkurnoakto kenka ket agsubliakto manen a dumawat ti tulongmo.”

Ni Jean di nagpungtot. Immisem ket kinunana, “Pangngaasim ta sukimatem ti kinapudno.” Iti dayta, isun ti pimmanaw, ngem isut’ siaayat a dumagas sagpaminsan ket isaludsodna, “Ar-aramidem met laeng ti panagsuksukimatmo?” Ninamnamak idi a daytoy nga organisasion isut’ sungbat ti Dios kadagiti karkararagko, ngem itan dagiti riknak iti naan-anay a mariribukan. Diak pay pulos nakangkangngeg idi ti panaggiddiat iti nagbaetan dagiti mapanto idiay langit ken dagidiay agbiagto nga agnanayon ditoy daga.

Kalpasan dayta, sipapasnek a sinukimatko nga inaldaw dagiti publikasion ti Watch Tower. Kalpasan ti sumagmamano a panawen ti agdaldaliasat a manangaywan dagiti Saksi ni Jehova, ni Adrian Thompson, ti simmarungkar kaniak. Dagdagus nga insaludsodko, buyogen iti bassit nga iyaalsa: “Uray pay no iti masanguanan ket addadanto dua a grupo, maysa a nailangitan ken maysa a naindagaan, saanto met laeng aya a ti Dios ti mangikeddeng? Maysa a kinatangsit para kadagiti tattao a mangikeddeng, saan kadi?” Simmungbat: “Apagpag-isu! Daydiay mangikeddeng isu ti Dios.” Uray pay diak matartarusan dagiti detalye, limmag-an bassit ti riknak. ‘Gapuna,’ napanunotko, ‘dagiti namnamak a mapan idiay langit ket saan pay met laeng a naikkat.’ Kalpasan dayta, nagkararagak ket intultuloyko ti panagad-adal a bukodko.

Idi 1954 timmabunoak iti Memorial iti ipapatay ni Kristo. Ni Lloyd Barry ti nagpalawag. Iti palawagna kunana a dagidiay adda iti “pannakitulag” ket isuda dagidiay makiraman iti tinapay ken ti arak. Kalpasan ti Memorial gapu ta nagadu ti saludsodko, nagnagnaak a nagawid a kadua ni Shizue Seki, maysa a naregta a Saksi. Nangipakita iti dakkel a pannakaseknan ket inwayaanna ti panawen a mangparegta kaniak a saan a sumuksuko gapu laeng ta addaanak ti parikut iti maysa a punto, no di ket siguraduen no amin dagiti dadduma a pannursuro ket naibatayda iti Biblia wenno saan.

Maysa nga aldaw, kalpasan a nakasibeten dagiti ubbing a napan idiay eskuelaan, agdaldalusak kas maysa a panagsagana para kadagiti sangaili, ket nagkararagak a siuulimek, ‘Makipagadalak manen kadagiti Saksi ni Jehova.’ Idi inmulagatko dagiti matak, nakellaatak pay a makakita, saan a kadagiti sangaili nga ur-urayek, no di ket tallo a Saksi ni Jehova a Haponesa. Nagsiddaaw, imbagak kadakuada a kalkalpasko laeng a nagkararag. Ni Fumiko Seki siraragsak a limmagto, agsipatsipat dagiti imana a kunkunana, “Naimbag! Naimbag!” Di nagbayag sabali manen a misionera, ni Sonny Dearn, a kaduana ni Fumiko a mangipatarus, ti nangirugi iti maysa a naragsak a panagadal. Iti daytoy a tiempo dua kadagiti annakko ti nakikaduan kaniak iti panagadal. Nupay kasta, nagbaliw ti nakaitudingan ni Sonny. Kalpasanna ni Leon Pettitt, sabali pay kadagiti ganggannaet, ti immay. Masansan nga ub-uborenmi kadagiti salsaludsod. Sikakalma nga impakitana kadakami dagiti kasuratan tapno makagtengkami iti umiso a konklusion ket rumang-ay iti Nainkasuratan a pannakaammo.

Panangadal ti Panggep ti Ipapan Idiay Langit

Maisupadi kadagiti personal a tartarigagayko, naadalko nga adda ti panggep ti ipapan idiay langit a nangnangruna ngem iti simple laeng a panagar-arapaap a kaasibay ti nadayag a Dios ken agbiag a kadua ni Apo Jesus iti agnanayon. Bayat a maam-ammuakon dagiti dadduma a kinapudno, sisasaganan ti pusok a mangawat kadakuada.

Umuna, no daydi immuna a tao a ni Adan ket di koma nagbasol awan koma ti pannakasapul ti uray asinoman iti sangatauan a mapan idiay langit. Daytoy ket gapu ta sakbay a naparsua ti lubong, addan rinibribo a ribo nga anghel idiay langit.​—Job 38:4-7; Daniel 7:9, 10.

Bayat ti irarang-ay ti panagadal, naadalko manipud Lucas 12:32 a maysa a bassit laeng a grupo nga aw-awagan ti Biblia a “bassit nga ipastoran” ti mapan idiay langit. Kuna ni Jesus: “Dikay agbuteng, bassit nga ipastoran, ta nagayatan ni Amayo nga ited kadakayo ti pagarian.” No maipapan iti panggep, saan kadi a naisurat idiay Apocalipsis 20:6 nga “isudanto . . . ket makipagaridanto kenkuana [ni Kristo] bayat ti sangaribo a tawen”? Ket idiay Apocalipsis 5:10 “agarida iti rabaw ti daga”?

Naadalko met ti kaipapanan ti Kararag ti Apo. Nagkararag ni Jesus: “Umay koma ti pagariam. Maaramid koma ti pagayatam ditoy daga, kas met sadi langit.” (Mateo 6:10, KJ) Idi naawatak a daytoy ket tuktukoyenna a ti nailangitan a gobierno ti Pagarian ket buklen dagiti tattao a naala manipud iti daga a makipagturay ken Ari a Jesu-Kristo, nagsiddaawak ti kinasirib ti Dios. Kumbinsidoak a daytoy ti mismo a banag a kasapulantayo, maysa a naisangsangayan, baro a gobierno a mangwayawaya kadagiti tattao manipud panagsagsagaba, ladingit, ken rigrigat nga inyeg ni Satanas. Diak mamedmedan ti pammadayawko ken ni Jehova.

Mainayon pay, idi naammuak a ti bilang dagiti mapan idiay langit ket nakedngan iti 144,000, diak a mamedmedan no di ket umanamong ti kinanainkalintegan daytoy. (Apocalipsis 14:1, 3) Iti dayta met laeng a pamay-an, uray ti bilang dagiti opisiales iti maysa a gobierno ditoy daga ket nakedngan met. Inapresiarko met nga addada dagiti sumagmamano a nasken nga annongen para kadagidiay mapan idiay langit. Ti trabahoda iti las-ud ti naayat nga urnos ti Dios ket ramanenna ti panamagbalin amin kadagiti agbibiag ditoy daga a naragsak ken isublinto daytoy a daga iti naparaisuan a kasasaadna.

Nalapunosak iti panangapresiar a gapu itoy siraragsak a pinanawakon dagiti kapanunotan a mapan idiay langit. Itan napunnoakon iti namnama nga agbiag iti maysa a paraiso a daga. Awan duadua, ti Dios ti nangilukat ti kaipapanan ti Biblia babaen iti organisasionna. Siak ti nagsapsapulen iti kinapudno. Mapilitanak nga agyaman iti Dios ta tinulongannak a maitimpuyog iti organisasion nga inanamonganna.

Nabunga, Naragsak a Ministerio

Nabautisaranak idi Oktubre 1954. Manipud 1955, dua kadagiti annakko ti makiramramanen iti amin-tiempo iti trabaho a panangiwaragawag iti Pagarian a kaduak. Ti anakko a ni Keijiro ti agserserbin kas maysa nga agdaldaliasat a manangaywan iti pito a tawenen. Itan isu ti nabendisionan kadagiti dua nga annak, ket isu ken ni baketna agtartrabahoda a sireregta kas amin-tiempo a manangaskasaba (payunirs). Kas espesial payunir, nakiramanak iti panangipasdek kadagiti kongregasion dagiti Saksi ni Jehova kadagiti innem a siudad.a Iti nabiit pay naaddaanak iti ragsak a nangaskasaba iti sumagmamano a tawenen a kadua ti inaunaan nga anakko a babai, ni Hiroko, idiay Isla ti Hachijō, a dayta ti 185 milias (300 km) iti tengnga ti Baybay Pacifico manipud Tokyo.

Yantangay kontentoakon iti namnama iti maysa a nakaskasdaaw a masanguanan ditoy daga, ti panangmatmatko iti daytoy a daga ti dakkel nagbalbaliwanna. Idiay isla ti Hachijō nangnangruna, nalikmutkami kadagiti naisalsalumina a sabsabong ket bayat ti inkami panagbalaybalay, dagita ti daydayawenmi unay no makipatpatangkami kadagiti bumalay kadagiti napipintas a minuyonganda. Maysa nga aldaw adda nasarakanmi a maysa a baket a mangtartaripato kadagiti sabsabongna. Pinadayawanmi ida, ngem silaladingit a kinunana: “Saanak a mabuteng a matay, ngem ti makariribuk kaniak a ta siakto ti maisina kadagitoy a sabsabong inton mapanak iti sabali a lubong.” Inlawlawagko nga iti sidong ti panagturay ti Pagarian ti Dios isunto ti mapagungar ken patay iti maysa a paraiso a daga a sadiay dagiti sabsabong tagiragsakennanto iti agnanayon. Rimmaniag dagiti matmatana, ket maysa a panagadal ti Biblia ti naiyurnos.

Naallukoyak met iti kinasimple laeng dagiti tattao iti dayta a puro. Isuda ti nangnangruna a nakadaydayaw maipapan iti pammadayawda kadagiti inapoda. No adda ti matay, tunggal maysa iti dayta a purok ti inkapilitan a tumabuno iti pompon. Ti laeng tarigagayko a ta amin koma dagiti tattao ket maammuanda ni Jehova, ti Ama ti biag, ket maawatanda koma nga isu ti Dios nga isunto ti mamagbiag manen kadagiti inapoda inton ti daga ket maisubli kas maysa a paraiso. Kayatko a maammuanda nga adda ti nasken a pagdumaan ti panagraem, ken panagdayaw kadagiti inapotayo. Rebbengna a daydayawentay laeng ti maymaysa nga Ama ti biag, ni Jehova. Kas kinuna ni Jesus: “Ngem ti oras umay, ket adda itan, a dagiti pudno nga agdaydayaw agdaydayawdanto iti Ama iti espiritu ken iti kinapudno, ta ni Ama sapulenna dagiti kakasta nga agdaydayaw kenkuana. Ti Dios maysa nga espiritu, ket dagiti agdaydayaw kenkuana masapul nga agdaydayawda iti espiritu ken kinapudno.”​—Juan 4:23, 24.

Itan iti maikapito a nakaidestinoakon a teritoria, agyamyamanak ken ni Jehova bayat nga agtultuloyak a mangibagbaga kadagiti tattao maipapan iti panggep ti nailangitan a gobierno ti Pagarian ni Jehova ken dagiti nakaskasdaaw a bendision nga iyegto dayta kadatayo nga addaan iti nakaskasdaaw a pribilehio nga agbiag nga agnanayon ditoy daga.​—2 Pedro 3:13; Apocalipsis 21:3, 4.

[Dagiti Footnote]

[Ladawan iti panid 12]

Ni Yuriko Eto a makipagad-adal kadagiti dadduma maipapan iti kari ti Biblia iti maysa a naindagaan a paraiso