“Tarigagayanmi a Dayta Koma ti Mabasa ti Tunggal Maysa Ditoy Daga!”
DAYTA ti insurat ti maysa a lalaki iti panangiyebkasnat’ panangipategna iti libro a Life—How Did It Get Here? By Evolution or by Creation? Isarsarming ti suratna ti rikrikna dagiti minilmilion a tattao a nakakita iti daytoy 256-panid a nailadawan a libro a nakapatpateg ti panangsungbatna kadagiti salsaludsod maipapan iti namunganayan ken panggep ti biag ditoy daga.
Nairuar dayta idi napan a tawen kadagiti kumbension dagiti Saksi ni Jehova iti nadumaduma a dagdaga, ti libro ti naiwarasen iti minilion a kopia ken iti adu a pagsasao. Daytat’ nakatulongen kadagiti tattao a makakita manipud kadagiti sientipiko ken Biblikal a pammaneknek a pudno nga adda ti maysa a Namarsua a nangaramid kadatayo ken isut’ addaan kadagiti nakaskasdaaw a panggep maipapan iti sangatauan.
“Naglaka a Maawatan”
Ti libro ket naisurat iti pamay-an a naglaka a maawatan. Kas kinuna ti maysa a surat: “Masapul nga ibagak kadakayo no kasanot’ panagsiddaawko iti pagbasaanyo. Asino, nga addaan iti natimbeng a panagpampanunot, ti makapagtukiad kadagiti awan biddutna a lohikayo? Nabalinanyo nga inaramid daytoy nakaun-uneg a tema a nakapimpintas a naglaka a maawatan—maysa a nakaskasdaaw nga aramid no pampanunoten ti naglaingan a panagsukimat a naikabil iti daytoy a libro.”
Umas-asping met, maysa a dati nga ebolusionista nga addaan pannakaammo iti siensia ti nagkuna: “Nakellaatak pay iti kinalawag ken ti bileg daytoy baro a libro. Ti kunak ket dayta ti kasasayaatan a libro ti siensia a nabasak pay laeng nga isut’ mangpabileg ti panangipateg iti biag. Dayta ti sientipiko a nakasirsirib, kaskasdi iti patas a mabalin nga apresiaren ti uray asinoman.”
Sabali pay ti nagkuna: “Ti intero a libro ket maysa nga obra maestra. Ti linaonna nga arte ken dagiti naimaldit a sasao nagkuyogda iti kasta unay a makaallukoy a pamay-an nga uray pay dagidiay bumdeng manipud iti kastoy a kita ti material ket agsiddaawda iti estilona a nakasimsimple ken nakaab-ababa. Ti nadayaw ken awan pananginsultona a panangiwayatna kadagiti kinapudno ti mangted iti mangnibinibi a pammaneknek a mangsungbat a silalawag ti saludsod nga adda iti paulo ti libro.”
Dagiti Ilustrasion Tumulongda a Mangdanon iti Puso
Maipapan kadagiti napnuan kolor a ladladawan, nagsurat ti maysa a tao: “Kasano ti inkam pannakapagyaman unay kadakayo gapu itoy nagpintas unay a libro? Dagiti ilustrasion isuda dagiti nagpipintas a sagut ti arte.”
Ngem dagiti sumagmamano gasut nga ilustrasion, agraman dagiti retrato, ket saanda laeng a napipintas nga arte. Mangisuroda, mangpabileg kadagiti punto iti teksto. Kas insurat ti maysa a pamilia: “Dagiti ilustrasion ken ti kinasimple ti libro ket nagdakkel a katulongan kadatayo a makasarak a nagrigat a makaawat iti tay-ak a sientipiko.” Ti sabali pay a surat ti nagkomento: “Dagiti ilustrasion ken dagiti panagadaw iti margin ti makatulong unay iti panangipaganetget iti punto ken iti pananglagip.”
Dagiti rikrikna ti nangnangruna nga apektado iti kapitulo 19, “Maysa a Naindagaan a Paraiso Dandanin Umay.” Kadagiti ilustrasion iti dayta a kapitulo, maysa a pamilia idiay Australia ti nagsurat: “Makaaramidda ti nauneg a panangsagid kadagiti tattao. Pinadpadasmi nga inladawan ti bagbagimi kas maysa a pamilia nga adda sadiay Paraiso. Pudno unay a ti Paraiso ken ti panagserbi nga agnanayon ken ni Jehova ti maikari iti aniaman a panagregget. Dagiti ilustrasion nangyegda kadagiti lulua iti matmatami.”
Sabali pay ti nagsurat: “Dayta pay laeng ti kapipintasan a pagbasaan a nakitak pay laeng nga impablaak dagiti Saksi ni Jehova. Idi a nakagtengakon iti panid 243 ket nakitak ti ladawan ti maysa a balasitang ken dagiti tigre, daytat’ nangyeg kadagiti lulua.” Kaskasdi sabali pay ti nagkuna: “Makasangitak pay idi nga uk-ukagek dayta. Nagsangitak gapu iti ragsak.” Ket ti maysa pay, a manipud Canada, ti nangisalaysay: “Dagiti lublubid ti pusok nagguyodda manen nga ad-adda ngem idi ket dagiti matak ti napunno kadagiti lulua ti ragsak.”
Awan duadua addada tattao nga ammoyo a magunggonaan a maaddaan iti kopia iti libro a Creation. Apay a dikay patulodan ida iti maysa a kopia a regalo? Kitaenyo ti impormasion iti sumaganad a panid agpaay kadagiti detalye.