Report dagiti Manangiwaragawag ti Pagarian
Ti Bendision ti Dios Makitkita Idiay Venezuela
TI ARAMID dagiti Saksi ni Jehova idiay Venezuela ti pudpudno a nabendisionan. (Salmo 3:8) Bayat ti 1985 ti bilang dagiti agibumbunannag rimmang-ay iti 16 porsiento nga ad-adu ngem iti napalabas a tawen ket idi Pebrero 1986 dimmanon ti kangatuan a bilang iti 31,247 a manangiwaragawag ti naimbag a damag. Dagiti regular payunir ti ngimmato iti 2,291 idi Pebrero, ti maika-38 nga agsasaruno a kangatuan a bilang! Ti dagupna a 50,659 a panangiyadal iti Biblia ti maidadaulo met kadagiti interesado a tattao. Dadduma kadagitoy nga indibidual ti naiyam-ammo iti kinapudno babaen kadagiti karkarna a kasasaad.
◻ Maysa nga agtutubo a kasado a lalaki ti addaan pakadamdamagan kas maysa a managkamat ti babbai. Saan a nasayaat dagiti bambanag nga agpaay kenkuana. Mariknana a ni baketna ti napan iti maysa a mangkukulam ket isu ti impailunodna gapu kadagiti pannakikamkamalalana. Isu daytoy a lalaki nagbiruk met ti maysa a mangkukulam tapno masumbra ti pannakailunodna ket isu ti naiturong iti maysa a babai. Daytoy a babai, nupay kasta, ti nakipagadalen iti Biblia kadagiti Saksi ni Jehova ket insardengnan ti panangkukulamna. Kinuna ti babai kenkuana nga isut’ saannan a matulongan, ngem mabalinna nga ikkan ti maysa a direksion no sadinot’ papananna ket makagun-od iti tulong. Isut’ direksion ti Kingdom Hall. Isut’ nagparang—a nagatiddog ti buokna, atiddog ti barbasna, ken nakaduldolpet ti panagkawkawesna. Tinagiragsakna ti gimong ta isu ti nagsubli manen iti ngudo dayta a lawas, agraman dagiti tallo a babassit nga annakna. Itan napukisanen ti buokna, nasayaaten ti panagkawkawesna ken nagibarbas metten. Itatta, isut’ maysan nga agibumbunannag ti naimbag a damag. Maragsakan kadi ni baketna agsipud ta insardengnan ti agkamkamat kadagiti dadduma a babbai? Saan, imbes ketdi isu ti bimmusor unay! Ngem dagiti panagbalbaliw nga inaramidna iti panagbiagna ti nangkellaat unay kadagiti adu nga am-ammona, nga isu ti nangilukat iti dalan nga agpaay kadakuada a makangngeg met iti mensahe iti kinapudno.
◻ Iti maysa nga ili a dumna iti beddeng ti Colombia, rinugian ti lokal a padi ti kampania a maibusor kadagiti Saksi. Inkabilna ti nagan a “Saksi ni Jehova“ iti dadakkel letra a nalabaga idiay information board ti simbaanda ket iti baba dayta ti sumagmamano a dakes a propaganda a maibusor kadakuada. Nakita ti maysa a miembro ti iglesia a naiparang a sibabatad ti nagan ket, uray no dinan binasa ti impormasion a simmaruno, immay iti konklusion nga inanamongan ti simbaan dagiti Saksi ni Jehova. Gapuna daytoy a babai napan iti maysa a gimong dagiti Saksi ket nagustuanna ti nakita ken nangngeganna. “Kinapudnona,” kuna ti report, “ti kampania ti padi ti namataud iti dakkel nga interes imbes nga iti kasunganina.” Adu itan dagiti mayat a makipagadal ket umasidegda payen kadagiti Saksi iti lanlansangan ket dawatenda no kaanonto manen ti panangsarungkarda kadakuada.
◻ Ti maysa nga ababa a palawag iti panamonpon idiay pakaitaneman iti kababautisar a kabsat a babai ti nakaiyam-ammuan ti sabali manen a pamilia idiay Venezuela iti kinapudno. Maysa a major iti armada ken ti pamiliana, dagiti kabagian ti natay, ti nagimdeng a naimbag iti Nainkasuratan a panangiparang ket kalpasanna inawisda ti nagpalawag idiay pagtaenganna tapno sukimaten ti dakdakkel a detalye dagiti teksto iti Biblia a nadakamat. Ti resulta? Simmungbat ti major:
“Siak ken ni baketko nagusiosokami ket tinarigagayanmi ti agusisa iti Biblia. Idi damo ti tarigagayko isu ti panangidemostra a nainkalintegan ti panangan-annurotko iti relihion a Katoliko. Nupay kasta, tunggal sungbatak ti maysa a punto, ti kabsat a mangiyad-adal kaniak ti agsubli nga addaan kadagiti nainkalintegan a panangmatmat iti Biblia. Sipapakumbaba, nabigbigko a ti kinapudno ket adda kadagiti Saksi ni Jehova. Itatta, siak ken ni baketko ket Saksi ni Jehova kamin, ket dagiti annakko ti agad-adalda metten iti Biblia. Agyamanak unay iti maymaysa a pudno a Dios, ni Jehova, a pagragsakak a pagserbian kas maysa a soldado, saanen a kadagiti nainlasagan nga ig-igam iti gubat no di ket dagidiay nga ipapaay ti espiritu ti Dios, sigun iti 2 Corinto 10:4, 5.”
Wen, binendisionan a sibabaknang ni Jehova dagiti ad-adipenna idiay Venezuela. Babaen iti naisangsangayan a timmabuno iti Memorial nga uppat a daras iti bilang dagiti agibumbunannag, adda pay ti dakkel a panginanamaan iti dakdakkel a panagrang-ay kadagiti tawen nga umay.
[Tsart iti panid 21]
Ti sumagmamano kadagiti kangatuan a bilang ti Venezuela a naibatay iti Pebrero 1986 a report:
31,247 nga agibumbunannag
2,291 a payunir
50,659 a panangyadal ti Biblia
“Ti bendisionmo maisaad koma iti ilim.”—Salmo 3:8