Dagiti Saludsod Manipud Kadagiti Managbasa

◼ Aniat’ kaipapanan ti 2 Samuel 18:8, a kunana: “Ti bakir nangpukaw kadagiti ad-adu a tattao iti daydi nga aldaw ngem ti pinukaw ti kampilan”?

Ti nataer nga anak ni Ari David a ni Absalom inagawna ti trono ket pinilitna ni amana nga agtalaw manipud Jerusalem. Kalpasan dayta, idiay bakir ti Efraim (nalabit daya iti Karayan Jordan) napasamak ti panagdangadang dagiti buybuyot ni Absalom ken kadagidiay nasungdo iti ari a pinulotan ni Jehova, ni David. Ti salaysay idiay 2 Samuel 18:6, 7 ipadamagna a ti nabara a panaggubat nakapapatay dagiti buybuyot ni David iti 20,000 a rebelde. Iti pasetna, innayon ti sumaganad a 2Sm 18:8 bersikulo: “Ket ti bakir nangpukaw kadagiti ad-adu a tattao iti daydi nga aldaw ngem ti pinukaw ti kampilan.”

Isingasing ti dadduma a daytoy tuktukoyenna ti panangalun-on dagiti naatap nga an-animal kadagiti rebelde a buybuyot a nagtataeng kadagiti kabakiran. (1 Samuel 17:36; 2 Ar-ari 2:24) Ngem ti kasta a literal a panangkaan dagiti animal ket saan a nga isu ti mabalin a kaipapananna, a kas met ti literal a “kampilan” dina kinnan dagidiay napapatay iti gubat. Iti aktualmente ti gubat “naisaknap iti rabaw iti isuamin a daga a makita.” Gapuna ti ad-adda a panangilawlawag iti dayta a ta dagiti naraut a buybuyot ni Absalom, a nagtataray gapu iti buteng kadagiti nabato a kabakbakiran, nalabit natnagda kadagiti abut ken dagiti nailemmeng a rangrangkis, ket isuda ti naibalbalud kadagiti napuskol a kamulmulaan. Makapainteres, intuloy a salaysayen ti pannalaysay a ni Absalom a mismo nagbalin a biktima ti bakir. Nalabit gapu iti napuskol a buokna, ti ulona ti naisalat iti maysa a dakkel a kayo, nga isu ti nakaisaranganna iti makapapatay a panangraut ni Joab ken ti buybuyotna. Ti bangkay ni Absalom ti ‘impurruakda iti dakkel a bito idiay bakir, ket namatakderda iti rabawna ti maysa a dakkel unay a gabsuon dagiti batbato.’​—2 Samuel 18:9-17.