Ti Baro a Kadakkel ti Nadiosan a Kinasirib
KET ti Dios kinunana ken Moises: ‘SIAK AGBALINAKTO KAS TI PAGBALINAKTO.’ Ket innayonna: ‘Kastoy ti sawemto kadagiti annak ti Israel, “NI SIAK AGBALINAKTO ti nangibaon kaniak kadakayo.”’” (Exodo 3:14) Inlawlawag ni Jehova ken ni Moises a sakbay daytoy uray dagiti ad-adipenna dida naawatan ti naan-anay a kaipapanan ti naganna. Isut’ Dios ti panggep ket kanayon a tungtungpalenna ti pagayatanna. No kasapulan dagiti kasasaad, mabalinna a baliwan ti pamay-an a pananggun-odna iti panggepna. Isut’ kasta ti kasiribna!
Ni Satanas a mismo dina inapresiar ti ipaspasimudaag ti nagan ti Dios. Nalabit ammona ti kayo ti biag idiay minuyongan ti Eden. No naiturongna da Adan ken Eva iti dayta, daytat’ kasla mangikabil ken ni Jehova iti pagduaduaan a pagpilian: mabalin a panangsalimetmet iti saona a ti basol kaipapananna ti ipapatayda wenno ti panangsalimetmet iti saona maipapan iti kayo ti biag. (Genesis 2:9; 3:1-6) Iti aniaman a kasasaad, mainanama ni Satanas ti pannakapaayna.
Ita rinugian ti Dios nga idemostra ti maysa a kinasirib a di ninamnama dagiti espiritu nga annakna ken di naipampanayag sakbayna kadakuada. (Idiligyo iti Efeso 3:10.) Rinugianna ti mangipaay iti agsasaruno a panagsao ken paspasamak nga iti naunday a tiempo nakaskasdaaw nga idemostrana ti naindaklan a kinasiribna ken abilidadna a mangitungpal iti awan inggana a panggepna, nga isunto ti mangpunno iti daga kadagiti naragsak, nasungdo a tattao nga agbiag nga agnanayon iti Paraiso. (Genesis 1:27, 28) Masansan tungdayen ti Dios dagiti panagregget ni Satanas a mangsinga.
Ti Nasantuan a Palimed Maipanayag
Kalpasan la unay ti umuna nga iyaalsa, nagtignay ti Dios. Dagus a nangangay iti korte nga agpaay iti sibabasol a pagassawaan ket intantandudona ti dusa nga ipapatay gaput’ panagsukir. Ket ania met ngay ti maipapan iti pannangan da Adan ken ni Eva manipud iti kayo ti biag? “Ket ni Jehova a Dios kinunana: ‘Adtoy ti lalaki nagbalin a kas maysa kadatayo nga ammona ti naimbag ken dakes, ket ita di laket ta igaw-atna ti imana ken mangala iti kayo ti biag ken mangan ken agbiag iti panawen a di nakedngan,—’ Iti kasta ni Jehova a Dios pinaruarna iti minuyongan ti Eden.”—Genesis 3:17-23.
Ket iti daytoy innala met ti Dios ti akem ti Managebanghelio, wenno Manangiwaragawag ti naimbag a damag. Inyebkasna ti immuna a padto: “Ket ni Jehova a Dios kinunana iti uleg: . . . ‘Siak pagginnuraenkayto iti babai ken ti kaputotam ken ti kaputotanna. Daytoy sugatennanto ta ulom ket sika sugatemto ti mukodna.’” (Genesis 3:14, 15) Adu a siglo iti kamaudiananna inlawlawag ni apostol Pablo: “Ta ti [natauan] a sangaparsuaan pinaiturayan iti kinaubbaw, saan nga iti nakemna no di gapu iti daydi nangituray kenkuana, a siinanama.”—Roma 8:20.
Wen, manipud iti dayta ti tao awantot’ gawgawayna a naibalud ken patay a natawid ken Adan, ngem iwarwaragawag ti Dios ti panggepna a mangalaw kadagiti natulnog nga annak ni Adan. Kaskasdi, anian ‘ti panginanamaan’? Kasanona nga alawen dagiti tattao ken kaskasdi itandudo ti dusa nga ipapatay gapu iti basol? Daytoy ti nailinged a kinasirib ti Dios; ramanenna “ti nasantuan a palimed a nailemmeng manipud iti napalabas s sistema dagiti bambanag ken manipud kadagiti napalabas a kaputotan.” (Colosas 1:26; 1 Corinto 2:7, 8) Nupay dagiti matalek idi ugma ket dida naawatan ti palimed, naaddaanda ti namnama nga uray pay kasta ti Dios ti mangalaw kadakuada. Ta, uray pay dagiti anghel ket magagaranda nga umammo no kasano a tungpalen ni Jehova ti panggepna! (1 Pedro 1:10-12) Matarusanyo aya daytoy nasantuan a palimed?
Nagatang Babaen iti Subbot
Nagin-inot iti panaglabas dagiti adu a siglo, ninaynayonan ni Jehova ti impormasion iti orihinal a karina. Ken matalek nga Abraham nagkari iti maysa a bin-i a paggapuanto ti bendision nga agpaay kadagiti amin a natulnog a tattao. (Genesis 22:15-18) Babaen ken ni Jacob impanayagna a ti bin-i ket agbalinto nga ari manipud tribo ni Juda. (Genesis 49:10) Iti daytoy a panawen dagiti nadiosan a tattao namatidan iti panagungar dagiti natay, nupay dida pay naawatan a naan-anay no kasanonto ti panagbalin daytoy. (Job 14:14, 15; Hebreo 11:19) Iti kamaudiananna, inkari ti Dios ken ni David a ti umay nga Ari, wenno Mesias, ket maysanto a kapuonan ni David ket agturayto iti panawen a di nakedngan.—2 Samuel 7:16.
Amin dagiti mammadto ninayonanda ti saggabassit a pannakaawat ti nasantuan a palimed, ngem dagiti tattao saanda a makita ti naan-anay a ladawanna. Idi agangay, dimteng met laengen ti panawen a panagparang ti Mesias, iti kamaudiananna, daytoy naindaklan a nadumaduma a kinasirib ti Dios ti nagbalin met laengen a nalawlawag. Daytat’ naisentro ken Jesu-Kristo ken ti pannakaisagana ti perpekto a natauan a biagna kas katupag a subbot nga agpaay iti sangatauan. Babaen iti dayta kas pakaibatayan, ti dadduma iti nadayag a panggep ni Jehova babaen iti Pagarian ti agtultuloy. Maaw-awatanyo aya ti subbot?
Idiay Roma kapitulo 5 ken 6, nangted ni Pablo ti nagsayaat a panangilawlawag iti dayta. Idiay Roma 5:12 inlawlawagna ti natawidtay a basol ken ti ipapatay. Intuloyna nga impakita no kasano a ti epekto a ti maysa laeng a panagbasol ni perpekto nga Adan ken ti pannakapukaw ti biag dagiti kaputotanna ket mabalin a mabalanse babaen iti sabali met laeng a perpekto a natauan a biag. Napaneknekan dayta kas ti biag ti “tao ni Jesu-Kristo.” (Bersikulo 15-21; kitaenyo met ti 1 Timoteo 2:5, 6.) Kasano a naipaay ni Jesus daytoy a subbot? Agsipud ta isu ti Anak ti Dios, ni Jesus ket “santo, awan basolna, di natulawan, adayo kadagiti managbasol.” (Hebreo 7:26; Lucas 1:32, 33) Di kasapulan a padpadasentay nga ilawlawag dagiti detalye ti maipapan kadagiti genetics ti pannakaiyanak ni Jesus. Impasiguro ni anghel Gabriel ken ina ni Jesus, ni Maria, ken kadatayo, nga awan ti imposible iti Dios. (Lucas 1:37) Gapuna ni Jesus, nupay naiyanak iti maysa a babai a kapuonan ni Adan, ket isut’ Anak ti Dios—kinaagpaysona maysa a perpekto a tao. Ti darana, wenno biagna, ket dakdakkel nga adayo ti pategna ngem ti dara dagiti di mabilbilangen nga an-animal nga indatdatonen dagiti papadi nga Aaroniko iti Israel idiay templo ti Jerusalem. Isu “ti Kordero ti Dios a mangikkat ti basol ti lubong.”—Juan 1:29; 3:16.
Maaramidan kadi ti Dios daytoy nga urnos babaen ken Jesus ket kaskasdi a nainkalintegan? No pinagungar ti Dios ti Anakna iti biag iti maikatlo nga aldaw, aniat’ mapasamak iti subbot? Ipasiguro ni Pablo kadatayo a ti Dios ket nalinteg. Surotenyo ti panagrasonna: “Ngem babaen iti asina maibilangda a nalinteg nga awan baybayadna [ta dayta ti libre], babaen ti panangispal a nagun-odan baeten ken Kristo Jesus. Ta ti Dios impakitana nga isut’ matay iti publiko kas maysa a daton iti pannakikappia a dayta ti gundawayan babaen ti pammati. Daytoy ket isu ti panangalangon ti mismo a kinalintegna (ta gapu iti kinaanusna, pinalabas ti Dios dagiti dati a basbasol dagiti tattao)—tapno alangonen ti kinalintegna iti agdama a tiempo, ken maipakita nga isu a mismo ti nalinteg, ket pagbalinenna met dagidiay addaan pammati ken ni Jesus a nalinteg.” (Roma 3:24-26, An American Translation) Ita, aniat’ kayat a sawen daytoy? Kayatna a sawen, a ni Jesus kas maysa a perpekto, lasag ken dara a tao, ti aktual a natay kas maysa a tao ket nagtalinaed a natay kas maysa a tao iti agnanayonen. Isu ti natay iti “namimpinsan a maipaay iti agnanayonen idi indatonna ti bagina.” (Hebreo 7:27) Gapuna ti subbot ket maawat. Natay ni Jesus iti lasag; iti maikatlo nga aldaw isu ti “napagbiag iti espiritu.”—1 Pedro 3:18.
Ti Baro a Tulag ken ti Baro a Panamarsua
Ita makitatayo ti mangbalangat a paset ti nasantuan a palimed. Ti kinamatalek ni Jesus agingga ken patay isut’ nangkualipikar kenkuana nga agbalin a Nangato a Padi ken Ari ni Jehova. Babaen iti naiparukpok a darana pinatalgedanna ti baro a tulag. Daytoy baro a tulag isut’ mangpataud kadagiti nainlangitan a kakaduana nga agturayto a kadua ni Jesus kas ar-ari ken papadi. (Apocalipsis 5:9, 10; 20:4, 6) Buklenda ti maysa a baro a nasion, “maysa a baro a parsua,” ket dayta ti pudno a maysa a banag!—Galacia 6:15, 16.
Usigenyo: Ti Dios babaen ken Kristo Jesus ti nangpili iti mangibagi a bilang manipud sangatauan, agpadpada kadagiti lallaki ken babbai. Mabalin nga ibilangna ida a nalinteg ket awaganna ida kas naespirituan nga annak. Iti umiso a tiempo ti Dios kalpasan ti ipapatayda, pagungarennanto ida idiay langit ket ikkanna ida ti immortalidad a kas pananggunggonana ken ni Jesus. (1 Pedro 1:3, 4) Anian a panagtalek ti adda kenkuana iti “baro a parsuana” ken ti kinasungdoda kenkuana! Anian a sungbat iti daydiay siuulbod a nangakusar kadakuada iti imatang ni Jehova! (Apocalipsis 12:10) Nupay immortalda a kadua ni Jesu-Kristo, nikaanoman saandanto a di agsungdo ken Jehova. Ngem saan nga isu laeng dayta.
Ti Paraiso a Daga
Ni Kristo Jesus, a kadua dagiti katulonganna a nainlangitan nga ar-ari ken papadi, kitaendanto a ti panggep ni Jehova maipaay iti tao ken ti daga ti maitungpalto a naan-anay bayat iti Milenio a Panagturayna. Iti panangiyaplikarna kadagiti gunggona ti subbot, pagungarento ni Jesus dagiti natay ken iyegnanto dagiti matalek kadakuada ken dagiti nakalasat iti panungpalan daytoy dakes a sistema iti natauan a kinaperpekto. Maigiddato iti dayta, ti daga agbalinto a paraiso. Amin dagidiay mangilaksidto iti maudi a panagregget ni Satanas a mangtulaw kadakuada ti maikkanto ti perpekto a natauan a biag iti agnanayon. Ni Satanas ken amin dagiti dakes a kakaduana madadaeldanto iti agnanayonen. Agtalinaedto ti talna ken panagkaykaysa ti sangaparsuaan, a mangalangon a naan-anay ti kinasoberano ken panagturay ni Jehova babaen iti ayat. Agpadpada a dagiti anghel ken dagiti tattao idemostradanto ti nasungdo a panagayatda iti Namarsuada ken Diosda.—Apocalipsis, kapitulo 20.
Ita, mabalinantayon a tarusan a nasaysayaat ti nasantuan a palimed. Itan makitkitatayon ti kinasirib ni Jehova a lab-awanna uray pay dagiti disenio a panamarsuana kadagiti mulmula ken iti lubong dagiti an-animal. Addaantay naimbag a rason nga idir-i: “O nagunegen dagiti kinabaknang ti sirib ken ti met pannakaammo ti Dios! Ania ketdin a saan a pannakatukod kadagiti pakinakemna . . . Ta dagiti amin a bambanag agtaudda kenkuana ken gapu kenkuana ken maipaayda kenkuana. Madaydayaw koma iti agnanayon. Amen.”—Roma 11:33-36.
[Ladawan iti panid 7]
Ti epekto ti maysa laeng a panagbasol ni perpekto nga Adan ken ti pannakapukaw ti biagna ket mabalin a mabalanse. Kasano? Babaen met laeng ti sabali a perpekto a natauan a biag, ti biag ni Jesus