Dagiti Saludsod Manipud Kadagiti Managbasa
◼ Tuktukoyen kadi ni Pablo ni Jehova wenno ni Jesus idi insuratna: ‘Ti Apo kinunana kaniak: “Ti pannakabalinko mangan-anay ti kinakapuy”’?
Kasla ti tuktukoyen ni apostol Pablo isu ni Apo Jehova. Babaen ti panangpaliiw kadagiti sasao ni Pablo iti konteksto, saantay laeng a makita no apay a pudno daytoy no di ket mapaunegtayo pay ti panangapresiartayo iti relasion iti nagbaetan ti Dios ken ti Anakna. Nagsurat ni Pablo:
“Ket tapno saanak koma a maidaydayaw iti aglablabes, gapu iti kadakkel dagiti paltiing, naited ti maysa a siit iti lasagko, maysa a babaonen ni Satanas a mamarigat kaniak, tapno saanak koma a maidaydayaw iti aglablabes. No maipapan itoy namitlo a nagkararagak iti Apo tapno mayadayu koma kaniak; ket isu kinunana kaniak: ‘Ti paraburko makaanay kenka; ta ti pannakabalinko mangan-anay ti kinakapuy.’ Gapuna, siraragsakak unay, nga agpasindayaw a nangnangruna kadagiti kinakapuyko, tapno ti pannakabalin ni Kristo salukubannak.”—2 Corinto 12:7-9.
Ti siit iti lasag ni Pablo mabalin a ti sakit iti matana wenno dagiti ulbod nga apostol a mangkarkarit iti kinaapostolna. (Galacia 4:15; 6:11; 2 Corinto 11:5, 12-15) Aniaman dayta, dayta ti mabalin a mangupay ken ni Pablo wenno mabalin a manglapped kenkuana iti panangitan-okna iti bagina met laeng iti ministeriona. Gapuna namitlo a dinawatna ti pannakaikkat dayta. Ngem iti siasino ti nangdawatanna, ken siasino ti simmungbat babaen ti panagsaona “ti pannakabalinko”?
Agsipud ta ti sasao dinakamatna “ti pannakabalin ni Kristo,” kasla agparang a ni Pablo ti nagdawat ken Apo Jesus. Awan duadua, isut’ addaan iti pannakabalin ken maipaayna dayta kadagiti adalanna. (Marcos 5:30; 13:26; 1 Timoteo 1:12) Kinapudnona, ti Anak ti Dios “salimetmetanna dagiti isuamin a bambanag iti sao ti pannakabalinna.”—Hebreo 1:3; Colosas 1:17, 29.
Nupay kasta, ni Apo Dios isu ti kamaudianan a gubuayan iti pannakabalin, isu a kabaelanna nga ipaay ken pudno nga ipaayna kadagiti managdaydayawna. (Salmo 147:5; Isaias 40:26, 29-31) Ti kasta a pannakabalin manipud iti Dios ti namagbalin ken ni Jesus a nakaaramid kadagiti milagro ken mamagbalinto kenkuana nga agtignay. (Lucas 5:17; Aramid 10:38) Kasta met, dagiti apostoles ni Jesus ken dagiti dadduma nga ad-adalan immawatda iti pannakabalin manipud ken Jehova. (Lucas 24:49; Efeso 3:4-16; 2 Timoteo 1:7, 8) Daytoy iramanna ni Pablo, isu a nagserbi “sigun iti sagut daydi parabur ti Dios a naited [iti apostol] kas ti panangaramid ti pannakabalinna.”—Efeso 3:7.
Agsipud ta ni Pablo dinawatna ti pannakaikkat ti ‘siit iti lasagna, maysa a babaonen ni Satanas,’ nainkalintegan nga agpannuray kan Apo Dios a mangaramid iti daytoy, a ni Jehova daydiay nakaiturongan dagiti karkararag. (Filipos 4:6; Salmo 145:18) Kasta met, ti panangparegta ni Jehova ken ni Pablo kadagitoy a sasao, “Ti pannakabalinko mangan-anay ti kinakapuyko,” dina isina ni Kristo. Ti pannakabalin manipud ken Apo Dios ti mabalin a deskribiren a kas “ti pannakabalin ni Kristo [a dayta ti] kasla tolda” a nangsalukub ken Pablo, ta ni ‘Kristo ti pannakabalin ti Dios ken ti kinasirib ti Dios.’ (1 Corinto 1:24) Gapuna, ti 2 Corinto 12:7-9 tulongannatayo a mangapresiar a nasaysayaat pay ti panagbalbaliw iti panangusar ni Jehova iti Anakna iti pannakaibanag iti nadiosan a pagayatanna.