Panangagas babaen iti Pammati​—Nagtaud Aya iti Dios?

TI LALAKI ket 38 a tawtawenen a masakit. “Kayatmo kadi ti mapaimbag?” insaludsod ni Jesus. No dakayo daytoy a lalaki, diyo kadi koma insungbat a sigagar iti wen? Kinuna ni Jesus kenkuana: “Tumakderka, bagkatem ta iddam ket magnaka.” Aniat’ epekto dagitoy a sasao? “Ket naigiddato a daydi a tao napaimbag, ket binagkatna di iddana ket nagna.”​—Juan 5:5-9.

Daytoy naindaklan nga aramid ti nadiosan a panangagas ket maysa laeng kadagiti adu nga inaramid ni Jesus bayat iti naindagaan a ministeriona. (Mateo 11:4, 5) Dagiti faith healer itatta akuenda a ti Dios agaramid pay laeng kadagita a panangagas, ket suportaran dayta dagiti pammaneknek ti rinibribo a mangikunkuna a napaimbagda kadakuada.

Dakkel a Paggigidiatan

Ti panagadal iti Biblia ipanayagna dagiti sumagmamano a dakkel a paggigidiatan dagiti panangagas nga inreport ti Biblia ken dagidiay inreport dagiti faith healer itatta. Ni Jesus ken dagiti adalanna, kas pangarigan, dida pulos simmingir para iti panangagasda. “Inawatyo nga awan bayadna, itedyo nga awan bayadna,” insuro ni Jesus. (Mateo 10:8) Gapuna sinurotda ti ulidan nga impaay ni Eliseo, a nagkitakit a mangawat iti regalo manipud iti lalaki a managan Naaman a ti kukutelna ket inagasan ni Eliseo. (2 Ar-ari 5:1, 14-16) Gapuna, no dagiti faith healer ket agsingirda maipaay kadagiti serbisioda, salsalungasingenda daytoy a Nainkasuratan a pagulidanan.

Nakabatbatad met a dagiti panangagas a naaramid idi panawen ti pannakaisurat ti Biblia ket giddato wenno naisayangkat dayta iti las-ud ti nabiit a panawen. Idi nakita ni apostol Pedro ti maysa a lalaki “a pilay manipud iti pannakayanakna,” kinunana iti lalaki: “Iti nagan ni Jesu-Kristo a taga Nazaret, magnaka!” Ipanayag ti salaysay: “Ket naigiddato a timmibker dagiti saksaka [ti pilay] ken lansalansana; ket, idi a limmagto, nagtakder ket rinugianna ti nagna.” (Aramid 3:1-8) Basaenyo a mismo dagiti dadduma pay a pangarigan idiay Aramid 5:15, 16 ken 14:8-10.

Dagiti panangagas babaen iti pammati itatta, nupay kasta, masansan nga abutenna ti adu nga aldaw, lawlawas, wenno uray bulbulan tapno agepekto! Nakadidillaw, met, ti kinapudno a dagiti faith healer agannayasda a mangipamaysa iti functional a saksakit, kas iti kinabulsek, paralysis, wenno kinatuleng​—saksakit a no dadduma addaan kadagiti sikolohikal a pakaibasaran. Ti siruhano a ni Paul Brand napaliiwna: “Apaman a ti organiko a kinapudno ket nagbalin a di mapagduaduaan​—ti napukaw a saksaka, matmata, wenno bubuok​—dagiti milagro ket mammanoda a mapasamak.” Ni Jesus, nupay kasta, pinaimbagna “amin a sakit ken amin a kita ti an-anayen,” agraman dagiti depekto nga organiko ti namunganayanda, a kas iti nagango nga ima.​—Mateo 9:35; Marcos 3:3-5.

‘Kurangka iti Pammati!’

Nakalkaldaang, adu a tattao a nakaro ti sakitda tabunuanda dagiti ‘krusada ti panangagas’ ngem agawiddanto a nakarkaro ti sakitda. Dagiti faith healer ilawlawagda dagita a pannakapaay babaen iti panagkunada a, ‘Kurangda iti pammati!’ Daytoy, nupay kasta, ket wagas a pananglokloko. Kas iti napaliiw ni Dr. Wiliam Nolen: “Saan a kas iti doktor nga orthodox, ti mangngagas a sikiko saanna pulos nga akuen ti responsabilidad no mapaay ti panangagasna. Masapul nga ipudnok a tarigagayak a pilien ti agtungpal iti kasta a pambar no makasarakak iti pasiente a diak mapaimbag.”

Dagiti propeta ti Dios, ni Jesus, wenno dagiti adalan ni Jesus dida pulos kasapulan ti agpambar a ti maysa a masakit ket saan a naagasan gaput’ kurang ti pammatina. Pudno, ti kinakurang ti pammati ti nalabit nanglimitar ti bilang dagiti tattao a dimmatag tapno maagasan. Ngem kadagidiay a dimmatag, ti naan-anay a pannakapaimbag ti kanayon a napasamak!​—Marcos 6:5, 6.

Pudno unay, iti sumagmamano a kaso dagiti tattao a nabatad a kurang iti pammati ket naagasanda. Ni Naaman, ti pangulo iti armada ti Siria, kas pangarigan, saan a naan-anay ti pammatina a maagasan ti kukutelna iti wagas nga imbilin ni propeta Eliseo. Kalpasan laeng ti pannakapaimbagna nga inadmitirna: “Adtoy ita, a naammuak, nga awan ti Dios iti isuamin a daga, no di laeng iti Israel.” (2 Ar-ari 5:11-13, 15) Ti narabaw a pampambar dagiti faith healer agparangda ngarud nga awan kaes-eskanda.

Panangagas​—Maysa Sagut a Naglabasen

Ngem saan kadi a pudno a ti namilagruan a sagut ti panangagas ket kadawyan kadagiti immuna a Kristiano? (1 Corinto 12:9) Wen, ngem adda naimbag a rason para kadagiti milagro a napasamak idi. Iti las-ud ti maysa ket kagudua a milenio, ti nasion ti Israel iti lasag ket napili nga ili ti Dios; ngem idi umuna a siglo iti Kadawyan a Panawentayo, ti Israel ket nailaksid gaput’ kinakurang ti pammatina ket sinukatan ti baro a kongregasion Kristiano. Dagidiay immuna a Kristiano kinasapulanda ti naisangsangayan a tulong tapno pabilgen ti pammatida ken tapno ipamatmat iti makinruar a lubong nga addaanda iti pannarabay ni Jehova a Dios.

Gapuna, dagiti namilagruan a sagsagut, agraman ti panangagas, ket naited iti kaipaspasdek a kongregasion Kristiano. Dagitoy ti nagpaay a kas “maysa a pagilasinan” kadagiti di mamati ken kas maysa a wagas iti panangpabileg iti pammati dagiti mamati. (1 Corinto 14:22) Nupay kasta, agarup dua a ribo a tawtawen kalpasanna, ti Kristianismo ket awanen iti kinamaladagana. (Idiligyo iti 1 Corinto 13:9-13.) Ti Biblia ket nabayagen a nakompleto ket minilmilionen a kopia ti naiwaras. Gapuna dagiti pudno a Kristiano itatta nalakada laeng nga iturong dagiti di mamati kadagiti pinanidna tapno suportaran ti isuroda. Dagiti namilagruan a panangiparangarang ti saanen a kasapulan.

Ni Pablo impamatmatna pay a dagiti sobrenatural a sagsagut ket “agsardengdanto.” (1 Corinto 13:8) Dagita a sagsagut maiyallatiwda laeng a direkta babaen wenno iti kaadda dagiti apostoles ni Jesu-Kristo. (Aramid 8:18-20; 10:44-46; 19:6) Kalpasan ti ipapatay dagiti apostoles, dagiti namilagruan a paspasamak simmardengdan.

Ti Cyclopedia of Biblical, Theological, and Ecclesiastical Literature da McClintock ken Strong (Tomo VI, panid 320) napaliiwna a maysa a “di mailibak a sasao a kabayatan ti umuna a sangagasut a tawtawen kalpasan ti ipapatay dagiti apostoles bassit wenno awan pulos ti mangngegtayo a panangisayangkat kadagiti milagro babaen kadagiti immuna a Kristiano.”

Rason tapno Agannad

Impakdaar ni Jesus nga umayto ti oras inton adu ti agkuna kenkuana: “Apo, Apo, saankami aya a nagipadto iti naganmo, ket iti naganmo painaruarmi dagiti sairo ket iti naganmo nagaramidkami kadagiti adu a datdatlag?” Ket ni Jesus ipalgaknanto kadakuada: “Uray kaano dikay naam-ammo! Umadayukayo kaniak, dakayo nga agar-aramid iti kinadakes.” (Mateo 7:22, 23) Ania, ngarud, ti makagapu iti kasla panagballigi iti panagaramidda kadagiti “datdatlag” no saan nga iti espiritu ti Dios?

Iti sumagmamano a kaso, ti naan-anay a panangallilaw ti agparang a nairaman. Kas pangarigan, ti pagiwarnak iti Zimbabwe a, The Herald, impadamagna maipapan iti tallo nga indibidual nga impakaammo ti maysa a nalatak a faith healer a naagasanna. Ti pagiwarnak imbunannagna daytoy a kas maysa a panangallilaw: “Maysa nga ubing ti kaskasdi a saan a makangngeg wenno makasao; ni kaanoman ti maysa nga ubing ket saan a tuleng wenno umel; ket ti maysa a babai, a tuleng, kaskasdi a saan a makangngeg.”

No dadduma ti panangagas babaen iti pammati agparang nga addaan iti placebo wenno sikolohikal nga epekto iti agrigrigat. Iti dadduma a kaso​—nangnangruna no aglabas ti naunday a panawen sakbay a makita ti pannakaagasna​—agparang a ti natural a mekanismo ti panangagas ti bagi isut’ nairaman. Iti libro a Science and the Paranormal, ni Dr. William Nolen kunaenna nga “agarup 80 porsiento kadagiti pasiente a dumatag [iti mangngagas nga orthodox] ket addaan iti sakit a limitado iti bagi​—kayatna a sawen, saksakit a basta umimbagto latta.” Iti panaglabas ti panawen, ngarud, ti maysa a faith healer nalakana laeng nga ipabiang iti bagina dayta a pannakaagas.

Kamaudiananna, ipakdaar ti Biblia a “ni Satanas agbalin a kasla anghel ti lawag” iti panangpadasna a mangallilaw. (2 Corinto 11:14) Idiay 2 Tesalonica 2:9, 10, inlawlawag pay ni Pablo: “Daydiay nga iyaayna kas iti panangaramid ni Satanas a mapakuyugan iti amin a pannakabalin [“amin a klase dagiti datdatlag,” The Jerusalem Bible] ken dagiti pagilasinan ken dagiti ulbod a datdatlag ken amin nga allilaw ti kinadakes a maipaay kadagiti mapukaw.” Gapuna agannadkayo! Ti panangagas babaen iti pammati masansan nga iramanna dagiti puersa ti demonio! “Diak kayat nga adda pakairamananyo kadagiti sairo,” imballaag ni Pablo. “Saanyo a mabalin ti uminum iti kopa ni Jehova ken iti kopa dagiti sairo.”​—1 Corinto 10:20, 21.

No ti Maysa a Kristiano ket Masakit

Pudno, no ti maysa ket masakit, mabalin a makaawis ti maysa a datdatlag a panangagas. Imutektekanyo, nupay kasta, a ti katrabahuan ni Pablo a ni Epafrodito ket nagsakit a ngangngani natay. (Filipos 2:25-27) Ti nasinged a kadua ni Pablo a ni Timoteo nagsagaba met iti “masansan a panagsaksakit.” (1 Timoteo 5:23) Kaskasdi, awan kadakuada ti inagasan ni Pablo iti namilagruan. Ket idi kasapulan a mismo ni Pablo ti pannakaagas, mabalin a ginundawayanna dagiti serbisio ni Lucas, “ti ay-ayaten a mangngagas,” a nakipagdaliasat kenkuana.​—Colosas 4:14.

Kasta met itatta, ti maysa a Kristiano a masakit mabalinna a sapulen ti tulong ti maysa a kualipikado a mangngagas wenno therapist, a likliklikan ti aniaman a pannakinamin kadagiti dinedemonio a panangagas wenno ti kinaalbulario a nalatak unay ita kadagiti adu a dagdaga. Mabalinna met ti agkararag, saan a maipaay iti datdatlag a pannakaagas, no di ket maipaay iti kinasirib a sumango iti sakitna. (Santiago 1:5) Mabalinna met ti umararaw a ni Jehova “sumaranayto kenkuana iti idda a nakaidalitan.”​—Salmo 41:3.

Ipapantayon, mabalin a makaupay unay no ti medikal a siensia ket saanna a maagasan ti maysa a partikular a sakit. Nupay kasta, uray no masakit ti maysa a Kristiano masapul a pagreggetanna a “siguraduaen dagiti napatpateg a bambanag,” a saan a palubosan a ti pannakaseknan iti salun-at ringbawanna a naan-anay ti pannakaseknan iti naespirituan. (Filipos 1:10) Mabalinna a pabilgen ti bagina iti namnama iti panagbiag iti sidong ti Pagarian ti Dios inton “ti agtaeng dinanton kunaen: ‘Masakitak.’”​—Isaias 33:24; 65:17-19.

Pudno unay, daytoy a namnama iti maysa a nalinteg a baro a lubong ket napatpateg ngem iti ungaong a karkari dagiti faith healer. Imutektekanyo ni Peter, maysa a bulsek a lalaki nga agnaed idiay Akumadan, Ghana. Isut’ nakabusbos iti 26 a tawtawen kadagiti nadumaduma nga iglesia nga agag-agas babaen iti pammati iti pananginanamana a maagasan ti kinabulsekna. Ngem awan faith healer a nakalukat kadagiti matana. Kalpasanna, bayat nga agat-atender pay laeng iti maysa nga iglesia nga agag-agas babaen iti pammati, isut’ nakasarita dagiti Saksi ni Jehova.

Inlawlawag dagiti Saksi manipud iti Biblia nga iti sidong ti Pagarian ti Dios ti naan-anay a pannakaagas dagiti amin nga an-anayen ti maibanagto. Daytoy ti nanglukat iti mata ti pannakaawat ni Peter. Napnuan iti panangipateg kadagiti nakaskasdaaw a kinapudno iti Biblia, isut’ nagbalin nga amin-tiempo a manangiwaragawag iti Pagarian ti Dios ket nakapagserbin a kasta iti nasuroken a tallo a tawtawen! Kumitkita iti masanguanan iti panawen inton, iti literal a pamay-an, “maluktanton dagiti mata ti bulsek, ken dagiti lapayag ti tuleng maluktandanto.”​—Isaias 35:5, 6.

Buyogen ti tulong ti Sao ti Dios, rinibribo pay dagiti nangwayawaya iti bagbagida manipud iti di umiso a panagtalek kadagiti faith healer.

[Ladawan iti panid 5]

Dagiti faith healer mammano a makaagasda iti tattao nga addaan kadagiti problema nga organiko

[Dagiti ladawan iti panid 7]

Ti maysa a Kristiano a masakit agkararag maipaay iti kired tapno makaibtur. Kumitkita met iti masanguanan iti baro a lubong, a sadiay “ti agtaeng dinanton kunaen: ‘Masakitak’”