Ti Pateg ti Panagkanta iti Pudno a Panagdaydayaw

MAILADAWANYO aya ti maysa a lubong nga awan kanta? A pulos dinto mangngeganen ti naragsak a panagkanta dagiti ub-ubbing wenno ti nasam-it a timek ti maysa a nightingale wenno ti bellbird? A dinto mangmangngeganen ti makaawis a paggaak ti maysa a magpie wenno ti panaggarakgak ti maysa a kookaburra? Makaparagsak, ta daytoy ket dinto pulos a kasta. Ngem ti kasta a panagar-arapaap itampokna ti maysa kadagiti adu a sagsagut ti Dios iti tao: ti sagut ti kanta.

Ni Jehova Maysa a Dios ti Kanta

Apay a ti panagkanta makaiyeg ragsak ken rag-o kadatayo? Umuna, ni Jehova a mismo tagtagiragsakenna ken maay-ayo kadagiti kankanta ti panagdayaw dagiti parparsuana. Mailadawanyo pay aya ti okasion idi amin dagiti anghel nagpukkawda iti ragsak iti kinaranga ti naindagaan a sangaparsuaan ni Jehova? Wenno maarapaapyo kadi sitatakderkayo a naimayeng a kadua dagiti papastor idi rabii ti otonio iti natauan a pannakaiyanak ni Jesus, ken iti makaay-ayo nga uni ti sangabuyotan nga anghel nga agkankanta: “Dayaw iti Dios idiay kangatuan”?​—Lucas 2:13, 14; Job 38:7.

Maysa a pamay-an a panangipamatmat ni Jehova nga isut’ maysa a Dios ti kanta ket babaen iti panangaramidna a ti panagkanta ket paset ti pudno a panagdaydayaw idiay Israel. Iti kamaudiananna, impanayag manen ti Dios ti nasinged a singgalut ti panagkanta ken pudno a panagdayaw idiay sirmata ti Apocalipsis a naited ken ni apostol Juan. Iti maysa a propetiko a buya maysa a nagdakkel a koro​—144,000 ti bilangda​—ti agkankanta iti nagngayed a baro a kanta iti sanguanan ti trono ti Dios.​—Apocalipsis 14:3.

Ti Panagkankanta kadagidi Tiempo Sakbay ti Kinakristiano

Ti kinadayag ti Dios ken dagiti nakaskasdaaw nga ar-aramidna ti nangtignay met kadagiti naindagaan nga ad-adipenna nga agkanta. Riknaenyo ti makatignay nga epekto ti panagkanta kadagiti Israelita di nagbayag kalpasan ti namilagruan a pannakaispalda manipud panangadipen dagiti Egipcio. Dagiti puso da Moises ken dagiti padana nga Israelita ket natignay unay ti riknada bayat a kinantada ti kanta ti panagballigi a nangiyulit-ulit iti inaramid ni Jehova ken ni Paraon ken ti buybuyotna.​—Exodo 15:1-21.

Iti maudi a paset ti historia ti Israel, ti di maliplipatan nga aldaw immay idi, iti sidong ti panangiturong ni Ari David, a maisaad ti lakasa ti tulag idiay uneg ti naisangsangayan ti pannakaibangonna toldana. Anian a historiko a pasamak dayta! Saan laeng a ti naisangsangayan a panagkanta no di ket ti makapatignay-kararua a panangakompaniar ti orkestra ti nangnayon iti kinadaeg dayta nga aldaw.​—1 Cronicas 16:4-36.

Ti ayat ni David iti musika ken iti kinasigona iti arpa ti nangipaganetget iti regtana a mangitan-ok iti musika ken panagkanta iti pudno a panagdayaw. Idiay Salmo 33:1, 3, mangngegtayo iti nabara a panagdawatna kadagiti managdaydayaw ken ni Jehova nga agkanta a sipipigsa iti Dios iti amin a pusoda: “Agragragsakkayo ken ni Jehova, dakayo a sililinteg. . . . Laingenyo ti agkutengteng a buyogen ti napigsa nga aweng.”

Ti Panagkanta kadagiti Panawen Kristiano

Idi immuna a panawen Kristiano, ti panagkanta ket addaan met ti prominente a paset ti pudno a panagdayaw. Ni Jesus ken dagiti apostolesna nagkantada a sangsangkamaysa kalpasan ti panangrabii sakbay la unay ti ipapatay ni Jesus. (Marcos 14:26) Idiay pagbaludan nagkanta a sipipigsa da Pablo ken Silas tapno amin mangngeganda. (Aramid 16:25) Kas ken ni David ni apostol Pablo ti naganaygay maipapan iti panagusar iti kanta. Kadarato, pinaregtana dagiti kapammatianna nga agkanta iti kankanta a panangidayaw ken ni Jehova.​—Efeso 5:18, 19; Colosas 3:16.

Iti agdama nga aldaw a Nakristianuan a panagdayaw, ti panagkanta ket nalatak met a paset. Idi 1905 ti libro a Hymns of the Millennial Dawn ti naipablaak. Ti panid ti paulo ti nangisalaysay kadagiti 333 a kankanta kas “Ti Napili a Koleksion ti Salmo ken Himno ken Naespirituan a Kankanta a Mangbadang iti Ili ti Dios iti Panagkanta ken ti Melodia iti Puspusoda a Maipaay iti Apo.”

Kalpasanna idi 1928 ti narebisar a pagkantaan nga addaan 337 a kankanta ti naipaay. Naawagan iti Songs of Praise to Jehovah, ket kuna ti pakpakaunana: “Dagitoy a Kanta ti nasarakan a maitunos kadagiti nadiosan a kinapudno a rebbeng a matarusan itan.” Nupay kasta, bayat ti panaglabas dagiti tawen ken rimmang-ay ti lawag ti kinapudno, nagbalin a nalawag a dadduma kadagitoy a kanta ti naimpluensiaan iti panagpampanunot a naadaw manipud ulbod a relihion. Mainayon pay, dagiti kankanta ti Pagarian a mangparegta iti panangikasaba ti naimbag a damag ket isudat’ kasapulan, idi nga ad-adda a naitan-ok ti publiko a panangiwaragawag iti dayta.​—Mateo 24:14; Hebreo 13:15.

Idi 1944 naipaay met ti Kingdom Service Songbook, nga addaan 62 a kankanta. Duapulo a tawen kamaudiananna, idi 1966, ti libro nga Agkankanta ken Pakpakuyoganyo ti Bagiyo iti Toktokar kadagiti Pusoyo ti nairuar. Daytoy ti naglaon iti 119 a kankanta ti Pagarian a saklawenna ti amin a paset ti Nakristianuan a panagbiag ken panagdayaw, agraman iti panangaskasaba kadagiti dadduma ken idaydayawna ni Jehova a Dios ken ni Kristo Jesus.

Ngangngani duapulo manen a tawen ti limmabas, bayat ti panagtultuloy nga idudur-as ti lawag ti kinapudno. (Proverbio 4:18) Nakita manen ti pannakasapul ti sabali a pagkantaan. Gapuna idi 1984 immay ti pannakairuar ti pagkantaan, a napauluan iti Agkanta ti Daydayaw ken Jehova. Daytat’ addaan 225 a kankanta ti Pagarian, a dagiti sasao ken melodiana ti pinutar nga interamente dagiti dedikado nga ad-adipen ni Jehova manipud amin a paset ti daga.

Aramatenyo a Naan-anay ti Teokratiko a Panagkanta

Ti ilustrasion a naipakita iti double-spread endsheet iti likudan daytoy kaudian a pagkantaan ti mangparegta kadatayo a mangusar a naan-anay ti teokratiko a panagkanta kadagiti Nakristianuan a panaggigimong. Dagiti nasanay a kumakanta iti templo a nailadawan sadiay ti nakalawlawag nga impangatoda ti puspuso ken timtimekda iti panagkanta iti Dios.​—1 Cronicas 25:7.

Mabalintay met ti agkanta a kasta kadagiti Nakristianuan a panaggigimongtayo, nga ilukat dagiti ngiwngiwattayo ken agkanta ken Jehova manipud puspusotayo. Nupay kasta, saan nga amin kadatayo ti mangar-aramid iti dayta. Nalabit ti kinatangsit ti makagapu iti pakaikapkapisantayo iti rag-o iti panagkanta ken ni Jehova nga awan ti panagbabainna, uray aniaman a kita ti boses ti adda kadatayo. Nalabit maseknantay unay iti impresion a maar-aramid kadagidiay sitatakder iti sibaytayo. Ni Moises ket naaddaan iti umas-asping a problema​—saan a ti panagkanta no di ket ti panagsao. Ti sungbat nga inted ni Jehova kenkuana ti mabalin a makatulong kadatayo no adda pagannayasantayo nga agkedked manipud panagkanta gapu iti kinakurang ti abilidadtayo. Ni Jehova nagsaludsod ken ni Moises: “Asino ti nangaramid iti ngiwat ti tao? . . . Saan aya a siak, ni Jehova?” (Exodo 4:11) Pudno unay, siraragsak nga agimdeng ni Jehova kadatayo no usarentayo ti aniaman nga abilidad nga intedna kadatayo nga agkanta a sipipigsa iti daydayawna!

Panunotenyo met, no kasano a nagkanta a sipipigsa ni Pablo ken ni Silas bayat nga addada iti pagbaludan. Awan ti panagbabainda sadiay, ket awananda ti panangakompaniar ti musika, awananda pay ti uray pagkantaan a suroten. Iladawanyo ti okasion: “Ket iti tengnga ti rabii, idi agkarkararag da Pablo ken Silas nagkankantada ti himhimno a maipaay iti Dios; wen, ket dagidi adda a balud nangngegda ida.” (Aramid 16:25) Gapu kadi daytoy ta da Pablo wenno ni Silas naaddaanda ti nasanay a timtimek iti panagkanta? Saan a nasesita a kasta. Ngem ti kangrunaan a pakaseknanda isut’ panagkantada a sipipigsa ken manipud iti puso! Aniat’ kangrunaan a pakaseknantayo no agkankantatayo iti kanta ti daydayaw?

Mabalintayo Amin ti Rumang-ay

Ti pammagbaga ni musikero a David ti maiyanatup ditoy: “Laingenyo ti agkutengteng a buyogen ti napigsa nga aweng.” (Salmo 33:3) Dayta ti namnamaen ni Jehova kadagiti isuamin nga ad-adipenna​—saan a nasursurok, saan a nakurkurang ngem iti ‘panangaramid iti amin a kabaelantayo.’ No aramidentay dayta, mainanamatayo ti panangbendision ni Jehova iti panagreggettayo, ken iti pagragsakantayo​—ken no maminsan pagsiddaawantayo​—makaaramidtayo met ti irarangay.a

Adtoy ti sumagmamano a praktikal a suhestion a makatulong a mangparang-ay ti kualidad ti panagkantayo: Padasenyo ti agdengngeg a masansan kadagiti babbaro a kankanta ti Pagarian, nga usaren dagiti nairekord a musikal tapes wenno plaka sadino man a mabalin. Para kadagiti dadduma, ti panagkanta ti kankanta iti pagtaenganda wenno kadagiti babassit a panagtataripnong a kadua dagiti kapammatianda ti napaneknekan a makagunggona ken makaay-ayo. Kadagiti panaggigimong ti kongregasion nasken a ti panangakompaniar a musikal ti matokar a kalalaingan ti pigsana tapno mangngegan amin dagidiay agkankanta. Daytoy ti mamagbalin a nalaklaka a suroten ti tunona ken parang-ayen ti panagtalek iti biang dagidiay agkankanta. Daydiay agpakpakanta masapul nga itedna ti temana, ken nalabit ipakita ti kinaumisona, a saan laeng a basta ibaga ti numero.

Dakayo a nagannak, parparegtaenyo met laeng aya dagiti annakyo nga agkanta ti kankanta ti Pagarian a sirarayray ken manipud puspusoda? Dagiti pamilia a nangparegta kadagiti agtutuboda nga agkanta manipud iti puso, ken buyogen ti pannakaawat, ti namin-adu a daras a nasarakanda dagita a panagkanta a nagsayaat a katulongan iti naespirituan a panagdakkelda.

Adu dagiti Gunggona

Adu dagiti gunggona ti panagkanta a sipipigsa ken manipud iti puso. Ti personal a pannakiramantayo iti panagdayaw iti publiko ti agbalin a napigpigsa. Dagidiay sitatakder iti sibayyo maparegtada nga agkanta met a napigpigsa no mangngegda ti di agbabain a panagkantatayo. Ti intero a kongregasion ti magunggonaan met, ta ti napigpigsa a panagkanta ti makaakar!

Mainayon pay, ti napigsa a panagkanta mangted ti nasayaat a pammaneknek kadagidiay damdamona ti tumabuno iti gimong. Dagidiay lumablabas iti sibay dagiti Kingdom Hall tayo, agraman dagiti kakaarruba nga agnanaed iti sangakaarrubaan, pagsiddaawanda ti nasayaat a panagkankantatayo, a nalabit kas kadagidiay dadduma a balud nakangngeg kada Pablo ken Silas. Daytoy ti nangibunga a dadduma pay kadagiti makangngeg tarigagayanda ti ad-adda a makaammo maipapan iti kinapudno.

Kangrunaanna, ti naparang-ay a panagkantatayo ti mangiyeg dakdakkel a dayaw ken ni Jehova, ti Namunganay iti musika ken panagkanta, daydiay maikari a maidaydayaw iti kanta a nangnangruna ngem kadagiti dadduma.

[Footnote]