Dagiti Anghel​—Apektaranda Kadi ti Biagyo?

PUDNO kadi nga adda dagiti anghel? Wenno dagitoy ti bunga laeng iti kapanunotan? No pudno nga addada, mabalin kadi nga apektaranda ti biagyo?

Adda laeng maymaysa a mapagtalkan a gubuayan dagiti sungbat kadagita a salsaludsod. Dayta ti naipaltiing a Rekord nga inted ti Dios iti sangatauan​—ti Saona, ti Nasantuan a Biblia. Iti dayta nagsurat ni apostol Pablo: “Isuamin a Kasuratan nga impaltiing ti Dios isu makagunggona . . . pakaadalan iti kinalinteg.”​—2 Timoteo 3:16.

Gapuna, agtalektayo a ti Biblia makaipaayto kadatayo kadagiti sungbat iti kaadda dagiti anghel ken no dagitoy apektarandatayo. Sigurado a ti Namarsua iti uniberso maibagana kadatayo no dagiti anghel mairamanda kadagiti pinarsuana.

Pudno Kadi dagiti Anghel?

Nalawag ti panagkuna ti Biblia: “Ti mangaramid [Dios] kadagiti anghel nga angin.” (Hebreo 1:7) Gapuna ti Namarsua addaan kadagiti naespirituan a parparsua iti nainlangitan a pagturayanna. Dagitoy ditay makita, ket nabilegda.​—Salmo 104:4; 2 Pedro 2:11.

Pinanggep kadi ti Dios a dagiti anghel ket basta saanda a persona, saan a nalawag ti kasasaadda a parparsua? No kasta ti kaso, apay nga iladawan ti Biblia dagiti anghel nga addaan kadagiti rikrikna? Kas pangarigan, ibagana kadatayo nga idi ti pamuon ti daga naisaad, dagiti anghel “nagdaniwda a sangsangkamaysa, ken amin dagiti annak a lallaki ti Dios [dagiti anghel] dimmir-ida gapu iti rag-o.”​—Job 38:4-7.

Agparang a, kas kadagiti intelihente a naindagaan a parparsua, dagiti intelihente a naespirituan a parparsua, dagiti anghel, addaanda iti bukod a personalidad. Nupay no ti Biblia ibagana laeng ti nagnagan dagiti dua nga anghel (ni Miguel ken Gabriel), ti kinapudno a dagiti anghel addaanda kadagiti nagnagan ket mangipaay iti indibidual a kasasaadda. (Lucas 1:11, 19, 26; Judas 9) Ti Biblia sibibileg ti panangkondenarna iti panagdayaw kadagiti anghel, ket dayta iramanna ti panagkararag kadakuada. Imbes nga agkararagtayo kadagiti anghel, namalakad ni apostol Pablo kadatayo: “Maipakaammo koma dagiti dawdawatyo iti Dios gapu iti kararag ken araraw agraman panagiaman.”​—Filipos 4:6; Apocalipsis 19:10; 22:8, 9.

Ngem naiprograma kadi dagiti anghel nga awanan iti pannakabalin nga agpili iti naimbag ken dakes a kas kadagiti awan isipna a robot? Saan, dagiti anghel ket siwayawayada nga agpili, a kas kadagiti tattao. Kas pangarigan, idi adda dagiti anghel a nangsalungasing kadagiti linlinteg iti Dios idi kaaldawan ni Noe, saan nga inawat ida ti Dios, ket dagitoy naparuarda manipud iti nainlangitan a paraangan ti Dios. Ti kinasukirda ket nalawag a panangipakita iti kinaindibidual dagiti anghel.​—Genesis 6:1, 2; 2 Pedro 2:4; Mateo 25:41.

Gapuna, ti Biblia mangipaay kadatayo kadagiti makatulong nga impormasion maipapan iti nagtaudan, kaadda, ken kasasaad dagiti anghel. No sawentayo ti naiduma iti kunaen ti Sao ti Dios maipapan kadakuada mabalin a pagpanunotenna ti maysa nga indibidual kadagiti awan ti mamaayna a salsaludsod a saan a sungbatan iti Biblia. Daytat’ mabalin a mangiturong pay iti di rumbeng a panangipaay iti atension ken panagdayaw kadagiti anghel. (Colosas 2:18) Ti Biblia palagipannatayo a “bigbigentayo dagiti napatpateg a bambanag” ket saan a sawen ti ‘maysa nga ebanghelio a naiduma iti daydiay inkasabami kadakayo.’​—Filipos 1:10; Galacia 1:8.

Dagiti Anghel iti Panggep ti Dios

Nupay adu ti umanamong iti nagtaudan ken kababalin dagiti anghel, mammano ti pudno a makaammo iti panggep iti kaadda dagiti anghel ken no kasano a dagiti anghel apektaranda ti biagtayo itatta.

Iti Biblia, dagiti dua a sasao a nausar a maipaay iti “anghel” ket mal·’akhʹ (Hebreo) ken agʹge·los (Griego). Agpada dagitoy a kaipapananna “mensahero.” Dagitoy ibagada kadatayo ti maysa a banag maipapan kadagiti trabaho dagiti anghel. Dagiti anghel agserbida kas mensaheros, wenno courier wenno mangawit kadagiti napapateg nga impormasion, iti nagbaetan ti Dios ken iti tao.

Kas pangarigan, ti maysa nga anghel ket naibaon a mangipan iti mensahe ken Abraham maipapan iti anakna a lalaki a ni Isaac ken ti pammendision a dumtengto baeten kenkuana, maysa a bendision a mabalintayo nga awaten. (Genesis 22:11-17) Maysa nga anghel ti naibaon a makisarita ken ni Moises. (Aramid 7:37, 38) Nangibaon met ti Dios iti maysa nga anghel nga addaan kadagiti bilin a maipaay ken mammadto nga Elias. (2 Ar-ari 1:3) Ket ti maysa nga anghel nagparang ken Jose, ti nangtagibi ken Jesus, nga addaan iti naisangsangayan a bilin maipapan iti maladaga.​—Mateo 2:13.

Dagiti anghel naibaonda met a mangsalaknib iti ili ti Dios: “Ti anghel ni Jehova alikubkubenna dagiti agbuteng kenkuana, ket ispalenna ida.” (Salmo 34:7) Kas pangarigan, maysa nga anghel ti nangwayawaya ken ni Pedro manipud iti pagbaludan. (Aramid 12:6-11) Dua nga anghel ti nangtulong ken ni Lot ken dagiti dua nga annakna a makalasat iti pannakadadael ti Sodoma ken Gomorra babaen iti panangkuyogda kadakuada a rummuar iti dayta a lugar. Ti asawa ni Lot, nupay kasta, saan a nagtignay a naan-anay a maitunos kadagiti anghel, gapuna napan iti pannakadadael a naikadua kadagidiay a siudad.​—Genesis 19:1-26.

Ti Biblia mangdakamat kadagiti adu a dadduma pay a pangarigan ti itutulong dagiti anghel, isu a mangipaganetget iti Hebreo 1:7 ken 14 a kunaenna: “Ket maipapan kadagiti anghel kunana: ‘Ti mangaramid kadagiti anghel nga angin, ket dagiti katulonganna a darang ti apuy.’ Saanda aya nga espiritu amin nga agserbida a maibabaon tapno agserserbi a maipaay iti paglaingan dagiti agtawidto iti pannakaisalakan?”

Ti maysa nga anghel ti nangipaay iti dakkel a liwliwa ken Jesus. Iti rabii sakbay iti ipapatayna, ammo ni Jesus no ania ti adda iti sanguananna​—nga isu ti maliputan, mababaot, ken sirurungsot a mapapatay. Kasapulanna ti bileg a mangibtur iti pannakasuot iti kinatarnawna. Iti dayta a narikut a tiempo, ti maysa nga anghel nagparang kenkuana ‘a mangpabileg kenkuana.’ Anian a bendision dayta a panangliwliwa ti anghel ken Jesus! Kas banagna, nupay no isut’ nakapadas iti kasta a rigat a “nagling-et iti kasla tedted ti dara a nagtinnag iti daga,” nabaelanna ti nagibtur a simamatalek agingga iti ipapatay.​—Lucas 22:43, 44.

Inusar met ti Dios dagiti anghel a mangpukaw kadagiti kabkabusor iti ilina. Idi ti Asirio a Pannakabalin iti Lubong pinagpeggadna dagiti managdaydayaw ti Dios idi ugma, napasamak ti sumaganad: “Ket naaramid iti daydi a rabii a di anghel ni Jehova rimmuar ket nangkabil iti pakarso dagiti Asirios iti sangagasut walo pulo ket lima a ribu a tattao. Ket idi a bimmangon dagiti tattao a nasapa iti bigat, adtoy, dagitoy bangbangkayda amin.” (2 Ar-ari 19:35) Makitayo ti nakaskasdaaw a pannakabalin dagiti anghel​—kinasapulan laeng ti maysa nga anghel a mangpapatay kadagiti 185,000 a bumusbusor iti Dios ken iti ilina!

Ti manangtabbaaw a ni Herodes ket sinaranget met ti pannakabalin iti maysa nga anghel. Idi ni Herodes rinugianna a panunoten ti bagina met laeng a kas maysa a dios, “dagus a ti maysa nga anghel ti Apo kinabilna gapu ta dina pinadayawan ti Dios; ket inigges ket natay.”​—Aramid 12:21-23.

Naipakaammuantayo a din agbayag, inton iyeg ti Dios daytoy intero a dakes a sistema dagiti bambanag iti panungpalanna, dagiti anghel mausardanto manen kas manangpapatayna. “Ti Anak ti tao ibaonnanto dagiti anghelna, ket kayaskasendanto iti pagarianna dagiti amin a pakaitibkolan ken dagiti agaramid ti kinadakes, ket isungroddanto ida iti horno iti apuy.”​—Mateo 13:41, 42.

Gapuna, dagiti anghel ket saan a kas iti pagpagarupen dagiti adu a tattao. Ti autor iti Aleman a relihion a ni Dr. Manfred Barthel kinunana: “No tarigagayantayo a pagarupen dagiti anghel iti Apo a kas iti panangmatmat dagiti autor iti Daan a Tulag kadakuada, umuna masapul a lipatentayo dagiti kallidan a kerubin . . . a mangarkos kadagiti kard a pangkablaawtayo.”​—What the Bible Really Says.

Kasano nga Apektarannakayo dagiti Anghel?

Nupay kasta, agtalinaed ti saludsod: Ania ti ar-aramiden dagiti anghel itatta? Ap-apektarandatayo aya a mismo itatta? Wen, pudno nga ap-apektarandatayo!

Laglagipenyo nga iti padtona maipapan “ti panungpalan iti sistema dagiti bambanag” impadto ni Jesus: “Ngem intono ti Anak ti tao umayto agraman iti dayagna [a mangakem iti pannakabalin ti Pagarian], ken amin dagiti anghel maikuyog kenkuana, isu ti panagtugawnanto iti trono ti gloriana. Ket iti sanguananna maurnongto dagiti isuamin a nasion, ket paglalasinendanto dagiti maysa ken maysa kadagiti tao.”​—Mateo 24:3; 25:31, 32.

Kasano a maibanagto daytoy a panaglasinlasin dagiti tattao? Impadto met ni Jesus: “Ket daytoy naimbag a damag ti pagarian maikaskasabanto iti isuamin a mapagnaedan a daga a maipaay pammaneknek kadagiti amin a nasion; ket kalpasanna umayton ti panungpalan.” (Mateo 24:14) Wen, usaren ti Dios dagiti tattaona ditoy daga a mangaramid iti sangalubongan a trabaho a panangasaba.

Ti Pagarian ti Dios isu ti gobierno a mangiyegto ti kakaisuna a solusion kadagiti parparikut iti sangatauan. Itatta, ti mensahe maipapan iti dayta ket naiwaragawagen iti isuamin a lubong babaen kadagiti nasurok a tallo a milion a Saksi ni Jehova, nga addaan kadagiti anghel a mangsupsuportar kadakuada. “Kastanto ti mapasamak inton panungpalan iti sistema dagiti bambanag: dagiti anghel rummuardanto ket lasinlasinendanto dagiti dakes manipud kadagiti nalinteg.”​—Mateo 13:49.

Daytoy nga inturong ti anghel a trabaho a panangasaba itatta umaw-awat iti agduduma a panagtignay kadagiti tattao. Dadduma ti agkuna nga okupadoda unay tapno umimdeng wenno basta agkedkedda nga umimdeng. Dadduma ti madi nga umimdeng wenno agduaduada. Kaskasdi, adu a nasingpet-panagpuspusona, ti maseknan maipapan iti masanguananda, ket situtulokda a nangipangag. Kasano?

Kadagiti 208 a dagdaga, mangikunkondukta dagiti Saksi ni Jehova iti panangiyadal iti Biblia kadagiti minilion a tattao a “sipapanunot iti naespirituan a kasapulanda” ken dagidiay a ‘mabisbisinan iti kinalinteg.’ (Mateo 5:3, 6) Adu a kapkapadasan ti mangipakita a masansan dagiti anghel ti mangiturong kadagiti ad-adipen ti Dios a mangsarungkar kadagiti nasingpet-panagpuspusona a tattao babaen iti mensahe iti pannakaisalakan. Ti Apocalipsis 14:6 simbolikal a deskribirenna ti maysa nga “anghel a tumaytayab iti tangatang” nga addaan iti “naimbag a damag nga agnanayon kadagiti agnaed iti rabaw ti daga.” Pudno a mapaspasamak dayta itan! Kasano a daytoy apektaranna ti masanguananyo?

Dagiti Anghel iti Masanguananyo

Ti Biblia nalawag nga ilasinna ti tiempotayo a kas “ti maudi nga al-aldaw” daytoy agdama a sistema. (2 Timoteo 3:1-5) Ipakaammo pay kadatayo ti Biblia a dagiti anghel “agtaktakderdan kadagiti uppat a suli ti daga, a laplapdanda dagiti uppat nga angin.” (Apocalipsis 7:1) Ania ti kaipapanan daytoy a simbolismo?

Gaput’ addada kadagiti “suli” iti daga, dagiti anghel addada iti saad a mangibulos kadagiti makadadael nga “angin” manipud iti amin a direksion. Awan ti lugar ditoy daga a mailaksid, isu a kaipapananna a ti “pannakadangran,” wenno pannakadadael, daytoy dakes a sistema ken dagiti mangsupsuportar iti dayta. Dagiti anghel ngarud ti nadeskribir a kas sisasaganan nga agtignay inton maited ti senias!​—Apocalipsis 7:3; 19:11-21.

Ti makadadael a “panangdangran,” nupay kasta, ket maipaay laeng kadagidiay saan a mangipangag iti sinuportaran dagiti anghel a mensahe a maikaskasaban iti isuamin a daga. Saannanto a dangran dagidiay a mangsapsapul iti Dios ken dagidiay a mangipangag iti mensahe iti Pagarian. Dagitoy maitalimengdanto, kas kunaen ti Sao ti Dios: “Birukenyo ni Jehova, dakayo amin a naemma iti daga . . . Birukenyo ti kinalinteg, birukenyo ti kinaemma. Nalabit a dakayo maitalimengkayto iti aldaw iti pungtot ni Jehova.”​—Sofonias 2:3.

Anianto ngarud ti kasasaad dagita a “naemma”? Ti Salmo 37:11 kunaenna: “Ti sililinteg tawidennanto ti daga, ket agtaengto kenkuana nga agnanayon.” (Salmo 37:29) Dayta kaipapananna nga addanto biag nga agnanayon ditoy daga a mapagbalinto a maysa a paraiso, kas impamatmat ni Jesus.​—Lucas 23:43.

Gapuna, ti saludsod a masapul nga imtuodenyo ket: ‘Anianto ti masanguanak?’ Ti sungbat agpannuray iti no kasano ti panagtignayyo iti panangiturong ti anghel. Umimdengkayo aya ken mangipangag no maiparang kadakayo ti mensahe a supsuportaranda? No ipangagyo, mairamankayto kadagidiay a mangin-inanama a buyogen iti panagtalek iti masanguanan nga addaan iti sigurado a kari iti Dios: “Ti lubong aglabas ken ti dakes a tarigagayna, ngem ti agaramid iti pagayatan ti Dios mataginayon.”​—1 Juan 2:17.

[Ladawan iti panid 7]

Dagiti anghel ‘laplapdandan dagiti uppat nga angin.’ Apay?