No Apay Rebbeng nga Agintereskayo
‘INTERESADO iti ania?’ Ti kadadakkelan pay laeng a panagbalbaliw a mapasamak iti historia iti sangatauan! Maysa nga interamente a baro a gobierno nga aramiden ti Dios ti ngangnganin a sumukat iti naindagaan a disso. (Daniel 2:44) Ti panangsukat apektaranna ti tunggal lalaki, babai, ken ubing—nga agpaay iti pagimbagan wenno pagdaksan. Daytoy nakaskasdaaw a panagbalbaliw ti mapagtengto iti las-ud ti kaputotan a nadakamat iti Mateo 24:34. Gapuna, ti mensahe maipapan iti dayta a panagbalbaliw kalikagumanna ti naimpusuan ken napasnek nga interes dagiti amin a tattao. Pudno unay, agbalin a di umiso ti panagkuna, ‘Saanak nga interesado.’
Idi Adu ti Nangipakita iti Kinaawan ti Interes
Ti moderno nga aldawtayo ket saan nga isu ti damdamo nga importante ken naganat a mensahe a naiyanunsio a rebbeng a mamagtignay iti panaginteres kadagidiay a naawis a dumngeg iti dayta. Ti kaaldawan ni Noe ti maysa kadagita a tiempo. Gapu iti kinadakes, imoral, ken ti naranggas a personalidad ti tao iti dayta a tiempo, pinanggep ni Jehova a Dios a dadaelen ti sangatauan babaen ti sangalubongan a layus. (Genesis 6:5-7, 13) Nupay kasta, sakbay ti panagtignayna a mangtalipupos kadagiti nadangkes, inyurnosna ken ni Noe, a manangaskasaba ti kinalinteg, a pakdaaranna ida iti um-umay a Delubio ken ti panagtignay a kasapulan a surotenda tapno maispal ti biagda. Ngem agpapan pay kinaimportante dayta a mensahe, dagiti tattao a kaaduan a nakangngeg iti dayta ket “saanda nga inkaskaso.” (Mateo 24:39; Lucas 17:26, 27; 2 Pedro 2:5) Isudat’ aleng-alengda, awan panangikankanoda—saanda latta nga interesado! Gapu iti daytoy, napukawda ti isuamin.
Umas-asping la unay ti napasamak met idi kaaldawan dagiti agnaed iti napalalo ti kinadakesna a siudad ti Sodoma ken Gomorra. Nupay napakdaaranda iti umasidegen a pannakadadaelda gapu iti napalalo a kinadakesda, saanda a nangipangag. Uray isuda saanda nga interesado iti asinoman a mangriribuk iti kasasaad ti panagbiagda. Ti lalaki a ni Lot ti kakaisuna a naisalsalumina.—Genesis 18:20-30; 19:1-29; Lucas 17:28-30.
Gapuna, ti mensahe ti di popular kadagiti agnaed kadagidiay a siudad. Nalabit ad-adda a maseknanda maipapan iti pampanunoten dagiti kaarrubada kadakuada no nangipakitada ti interes. Wenno nalabit agamakda nga agaramid ti aniaman a panagbalbaliw iti panagbiagda a saanda a kayat nga aramiden. Kaawatan, tagtagiragsakenda ti nalulok nga estilo ti panagbiagda. (Judas 7) Gapuna agingga iti aldaw nga iyaayen ti pannakadadaelda, awan pulos sinussuspetsada ket dida naawatan no ania ti dandanin mapasamak.
Dagidiay Di Interesado Idi Kaaldawan ni Jesus
Idi ti Anak ti Dios, ni Jesu-Kristo ket adda ditoy daga, imbaonna dagiti paspasurotna a mangiyanunsio ti naimbag a damag maipapan ti nailangitan a gobierno ti Dios. (Mateo 10:7) Kinapudnona, sinursuruanna dagiti adalanna iti pamay-an a panangiparangda iti daytoy karkarna ken importante a mensahe iti tunggal pagtaengan ken no ania dagiti addang nga alaenda no dagiti bumalay saanda a nangipakita iti pudpudno nga interes. Isut’ denggenyo bayat a sansanayenna dagiti adalanna: “Ket no sumrekkayo iti balay, agkablaawkayo; ket no ti balay maikari, ipaayyo koma kenkuana ti talnayo; ngem no saan a maikari, ti talnayo iyawidyo. Ket uray siasino a saan nga umawatto kadakayo ket saan a dumngeg kadagiti saoyo, no pumampanawkayon iti daydiay a balay wenno ili pampagenyo ti tapuk dagiti saksakayo.”—Mateo 10:12-14.
Kitaenyo a binilin ni Jesus dagiti adalanna a “pampagen[da] ti tapuk kadagiti saksaka[da]” no panawanda ti maysa a pagtaengan wenno ili a sadiay adda naan-anay a kinakurang ti interes iti Pagarian ni Jehova. Aniat’ kayatna a sawen iti daytoy a pammalakad? Ti panangpampag ti tapuk manipud saka ti maysa ipamatmatna ti panangikkat iti responsabilidad wenno sungsungbatan kadagiti mapasamak a sagabaen ti maysa a bumalay gapu iti kinakurang ti interesna iti mensahe ti Dios. Isingasing dayta a dagiti paspasurot ni Jesus ti sitatalna a pumanawda ken tallikudanda dayta a balay wenno siudad kadagiti mapagteng a mapasamakto a naggapu iti Dios.
Mangipakita iti Interes—Kaipapanan Dayta ti Biagyo!
Makapainteres a maammuan nga inyarig ni Jesu-Kristo ti panagtignay iti kaaldawantayo kadagiti kaaldawan iti Sodoma ken Gomorra. (Mateo 24:37-39; Lucas 17:26-30) Ti imoralidad ken kinaranggas ti aglaplapusanan nga agpadpada idi kaaldawan ni Noe ken idi kaaldawan ni Lot. Pudno unay, matutuok ni nalinteg a Lot ken mariribukan a mangpalpaliiw iti kinadakes ken iti nalulok a kababalin dagiti agtataeng iti Sodoma ken Gomorra.—2 Pedro 2:6-8.
Kaskasdi, idi dinakamat ni Jesus ti kaaldawan ni Noe ken ni Lot, insentrona ti atensiontayo, saan nga iti imoralidad ken kinaranggas dagidiay a panawen, no di ket, kadagiti inaldaw-aldaw a pakaseknanda—pannangan, panaginum, panagasawa, pannakaiyasawa, panaggatang, panaglako, panagbangon, ken panagmula. Impamatmatna nga adu dagiti dinto mangipangag iti naimbag a damag ti Pagarian ti Dios no di ket okupadoda kadagiti inaldaw-aldaw nga ar-aramid ti panagbiag ket iti kasta awan impakitada nga interes iti pangpanggep nga aramidento ni Jehova. Ti mensahe ket maysa a biag wenno ipapatay ti kinapategna. Ti di panangipangag ket agbalinto a nakangingngina. Ti di panangikankano wenno panangipakita iti kinaawan interes ket serioso a basol.—Idiligyo iti Mateo 6:31, 32.
Kasano kaserioso? Intuloy nga inlawlawag ni Jesus: “Iti Aldaw ti Panangukom mangipakitanto ti Dios ti ad-adu nga asi kadagiti tattao iti Sodoma ken Gomorra ngem kadagiti tattao iti dayta nga ili” a di nangipangag wenno di nangipakita ti interes. (Mateo 10:15, Today’s English Version) No ti maysa a tao ket mangipakita ti interes, dumngeg, ken mamati iti mensahe, uray no isu idi ti narugit ken narungsot, mabalinna a baliwan ti personalidadna ket makasarakto iti pabor iti imatang ni Jehova tapno makakualipikar kas maiturayan iti Pagarian, kas met laeng dagiti immuna a Kristiano idiay Corinto.—1 Corinto 6:9-11.
Kadagiti isuamin a pannakipatpatangna kadagiti adalanna, ingunamgunam ni Jesu-Kristo kadakuada a dumngegda, mangipangagda, a mangipakita ti interes iti importante a mensahe iti Pagarian ti Dios. Tapno matignay ti atension dagidiay pakisarsaritaanna, binalakadanna ida: “Imdenganyo ngarud kas mangngegyo.” “Ti adda pagdengngegna dumngeg koma.” “Dumngegkay amin ket awatenyo.” “Dumngeg ket awatenyo.”—Lucas 8:18; Marcos 4:9; 7:14; Mateo 15:10.
Gapuna, ti sumaganad a maysa kadagiti Saksi ni Jehova sumarungkarda iti pagtaenganyo, agpaay a pakagunggonaanyo no kunaenyo: ‘Sumrekkayo, interesadoak.’