Dagiti Saludsod Manipud Kadagiti Managbasa
◼ Ni aya Judas ti tuktukoyen ni Jesus idi kinunana ken ni Pilato: “Gapuna ti nangyawat kaniak kenka dakdakkel ti basolna”?—Juan 19:11.
Agparang a kasla saan a tuktukoyen ni Jesus ditoy ni Judas wenno ti asinoman a sabali a tao. Sumagmamano a nakabasol a tattao ti nairaman kadagiti pasamak a nagturong iti pannakaipasango ni Jesus ken ni Pilato ken naipasango ken patay.
Awan duadua, a ni Judas ti umuna a malagip agsipud ta dayta nagdakes nga apostol ti nagtraidor. (Juan 6:64, 71; 12:4-6) Simmango ni Judas kadagiti pangulo a papadi, nga “agsapsapulda ti pamuspusan ti panangpapatayda” ken Jesus. Binayadanda ni Judas ti 30 a kapisi ti pirak tapno isut’ ilibakna. (Lucas 22:2-6) Ngarud, saanen a pagduaduaan, a dakkel ti basol ni Judas maipapan iti ipapatay ni Jesus.
Ngem saan a nagbukbukod ni Judas a nangiyeg iti ipapatay ni Jesus. Ti nangato a padi a Caifas ti nangidaulo kadagiti dadduma a panangpapatay ken ni Jesus. (Juan 11:49, 50) Insalaysay ni Mateo nga apaman a “dagiti panguluen dagiti papadi ken ti intero a Sanhedrin” ti nangkondenaren ken Jesus, nagtignayda a sangsangkamaysa. “Isuamin dagiti turayen dagiti papadi ken panglakayen dagiti umili nagnunumoda iti maibusor ken Jesus tapno papatayda. Ket, isu pinarautanda, ket impanda ket inyawatda ken Poncio Pilato a gobernador.” (Mateo 26:59-65; 27:1, 2) Mainayon pay, kalpasan a ni Pilato nasarakanna ni Jesus nga awan basolna, “dagiti umili” indawatda a ni Barrabas ti wayawayaanda. Maigiddiat iti dayta, maipapan ken Jesus impukkawda: “Mailansa koma!”—Mateo 27:20-23; Juan 18:40.
Gapuna mabalin nga awan espesipiko nga indibidual a tuktukoyen ni Jesus idi nga isut’ nagkuna ken ni Pilato: “Gapuna ti nangyawat kaniak kenka dakdakkel ti basolna.” (Juan 19:11) Nupay ni Judas, “daydi anak ti pakadadaelan,” ti nangibaklay ti nadagsen a basol, adu pay dadduma a nakiraman iti basol a panangpapatay ken ni Jesus. (Juan 17:12) Isut’ gapuna nga idi aldaw ti Pentecostes inawagan ni apostol Pedro dagiti Judio nga agbabawida iti nasaem a basolda maibusor iti Anak ti Dios. (Aramid 2:36-38) Dagita a Judio ket paset ida ti maysa a nasion a dedikado iti Dios ni Jesus, nga isu ni Jehova. Adda kadakuada dagiti padto a nangipabigbig ken Jesus kas ti Mesias. Ket adu kadakuada ti nakakita kadagiti milagrona. Gapuna sigurado a dakdakkel ti basolda ngem iti daydiay opisial a di Judio a nagkuna nga awan babak ni Jesus.—Juan 18:38.
◼ Aniat’ punto a kayat a sawen ni Jehova idi imbagana ken Ezequiel a ti rupana agbalinto a natangken, kas ti ruprupa dagiti Judio?
Ni Ezequiel ket mammadto ti Dios, a nagserbi kadagiti Judio a nakayawan idiay Babilonia. Mabalin nga impato dagitoy a kayaw a ni Jehova ti daras a mangalawto kadakuada agsipud ta isudat’ ili a pinilina. Saanda nga inakseptar ti kinapudno a ti napadasanda dimteng kadakuada gapu ta maikarida iti pungtotna.
Gapuna idi ni Jehova inturongna ni Ezequiel nga “isaom dagiti saok kadakuada,” saan a nalaka a trabaho dayta. Iti panangisaganana iti mammadto, namakdaar ti Dios a “saandakanto nga ipangag, ta saandak nga ipangag; ta amin a balay ti Israel natangken ti mugingda ket natangken ti pusoda.”—Ezequiel 3:4, 7.
Iti daytoy a punto kinuna ti Dios ken Ezequiel: “Adtoy! Pinarupangetko ti rupam a maibusor kadagiti ruprupada ken ti mugingmo a natangken a maibusor kadagiti mugmugingda. Inaramidko ti mugingmo a kas pamulinawen a natangtangken ngem bato a pagpinkian. Dika agbuteng kadakuada.”—Ezequiel 3:8, 9.
Dagiti tattao ti natangken ken nasukirda. (Ezequiel 2:6) Maparmekdanto aya wenno mabutbutengda ti mensahero ti Dios? Saan. Gapu ta adda tulong ti Dios, saanto nga agbalin a naluklukneng ni Ezequiel ngem kadakuada. Ti pagpinkian ti nakatangtangken a bato, natangtangken pay ngem asero. No dagiti natangken, di matignay a Judio ket maiyarigda iti pagpinkian, kasta met ken ni Ezequiel. Nakarkaro pay, isut’ agbalin kas briliante, ti katatangkenan kadagiti mineral; nakatangtangken a daytat’ mausar pay a panggaradgad uray ti pagpinkian.—Jeremias 17:1, 2.
Siempre saan a kayat a sawen daytoy a ti ili ti Dios itatta ibilangda a makaay-ayo ti panagbalin a natangken, a di makarikrikna iti panagrikrikna dagiti sabsabali, wenno agbalin pay nga awan ayatna iti panagaramid ti patienda nga umiso. Amadenyo ti inggunamgunam ni apostol Pedro maipapan iti interpersonal a pannakilanglangen: “Agmaymaysakay koma amin iti nakem, a mangipakpakita ti pannakipagrikna iti kadua, agdidinnungngokayo a kasla agkakabsat, manangngaasi, naemma, a dikay supapakan ti dakes iti dakes, ti lunod iti lunod, no di ket ikararaganyo ida.”—1 Pedro 3:8, 9.
Ti pannakipagrikna ket maysa met kadagiti pamunganayan a motibo iti panangiranudtay ti naimbag a damag ti Pagarian kadagiti dadduma. (Mateo 9:36-38) Ngem uray no maipasangotayo kadagiti panangiyaleng-aleng, pananglaksid, wenno nabatad nga ibubusor, ditayto agsardeng a mangiproklamar ti mensahe ti Dios nga agpaay iti tiempotayo. Ramanen dayta ti panangiwaragawag nga iti mabiiten “balsenna dagiti saan a mangammo iti Dios ken di agtulnog iti naimbag a damag ni Apotayo a Jesus.” (2 Timoteo 1:6-9) Masapul a ditay koma agamak wenno agkedked. Iti daytoy a pannakaawat agbalintayo a pimmamulinawen kas idi ken Ezequiel.