Report dagiti Manangiwaragawag ti Pagarian
Ti Naimbag a Damag Rumangrang-ay idiay Cyprus Uray Mabusbusor
NI APOSTOL Pablo inkaskasabana ti naimbag a damag ti Pagarian idiay Cyprus. (Aramid 13:4-12) Daytat’ idi 47-48 K.P. Itatta, ti naimbag a damag ti maikaskasaban iti daytoy nagpintasan nga isla babaen kadagiti 1,154 a Saksi ni Jehova, ket idi Abril itoy a tawen, 2,570 ti timmabuno iti serbisio ti Memorial, a mangipakpakita nga adu pay dagiti nasingpet-panagpuspusona ken managbuteng iti Dios a tattao nga adda iti daytoy nga isla. Ngem numan pay adu a tattao ti mangab-abrasa iti natalna a mensahe ti Biblia nga iparparang dagiti Saksi ni Jehova, dagiti klerigo ti Greek Orthodox, kas met laeng kadagiti klerigo a Judio idi panawen ni Jesus, ti mangbusbusor iti trabahotayo. (Juan 15:20) Insurat ti sanga idiay Cyprus: “Iti ad-adda pay ngem iti napalabas, ipakpakita ti Greek Orthodox Church ti determinasionna a mangriribuk iti trabahotayo a panangasaba.” Kalpasanna ti report insalaysayna no kasanot’ panangrirriribuk dagiti klerigo kadagiti kakabsat iti ministerioda a panagbalaybalay ken ti panangsulsulbogda kadagiti kakabsat tapno padpadasen nga allukoyen ida iti maysa nga argumento. Inakusarda ida a mangpatpataud ti gulo, ngem dagiti kakabsat madi a pasulbog ket pumanawda lattan.
Pudno unay, ti ibubusor dagiti klerigo ti masansan agbalandra, kas ipakita ti sumaganad a kapadasan: “Sumagmamano a bulan ti napalabasen, maysa a babai ti nangrugi a makipagad-adal ti Biblia kadagiti Saksi ni Jehova, ken iti nabiit pay timmipon metten ni lakayna. Kalpasanna maysa a teologo ti bimmisita itoy a pagassawaan, a mangin-inanama a makumbinsirna ida a mangisardengen ti panagad-adalda ti Biblia. Pinadpadas ti teologo nga ilawlawag ti Trinidad kadakuada. Kalpasan ti apagkanito ti asawa a lalaki ti bimmallaet ket kinunana: ‘Diak maawatan no kasano a ni Jesus, nga addan idiay langit iti pisikal a bagi, kas panagkunam, ket maigiddato iti dayta kaduana ti Dios nga adda iti espiritu.’ Ti sungbat ti teologo ket: ‘Bueno, saan a kasapulan a maawatam amin.’ Kuna ti tao nga interesado: ‘Ngem maawatak a ni Jesus isut’ Anak ti Dios ket saan nga isut’ Dios mismo. Diak kayat a denggen pay ti maipapan iti Trinidad.’ Ket iti daytoy timmakderen ti teologo ket sipupungtot a kinunana: ‘Adelantadokay la unay iti panagad-adalyo ti Biblia. Saankayo a mabalbaliwan.’”
Itan ti asawa a babai ti mapmapanen kadagiti isuamin a panaggigimong ken nabautisaranen idiay “Agtalek ken Jehova” a Kumbension Distrito. Ti asawa a lalaki ti mangitultuloy pay ti panagad-adalna ken tumabtabuno metten iti sumagmamano kadagiti gimongtayo.
“Gapuna, agpapan pay ti reggetda, dagiti klerigo ket saanda a maragragpat ti kalatda,” kuna ti report manipud sanga nga opisina ti Cyprus. “Imbes ketdi, ti mapalpaliiwmi a ta ad-adu nga interesado a tattao ti makigimgimongen ngem idi. Maigiddato iti dayta, dagiti kakabsat ti ad-adda a determinado a mangipan ti naimbag a damag kadagiti nasingpet panagpuspusona a tattao.” Ni Jehova ti mangsupsuportar kadagiti nasungdo a tattao kas inkarina idiay Jeremias 1:19: “Ket makibakaldanto kenka, ngem saandakanto nga atiwen, ta ‘Siak addaak kenka,’ kuna ni Jehova, ‘tapno isalakanka.’”