Ti Naindaklan a Pintor—Ni Jehova!
“DAGITI pintor ket mangiladladawanda kadagiti di mabilbilangen a panagleggak ken panaglennek ti init, ket ti ar-aramidda malako iti ginasgasut, rinibribo pay, a doliares. Kaskasdi, ni Jehova a Dios, ti Naindaklan a Pintor ken Namunganayan dagiti panagleggak ken panaglennek ti init, ti mangmangted kadatayo ti maysa iti tunggal aldaw—nga awan bayadna. Dagiti orihinal adayo a lab-awanda dagiti kopia laeng. Di aya rebbeng a mangted dayta kadatayo ti panggapuanan a mangapresiar kenkuana kas ti Namarsua?” Kastat’ panangirason ti maysa nga agdaldaliasat a manangaywan dagiti Saksi ni Jehova idiay Hawaii bayat ti maysa kadagiti palawagna iti kongregasion.
Maysa a babai nga ateista, a damo a bumisita idiay Kingdom Hall, ti kabilang dagiti agdengdengngeg. Pinampanunotna ti panagrasrason ti ministro, ngem adda pay latta nabatbati a napigsa a panagduaduana iti kaadda ti Dios. Nupay kasta, idi agmammaneho nga agturong idiay balayda manipud panggedanna ngangngani dua a tawen kamaudiananna, isut’ nakemmeg iti trapiko gapu ta panagaawiden. Daytoy ti nakagaput’ pannakaimatangna ti naisangsangayan unay nga ilelennek ti init. Ti pampanunotna nagsubli iti palawag daydi agdaldaliasat a manangaywan.
Insalaysayna: “Imbes a masimronan gaput’ pannakakemmeg iti trapiko, nakitak ketdi ti nagpintas nga ilelennek ti init, ket impalagipna kaniak ti kinuna daydiay managpalawag maipapan iti panangapresiar ken Jehova a Dios kas Pintor ken Manamarsua. Daytat’ namagpanunot kaniak, ‘Nalabit ti kinunana ket agpayso; nalabit adda a talaga ti Manamarsua.’ Pinampanunotko dayta bayat nga intultuloyko ti panagawidkon, ket iti dayta a rabii inawagak ti gayyemko a damo a nangawis kaniak idiay Kingdom Hall. Rinugiak ti makipagadal ti Biblia, ket itan agdaydayawakon ken Jehova kas Diosko ken Manamarsuak.”
Kas ti salmista, saan laeng nga inapresiar daytoy a babai ni Jehova kas ti Naindaklan a Pintor ti panamarsua no di pay ket nagkanta ti panangidaydayaw kenkuana. Insurat ti salmista: “Idaydayawyo ni Jehova manipud kadagiti langlangit . . . Idaydayawyo, init ken bulan. Idaydayawyo, dakayo amin a bituen nga agsilnag. . . . Idaydayawda koma ti nagan ni Jehova; ta isu nagbilin, ket naparsuada.”—Salmo 148:1-5.