Nadiosan a Kinahustisia​—Maysa a Pagraragsakan!

“BUMUYOGKAY . . . ‘Agarin Jah; agrag-otay.’” Dagidiay a sasao ti paset ti maysa a kanta iti bibig ti agarup 9,000 nga Arabe, Griego, Italiano, Portugues, ken Español a delegado iti “Nadiosan a Kinahustisia” a Kumbension Distrito idiay Montreal, Canada. Nagpupunipon dagiti kumbensionista idiay uneg ti Olympic Stadium maipaay kadagiti pangserra a kanito daytoy uppat-nga-aldaw a kumbension tapno makidanggayda iti panagkanta kadua dagiti 36,900 a delegado nga addan iti estadium.

Ti grupo dagiti dadduma a pagsasao ket presenteda met para iti isu met laeng a programa ti kumbension kadagiti arubayan nga arena ken auditorium. Ita timmipondan kadagiti kumbensionista a Pranses ken Ingles iti makatukay a panangipamatmat ti panagkakabsat ken kinasungdo​—banag a matungpal laeng kadagiti ad-adipen ti Dios ti pudno a kinahustisia, nga isu ni Jehova. Gapu iti nakasaksaknap a kinaulpit iti moderno a lubong, ti tema ti kumbension​—“Nadiosan a Kinahustisia”​—ket pudno a naintiempuan. Nailagalaga iti intero a programa, daytoy a tema pinabilegna ti panangapresiartayo iti daytoy nakapatpateg a galad ni Jehova a Dios.

“Naragsak dagiti Mangsalimetmet ti Kinahustisia”

Isu daytoy ti tema ti umuna nga aldaw ti kumbension. (Salmo 106:3) Ti palawag a panangabrasa ti tserman pinagbalinna a nalawag a ti nadiosan a kinahustisia ket saan laeng a ti nalamiis a legal a panangwatwat ti hudisial a bambanag. Imbes ketdi, isut’ panangtaginayon no aniat’ nalinteg iti awan panangidumdumana ken natimbeng a pamay-an sigun kadagiti pagalagadan ti Dios. Ni Jehova ti mangikeddeng kadagiti kangatuan a pagalagadan ken isut’ naan-anay iti kinahustisia agsipud ta petpetpetanna dagitoy. Gapuna, maikuna nga “amin a dalanna kinahustisia.”​—Deuteronomio 32:4.

Ad-adda manen a naitampok daytoy iti kangrunaan a palawag, a napauluan “Agminar ti Kinahustisia kadagiti Dalan ti Dios.” Nikaanoman saan a simmina ni Jehova kadagiti nalinteg a pagalagadanna no di ket us-usarenna dagiti isu met laeng a nalinteg a pamay-an iti pannakilangenna iti imperpekto a sangatauan. (Malakias 3:6) Nupay dadduma siuulbod nga ak-akusarenda ti Dios a di nalinteg gapu ta makitkitada ti nakaad-adu a kinakurang ti kinahustisia iti natauan a kagimongan, isut’ saan a responsable iti kinakillo ti managbasol a sangatauan.

Yantangay ni Jehova ket managayat ti kinahustisia, namnamaenna met ti panangwatwattayo iti daytoy a kualidad babaen ti panagaramid iti umiso ken ti nainkalintegan. Rebbeng nga aramidentayo daytoy kadagiti padatayo a tattao ken iti pamiliatayo, iti uneg ti kongregasion, ken iti amin a paset ti panagdayawtayo. Daytoy ti mangiyeg kadagiti nabaknang a bendision, kas makita manipud naiparang iti programa bayat ti nabati a tallo nga aldaw ti “Nadiosan a Kinahustisia” a Kumbension Distrito.

“Awatenyo ti Disiplina a Mangted Pannakaawat”

Ti maikadua nga aldaw ti kumbension ket addaan iti dayta a tema, a naibatay iti Proverbio 1:3. Naigunamgunam kadatayo nga “Awaten ti Disiplina ket Agbalin a Masirib,” a daytat’ paulo ti immun-una a paset ti programa. Ti disiplina manipud ken Jehova tandaanna ti wagas ti panagbiag a ramanenna ti pananggugor kadagiti pampanunottayo ken moral a kababalintayo. Ebkas met dayta ti panagayat ti Dios kadatayo. (Hebreo 12:4-11) Ti kasta a disiplina pagbalinennatayo a sensitibo kadagiti kangatuan a pagalagadan ti kinahustisia​—ti nadiosan a kinahustisia.

Dagitoy positibo a sasao ti sinaruno ti palawag nga “Agdaluskayo iti Isip ken iti Bagi.” Anian a makatignay-panunot dayta! Impaganetgetna ti pannakasapul ti panangipaaytay ti bagbagitayo iti Dios kas nasin-aw, nadalus, ken nasantuan nga ili. Apay? Ngamin ta ni Jehova ti katan-okan iti kinadalus ken kinasanto​—maysa a kasasaad a mangilasin kenkuana kadagiti amin a narugit a didiosen dagiti nasnasion. Sipapanunot iti daytoy a palawag, kuna ti maysa nga agtutubo a kabsat a lalaki: “Isuamin maipapan iti mental, moral, pisikal, ken naespirituan a kinadalustayo ti nasukimat. Ti panagkawkawestayo, ti panagbubuoktayo, ti pagtaengantayo, ti kotsetayo, ken ti personalidadtayo ket naikkan amin ti atension.” Kunat’ maysa a panglakayen: “Ti panangannurot ti kasta a balakad ti mamagbalin kadagiti kakabsattayo a nakamimminar nga ad-adda pay kadagiti tattao iti aglawlawda ken mangted ti kalalainganna a salun-at a di pagaammo iti lubong nga en heneral.”

Ti moderno-aldaw a drama a “Natandaan a Maipaay iti Pannakaispal” ti nangnayon ti rikna ti kinaganat iti programa, ta iti mabiiten masapul a mapennek ti nadiosan a kinahustisia. Daytoy makatukay-puso a presentasion ti nakabatbatad a nangipakita ti kinaganat ti isuamin a luktan ti matmatada iti kinapateg dagiti panawentayo. Pudno unay, sakbay a matalipupos ti ulbod a relihion, masapul nga agkamangtayo iti lugar a pagkamangan ken masapul a sipipiho a matandaan a maipaay ti pannakaispal.

Iti malem, ti simposium dagiti pumapalawag pinaneknekanda ti pannakasapul ti “Panangdisiplina iti Kinalinteg iti Uneg ti Pamilia.” Nabagbagaan dagiti assawa a lallaki ken amma a maaddaanda koma ti naespirituan a programa iti pagtaengan, nga idauluanda ti panagkararag, panagadal, ken ti sagrado a serbisio. Dagiti kualidad ti maysa a lalaki nga adda iti ama ken no kasanot’ panangipakitana ti kinaulona ket dakkel maitulongna iti panangmatmat ti ubing iti autoridad, nadiosan man ken natauan. Gapuna, masapul a dagiti Kristiano nga amma agbalinda a nainkalintegan ken di agbaliwbaliw iti panangdisiplinada. Masapul ti panangipakitada ti empatia ken kinabara, iti kasta agbalin a silulukat dagiti linea ti komunikasion kadagiti annakda.

Naparegta dagiti nagannak nga ibagay ti panangisuroda kadagiti annak. Nasken nga ipaay ti pannakaawat kadagiti annak babaen ti panangpanunot no kasanot’ panangisuro ken no aniat’ isuro tapno madanon ti puspusoda. Ti panggepna ket isu komat’ panangimpluensia ti kinapudno ti intero a pamilia iti makaay-ayo a pamay-an.

Ti maudi a nagpalawag iti daytoy a simposium ti nangaramid ti nabara a panagapelar kadagiti annak nga aramidenda koma ti namnamaen ni Jehova kadakuada iti uneg ti urnos ti pamilia. Naigunamgunam kadagiti agtutubo a lisian ti umaalsa nga espiritu ti nalulok a kagimongan itatta ken pagrag-oan ti disiplina a mangted ti pannakaawat.

Kadagiti sasao a naibatay iti Proverbio 2:1-9, naparegta dagiti kumbensionista nga “Itultuloyyo a Biruken kas Nalmeng a Gameng.” Naiyilustrar a dagiti naespirituan a batbato ti masarakan babaen iti naanep a panagadal ken panagsukimat. Nagpalawag iti tema a “Dumawat ken Jehova ti Pannakaawat,” inlawlawag ti sumaganad a pumapalawag a ti pannakaawat ket isut’ abilidad a makakita ti adda a kasasaad, a kumita iti labes ti saanen a pagduaduaan ket maawatan ti kaipapanan ti maysa a banag. (Mateo 13:13-15; Roma 3:11; Efeso 5:17) Daytoy nakaay-ayat nga aldaw ngarud ti dimteng iti tampokna idi ti Olympic Stadium ket naisilpo babaen ti telepono kadagiti adu a siudad idiay Canada ken Estados Unidos. Ti dua-kapaset a simposium ti tinampokan ti pannakairuar ti dua-tomo a publikasion nga Insight on the Scriptures, a naglaon ti nasurok ngem 2,500 pinanid a makaisuro nga artikulo ken ilustrasion a mangpatadem ti apresiasiontayo kadagiti naespirituan a bambanag.

“Napudno ken Nalinteg dagiti Panangukomna”

Iti maikatlo nga aldaw, nga addaan ti tema a naibatay iti Apocalipsis 19:2, adut’ mangparagsak kadatayo. Ti palawag a “Ti Moral a Kinadalus Isut’ Kinapintas ti Agtutubo” napigsa ti panangallukoyna kadagiti agtutubo. Naipaganetget ti panangipategda koma ti kinapintas a nainaig iti panangsalimetmet kadagiti pagannurotan ti Dios iti pisikal, moral, ken naespirituan a kinadalus. Dagiti nabatad a seksual a kankanta, dagiti imoral a programa iti telebision, dagiti pornograpiko a pelikula ken literatura, ken ti panangpilit dagiti padada nga agtutubo ti masansan a mangbombomba kadagiti agtutubo a Kristiano. Sigun iti maysa a gubuayan, ti laeng naidaddaduma nga agtutubo ti di pay nakaraman ti pannakidenna sakbay ti panagasawa inton mangtenganna ti edad a 19. Ngem nagsipat a sibabara dagiti agdengdengngeg idi kinomendaran ti nagpalawag dagiti rinibo nga agtutubo a Saksi a mangipakpakita nga isudat’ naidaddaduma babaen ti panangsalimetmetda ti nangato nga estandarte ti kinalinteg. Dagiti nasapa a panagasawa ket napunno kadagiti problema, ket naipakita a dagiti sasao ni Pablo maipapan ti panagasawa gapu ta “simgedda ti derrep” ti naiturongda saan a kadagiti tin-edyers no di ket kadagidiay “limbesdan iti kabannuaganda.”​—1 Corinto 7:9, 36.

“Dikay Makisangol kadagiti Di Manamati” isut’ sumaganad a topiko. Ti panagtulnog iti bilin ti Dios a makiasawa “isuna laeng a maaramid koma a mayalubog iti Apo” ti mangispal kadatayo kadagiti nasasakit a pagtungpalanna. (1 Corinto 7:39) Mainayon pay, awanen ti ad-adda pay a makapapigsa iti panagasawa no di ti agkapada a debosion ken Jehova ken panangsalimetmet kadagiti nalinteg a pagalagadanna. Sumaruno a natulongantayo met a makakita no kasanot’ rebbeng a “Panagtignay a Buyogen ti Panagraem ken Nadiosan a Panagbuteng.”

Kalpasanna immay ti nakaay-ayat a tampok​—ti palawag a “Ti Bautismo a Mangiturong iti Paborable a Pannakaukom,” a sinaruno ti pannakaitaneb dagiti kabarbaro a dedikado a tattao. Naiyunay-unay kadakuada nga ad-adu pay ti namnamaen kadakuada ngem ti laeng panangiwaksi kadagiti rugit ti lasag. Ti panagbabawi, pannakakumberte, ken ti aginggat’ tungpal-biag a sagrado a serbisio ti masapul a mainaig iti dedikasion ken bautismoda no kayatda a tagiragsaken ti paborable a panangukom manipud ken Jehova.

Ti programa iti malem ti pudpudno a di maliplipatan. Ditoy manen babaen ti pannakaisilpo iti telepono, dagiti miembro ti Manarawidwid a Bagi dagiti Saksi ni Jehova ti nangparegta kadagiti agdengdengngeg iti intero a Norte America iti makatignay a presentasion ti simposium a “Ti Naituding a Panawen Asidegen.” Iti pinulpullo a tawtawenen, iwarwaragawag dagiti napulotan a saksi ni Jehova dagiti nadiosan a mensahe ti panangukom kontra iti Babilonia a Dakkel, ti sangalubongan nga imperio ti ulbod a relihion. Iti daytoy a kumbension, nupay kasta, dagitoy a mensahe ti ad-adda a pimmigsa ti tonoda. Ti Babilonia a Dakkel ti sibabasol iti panagsalungasingna kadagiti nalinteg a bilbilin ni Jehova. Isut’ maikari iti pannakadadael, ta “dagiti basbasolna nakagtengda sadi langit, ket ti Dios linagipna dagiti kinadangkesna.” Gapuna, impukkaw ti anghel ni Jehova, “iti maymaysa nga aldaw umayto dagiti saplitna, ti ipapatay, ken ti ladingit ken ti bisin, ken isu mapuoranto iti apuy, ta napigsa ni Jehova a Dios a mangukom kenkuana.”​—Apocalipsis 18:5, 8.

Iti tema a “Ti Mangibabain a ‘Balangkantis’​—Ti Pannakatnagna ken Pannakadadaelna,” impalawag ti maudi a pumapalawag iti daytoy a simposium ti grande a tampok ti Apocalipsis. Nagtengan daytoy a tampokna babaen iti panagboda ti Kordero, a makikallaysan iti nobiana, ti nasantuan a siudad, a mangbendision ti sangatauan iti biag nga awan inggana. Nasantipikaren ti nagan ni Jehova! Nagpatingga ti simposium babaen iti makatignay a sasao a ti naituding a panawen ti as-asidegen ngem iti panangipagaruptayo! Pudno unay, ti grande a tampok ti Apocalipsis asidegen!

Bayat a pumalpalakpak pay dagiti agdengdengngeg, immay ti pannakairuar ti baro a 320-panid a libro nga Apocalipsis​—Ti Grande a Tampokna Asidegen! Anian a pagragragsakan! Pudno a daytoy a pagbasaan ti epektibo a pamay-an a panangiyanunsio ti ipapatayen ti Babilonia a Dakkel, a dagiti nasnasion ti naipasango itan iti Armagedon, ket ni Jehova ti ngangnganin a mangdusa. Sapay koma ta amin a tattao nga addaan panangipateg sungbatanda ti imbitasion “ti espiritu ken ti nobia” nga “umay” iti dandanum ti biag. (Apocalipsis 21:2, 9; 22:17) Daytoy makaay-ayo a naiyimprenta a ruar ti sinaruno ti sabali manen a pagraragsakan. Buyogen ti naragsak a rikna, sangsangkamaysa nga inanamongan dagiti agdengdengngeg ti kumbension ti nakalawlawag ken prankesa a resolusion a nangiyebkas ti panangguratayo iti Babilonia a Dakkel.

“Kinahustisia​—Kinahustisia a Rebbeng a Surotenyo”

Naibatay iti Deuteronomio 16:20, isu daytoy ti tema ti maudi nga aldaw. Dagiti pumapalawag iti agsapa impaganetgetda ti kinapudno a tapno magunggonaan manipud nadiosan a kinahustisia, masapul a naidumatayo iti lubong. Panunotenyo ti palawag a “Panangsalimetmet ti Naespirituan a Salun-at iti Masaksakit a Lubong.” Impakita dayta no kasanot’ pananglikliktayo ti pannakakontaminar manipud di nasalun-at iti naespirituan a lubong babaen ti panagannadtayo maibusor kadagiti nailasagan a pagkapuyan, nailubongan nga impluensia, ken “dagiti pangallilaw ti Diablo.” (Efeso 6:11, 12; Roma 7:21-25; 1 Juan 2:15-17) Ti palawag a “Ti Kadi Pammatiyo Ilunodna ti Lubong?” impakitana a no addaantay ti pammati kas ken Noe, agtakdertayto a naiduma manipud iti lubong. Idi kaaldawan ni Noe, adda ti dakkel a pagdumaan dagiti nakalasat iti Layus ken kadagidiay napukaw. Kasta met laeng itatta.

Daytoy nasken a punto ti naitampok iti drama ti Biblia a “Dagiti Panangukom ni Jehova Maibusor kadagiti Managsalungasing-Linteg a Tattao.” Silalawag nga indilig dayta dagiti managsalungasing-linteg a tattao idi kaaldawan da Noe ken Lot kadagidiay agbibiag met iti tiempotayo. Ni Noe ken ni Lot nagtakderda a naigiddiat unay, ket ti pammatida ti nangilunod kadagiti kapatadanda. Personal aya nga agtaktakdertayo met a naigiddiat manipud kadagiti tattao itatta nga okupado unay kadagiti material a bambanag ken managayat iti kinadakes?

Ti palawag publiko a, “Kinahustisia Para kadagiti Isuamin Babaen iti Ukom a Dinutokan ti Dios,” ket makagutugot a panangsalaysay iti imbitla ni apostol Pablo kadagiti lallaki ti Atenas idiay Areopago, wenno Mars’ Hill. Gapu ta nalikmuttayo iti napalalo a kinaulpit ken ulbod a relihion, ti sasao ti apostol ket addaan dakkel a kaipapanan kadatayo. Nangnangruna nga addaantay rason nga agrag-o agsipud ta agbibiagtayon iti kangitingitan a panawen ti panangukom a makapagtignaytayon tapno maaddaantay ti anamong ti Dios. Wen, kas kinuna ni Pablo, pinanggep ni Jehova ti “panangukomnanto a sililinteg iti mapagnaedan a daga gapu iti daydiay lalaki a tinudinganna a pinaneknekanna kadagiti isuamin a pinagungarna iti tengnga dagiti natay.”​—Aramid 17:31.

Idi agpatinggan ti programa, naigunamgunam kadatayo nga “Itultuloyyo a Suroten ti Kinahustisia Bayat nga Umasidegen ti Kangitingitanna.” Daytoy nagsayaat nga uppat nga aldaw a kumbension ti nangpunno kadatayo iti determinasion a mangaramid ti dayta. Impasagepsep met ti programa kadatayo ti kinalawa ti internasional a panagkakabsattayo. Kas pangarigan, anian a rag-o ti pannakangngeg manipud kadagiti bumisbisita a misioneros a simamatalek nga agserserbi kadagiti nakaitudinganda iti adun a tawtawen!

Pinanawantayo ti kumbension a buyogen ti napabaro a determinasion nga agtalinaed a naisina manipud itoy a lubong ken agtalinaed a nadalus iti naespirituan, iti moral, mental, ken pisikal. Bayat ti pannakitimpuyogtayo a situtunos iti pangserra a kanta, maragsakantayo a mangikanta ti daydayaw ken Jehova, a siyayaman a ti nadiosan a kinahustisia ti mangted kadatayo iti dakkel a pagragsakan.

Iti nasurok a 125 a kumbension idiay Estados Unidos ken Canada laeng, adda 1,440,932 a timmabuno ken 19,878 dagiti nabautisaran

[Dagiti ladawan iti panid 26]

1, 2. Dagiti publikasion nga Insight on the Scriptures ken Revelation​—Its Grand Climax At Hand! a maiparparang idiay Yankee Stadium, New York City, babaen kadagiti miembro ti Manarawidwid a Bagi a J. E. Barr ken ni W. L. Barry

3, 4. Dagiti buya manipud drama ti Biblia a “Dagiti Panangukom ni Jehova a Maibusor kadagiti Managsalungasing-Linteg a Tattao”

5. Rinibo dagiti nabautisaran kas simbolo ti dedikasionda ken Jehova a Dios

6. Buya manipud iti moderno-aldaw a drama a “Natandaan a Maipaay iti Pannakaispal”

7. Dagiti bumisbisita a misionero, kas ken John Cutforth ti Papua New Guinea, inranudda ti kapkapadasanda kadagiti kumbensionista