Kanayon Aya a Dakes ti Buteng?
DAYTAT’ mangdadael iti kinaragsak ken namnama. Daytat’ matuktukoy a sabidong iti isip, manangdadael iti panagrason, ken makuna a dakdakes pay ngem ti kadadaksan a pisikal a sakit. Wen, ti buteng ket nabileg nga emosion. Ngem, kanayon kadi a dakes?
Panunotenyo laengen nga agmammanehokayo iti dikay kabisado a kalsada. Ti kalsada sumang-at iti bambantay ket mangrugin nga agkurbakurba. Sumipngeten, ket adda sangkabassit a panagtinnag ti niebe. Maikaglis bassit ti kotse, ket mabigbigyon a nakagtengkayon iti kangato a sadiay ti kalsada ket agbalbalinen a nahielo.
Ita masapul nga agsiputkayon a naimbag. Bayat ti siaannad a panagkurbayo, pampanunotenyo no kasano a nakalaklaka a maikaglis ti kotse iti nagalis a dalan ket matnagkayo iti ginget iti baba. Kasta met, dikay ammo no ania pay dagiti peggad iti kasipngetan. Bayat a pampanunotenyo dagitoy, agmaga ti ngiwatyo ket pumartak ti panagbitik ti pusoyo. Siriringkayo. Aniaman ti pampanunotenyo sakbayna, naan-anayen nga okupadokayo iti adda a trabaho: ti panamagtalinaed iti kotse iti kalsada ket maliklikan ti aksidente.
Kamaudiananna, agsalogen ti kalsada. Addan silsilaw iti kalsada, ket awanen ti hielo. Main-inoten, awanen ti panagdanagyo. Awanen ti panagdanagyo ket mabang-arankayon. Amin dayta ket awan mamaayna a panagbuteng!
Ngem amin kadi dayta ket awan mamaayna a panagbuteng? Saan. Gagangay laeng ti nainkalintegan a panagnerbios kadagita a kasasaad. Pagbalinennatay dayta a siririing, naannad. Ti nasalun-at a buteng tulongannatayo a saan nga agapura a mangaramid kadagiti bambanag, a dangrantayo ti bagitayo. Wen, ti buteng saan a kanayon a mangdadael iti panagrason wenno sabidong iti isip. Iti sidong dagiti dadduma a kasasaad, daytat’ makagunggona pay.
Saritaen ti Biblia ti maipapan iti panagbuteng ket iyam-ammona ti dua a partikular a kita. Ti maysa a kita iti buteng ket pudno a sabidong iti isip. Ngem ti sabali ket saan laeng a gagangay ken nasalun-at no di ket nasken iti pannakaisalakantayo. Ania dagiti dua a kita iti buteng? Ken kasanot’ panangparang-aytayo iti maysa bayat a liklikantayo ti sabali? Daytoy ket maisalaysayto iti sumaganad nga artikulo.