Ti Kaiyulogan dagiti Damdamag
Sataniko nga Impluensia
Kalpasan ti panangaramidda iti panagsirarak maipapan iti impluensia iti Satanismo iti rock ken heavy metal rock music, ti kolumnista iti pagiwarnak iti Toronto a ni Tom Harpur insuratna iti The Sunday Star: “Masapul nga ipaulogko ti mabalin a kabibilgan a pakdaar maipapan iti mapaspasamak. . . . Diak pay nakakita a pulos ti kasta a nakaap-aprang unay. Napnapno dagiti kanta iti panagmauyong, panangikut, demonio, dara, panangilunod, ken ti isuamin a kita ti kinaranggas, agraman ti panangrames, ti panangpawad iti bagi met laeng, panangpapatay, ken ti panagbekkel. Ti ipapatay ken ti pannakadadael, dagiti padpadto iti pannakadadael, ti panangilibak iti aniaman a naimbag ken ti panangawat kadagiti amin a nakaam-amak ken dakes—dagitoy dagiti tema.”
Maitunos iti irarang-ay iti sataniko a musika isu ti irarang-ay ti ar-aramid ti sataniko a kulto idiay Estados Unidos ken Canada. Iti panangipadamagna maipapan iti nabiit pay a seminar ti polis idiay Ontario, kunaen ti The Globe and Mail, maysa a pagiwarnak iti Canada, a dagiti sataniko a kulto “nairamanda kadagiti panagidaton iti an-animal, ti pannakalais ti sementerio ken ti ritual a panangabuso kadagiti ubbing.” Ni Detektib a James Bradley iti Washington, D.C., innaigna dagiti ginasgasut a kaso iti panangabuso iti ubing kadagiti krimen a ritual iti Satanismo. Kas naadaw iti The Globe and Mail, innayon ni detektib a Bradley nga iti nasuroken a lima a tawen, dagiti naipadamag a ritual a panangabuso iti ubing ket naggapu kadagiti “ginasgasut nga ubbing, ginasgasut a social workers ken mannursuro.”
Iti panangtukoyna “iti maudi nga al-aldaw” iti agdama a dakes a sistema dagiti bambanag, nagsurat ni apostol Juan: “Ti Diablo immulog kadakayo nga addaan dakkel a pungtot, nga ammona a bassiten ti tiempona.” (2 Timoteo 3:1; Apocalipsis 12:12) Ti impluensia ni Satanas, “ti agturay iti pannakabalin ti angin,” nakastreken uray pay iti popular a musika daytoy a lubong. (Efeso 2:2) Dayta ti makagapu no apay a namalakad ni apostol Pablo kadagiti padana a Kristiano nga “agtalinaed[da] a bumusor kadagiti pangallilaw ti Diablo.”—Efeso 6:11.
“Saan a Matengngel”
Idi ti maysa a 28-años a babai a manag-jogging ket namalmalo ken narames idiay Central Park iti siudad ti Nueva York, minilion a tattao ti nakigtot ken naupay. Ti rason? Ti kinaranggas ken narungsot a panangatake ket inaramid ti maysa a gang dagiti tin-edyer a “pudno a nakaam-amak ti naalas a panagragsakda iti nagbanaganna ken ti dida panangikankano iti naipaay a panagsagaba,” impadamag ti The New York Post. Dadduma kadagiti mapabasol iti nakaam-amak a krimen ket naipadamag nga ub-ubbing nga agedad iti 14. Gaput’ nasdaaw iti panangatake, maysa a mannurat iti Post ti nangamin a ti lubong nagbalinen a “sosiedad nga awan ti disiplinana, awan panangikankanona, napno iti droga, nakayawan iti sekso, nasinasina a pamilia, agmauyong iti kinarangas” a “saanen a matengngel” ket ti saludsod ket: apay?”
Iti kinapudnona, daytoy a kaputotan iti awan maipadis a kinaranggas ket apag-isu iti impadto ni apostol Pablo idiay 2 Timoteo 3:1-5. Sadiay inlawlawagna a “ti maudi nga al-aldaw” tandaanto dagiti tattao a “naagum, nabuklis, napangas, ken natangsit.” Ken ti dakdakes pay, “dagitoy mananginsulto, nasukir kadagiti dadakkelda, awan panagyamanda, ken saanda a relihiuso; dagitoy nauyongda, awan asida, managpadpadakes, naranggas, ken narungsot; guraenda ti naimbag; manangallilaw, awan panagannadda, ken nakaro ti kinatangsitda; nga ayatenda ti ragragsak imbes nga ayatenda ti Dios.” (Today’s English Version) Agtalinaedto kadi daytoy naranggas a lubong a “saan a matengngel” iti awan inggana? Saan! Kinuna ni Jesus: “Ngem inton dagitoy a banag mangrugida a maaramid, kumitakayo ket itangadyo dagiti ul-uloyo ta ti pannakaisalakanyo umasidegen.”—Lucas 21:28.