Aniat’ Namnama Dagiti Natay?

MAYSA nga agtutubo a pamilia ti agdaldaliasat idiay makindaya a kosta ti Sud Africa maipaay iti bakasionda. Ti nagannak ti asawa a babai ket addadat’ sabali a kotse nga adda iti unaanda. Pagammuan, bimtak ti maysa a pilidna. Bayat nga isagsaganadat’ panangsukat iti dayta idiay igid ti kalsada, maysa a nabartek a tsuper ti nangdungpar kadagiti dua a kotse. Ti lakay ken ti baketna natayda. Ti ub-ubing a lalaki natay sumagmamano nga aldaw kalpasanna. Ti asawa a babai natuktukkolan ti paragpag ken nadundunor. Ti anakna nagsagaba met iti makaparalisado a pannakadangran ti utek.

Anian a didigra iti daytoy daksanggasat a pamilia! Idi a ni Carolann, ti kabsat a babai ti agtutubo nga asawa a babai, nangngegnat’ damag, nabibineg ti riknana. Dagiti didigra kas itoy mapaspasamakda iti amin a pagilian. Dagiti maladingitan unay a kakabagian ken gagayyemda masansan agpampanunotda, ‘Dagiti natay pudno kadi a natayda,’ wenno . . .

‘Sibibiag Aya dagiti Natay?’

Nagistay amin a relihion isursuroda a ti kararua ket di matay. Gapuna, patien ti paspasurotda a dagidiay matay saanda a pudpudno a natay no di ket sibibiagda pay idiay langit, idiay purgatorio, wenno idiay impierno. Kas maisursuro iti adu a simbaan, dagidiay kano adda idiay impierno agsagsagabada ti kasta unay iti awan inggana. Ngem ti kadi Dios ti ayat pudno a mangted ti kasta a panagsagaba kadagiti parsuana?​—1 Juan 4:8.

Agparang a kasla saan, ngem kasanotay a makasiguro? Panunotenyo a naimbag ti sumaruno a pammaneknek ti Biblia. “Ket ni Jehova a Dios binukelna ti tao iti tapuk ti daga ket impuyotna iti agongna ti anges ti biag, ket ti tao nagbalin a kararua a sibibiag.” (Genesis 2:7) Kinuna kadi daytoy naipaltiing a sasao a ti umuna a tao, ni Adan, ket naikkan ti kararua? Saan, isut’ nagbalin a maysa a kararua, maysa a sibibiag a persona. Pinatalgedan daytoy ni apostol Pablo, a nangisurat: “Ti umuna a tao, ni Adan, kas kunaen ti kasuratan, nagbalin a kararua a sibibiag.” Agad-adaw ni Pablo manipud Genesis.​—1 Corinto 15:45, The Jerusalem Bible.

Matay kadit’ natauan a kararua? Nagsurat ni mammadto Ezequiel: “Amin a kararua​—kukuak ida. Kas ti kararua ti ama kasta met ti kararua ti anak a lalaki​—kukuak. Ti kararua nga agbasbasol​—daytat’ matayto.” (Ezequiel 18:4, 20; Eclesiastes 9:5, 10) Nalawag, no ti kararua ket matay, no kasta daydiay persona awanen ammona, ngarud saanen nga agsagaba. Iti umuna a palawag publikona kalpasan ti Pentecostes 33 K.P., kinuna ni apostol Pedro: “Ket maaramidto, nga amin a kararua a dinto dumngeg iti dayta a Mammadto [a ni Jesus] mapukawto kadagiti umili.” Ngarud ti kararua ket matay.​—Aramid 3:23.

Dagiti Natay Agbiagdanto Aya Manen?

Amin dagidiay mamati a ti Biblia ket pudno ammoda a ni Jesus natay ket napagungar iti maikatlo nga aldaw. (Aramid 10:39, 40) Kasano a napasamak daytoy? Babaen iti pannakabalin ti nasantuan nga espiritu ti Dios.

Ti kadi panagungar ni Jesus naisalsalumina? Saan. Kas insurat ni Pablo iti kongregasion idiay Corinto: “Ni Kristo napagungar kadagiti natay, nga isu ti umuna a bunga kadagiti matmaturog. Ta yantangay gapu iti tao immay ni patay, gapu iti tao umay met ti panagungar dagiti natay . . . ken Kristo.” (1 Corinto 15:20-22) Gapuna, adut’ mapagungarto manipud ken patay. Kinuna pay met ni Jesus: “Dikay pagsiddaawan daytoy, ta umay ti oras a dagiti amin nga adda kadagiti tanem a pakalaglagipan mangngegdanto ti timekna ket rummuardanto, dagiti nagaramid ti naimbag iti panagungar ti biag.” (Juan 5:28, 29) Daytoy igarantiana ti panagungar ti minilmilion pay.

No ti panangilawlawag iti ngato riniingna ti interesyo iti panagungar, mabalin a maisaludsodyo, ‘Agpaay iti siasino ti panagungar, ken kaano?’ Usigentayo dagita a nasken a salsaludsod.