Ti Panagungar​—Agpaay iti Siasino ken Kaano?

NAPASAMAK dayta idi tawen 32 K.P. idiay Betania, a pagnanaedan ni Lazaro kadua dagiti dua a kakabsatna a babbai, da Marta ken Maria. Dagiti agkabsat nangipatulodda iti mensahe ken Jesus a masakit ni Lazaro. Ni Jesus dinungdungngona ni Lazaro ken ti kakabsatna a babbai, gapuna Isut’ nagrubbuat nga agturongen idiay Betania. Idiay dalan, pinakaammuan ni Jesus dagiti adalanna: “Ni Lazaro a gayyemtayo matmaturog, ngem innak tapno riingek iti turogna.” Impapan dagiti adalan a ti kayat a sawen ni Jesus ket literal a pannaturog. Gapuna imbaga a silalawag ni Jesus: “Ni Lazaro natay.”​—Juan 11:1-15.

Simmangpet dagiti sangaili uppat nga aldaw kalpasan ti ipapatay ni Lazaro. Idi nakita ni Jesus ni Maria ken ti dadduma nga agsangsangitda, isu met ti “nagsangit,” a mangipakpakita ti nauneg a panagayat ken dungngona. (Juan 11:17, 35) Ti bangkay ni Lazaro ket naitanem iti maysa a rukib. Imbilin ni Jesus nga ikkatenda ti bato a naiserra iti tanem. Nagkararag ken Amana ken pimmukkaw iti napigsa a timek: “Lazaro, rummuarka!” Rimmuar ni Lazaro. Anian a ragsak ti inyeg daytoy kadagiti kakabsatna a babbai!​—Juan 11:38-45.

Daytoy a pasamak mangted pudno a namnama iti panagungar. Nupay kasta, iti kaaduanna, ni patay ket nagsaem a kabusor a mangal-ala kadagiti ing-ingungotentayo nga awan inanama iti insigida a panangpagungar ni Jesus kadakuada. Kas pagaammotay unay, adu kadagitoy inay-ayat a tattao ti nasayaat ken manangngaasi unay. Gapuna, maysa a nalawag a saludsod ti rumsua . . .

Apay Rumbeng a Matay dagiti Tattao?

No kayattay ti apagpag-isu, mapagtalkan a sungbat, masapul a tumalliawtayo iti pangrugian ti sangatauan idiay minuyongan ti Eden. Iti panangsuotna iti kinatulnog ni Adan, isut’ binilin ti Dios sadiay a di mangmangan iti bunga ti maysa a kayo. No isu ken ni Eva ti mangan iti bunga, kunat’ Dios, “matay[da] a di bumurong.” (Genesis 2:17) Idi sinulisog ni Satanas, sinukirda ti Dios ket napaayda iti dayta kangitingitan a suot. Ipapatay ti imbungana.

Apay a kastat’ dusa agpaay iti kasla nagbassitan a krimen? Ti tignayda ket bassit, ngem ti krimen ket serioso a makapapatay​—maysa nga iyaalsa dagiti perpekto a tattao, ni Adan ken Eva, maibusor iti Namarsuada. Saandan a perpekto, ket ipapatay ti insentensia ti Dios. Kaskasdi, inyurnos ti Dios a dayta a nalinteg a dusa ket masungani agpaay kadagiti kaputotan ni Adan. Kasano? Insurat ni Pablo a ni “Kristo Jesus . . . intedna ti bagina a subbot gapu kadagiti adu.”​—1 Timoteo 2:5, 6; Roma 5:17.

Aniat’ Kasasaad dagiti Natay?

Ni Lazaro ket natay iti uppat nga aldaw. No nataykay koma ket kinapudnona sibibiagkayo iti naespirituan a lugar iti uppat nga aldaw ket kalpasanna napagungarkayo, diyonto kadi kayat nga ibaga dayta kadagiti dadduma? Ngem awan nasasao ni Lazaro maipapan iti panagbiagna iti sabali a disso. Kunat’ Biblia: “Dagiti natay, dida ammo ti aniaman.”​—Eclesiastes 9:5; Salmo 146:3, 4.

Panunotenyo dagiti iraman dayta. Minilion a tattao ti mamati iti purgatorio, nupay dayta a sao di agparang idiay Biblia. Adu pay ti mamati nga adda umap-apuy nga impierno. Nupay kasta, uray ti maysa a kabusor dikanto pupuoran iti apuy iti agnanayon. No dikayto pay kayat nga aramiden ti kasta a nadamsak a banag, aramiden kadi dayta ti naayat a Namarsuatayo babaen ti panamagsagabana kadagiti indibidual iti impierno nga apuy? Ngem panunoten, pangngaasiyo, ti makaliwliwa a pammasiguro ti Biblia a nadakamat iti ngato​—dagiti natay “dida ammo ti aniaman.”

Sigun iti Kasuratan, ti bilang dagidiay makipagturay ken Kristo idiay langit ket bassit no idildilig. Dineskribir ni Jesus ida kas “bassit nga ipastoran.” (Lucas 12:32) Nakita ni apostol Juan “ti Kordero [ni Jesu-Kristo] agtaktakder iti rabaw ti [nailangitan a] Bantay Sion, ket naikuyogda kenkuana dagiti sangagasut uppat a pulo ket uppat a ribo . . . isuda a nasubbot itoy daga.” (Apocalipsis 14:1-3) Ngarud, kaipapanan daytoy, a dagita a persona a tattaoda idi, ket natayda, ket kalpasanna napagungarda nga agbiag idiay langit a kadua ni Kristo.

Kas maripiripyo, natulongan dagiti tattao a mangtarus kadagitoy a kinapudno ti Biblia​—nga awan purgatorio wenno umap-apuy nga impierno ken adda namnama a dagiti natay a tattao mapagungarda idiay langit. Nupay kasta, no dagidiay mapagungar idiay langit bassitda, ania ngay namnama agpaay kadagiti sabsabali pay?

Ti Naindagaan a Panagungar

Ni Jesu-Kristo linuktanna, wenno inyusuatna, ti dalan a pannakapagungar iti biag idiay langit. (Hebreo 9:24; 10:19, 20) Gapu itoy, saan a makipaset ni Juan a Mammautisar iti nailangitan a panagungar agsipud ta isut’ napapatay sakbay ti ipapatay ni Jesus ken ti pananglukatna iti dalan nga agturong iti nailangitan a biag. Kunan Jesus: “Awan ti timmakder kadagiti nayanak kadagiti babbai ti sabali a dakdakkel ngem ni Juan a Bautista; ngem ti kababassitan unay iti pagarian ti langit dakdakkel ngem isu.” (Mateo 11:11) Ania a gunggona ti indiaya ti Dios agpaay itoy tao a matalek ken iti sabsabali pay a natnatayen kas kenkuana?

Ukradenyo ti Bibliayo iti Lucas 23 ken basaenyo ti bersikulo 39 ingganat’ 43 Lu 23:39-43 . Maysa kadagiti managdakdakes a nailansa iti sibay ni Jesus ti nagkuna: “Jesus, laglagipennak inton umayka iti pagariam.” Impasiguro ni Jesus kenkuana nga isut’ addanto idiay Paraiso. Saan nga idiay langit dayta, no di ket daytat’ naindagaan a paraiso, kas daydiay immuna a Paraiso.

Ti Panagungar​—Gubuayan ti Liwliwa

Dayta a pudno a namnama idiay Biblia rebbeng a makaliwliwa unay, ta nainkalintegan a namnamaentayo. Apay? Agsipud ta ni Jehova ket ayat. (1 Juan 4:8) Idi pinalubosanna ti Anakna a matay ti nakababain nga ipapatay, aktualmente a ti Dios iparparangarangna ti nakaskasdaaw a kualidad ti ayatna. Sakbay dayta, kinuna ni Jesus: “Ta kasta la unay ti panagayat ti Dios iti lubong [ti sangatauan] nga intedna ti Anakna a bugbugtong, tapno amin a mangalagad ti pammati kenkuana saan a mapukaw no di ket adda biagna nga agnanayon.”​—Juan 3:16.

Impakita met ni Jesus ti naisangsangayan nga ayat babaen ti panangtednat’ biagna kas subbot iti mamati a sangatauan. Isu a mismo kinunana: “Ti Anak ti tao immay, saan a tapno pagserbian, no di ket tapno agserbi ken itedna ti biagna kas maysa a subbot kadagiti adu.”​—Mateo 20:28.

Ni Carolann, a nadakamat iti umuna nga artikulo kas nakapukaw ti sumagmamano kadagiti inay-ayatna iti nakasasaem nga aksidente, naladingitan unay kalpasanna. Ngem isut’ naliwliwa a makaammo a dagidiay natay nga ing-ingungotenna ket saanda nga agsagsagaba. Aniat’ nakatulong pay kenkuana tapno makaibtur? Ti ayat ken agpaypayso a pannakipagrikna nga impakita dagiti naespirituan a kakabsatna, dagiti Saksi ni Jehova, ket napaneknekan a makatulong unay.​—Salmo 34:18.

Ti panagkararag ken Jehova nakatulong met ti kasta unay. Adu a rabii isut’ agriing ket pampanunotenna a daytat’ dakes amin a tagtagainep, ngem kalpasanna ti kinapudnona agdisson kenkuana. Ti araraw ken Jehova ti mangpakalma kenkuana, ket ad-adda nga apresiarenna unay ti insurat ni Pablo: “Dikay madanagan iti uray ania, no di ket kadagiti isuamin maipakaammo koma dagiti dawdawatyo iti Dios gapu iti kararag ken araraw agraman ti panagyaman; ket ti talna ti Dios a daeganna ti amin a pannakaawat aywanannanto dagiti puspusoyo ken dagiti panunotyo ken Kristo Jesus.”​—Filipos 4:6, 7.

Ni Shirley ti mangted pay sabali nga ulidan no kasanot’ panangliwliwa ti namnama ti panagungar. Ti agtutubo nga anakna a ni Riccardo natay idi bigla a naitupak ti nagdakkelan a konkreto iti barukongna, a nangbettak ti bassit a pusona. Kalpasan daytoy a didigra, idi Enero 1986, imbaga ni Shirley kadagiti gagayyemna: “Daytat’ kasla dakes a tagtagainep.” Idiay Simbaan Katoliko nangngegna dagitoy a sasao: “Ti Dios ukomennanto ti sibibiag ken ti natay.” Nangrugi nga agpanunot ni Shirley, ‘No ti Dios ukomennanto dagiti sibibiag ken dagiti natay, ngarud kasano a maammuan ti maysa no sadinot’ papanan dagiti tattao kalpasan ti ipapatay? Ket no addada idiay langit, apay a pagungarennanto pay laeng ida nga ukomen? Sa, kasano a mapagungarda no addada pay a sibibiag idiay langit?’ Nikaanoman saan a dakdakamaten ti Biblia ti panagungar dagiti nabiag no di laeng dagiti natay.

Nagsaludsodan ni Shirley ni lakayna maipapan itoy a problema, ta am-ammona ti Biblia. Apaman a natarusannan bassit ti ibagbaga ti Kasuratan iti dayta a tema, saanen a nagsubsubli ni Shirley idiay simbaan. Maysa a kabagian a maysa kadagiti Saksi ni Jehova ti nangrugi a nangiyadal ti Biblia ken Shirley ken ni lakayna idi Marso 1986, ket di nagbayag nabautisarandan. Itan maikuna ni Shirley: “Nakaay-ayat ti pannakaammo iti kinapudno, ti pannakaammo maipapan iti panagungar, ken ti pannakaammo nga anian a nakaskasdaaw a persona ni Jehova.”

Ti Panagungar​—Kaano?

Iti sirmata, nakita ni apostol Juan ti “dakkel nga umariwekwek, nga awan ti makabalin a bumilang, a naggapuda kadagiti isuamin a nasnasion ken tribo ken il-ili ken pagsasao, nga agtaktakderda iti sanguanan di trono ken iti sanguanan daydi Kordero.” (Apocalipsis 7:9) Ti ‘panagtaktakder [ti dakkel nga umariwekwek iti] sanguanan ti trono ti Dios’ ket maitunos iti kinapudno nga agur-urayda nga agbiag iti rabaw ti daga. (Isaias 66:1) No dadduma kadakuada ti matay itan, kaanonto a mapagungarda? Di itden ti Biblia ti maysa a petsa, no di ket daytantot’ kalpasan ti umadanin a gubat a sadiay paksiatenton ti Dios manipud daga amin dagidiay madi nga agbiag babaen kadagiti nalinteg a pagannurotanna. (2 Tesalonica 1:6-9) Daytat’ manglukat ti dalan iti Aldaw a Panangukom ken ti panagungar amin a matmatmatan ti Dios a nakalinea agpaay iti naindagaan a panagungar. (Juan 5:28, 29; Aramid 24:15) Ti kaitungpalan ti padto ti Biblia paneknekanna a dagitoy makaparagsak ken nakaskasdaaw nga ar-aramid dandanidan a mapagteng!​—Apocalipsis 16:14-16.

Naminsan insaludsod dagiti adalan ni Jesus kenkuana: “Anianto ti pagilasinan iti kaaddam ken ti panungpalan toy sistema dagiti bambanag?” Kas sungbat dinakamat ni Jesus dagiti gubat, kinakirang ti taraon, dagiti ginggined, ang-angol, ken sangalubongan a panangikaskasaba ti naimbag a damag ti Pagarian.​—Mateo 24:3-14; Lucas 21:7-11.

Daytoy nakaskasdaaw a padto matungtungpalen nanipud pay 1914, idi nangrugi ti Gubat Sangalubongan I. Daytat’ nangpapatay ti minilion ken nangpataud bisin ken kinakirang ti taraon iti adu a pagilian. Ti kasasaad ti lubong bayat ken kalpasan ti Gubat Sangalubongan II ket ad-adda a dimmakes.

Maipapan kadagiti angol, patien ti adu a ti kadadaksan a pangarigan isut’ AIDS. “Ti epidemia ket nakasaksaknap unay ken makapapatay a daytat’ iyar-arig dagiti eksperto iti Negra Muerte (Black Death) a nangpapatay iti kakapat iti populasion ti Europa idi maikasangapulo ket uppat a siglo.”​—Reader’s Digest, Hunio 1987.

Gapu iti kakasta nga agdama a pagbutbutngan, anian a nakaskasdaawto a pasken ti panagungar! Daytantot’ panawen ti di mamedmedan a ragsak inton dagiti pamilia a pinagsisina ni patay, kas kadagidiay ken Carolann ken Shirley, agtitipondanton! Nalawag, ti masirib a kurso iti tunggal maysa kadatayo isut’ panangitunos kadagiti biagtayo itan iti pagayatan ti Dios ket iti kasta makakualipikar nga addanto a siimatang inton matungpalen ti panagungar.

[Ladawan iti panid 7]

Kunat’ Biblia a no kasano a ti maysa a kayo a mapukan ket agsaringitto manen, mabalinto nga ibangon ti Dios manipud ken patay dagidiay addat’ lagipna.​—Job 14:7-9, 14, 15