Dikay Isangol ti Bagbagiyo Kadagiti di Kapammatian

“Saankay a makikadua iti sangol kadagiti saan a mammati. Ta . . . ania ti pakaibiangan ti tao a matalek iti saan a mammati?”​—2 CORINTO 6:14, 15.

1. Kasano a naiyasawa ti maysa a kabsat a babai iti di kapammatian?

MAYSA kadagiti Saksi ni Jehova manipud akintengnga a laud ti Estados Unidos napukawnan lakayna gapu iti maysa nga aksidente ti kotse sumagmamano a tawen ti napalabasen. “Idi damo naupayak unay,” malaglagipna, “ngem determinadoak a diak palubosan daytoy a mangsinga ti panagserbik ken Jehova. Kalpasan ti dua a tawen, nupay kasta, mangrugiak nga agriknan a kasla awan mamaayna iti aglawlaw dagiti pagassawaan idiay kongregasion. Siak ken ti balasangko ti di kanayon a maim-imbitaran iti panagpasiar dagiti pamilia. No makakitaak ti pagassawaan a Kristiano nga aglalailo iti maysa ken maysa, ad-adda manen a kasla maipupueraak. Kasla awan ti makadkadlaw a kumapkapuyak iti naespirituan. Ngarud idi adda lalaki a taga lubong nga am-ammok manipud panggedak a nangawis kaniak a mangan iti ruar, kimmuyogak. Di nagbayag, mariknak nga agayatakon kenkuana. Iti kamaudianan, nakakapkapsutak ket dinaegnak ti kinalidayko ta immanamongak a makikallaysa kenkuana.”

2. Apay a ti tarigagay a mangasawa natural laeng, ket aniat’ nakairantaan a buklen ti panagasawa?

² Wen, ti tarigagay a makirinnanud ti biag iti maysa nga asawa mabalin a nakapigpigsa, ket natural met ti kasta. Kas panangikuna ni Jehova a mismo: “Saan a nasayaat nga agmaymaysa ti tao. Yaramidakto ti katulonganna, kas kanayonanna [“kaing-ingasna,” banag a maibagay kenkuana].” (Genesis 2:18, New World Translation Reference Bible, footnote) Nairanta ti panagasawa a mangporma ti maysa a nasinged, permanente a singgalut ti panagkaykaysa ti maysa a lalaki ken maysa a babai. Saan a ni Adan no di ni Jehova ti nagkuna: “Gapuna ti lalaki panawannanto ti amana ken ti inana ket tumiponto iti asawana ket agbalindanto a maymaysa a lasag.” (Genesis 2:22-24; idiligyo ti Mateo 19:4-6.) Nalabit il-iliwen ti pusoyo ti kasta a kanayonan.

3, 4. (a) Kasanot’ panangpakdaar ti Biblia maibusor iti panangaramid ti nasinged a pannakaisinggalut kadagiti di kapammatian? (b) Iti ania a pamay-an a ti balakad ni Pablo maipapan iti di agkaasmang a pannakisangol mabalin a maiyaplikar iti panagasawa? (c) Kasanot’ pannakaawat dagiti Kristiano a taga Corinto iti termino a “di mammati”? (Kitaenyo ti footnote.)

³ Ti Biblia, nupay kasta, mamakdaar maibusor iti panangaramid iti napalalo a kinasinged kadagiti di kapammatian. Kas panagkuna ni apostol Pablo: “Saankay a makikadua iti sangol [“Diyo isangol ti bagbagiyo iti di agkatupag a bunggoy,” The Jerusalem Bible] kadagiti saan a mammati.a Ta . . . ania ti pakaibiangan ti mammati iti saan a mammati?”b (2 Corinto 6:14, 15) Mabalin a silalagip ni Pablo iti Mosaiko a Linteg a mangiparparit ti panangisangol ti maysa a baka a lalaki iti maysa nga asna a maipaay a pagarado. (Deuteronomio 22:10) Ti asna ket basbassit ken saan a kas kapigsa ti kalakian a baka ket agsagaba kas resulta ti di agkaasmang a panangisangol. Yantangay ti panagasawa arignat’ sangol a mangisinggalut ti asawa a lalaki ken babai, ti Kristiano a mangasawa ti di kapammatian ti mangibunga iti di agkaasmang a pannakisangol. (Mateo 19:6) Ti kasta a pannakisangol masansan mangyeg ti ad-adda a rigat ken babantot iti panagasawa.​—Idiligyo ti 1 Corinto 7:28.

⁴ Kaskasdi, kas iyilustrar ti panglukat a kapadasan, dadduma kadagiti Kristiano pinilida ti makiasawa kadagiti di kapammatian. Apay a dadduma makitada a narigat ti panangasawa “laeng iti Apo”?​—1 Corinto 7:39.

No Apay Dadduma Kumitadat’ Sabali

5. Iyilustrar no apay dadduma mairamanda a romantiko iti di mammati

⁵ Saan met a gapu ta inggagarada a laksiden ti balakad ti Dios. Panunotenyo ti situasion ti maysa a Kristiano a kabsat a babai a kayatna ti makiasawa. Mabalin nga il-iliwenna ti maaddaan ti Kristiano nga asawa, ngem agparang nga awan met adu a mabalin a kakabsat a lallaki kadagiti manamati a gagayyemna. Pampanunotenna met ti edadna. Tarigagayanna ti maaddaan ti pamilia. Ti buteng nga isut’ bumaketen nga agmaymaysa ken ti rikna a kayatna met nga adda mangay-ayat kenkuana ti mamagbalin kenkuana a nalaka a puntiria. Ket, no, adda lalaki a taga lubong a mangipakita ti interes kenkuana, nagrigat a resistiran dayta. Mabalin nga isu met ti naasi, managayat. Mabalin a di pay agsigsigarilio wenno agusar ti dakes a pagsasao. Kalpasanna umayen ti panangikalkalinteganna: ‘Apay, isut’ nalalaing pay ngem ti adu kadagiti kakabsat a lallaki nga am-ammok!’ ‘Interesado met a makiadal.’ ‘Addada ammok a ti maysa a kabsat a babai nakiasawa iti di kapammatian ket idi agangay nagbalin metten a mammati.’ ‘Addada sumagmamano a Kristiano a panagasawa a di met nagballigi!’​—Kitaenyo ti Jeremias 17:9.

6, 7. (a) Kasano a dineskribir ti maysa a kabsat a balasang ti pannakaupayna? (b) Ania a saludsod ti maikari iti panangusigtayo?

⁶ Wen, mabalin a daytat’ makaupay unay iti agmaymaysa a Kristiano a kayatnan ti mangasawa. Dadduma makeltay pay rikriknada. “Ti bilang dagiti mabalin a kakabsat a lallaki ket nagbassitan,” kunat’ maysa a kabsat a balasang iti panangiladawanna ti situasion idiay lugarda. “Ngem ti bilang dagiti kakabsat a babbalasang ket nagdakkelan unay. Bayat a makitkita ti kabsat a babai a sipapardas a lumablabas ti kina-agtutubonan, itan agtinnagen ti panagpilina iti pulos a saanen a pannakiasawa wenno pannakiasawa iti umuna nga agparang a gundawayna.”

⁷ Kaskasdi, ti balakad ti Biblia nalawag: ‘Dika isangsangol ti bagim iti di kapammatian.’ (2 Corinto 6:14) Daytoy kadi a nadiosan a pakdaar ket nagubsang wenno saan a rasonable?

Maysa nga Ebkas ti Kinamanagayat ti Dios

8. Kasanot’ panangidemostra ni Jehova nga adda iti pusona ti kasayaatan a paginteresantayo?

⁸ Ni Jehova ket maseknan unay maipapan ti agnanayon a pagimbagantayo. Saan aya, a babaen iti dakkel a gatad iti biangna, intedna ti Anakna kas “subbot nga agpaay kadagiti adu”? (Mateo 20:28) Saan kadi nga isu ‘Daydiay mangisuro kadatayo a maipaay iti pakagunggonaantayo’? (Isaias 48:17) Saanna kadi nga inkari a ‘dinanto ipalubos a masulisogtayo iti nalablabes ngem iti mabalinantayo’? (1 Corinto 10:13) Nainkalintegan, ngarud, a no ibagana kadatayo a ditay isangol ti bagbagitayo kadagiti di kapammatian, pudno nga addat’ pusona ti kasayaatan a paginteresantayo! Panunotenyo no kasano a daytoy a pakdaar ket ebkas ti naayat a pakaseknanna kadatayo.

9. (a) Ania a pammakdaar ti inted ni Pablo maibusor ti panangporma ti Kristiano iti nasinged a pannakisinggalut iti di mammati? (b) Aniat’ kaipapanan ti sao a Griego a naipaulog a “panagtunos,” ket kasano nga iyilustrar dayta ti rigat a rumsua no isangol ti maysa a Kristiano ti bagina iti di mammati?

⁹ Ti panagasawa ket inranta ti Namarsua a mangbukel ti kasisingedan a singgalut kadagiti tattao, a ti asawa a lalaki ken babai agbalinda a “maymaysa a lasag.” (Genesis 2:24) Nainsiriban kadi iti Kristiano a mangbukel ti kasta a nasinged a pannakisinggalut iti di kapammatian? Sumungbat ni Pablo babaen ti panangpatanorna kadagiti sumalput a salsaludsod, a tunggal maysa isingasingna ti negatibo a sungbat: “Ta ania ti pakikaduaan ti kinalinteg iti kinakillo? Wenno ania ti pakikaduaan ti silaw ken ti sipnget? Ket ania ti pakikappiaan [Griego, sym·phoʹne·sis] ni Kristo ken Belial [Satanas]? Wenno ania ti pakaibiangan ti mammati iti saan a mammati?” (2 Corinto 6:14, 15) Ti Griego a sao a sym·phoʹne·sis ket literal a kaipapananna ti “agaweng nga aggiddan” (manipud syn, “kadua,” ken pho·neʹ, “aweng”). Tuktukoyen dayta ti panagtunos a patauden dagiti instrumento ti musika. Siempre, awan panagtunos iti nagbaetan ni Kristo ken Satanas. Umar-arngi, iti di agpada a pannakaisangol, nakarigrigat para iti asawa a lalaki ken babai ti ‘mangkalbit kadagiti isu met laeng a kuerdas.’ Arigdat’ dua nga instrumento ti musika a di agkatunosan iti maysa ken maysa, a mangpataud ti agduma nga aweng imbes a musika.

10. Ania dagiti nasken nga elemento iti naragsak a panagasawa, ken ania dagiti bentahena no adda agkapareho a sangol?

¹⁰ Ngarud, kasano, a tagiragsaken ti maysa a naespirituan a tao ti naan-anay a pannakitunos iti nainlasagan a tao? (1 Corinto 2:14) Dagiti agkapareho a pammati, prinsipio, ken kalat ket naskenda nga elemento iti naragsak a panagasawa. Awan makaited dakdakkel a pigsa iti panagasawa ngem iti debosion dagiti dua iti Namarsua. No agkasangolanda, ti asawa a lalaki ken babai makapagpinnaregtada iti maysa ken maysa iti panagdayaw. Mabalinda a dua ti kumita iti Kasuratan a mangukas ti aniaman a di pagkinnaawatan. Ngarud, saan kadi a nalawag, nga ibagbaga ni Jehova kadatayo a ditay isangol ti bagitayo kadagiti di kapammatian agsipud ta kayatna a tagiragsakentay nga inggat’ mabalin ti kasingedan a singgalut iti asawatayo?

11. Apay a dagiti tulag ti pannakiasawa kadagiti saan a managdaydayaw naiparit idiay Israel, ket ania a makatignay-panunot a saludsod ti pataudenna?

¹¹ Ti panangipangag iti pakdaar ti Biblia ispalennatay met kadagiti nasakit a bunga a masansan isudat’ resulta no isangol ti Kristiano ti bagina iti di kapammatian. Kas pangarigan, adda ti posibilidad a ti di mammati ibaw-ingna ti Kristiano nga asawana manipud panagserbi ken Jehova. Panunotenyo ti pakdaar ni Jehova iti kadaanan nga Israel. Ti pannakiasawa kadagiti di managdayaw [ken Jehova] ket maiparit. Apay? “Ta pagbaw-ingennanto ta anakmo iti isusurot kaniak,” impakdaar ni Jehova, “tapno agserbida iti sabali a dios.” (Deuteronomio 7:3, 4) No naipasango iti ibubusor ti di mammati nga asawa, adda pagannayasan a maiyanud nga agturong iti dalan a kalalakaan nga awan pakarigrigatan. Naglaka a panunoten, ‘Di mapasamak kaniak dayta!’ Ngem daytat’ napasamak iti lalaki kas kinasirib ni Salomon. Di ngata mapasamak met kenka?​—1 Ar-ari 11:1-6; idiligyo ti 1 Ar-ari 4:29, 30.

12. Kasano a ti linteg ti Dios a mangiparparit ti panagasawa kadagiti ganggannaet nagserbi kas salaknib kadagiti Israelita? Iyilustraryo.

¹² Uray pay no ti mammati di maibaw-ing manipud pudno a panagdaydayaw, kaskasdi nga addada problema ken rigat a masansan nainaig iti nabingaybingay a sangakabbalayan gaput’ relihion. Usigenyo, manen, ti linteg ti Dios iti Israel. Kas pangarigan immanamong ti babai nga Israelita a makiasawa iti lalaki a Canaanita. No maipasango kadagiti seksual nga ar-aramid a nasaknap idiay daga ti Canaan, aniat’ addanto kenkuana a panagraem iti linteg ti Dios? Kas pangarigan, situtulok kadi nga idianna ti seksual a panagdenna bayat ti panagkadawyan, kas kalikaguman ti Linteg Mosaiko?c (Levitico 18:19; 20:18; idiligyo ti Levitico 18:27.) Iti kaso ti lalaki nga Israelita a mangasawa ti babai a Canaanita, kasano ngatat’ panangsuportarna no ti lalaki agdaliasat nga agturong Jerusalem mamitlo ti kada tawen a tumabuno iti panapanawen a pipiesta? (Deuteronomio 16:16) Nalawag, ti linteg ti Dios a mangiparparit kadagita a panagasawa agserbi kas salaknib kadagiti Israelita.

13. (a) Apay a ti tao a taga lubong awanan ti nasanay iti Biblia, a Nakristianuan a konsiensia? (b) Ania a rigrigat ken parikut ti sanguen ti sumagmamano a nabingbingay ti pagtaenganda gapu iti relihion?

¹³ Komusta met itatta? Dagiti moral a pagalagadan dagiti nailubongan a tattao ket naigiddiat unay manipud kadagiti adda idiay Biblia. Agpapan pay kasanot’ kinadalus ti langa ti sumagmamano kadagiti nailubongan a tattao, awanandat’ Nakristianuan a konsiensia, a nasanay iti Biblia. Dida pay nangbusbos ti adu a tawen nga agad-adal ti Saot’ Dios, ‘a pinabaro ti is-isipda’ ken ‘inuksob ti daan a personalidad.’ (Roma 12:2; Colosas 3:9) Gapuna, ti Kristiano a mangisangol ti bagina iti di kapammatian masansan nga isarsarangnat’ bagina iti adu a panagsennaay ken ladingit. Dadduma maipasangoda iti maulit-ulit a panangpilit iti pannakiraman iti binaballikog nga ar-aramid ti sekso wenno mangrambak iti nailubongan a ngilngilin. Ken dadduma agrekreklamoda maipapan ti kinaliday. Kas insurat ti maysa a kabsat a babai: “Ti liday a mariknam no naiyasawaka iti maysa a di agayat ken Jehova isut’ kadadaksan a kitat’ liday nga adda. Kas makitayo, awan asinoman a mabalinmo a pangiranudan ti kinapudno, nga isut’ kapapatgan a banag iti biagmo.”

14. (a) Iti nabingaybingay a pagtaengan, apay a narigat ti panangpadakkel ti annak iti “disiplina ken panangiturong-panunot ni Jehova”? (b) Aniat’ mabalin nga epektona kadagiti ubbing iti nabingaybingay a pagtaengan?

¹⁴ Iti nabingaybingay a pagtaengan, nakarigrigat ti panangisuro kadagiti ubbing “iti disiplina ken panangiturong-panunot ni Jehova.” (Efeso 6:4) Kas pangarigan, ti di mammati, situtulok kadi nga ipalubosna dagiti ubbing a mapan makigimong wenno makiraman iti tay-ak ti ministerio? Masansan dagiti ubbing agpatinggada a nabingay iti ayatda​—inayatda nga agpada dagiti dadakkelda, ngem maymaysa laeng kadagiti naganak ti agayat ken Jehova. Kuna ti maysa a kabsat a babai a nakiasawa iti di kapammatian: “Naglasatak iti adu a sennaay bayat ti 20-tawen a panagasawak. Dimmakkel dagiti annakko a lallaki iti adu a gulo ken pannakariribuk ti emosionda ket ita pasetdan ti lubong. Masansan a ti balasangko ket kanayon a mariribukan iti pannakaiyadayona kaniak gaput’ kalintegan ni tatangna a bumisita. Naadda amin dagitoy a problema agsipud ta idi agtawenak ti 18, diak inkankano ti maysa kadagiti prinsipio ni Jehova.” Ania a prinsipio? Dikay makisangol iti di kapammatian!

15. Apay a ni Jehova balakadannatayo a di isangol ti bagbagitayo kadagiti di kapammatian?

¹⁵ Nalawag, kayat ni Jehova a magun-odantay ti kaaduan manipud biag. Ti kidkiddawenna kadatayo, agraman ti balakadna a ditay makisangol iti di kapammatian, ket agpaay iti pagimbagantayo. (Deuteronomio 10:12, 13) Ti panangasawa iti di mammati ket di panangikankano iti Nainkasuratan a balakad, ti praktikal a kinasirib, ken ti masansan nasakit a kapadasan dagiti dadduma.

Salsaludsod a Masansan a Maiyimtuod

16, 17. (a) No saantay a naannad, kasano a suminga ti emosion iti nasin-aw a panagpampanunot? (b) Rebbeng aya a laksiden ti balakad ti Dios gapu kadagiti naidumduma a situasion a ti maysa a Kristiano nangasawa ti di mammati ket itan isuda a duan agserserbidan ken Jehova? Ilawlawagyo.

¹⁶ Kaskasdi, no ditay agannad, mabalin a ti emosion singaenna ti nasin-aw a panagpampanunot. Mabalin a mangrugi a patientayo a maipuera ti adda a kasasaadtayo. Usigenyo ti sumagmamano kadagiti masansan a maisalsaludsod.

¹⁷ Ania met ngay ti maipapan kadagiti situasion a ti maysa a kabsat a lalaki wenno babai a nakiasawa iti di kapammatian, ket itan isudat’ agserserbin ken Jehova? Kaskasdi, nasalungasing latta ti prinsipio ni Jehova. Ti kadi pagpatinggaanna ikalinteganna ti napasamak? Ti mangiyilustrar iti panangmatmat ti Dios kadagidiay nangilaksid ti balakadna isut’ kaso dagiti Judio a nagsubli manipud pannakakayawda idiay Babilonia. Idi dadduma ti nangala kadagiti pagano nga assawada, direkta a kinondenar da mannurat ti Biblia nga Esdras ken Nehemias ti ar-aramidda. Dagidiay a Judio “naglabsingda,” nakaaramidda ti “dakkel a kinadakes,” ket naaddaandat’ “babak.” (Esdras 10:10-14; Nehemias 13:27) Adda pay banag nga usigen: No laksidentay ti balakad ti Dios, masugatantay ti bagbagitayo iti naespirituan, a mangbibineg ti konsiensiatayo. Maysa a kabsat a babai a ti di mammati a lakayna nagbalin met laeng a mammati ti nagkuna: ‘Kaskasdi a marikriknak pay laeng ti pannakabibineg ti rikriknak. Diak maiyebkas ti nagsakit a riknak no dagiti dadduma itudodakami ket kunaenda, “Ngem nagbalin met kadakuada.”’

18. Aniat’ kurso ti kinasirib no maatrakarka iti maysa a di pay bautisado, ket ania ti idemdemostrayo iti dayta?

¹⁸ Ket ania met no maatrakarka iti maysa nga agad-adal pay laeng ti Biblia ken makigimgimongen, nupay isu ket saan pay a bautisado? Agrag-otayo no adda maysa a mangipakpakita ti interes iti kinapudno ti Biblia. Ngem, ti saludsod, ket: Rebbeng aya a surotenyo ti pagannayasanyo? Kinapudnona, ti kurso ti kinasirib isut’ panaguray bassit agingga iti kalpasan a nabautisaranen ti gayyemyo ket rumangrang-ayen a mangipakpakita kadagiti bunga ti espiritut’ Dios sakbay ti pannaki-date kenkuana. (Galacia 5:22, 23) Mabalin a di nalaka ti panangiyaplikar ti kasta a pammagbaga, ngem ti panangaramidyo iti dayta idemdemostrayo ti debosionyo kadagiti prinsipio ti Biblia; daytoy ti mangisaad ti nasayaat a pundasion maipaay iti pudno a kinaragsak iti panagasawa. No ti gayyemyo pudno nga inayatnakayo ken pudno nga ayatenna ni Jehova, awan duadua a daytoy a lalaki (wenno babai) ti situtulok nga aguray agingga a dakay a dua ket addan “iti Apo”​—a dedikado ken bautisadon​—sakbay ti panaginnarem. Ken, laglagipenyo met, a ti pudno nga ayat saan a masaktan iti panaglabas ti tiempo.​—1 Corinto 7:39; Genesis 29:20.

19. Aniat’ rebbengyo a laglagipen no marigatankayo a mangsapul ti asawayo manipud kadagiti kapammatian?

¹⁹ Anian no marigatankayo nga agsapsapul ti maiyanatup nga asawayo manipud kadagiti kapammatian? “Beinte-seis añoskon, balasang pay, ken pudno a malidayan,” kunat’ maysa a kabsat a babai. Pudno, ti panagmaymaysa mabalin a narigat para kadakayo, ngem dagiti parikut a rumsua manipud pannakaisangol iti di kapammatian iti panagasawa ket ad-adda pay a narigrigat! Ti panagtulnog iti balakad ti Dios mabalin a sapulennat’ pammati, panagteppel, ken anus, ngem manginanamakayo nga ammo ken tarigagayan ni Jehova no aniat’ kasayaatan nga agpaay kadakayo. (1 Pedro 5:6, 7) Pagbalinenyo dayta a tema iti kararagyo, kalpasanna aguray ken Jehova. (Salmo 55:22) Iti daytoy a sistema dagiti bambanag, awan ti addaan ti perpekto a makapnek unay a biag. Mabalin a tarigagayan ti pusoyo ti kabinnadang. Dadduma, nupay kasta, adda met bingayda kadagiti problema, a dadduma saandan a maagasan itoy a sistema. Idiay laeng um-umay a baro a lubong a “ti tarigagay ti tunggal sibibiag a banag” ket mapnekton a naan-anay.​—Salmo 145:16.

20. Kasano ti panangiyebkas ti maysa a kabsat a balasang ti determinasionna, ket no kasta met ti determinasionyo, ania a pannakapnek ti maaddanto kadakayo?

²⁰ Kabayatanna, determinadokay koma a di mangisangol ti bagiyo iti di kapammatian. Maysa a 36-años a kabsat a balasang ti nangiyebkas ti determinasionna a kastoy: “Agkarkararagak nga inaldaw ken Jehova a maipaay iti asawa. Awan tarigagayko nga agsapul iti ruar ti organisasion ni Jehova, ngem ti sulisog kankanayon nga adda. Kabayatanna, planok a parang-ayen dagiti kualidad a mangparang-ay kaniak kas maysa a tao tapno siakto daydiay kita ti naespirituan a babai a birbiruken ti maysa met a naespirituan a lalaki.” Determinadokay met aya a kasta? No kasta, maaddaankayto ti pannakapnek a dumteng manipud panangpaneknekyo iti kinasungdoyo iti Dios ti nadiosan a kinahustisia.​—Salmo 37:27, 28.

[Dagiti Footnote]

Mailawlawagyo Aya?

◻ Kasanot’ panangpakdaar ti Biblia maibusor iti panangaramid ti nasinged a pannakaisinggalut kadagiti di kapammatian?

◻ Apay a dadduma kadagiti dedikado a Kristiano agsapulda pay iti ruar ti kongregasion iti asawada?

◻ Kasano a ti pakdaar ni Jehova maibusor iti pannakisangol iti di kapammatian ket ebkas ti kinamanagayatna kadatayo?

◻ Ania a salsaludsod maipapan iti panagsapul ti asawa ti kaaduan a maiyim-imtuod, ket kasanoyo a sungbatan ida?