Report dagiti Manangiwaragawag ti Pagarian
‘Naimbag a Damag Manipud Adayo a Dagdaga’
◻ IDIAY nakayelyelo a Greenland sumagmamano nga agibumbunannag nga adda iti panangaskasaba a panagdaliasat ti nakasarak ti maysa nga agtutubo a Noruego a nangakseptar ti libro a Life—How Did it Get Here? By Evolution or by Creation? Ngem, saan a nangipakita unay ti dakkel nga interes. Iti sumaganad a panagsarungkarda iti daytoy nakaad-adayo a lugar, kinunana a nabasana a namin-anon ti libro ken kayatnat’ ad-adu pay a libro. Sumagmamano a libro ken broshur dagiti naibati kenkuana. Isut’ maladingitan a makaammo a dagiti agibumbunannag saanda a makasubli aginggat’ sumaganad a tawen ngem innalana ti address dagiti Saksi. Maysa a bulan kalpasanna, iti pannakakellaatda, timmuktok idiay ruanganda. Insalaysayna nga isut’ natnag iti yelo babaen iti scooterna iti niebe idi isut’ agturong iti bilogna, sa inabutnat’ innem nga oras a naglayag tapno madanonna dagiti Saksi. Kayatna ti mangala pay ti ad-adu a literatura ken tapno pakisarsaritaan manen ti kinapudno. Timmabuno iti gimong iti dayta a rabii ket nagplano nga isut’ tumabuno a maminsan ti kada bulan. Immay iti ibibisita ti manangaywan ti sirkito ket naparegta ti kasta unay. Isut’ naglusulosen iti simbaan ket itan mangaskasabaan ti naimbag a damag idiay lugarda. No ti yelo iti kalam-ekna ti manglapped iti itatabunona kadagiti gimong babaen iti bilog, mangala ti helicopter, a ti magastona ket $150 tunggal biahe.
Mano kadakayo ti addaan kasta a regget tapno paadelantaren ti ministeriotayo?
◻ Adu a tattao ti mangab-abrasa ti naimbag a damag idiay Madagascar. Iti nasurok laeng a 3,200 nga agibumbunannag ti Pagarian, 16,205 ti timmabuno ti Panglaglagip ti ipapatay ni Kristo. Pagregreggetan unay dagiti kakabsat a danonen amin a tattao iti isla.
Kas pangarigan, 17 kadagiti 30 nga agibumbunannag ti Isaonjo a Kongregasion naikeddengdat’ mangaskasaba iti teritoria nga adu a kilometro ti kaadayona. Nagrubbuatda idiay barioda kagudua oras kalpasan ti tengngat’ rabii. Iti dua oras nagnagnada iti nakarangrangkis a dana iti igid ti bantay ken limmasatda kadagiti kapitakan. Kalpasanna simrekdan iti tropikal a kabakiran iti alas 2:30 t.b. Gapu ta naabbungotan ti sipnget ti kabakiran, dadduma kadagiti kakabsat a lallaki natnagda kadagiti rengngat. Daddumat’ naitibkol iti naurnong a danum iti likkaong ti batbato. Ti kabakiran addaan kadagiti alimatek ket adu nga insekto ti kimmagat kadakuada. Kaaduan kadagiti kakabsat a babbai kastoy ti sinagabada. Ti pitak ket pagattumeng no maminsan. Amin dagiti 17 nga agibumbunannag ti nasugsugatan iti nadumaduma a pamay-an, ngem nakaruarda manipud kabakiran iti alas 6:30 t.b.!
Ti panagserbi iti tay-ak nangrugi iti alas 6:45 t.b. Kaaduan kadagiti tattao ti nangawat a siaasi kadagiti agibumbunannag. Ti maysa a di nangawat idi umuna isut’ asawa ti Protestante a pangulo ti relihion. Kunat’ babai: “Adda relihionkon; husto daytan kaniak. Ammok aminen nga ibagbaga ti Biblia.” Idi nangiruar ti agibumbunannag ti magasin a Pagwanawanan, sitatangsit a nagkedked ti babai, a kunkunana: “Nagadu ti sabali a basbasaekon.” Ngem nangrugi a nagsalsaludsod: “Asinoka, ken taga-anoka, ken asinot’ nangibaon kenka?” Kalpasan a simmungbatda a sieemma ken insalaysayda bassit ti bannogda tapno makagteng iti barioda, inawat ti babai Ti Pagwanawanan, a kunkunana: “Gatangek dayta. Asinot’ makaammo no Dios ti nangibaon kadakayo?”
Iti ala 1:30 t.m., dagiti 17 ti pimmanawen iti teritoria tapno agawid, a ti panagdaliasatda inabutnat’ kurang ngem uppat nga oras agsipud ta aldaw pay laeng. Nabannogda ngem natalged, ket maragsakan dagiti ruprupada. Kinunada: “Daytat’ di maliplipatan nga aldaw para kadagiti 17 kadakami manipud Isaonjo a Kongregasion.”
Pudno unay, tigtignayen ti espiritu ni Jehova dagiti dedikado nga ad-adipenna a mangikaskasaba ti naimbag a damag ti Pagarian “agingga iti ungto ti daga,” ket adu dagiti mangab-abrasa iti kinapinget dagiti Saksi.—Aramid 1:8.
[Ladawan iti panid 31]
Sangladan ti Umanak, Greenland