Ti Kaiyulogan dagiti Damdamag
Di Umdas ti Panangtagikua ti Biblia
Natakkuatan ti nabiit pay a panagsirarak a kadagiti tattao nga agtagtagikua ti Biblia, kagudua ti nagkuna a dida pay pulos nabasbasa ida. Ramanen daytoy dagiti adu nga agkunkuna a naiyanakda manen a Kristiano. Ngangngani 30 porsiento kadagidiay agkunkuna a Kristiano a napagsaludsodan dida ammo a ni Jesus ket naiyanak idiay Betlehem. Sigun iti The Detroit News, “diesiotso porsiento ti simmungbat ti Jerusalem, bayat a 8 porsiento ti nagkuna a Nazaret.” Ni George Barna, a pangulo ti grupo dagiti nagsurbey, ti nagkuna: “No saanda nga ammo dagiti pagdamdamuan a bambanag kas kadagitoy, kasano a manamnamada a pakisaritaan a sisasaririt dagiti linaon ti Kasuratan iti maysa a di mamati wenno agbiag a maitunos kadagiti biblikal a prinsipio?”
Napaliiw ni apostol Pablo ti umas-asping a kasasaad kadagiti sumagmamano nga addaan ti “regta a maipapan iti Dios; ngem saan a mayannurot iti umiso a pannakaammo.” Tinukoyna met ti dadduma nga “agparangda a nainsiriban babaen ti kananakem a panagdayaw ken kinapakumbaba” ken impadtona a dagiti “maudi nga al-aldaw” matandaandanto iti kaadda dagidiay “adda langada a kinasanto ngem libakenda ti pannakabalin daytoy.” (Roma 10:2; Colosas 2:23; 2 Timoteo 3:1-5) Dagiti pudno a Kristiano, nupay kasta, petpetanda a sidadayaw unay ti Sao ti Dios. Bigbigenda a ti panangtagikua iti Biblia ket saan nga umdas. Imbes ketdi, naimpusuan nga umanamongda iti pammagbagana a “tarigagayan ti awan lalaokna a gatas a naipabiang iti sao.”—1 Pedro 2:2.
Nairuamen iti Kinadakes
Maysa kadagiti benneg nga inlista ni Jesu-Kristo a paset “ti pagilasinan” ti maudi nga al-aldaw daytoy a sistema dagiti bambanag isu “ti lumanlanlan a kinadakes.” (Mateo 24:3, 12) Ti panangabuso ti droga ket addaan dramatiko nga impluensia iti idudur-as ti kinadakes itatta. Kas pangarigan, kuna ti pagiwarnakan idiay Australia a The Sydney Morning Herald a pito kadagiti sangapulo a krimen a maar-aramid idiay New South Wales ket nainaig iti droga, ken agarup 85 porsiento kadagiti armado a panagtakaw iti estado ket ar-aramiden dagiti agus-usar ti heroin. Ken dumakdakkel ti problema ti panangabuso ti droga.
Ti U.S.News & World Report kunaenna nga “awan lugar idiay Europa ti nailaksid manipud iti saplit.” Idiay Union Soviet, ti bilang dagidiay agus-usar ti droga ket napattapatta a minilmilion. Iti awan panginanamaan a panagreggetda a pasardengen ti panangabuso ti droga, linukatan ti gobierno a Soviet dagiti negosasion kadagiti ahensia dagiti mangipatpatungpal ti linteg maipapan ti droga kadagiti 25 a pagilian. Nupay kasta, dagiti namnama a maragpat dagiti gobierno dagita a kalat ket kasla saan a realistiko gapu kadagiti damag a ti ganansia gaput’ droga ket maus-usar a pangpasuksok kadagiti polis, abogado, ken uray pay dagiti ukom. Kunat’ maysa kadagiti naupay nga opisial ti gobierno: “Awan pay puersa ti polisia ditoy lubong a dakkel ti naaramidanna iti panangpasardeng ti abasto [ti droga] a makagkagteng kadagiti lansangan.” Innayonna pay: “Makapaladingit agsipud ta awan aniaman a solusion a maipapaay.”
Dagita a sasao ipalagipna ti padto ni Jesus maipapan kadagiti maudi nga al-aldaw. Impadtona nga iti daytoy a tiempo ‘dagiti tattao agkapuydanto gapu iti buteng, a dida ammo ti ruaranda.’—Lucas 21:25, 26.
Ni Jesus ken ti Politika
Maysa a paulo ti damag idiay The Star ti Johannesburg, a pagiwarnak iti Sud Africa, mabasa: “Ti Iglesia Katolika Inlatakna ti Pastoral a Plano para ti SA.” Ti plano ket isut’ “panangitungpal ti pagarian ti Dios” idiay Sud Africa babaen iti “determinado a panagtarigagay ti simbaan a paksiaten ti panangidumduma ti rasa.” Tapno maragpat daytoy a kalat, ni Jude Pieterse, sekretario-heneral ti South African Catholic Bishops Conference, kunana a birbiruken ti simbaan ti panangsuportar dagiti dadduma nga iglesia agraman “amin a paset ti kagimongan ti Sud Africa.” Nupay kasta, patien dagiti dadduma a Katoliko a ti plano ket maysa a “pamrayan dagiti Obispo tapno pagbalinen dagiti Katoliko kas aktibista ti politika,” inlawlawag ti obispo ti Johannesburg, a ni Reginald Orsmond. Nupay admitiren ni Pieterse a ti plano ket addaan kadagiti napolitikaan nga implikasion, kuna ni Orsmond a dayta ket “saanen a baro” no di ket “kas kalakayen ni Jesus mismo.”
Kinapudnona, nikaanoman nga inturong ni Jesu-Kristo dagiti adalanna nga agbalin a napolitikaan nga aktibisita. Idi isut’ sinaludsodan ni Poncio Pilato, situtured a simmungbat ni Jesus: “Ti pagariak ket saan a paset daytoy a lubong.” (Juan 18:36) Kasta met, nasurok ngem tallo a milion a Saksi ni Jehova ti mangtagtagiragsak ti panagtutunos ti rasa iti ranggoda gapu ta agbibiagda a maitunos iti ‘baro a bilin [ni Jesus], nga agayan-ayatda iti maysa ken maysa; kas panagayat ni Jesus kadakuada’—saan laeng nga idiay Sud Africa, no di ket iti sangalubongan!—Juan 13:34.