Nadiosan a Debosion​—Makagunggona iti Isuamin a Banag

AMMO dagiti Saksi ni Jehova a “ti nadiosan a debosion makagunggona iti isuamin a banag” ken nasken iti pudno a panagdayaw. (1 Timoteo 4:8) No awan dayta, ti relihion agbalin a pormalismo laeng. Ngarud ti “Nadiosan a Debosion” ket maitutop a nagan ti agsasaruno a kumbension distritoda a nangrugi idi napalabas a Hunio.

Idi Agosto, tallo kadagita a kumbension ti naangay idiay Poland iti nakaragragsak a kasasaad. Naaramidda kalpasan ti pannakaited ti opisial a pannakabigbig kadagiti Saksi ni Jehova idi Mayo. (Maipaay kadagiti dadduma a detalye maipapan kadagiti kumbension a Polako, kitaenyo ti Agriingkayo! a Disiembre 22, 1989.) Repasuentay ditoy ti programa ti kumbension kas naiparang idiay Poland.

Piątek w Poznaniu (Iti Biernes Idiay Poznan)

Iti panagdawatda ti taraon ken wayawaya, 50,000 a demostrador ti nagderraaw idiay Poznan idi Hunio 1956. Nagresulta daytoy iti nasurok a 50 a natnatay ken ti pannakabukel ti baro a gobierno a Polako. Iti kasupadina unay, 33 a tawen kamaudiananna, iti kasasaad nga iladladawan ti aglaplapusanan a naespirituan a taraon ken Nakristianuan a wayawaya, nagtataripnong dagiti natalna a Kristiano sadiay tapno denggen dagiti palawag maipapan ti “Panagserbi iti Dios a Mangikalikagum ti Naipamaysa a Debosion,” a tema iti Biernes. Ti kangatuan a bilang a 40,442 ti nagtataripnong sadiay iti Domingo.

Kalpasan ti palawag a panangawat ti tsirman ti kumbension ken pananginterbio kadagiti tattao nga “Addaan Biag a Napnuan ti Nadiosan a Debosion,” naipaay dagiti praktikal a balakad iti palawag a “Liklikan dagiti Bibig a Makapasakit.” Anian a naglaka para iti awan mamaayna a panagsasao nga agbalin a makapasakit a panangidanondanon! Ket ti makadangran a panangidanondanon mabalin nga agturong iti makapapatay a panangpardaya. Ngem sakbay a pagsasaritaan maipapan kadagiti dadduma a tattao, dagiti nataengan a Kristiano, a magagaran a mangitalimeng ti talna ken panagkaykaysa, sisisirib nga isaludsodda iti bagbagida: ‘Nasao koma aya ni Jesus daytoy? Kasapulan kadi a maibaga dayta? Makapabileg ngata? Aniat’ rasonko a pangibagaan iti dayta?’

Naisangsangayan kadagiti kumbension idiay Poland isut’ panawen a naikeddeng tunggal aldaw a dumngeg ti report nga impaay dagiti Saksi manipud dadduma a dagdaga. Dagiti kapadasan nga insalaysay dagiti delegado a nangirepresentar ti 24 a nagduduma a nasion ti nangipaganetget iti kinapudno nga adtoy ti maysa nga internasional a pamilia a pudpudno a nagkaykaysa iti panangbigbigda iti kinapudno a ni “Jehova Idagadagna ti Naipamaysa a Debosion.” Idinto a ti Dios maikari nga umawat ti kasta a debosion, masapul a dagiti ad-adipenna ket di koma nabingay ti ayat ken panagdayawda. Iyilustrar ti ulidan ni Jesus a di mabalin ti kagkaguduat’ puso no maipapan iti naipamaysa a debosion.

Ti nadiosan a debosion ramanenna ti isuamin nga ar-aramidentayo. Gapuna, maysa a tallo-kapaset a diskusion pinakdaaranna dagiti Kristiano a “Liklikan ti Pannakaisiasiyo” kadagiti bambanag maipapan ti taraon ken panaginum, panagkawkawes ken panagbubuok, ken panaglinglingay. Ti kinabuklis ken panagbartek ket isudat’ langa ti kinaagum a mangbibineg kadagiti naespirituan a rikrikna, mangpataud parikut ti salun-at, mamataud ti dakes a kababalin, ken mangiturong kadagiti disgrasia. Ti aglablabes nga estilot’ panagkawes​—di nanakman, karkarna, nakakatkatawa, wenno nakakigkigtot pay​—ket masapul a liklikan. Ti burara, aglablabes ti kinaimpormalna, wenno dagiti nakakipkipet a kawes ket awan ti lugarda. Ti isyu ket saan a no ti estilo ket isut’ moda, no di ket no daytat’ maiyanatup iti maysa a ministro ti Dios. Ken dagiti panaglinglingay a namantsaan ti iyaalsa, kinaranggas, droga, okultismo, wenno seksual nga imoralidad ket saan nga agpaay kadagiti Kristiano.​—Filipos 1:27.

Ti programa iti malem ti Biernes nangrugi iti palawag a “‘Ti Matalek nga Adipen’ ken ti Bagi a Manarawidwidna.” Gaput’ panagtalekna iti kinasungdo dagiti matalek a parparsuana, ni Jehova ti nangitalek wenno nangikargo ti kinaturay. Kasta met ti Anakna. Manipud kadagiti napulotan a paspasurotna, “ti matalek ken naannad nga adipen,” isut’ nangpili ti sumagmamano nga agserbi kas makitkita a bagi a manarawidwid. (Mateo 24:45) Idi umuna a siglo, daytoy a grupo ket buklen dagiti apostol ken sumagmamano kadagiti panglakayen idiay Jerusalem.

Kadagiti moderno a tiempo ti Bagi a Manarawidwid ti sisisinged a nailasin iti editorial staff ti Watch Tower Society ken ti board of directors na. Ngem ti Bagi a Manarawidwid naiduma manipud iti dayta legal a korporasion, kas intudo ti nagpalawag: “Yantangay ti kaadda ti korporasion ket interamente a legal, nga addaan iti pirme a geograpiko a hedkuartersna, daytat’ mabalin a rakraken ni Cesar, ti Estado.” Ngem saan a kasta iti Bagi a Manarawidwid, a daytat’ saan a maysa a legal nga instrumento no di ket dagiti kamkamengna ti “nadutokan babaen ti nasantuan nga espiritu iti sidong ti panangiturong ni Jehova ken ni Kristo.” Gapuna, ti Bagi a Manarawidwid agtultuloy nga agandar ken umawat ti di nabingay a panangsuportar dagiti Saksi ni Jehova iti intero a lubong.

Dagiti kumbension a Polako ket tinabunuan dagiti 5 a miembro ti agdama a 12-katao a Bagi a Manarawidwid. Maysa kadakuada ti nangibitla ti kangrunaan a palawag nga, “Apay nga Adalen ti Nasantuan a Palimed ti Nadiosan a Debosion.” Naibaga iti dayta a ti palimed ti nadiosan a debosion ket saanen a maysa a palimed, ta “daytat’ immayen iti kinapersona ni Jesus.” Inlawlawag ti nagpalawag dagiti innem a paset daytoy nasantuan a palimed a nadakamat idiay 1 Timoteo 3:16, ket sana kinuna: “Ti panangapresiartayo iti nasantuan a palimed ti nadiosan a debosion ti rebbeng a mangiturong a kanayon kadatayo a mangsurot a sisisinged kadagiti addang ni Jesus.”

Pinagbalin a nalawag dagiti dua a simposium a kasapulan ti nadiosan a debosion agpadpada iti agtutubo ken natataengan. Responsable dagiti nagannak iti panangted kadagiti annakda ti naespirituan a tawid babaen ti panangisuro kadakuada a patanoren ti umiso a pannakaawat ti naimbag ken dakes. Dagiti nabagas a panagadal ti pamilia, agraman dagiti realistiko a panangsalaysay kadagiti parikut ti kinaubing, ket nasken a banag. Kanayon nga alerto kadagiti seniales ti peggad, masapul a saluadan dagiti nagannak dagiti annakda manipud di makaay-ayo a pannakikuykuyog, uray iti uneg ti kongregasion.

Iti kasumbangirna, no dagiti agtutubo agbiagda kadagiti makagunggona a biag, masapul a kumitada ken Kristo, a ‘nangibati ti ulidan tapno surotenda a sisisinged dagiti addangna.’ (1 Pedro 2:21) Maiyanatup unay, naisaludsod kadakuada: “No dimmakkelkayo iti kinapudno, ammoyo no ania ti pinatiyo, ngem ammoyo kadi no apay?” Naparegtada a mangtagikua iti kinapudno babaen ti panangpaneknekda a mismo a ti Biblia ket Sao ti Dios ken pudno nga adda kadagiti Saksi ni Jehova ti kinapudno.

Iti adu a pagilian daytoy a diskusion ti tinampokan ti pannakairuar ti baro a 320-panid a libro a Salsaludsod nga Iyimtuod ti Agtutubo​—Dagiti Sungbat nga Epektibo. (Pangngaasiyo ta kitaenyo ti naipakuyog a kahon a, “‘Sagut Manipud ken Jehova’ Para kadagiti Agtutubo.”) Namnamaen a dagiti agtutubo idiay Poland ken dadduma pay a pagilian iti Akindaya nga Europa nga iti maysa nga aldaw magunggonaandanto met manipud ti nagsayaat a balakad a linaon daytoy a publikasion babaen ti panangbasada iti dayta iti mismo a pagsasaoda.

Sobota w Chorzowie (Iti Sabado Idiay Chorzów)

Ti Chorzów ket maysa a sentro ti industria idiay tengnga dagiti pagminasan ti karbon iti umabagatan a Poland. Dagiti Silesian a pagminasan ti karbon kinaipapananna ti ganansia ti ekonomia para iti dayta a lugar. Ngem ti kangrunaan a topiko a pagsasaritaan kadagiti 65,710 a tattao idiay Slaski Stadium idi napan nga Agosto ket maysa a dakdakkel a kita ti ganansia.

“Ti Nadiosan a Debosion Kaipapananna ti Dakkel a Gunggona,” ti tema para iti Sabado, ti inlawlawag ti immuna a nagpalawag iti sesion ti malem. (1 Timoteo 6:6) Ti nangipaganetget ti kinapudno dagiti sasao ti nagpalawag isuda dagiti pananginterbio kadagiti indibidual a naglak-amen ti dakkel a gunggona iti mismo a biagda babaen ti panangsurotda ti nadiosan a debosion.

Kabayatan ti programa iti agsapa, dagiti gunggona iti panangsurot iti nadiosan a debosion ket naipaganetget iti maysa a simposium. “Babaen ti Regular a Panagbasa [ti Sao ti Dios] nga Addaan Pannakaawat,” a suksukimaten ti kaipapanan ti intay basbasaen, ken buyogen ti panagkararag a panangusig no kasanot’ panangiyaplikartay ti intay naadal, datayo kas Kristiano mabalinantay a suroten ti nadiosan a debosion “Babaen ti Kanayon a Panangisilnagtay ti Silawtayo.” (Josue 1:8) Naibaga a no tunggal maysa kadagiti Saksi ni Jehova iti intero a lubong ti mangbusbos laeng ti 15 minutos kada aldaw a makisasao nga impormal kadagiti dadduma, ti kanayonan a 327 milion nga oras ti mabusbos kada tawen iti trabaho a panangikaskasaba ti Pagarian.

Ti nadiosan a debosion ket masurot met “Babaen ti Panangparmek ti Sulisog.” Dagiti bambanag kas ti taraon, inumen, sekso, wenno kuarta, nupay saanda met a dakes a mismo, agbalinda a dakes iti sidong dagiti di umiso a sirkumstansia. Ti dalan ti salaknib ket isut’ panangliklik iti aglablabes a panangisarang ti bagi iti materialismo ti lubong, iti pornograpia, droga, ken panagbarbartek, agraman iti panaglablabes iti ragragsak, kas iti musika, ay-ayam, ken sosial a panagtataripnong. Nasken ti panagkararag. Masapul a maadal dagiti Kristiano a guraen ti dakes. Maiyanatup daytoy, ta intudo ti sumaganad a nagpalawag a rebbengda ti “Agbiag Saanen a Maipaay ti Pagayatan ti Tao No Di Ket iti Dios.”

Umad-adu dagiti tattao ti mangikedkeddeng a mangaramid iti kasta. Napaneknekan daytoy idi 2,663 a baro a Saksi ti nangiyebkas iti publiko ti determinasionda a “Suroten ti Nadiosan a Debosion kas dagiti Dedikado, Bautisado a Kristiano.” (Kadagiti amin tallo a kumbension idiay Poland, ti dagup amin a kandidato iti bautismo ket 6,093.) Tapno mataginayon ti rag-o iti serbisio ni Jehova, dagidiay ngangngani mabautisaranen naparegtada a mangmennamenna kadagiti adu a rason iti panagrag-o: Pannakigayyem ni Jehova, ti sangalubongan a panagkakabsatda, ken ti namnama nga agbiag iti Paraiso.

Ti Nakristianuan a panagpasakop ti rimmuar met iti diskusion iti palawag a “Panangiparangarang kadagiti Ar-aramid ti Nadiosan a Debosion​—Kas Lallaki iti Sidong ti Kinaulo ni Kristo.” Dagiti lallaki a mangal-alagad ti nadiosan a debosion ket aywananda dagiti annongenda iti pamilia iti naayat, kas ken Kristo a pamay-an. “Kas Babbai a Mangipakpakita ti Umiso a Panagpasakop,” dagiti Kristiano a kakabsattayo a babbai agbalinda met a manangsuportar, a saanda nga impluensiaan iti di umiso ti ulo ti pamilia wenno palpalubosan ti emosion a mangallukoy kadakuada nga agaramid kadagiti di nainsiriban a desision. “Kas Annak nga Agtultulnog kadagiti Nagannak,” adalen met dagiti agtutubo ti agtulnog, nga agkomento kadagiti panaggigimong, ken makiraman iti Nakristianuan a ministerio.

Anian a nagsayaat a balakad! Kaskasdi, anian a nakaayay-ay ti pannakapaay ti ulbod a relihion a mangted iti kasta nga umiso a panangiwanwan! Gapu itoy, maikari dayta ti napigsa a panangkondenar, nga isut’ simmaruno iti palawag a “Panangibutaktak iti ‘Tao ti Kinakillo.’” Daytoy maysa a misterioso ket naipabigbig kas “napagkaykaysa a ‘tao,’ ti intero a narelihiusuan a klero ti apostata a Kakristianuan.” Agdinamag iti kinadakesda gaput’ panangidadanes kadagiti ad-adipen ti Dios, dagiti klero ket kinaduaan itan dagiti “moderno nga apostata, a dati nga agkunkuna a Saksida, [ngem] agsubsublidan kadagiti doktrinal a sarwa ti Kakristianuan ken makikadkaduadan kadagiti naespirituan a mammartek iti Babilonia a Dakkel iti panangkabkabil ken panangraut iti klase matalek ken naannad nga adipen ni Jehova.” Ti panagpalakpakda impamatmatna ti anamongda idi a kinuna ti nagpalawag: “Itultuloytayo nga ibutaktak ti Babilonia a Dakkel ken dayta ‘tao ti kinakillo.’”

Sapulen daytoy ti tured, nangnangruna iti panawen a, sigun ken M. .G. Henschel, a miembro ti Bagi a Manarawidwid, kaaduan a tattao “tinallikudandan ti Dios ken ti Saona, nga isu ti Biblia.” Nupay “ti panagraem iti Biblia itatta ket kababaan pay laeng iti isuamin a panawen,” natakderan ti Biblia ti suot ti panawen. Insalaysay ti nagpalawag nga “awan libro nga inaramid a mismo dagiti tattao ti mabalin a nauneg unay ti pannakaawatna ken kankanayon nga umiso.” Kinunana a “dagiti Saksi ni Jehova palpalubosanda ti Sao ti Dios a maaddaan pannakabalin iti biagda [ken] ti imbungana nga internasional a panagkakabsat dagiti pudno a Kristiano ket nagpigsa nga ebidensia a ti Biblia ket naipaltiing a Sao ti Dios.” Nagtengan ti aldaw ti makaparagsak a tampokna babaen ti pannakaiyanunsio ti baro a libro a Ti Biblia​—Saot’ Dios wenno ti Tao?, a nairuar iti nakaad-adu a pagsasao.

Niedziela w Warszawie (Iti Domingo Idiay Warsaw)

Kaaduan a sangaili ti Warsaw mapanda kitaen dagiti tanda a pakalaglagipan ti nakababain a Warsaw Ghetto, a sadiay ti nangikulongan dagiti Nazi ti ginasgasut a ribo a Judio a namarkaan a mapapatay bayat ti Gubat Sangalubongan II. Masarakan iti sumagmamano laeng a minuto babaen iti kotse manipud sadiay, nupay kasta, napekpek ti X-Lecia Stadium, idi Agosto 13, kadagiti 60,366 a tattao a dimmar-ay tapno denggenda ti pampanunot iti “Iwaksi ti Kinadakes ket Agbiag iti Nadiosan a Debosion,” ti tema para iti Domingo.​—Tito 2:12.

Ti panagbiag iti nadiosan a debosion nalawag a dina ipalubos ti panangiparangarang ti nailubongan nga espiritu ti panagwaywayas. Ti pudno iti biag a drama nga “Ipasakopyo ti Biagyo ken Jehova,” a naiparang a binuyogan ti entusiasmo a Polako, impaganetgetna ti nasken a panagbalbaliw a masapul nga aramiden dagiti Kristiano tapno awatendat’ anamong ti Dios.

Maysa a kameng ti Bagi a Manarawidwid ti nangadaw ti 1 Corinto 8:6, a kunkunana: “Ngem kadatayo adda maymaysa a Dios nga isu ti Ama.” Imbagana a ti kangrunaan a doktrina ti Kinakristiano ket saan a ti Trinidad, kas kunat’ adu, no di ket ti panangalangon ken Jehova babaen ti Pagarianna iti sidong ni Kristo. “Ti sursuro a Trinidad ket isisiasi iti kinapudno, ti panagapostata manipud iti dayta,” inlawlawagna. Gapuna, dagiti tattao a mangaw-awag ken Maria nga ina ti Dios ken ti Manangibabaet ti Dios ken iti tao ket saanda “sinalimetmetan ti Dios iti umiso a pannakaammo.” (Roma 1:28) Gapuna, “ti umiso a panagdayaw iti Dios kaipapananna ti panangilaksid iti doktrina a Trinidad.” Ti panagpalakpak inabrasana ti pannakairuar ti 32-panid a broshur a, Czy wierzyć w Trójcę? (Rumbeng Aya a Patienyo ti Trinidad?) Anian a nagsayaat nga instrumento a pangibutaktak iti kinaulbod daytoy mangibabain-Dios a doktrina!

Di pulos immay ti pannakaispal kadagiti biktima ti Warsaw Ghetto. Ngem ti kari ti Dios, kas nailawlawag iti palawag publiko, a ta “Asidegen [ti] Pannakaispal dagiti Tattao ti Nadiosan a Debosion!” (2 Pedro 2:9) Pudno daytoy numan pay dagiti Kristiano nagbalindan a biktima kadagiti nagkadua a kita ti kinaranggas​—daydiay kita nga inaldaw-aldaw a kita ken daydiay maipatpaturong kadakuada babaen iti pannakaidadanesda. Umaw-awag ti kabukbukodan a panangsukimat, impaganetget ti nagpalawag a “ti pannakaispal ket agpaay laeng kadagidiay tattao ti nadiosan a debosion, dagidiay a ti debosionda ket pudpudno, dagidiay a ti kinatulnogda ket ebkas ti kinasungdoda.”

Kalpasan ti pinal a palagip a “Nasgedkay Koma iti Espiritu,” nagpatingga ti kumbension babaen iti makatignay a presentasion iti tema a “Ti Agtultuloy a Pannakasanaytayo iti Nadiosan a Debosion ket Makagunggona.” Kalpasanna linuktan dagiti kumbensionista ti kabbaro a pagkantaanda iti Polako, a karuruar laeng kadagiti pagimprentaan sumagmamano a lawas a nasapsapa, ket sangsangkamaysada a nangipaay ti “Kararag a Panagyaman” babaen iti kanta 45.

Ti maysa a nabara ken napasnek a kararag ti simmaruno, ket kalpasan dayta bimtaken ti gumgumluong a panagpalakpak idiay Warsaw, Poznan, ken Chorzów. Idiay Warsaw ti nakabarbara a panagpalakpak ti pinullo-ribo nga im-ima ket nagallangogan a nagsasaruno iti nasurok a 11 a minutos. Awan ti mayat a pumanaw, ket ti panagpalakpakda bayat ti itatakderda, nga ebkas ti ragsak daytoy nga umariwekwek a bilang dagiti Saksi, nga adu a ribo ti damdamona nga umatender ti tallo-aldaw a kumbension, ket dramatiko a panangiyebkas ti panagyamanda ken Jehova ken iti organisasionna. Daytat’ kasla sungbatda iti Salmo 47:1, 2: “O agsipatkayo, dakayo amin nga umili. Agpukkawkayo iti Dios iti timek ti panagballigi. Ta ni Jehova a Kangatuan, nakakigkigtot, isu ti naindaklan nga Ari iti amin a daga.” Bayat a ti maysa kadagiti kagrandean a pasken iti moderno-aldaw a historia dagiti Saksi ni Jehova ket nagserran, dagidiay napasnek a kakabsat nangrugidan a nagdaliasat iti panagawidda, a ti pusoda agliplippias iti ragsak ken determinasion a parang-ayen ti grande a pammaneknek ti Pagarian maitunos iti nasudi nga ulidan ni Jesus ti nadiosan a debosion.

[Kahon iti panid 27]

Dagiti Baro a Ruar Tignayenda dagiti ‘Ar-aramid ti Nadiosan a Debosion’

Ti baro a libro a Ti Biblia​—Saot’ Dios wenno iti Tao? ken ti broshur a Rumbeng Aya a Patienyo ti Trinidad? agpadpadada a nangtignay kadagiti adu nga ebkas ti panangapresiar. Maysa a sister ti nagsurat maipapan ti broshur a Trinidad: “Nasdaawanak, maragsakanak, ken maay-ayoak iti dayta. Pagyamanan unay ti nagadu a tiempo, pigsa, ken trabaho nga impaayyo iti panangimprenta itoy nagsayaat a pagbasaan.”

Sabali pay a sister ti nagsurat maipapan ti libro a Ti Biblia​—Saot’ Dios wenno iti Tao?: “Kayatko ti agyaman kadakayo manipud kaunggan toy pusok gapu itoy nagpintas a baro a libro. Pampanunotek, pagaammoyo aya a mismo a daytat’ nakasaysayaat? Masansan nga ug-ugedak dagiti nasken a sasao. Ngem pinagkellaatdak ta tunggal maysa a sao ket nasken. Kakkalpasko pay laeng ti kapitulo 5, ngem masapul nga agyamanakon kadakayo.”

[Kahon iti panid 30]

‘Sagut Manipud ken Jehova’ Para kadagiti Agtutubo

Maysa a naisangsangayan a paset dagiti kumbension idiay Estados Unidos ken iti adu pay a sabsabali a dagdaga isut’ sesion iti malem ti Biernes, idi dagiti agtutubo iti nagbaetan ti edad a 10 ken 19 ti naikalikagum nga agtugaw kadagiti naireserba a lugar. Kalpasan ti espesial a nagsasaruno a palpalawag, tunggal maysa ti naikkan iti libre a kopia ti baro a libro a Salsaludsod nga Iyimtuod ti Agtutubo​—Dagiti Sungbat nga Epektibo. Iti intero a lubong, agarup 8,840,000 a kopia ti nairuar iti 21 a pagsasao, ken ginasgasut a surat ti panangapresiar ti naaw-awaten!

“Kadagiti napalabas nga asamblea, addada metten palawag a naipaay kadagiti agtutubo,” insurat ti maysa a babai a tin-edyer, “ngem ti epekto ti pannakaipatugawmi amin a sangsangkamaysa ket kasla di nakapapati.” Insurat pay ti maysa nga agtutubo: “Nagtugawak iti lugar nga agpaay kadagiti agtutubo. Naparegtaak unay iti daytoy ta, nanipud idin, mangal-alaakon iti notas kadagiti gimong, ad-addan ti panagad-adalko, ken ti panagkomentok. Pampanunotekon ti panagpabautisar iti umay a kalgaw.”

Kadagiti adu nga agtutubo, ti kapadasan ket maysa a pasken a pakalaglagipan. “Idi inyanunsio ti agpalawag nga agtugawkami iti espesial a lugar,” malaglagip pay ti maysa nga agtutubo a babai, “Ammokon nga adda dakkel a banag a mapasamak. Idi inyanunsioda ti mairuar a libro, maragsakanak un-unay ta makasangitak pay. Kankanayon nga ammok a maseknankayo kadakami nga agtutubo, ngem daytoy ti immukuok iti pusok. Daytoy a libro ket kasapulanmi unay!”

“Nagsayaat pannakaisuratna,” kuna ni agtutubo nga agnagan Leah, “ken dagiti retratona ket realistiko ken pudno a pagpanunotennaka.” Dagiti edision ti libro iti kumbension naglaonda ti ababa a mensahe manipud ti Bagi a Manarawidwid a naiturong “Kadagiti Amin nga Agtutubo a Saksi ni Jehova.” “Natignayak pay iti dayta espesial a surat,” kuna ni agtutubo nga Andreá. “Para kaniak kasla la maysa kadagiti pinili ni Jehova a makipagtaeng kenkuana idiay langit ti aktual a makisasao kaniak!”

Adut’ nangapresiar a ti libro ket naited kas regalo. Malaglagip pay ti maysa a naganak: “Makasangitak pay. Kakabsat, lima kadagidiay nga agtutubo ket annakko, agtawen ti 11 ingganat’ 16.” Dua koma laeng a libro ti makontribusionak.” Insurat ti agtutubo nga agnagan Mark: “Rinugiak a kinalkular no manot’ gastosna no maikkan ti maysa a kopia ti kada agtutubo, ngem idin nabigbigko a ti panangiwanwan nga addat’ unegna ket di magatadan. No ti libro matulonganna ti uray maysa laeng a simiasi nga agtutubo nga agsubli iti dalan nga agturong iti biag wenno, nasaysayaat pay, matulonganna ti adu kadatayo nga agtalinaed iti dayta a dalan, maikari amin dayta ti nginana.”

Adu nga agtutubo ti nangrugi a nagunggonaan a dagus iti dayta a libro. “Immatenderak iti kumbensionmi idi Hulio 7-9,” kuna ti maysa nga agtutubo, “ket iti Lunes, Hulio 10, nalpaskon dayta!” Kunat’ sabali pay: “Dagiti maudi a dua a kapitulo pudno a pinaregtadak tapno rugiak ti maaddaan ti ad-adda a serioso a panagbiag. Naminsan a kayatkon ti agpabautisar ngem nagbaliw ti panunotko. Itan ta nakaawatak iti daytoy nakaskasdaaw a publikasion, makitakon a ‘ti lubong aglabasen’ ket kasapulan nga agtignayak itan.”

“Gapu ta nagbalbaliw unayen dagiti panawen,” insurat ti maysa nga agtutubo a babai, “pampanunotek a kanayon a di ammo dagiti nataengan no kasanot’ riknami. Dikay ammo no kasanot’ kinaragsakko a makakita a nagkamaliak. Ti atensionyo kadakami nga agtutubo impariknana kaniak a maikariak.” Insurat ti maysa a grupo dagiti agtutubo a taga Sweden: “Patienmi a matartarusandakami nga agtutubo, ken mariknami met a nakasingsingedkami kadakayo.”

Maysa nga agtutubo ti nanggupgop a naimbag iti dayta idi a kinunana: “Ti kabsatko a lalaki ken babai ken siak inayatmi unay ti libro. Patienmi a daytat’ sagut a naggapu a direkta ken Jehova.” Ikarkararagmi a daytoy a regalo wenno sagut ti agtultuloy nga agtignay a pakabendisionan dagiti agtutubo a managbuteng iti Dios.

[Tsart iti panid 29]

Nadiosan a Debosion Rumangrang-ay Idiay Europa!

1979 1984 1989 1979 1984 1989

AUSTRIA 17,847 20,908 25,153 236 257 307

BELGIUM 23,185 28,456 30,622 234 248 429

BRITANIA 113,910 137,008 160,704 605 937 1,344

DENMARK 21,057 23,267 24,645 122 147 249

FINLAND 20,293 23,501 25,679 215 302 329

FRANCIA 89,073 110,745 156,751 1,361 1,856 3,201

ALEMANIA 129,342 140,681 159,819 1,154 1,009 1,694

ITALIA 117,163 169,328 240,041 2,515 3,769 6,295

LUXEMBOURG 1,141 1,327 3,131 8 12 61

NETHERLANDS 36,768 42,060 44,185 126 143 271

NORWAY 10,327 11,352 13,829 107 159 294

POLAND ​— 94,134a 166,518 ​— 3,140b 6,093

PORTUGAL 35,108 47,843 59,797 862 1,068 1,546

ESPANYA 62,201 84,706 115,981 1,278 1,521 2,935

SWEDEN 21,286 25,204 30,943 279 323 410

SWITZERLAND 14,455 17,457 23,867 130 225 349

DAGUPNA 713,156 977,977 1,281,665 9,232 15,116 25,807

[Dagiti Footnote]

[Ladawan iti panid 26]

Ti pannakairuar ti broshur a “Trinidad” ket gubuayan ti rag-o idiay Warsaw

[Ladawan iti panid 31]

Dagiti kabbaro a dedikado a Saksi idiay Chorzów sinurotda ti nadiosan a debosion babaen ti pannakabautisarda