Magunggonaankay Aya iti Di Kaikarian a Kinamanangaasi?

“NO AD-ADDA a maad-adalko dagiti pagalagadan ti Dios idiay Biblia, ad-adda met a mariknak a diak maikari iti parabur ken bendisionna,” kuna ni Frank. Ti interesna iti Biblia ti nariing bayat nga isut’ adda idiay pagbaludan gapu kadagiti basol maipapan ti droga. Isut’ nakabasa ti kopia ti libro a Ti Kinapudno a Mangiturong iti Biag nga Awan Inggana,a nariknana a ti kinunana isut’ kinapudno, ket, kalpasan ti pannakawayawayana manipud pagbaludan, binirukna dagiti Saksi ni Jehova tapno makaadal ti ad-adu pay maipapan ti Biblia.

Apay a ti panagad-adal ti Biblia ti namagrikna kenkuana iti saanna a pannakaikari? Gapu ta ti napalabas nga estilot’ panagbiagna sinalungasingna ti adu a prinsipio ti Dios. Ti di umiso a panangusar ti droga, panangabuso ti alkohol, ken dagiti nadumaduma pay a makaibabain nga ugali ti nakaipababa unay kenkuana nga iti naminsan nga okasion kuna ti maysa a polis kenkuana: “Pangngaasim man ta ibagam kaniak ti direksion ti balayyo? Kayatko laeng a maammuan no sadinot’ pangipatulodak ti bangkaymo!”

No ania ti namagrikna kenkuana iti kamaudianan a di unay maikari, nupay kasta, a ta nupay kasano kapinget ti panangpadpadasna, nakitana a narigatna a parmeken dagitoy naipasagepsepen a narugit nga ug-ugali. Ti nakababain a panangtengngel ti alkoholismo, kas pangarigan, ti ngangngani nangdaeg kenkuana. “Agsasaruno ti nakaladladingit a pannakapaayko ken lumdaangak unay,” kunana. “Ngangngani simmukoakon nga interamente, a mamati a siak ket maysan a kaso nga awanen pangnamnamaan.”

Dadduma ti mabalin nga awanan met ti kasta a napalabas a kas ken Frank. Ngem, kaskasdi, mabalin nga addaanda kadagiti rikna ti kinakurang. Mabalin a daytoy ket gapu ta nangikabildat’ di nainkalintegan a nangangato a pagrukodan iti bagbagida kabayatan ti panangpadpadasda nga agbiag iti patienda a kalkalikaguman ti Dios. No mapaayda, kasla nakabasol riknada. “Ti basol mabalin nga agbalin kas dakes a tagtagainep,” inlawlawag ni Dr. Claire Weekes iti librona a Self-Help for Your Nerves, “nangnangruna kadagidiay mangpadpadas a mangikeddeng iti nangato a pagalagadan para iti bagbagida.” Aniat’ maaramidan ti maysa a Kristiano no isut’ apektado ti kasta a rikrikna ti di pannakaikari?

Patgenyo ti Di Kaikarian a Kinamanangaasi

“Maysa a banag a nakatulong unay kaniak,” kuna ni Frank, “ket isut’ panangipateg ti kuna ti Biblia idiay Hebreo 4:15, 16.” Sadiay impalagip ni apostol Pablo kadatayo a ni Jesus ket maysa a naayat a katulongan a “makabalin a mangrikna kadagiti kinalap-ittayo” ken namagbalin a posible para kadatayo nga “awatentayo ti asi ken makasaraktayo ti di kaikarian a kinamanangaasi a tumulong kadatayo iti aldaw ti pannakasapul.”

Kayatyo aya ti tulbek a mangparmek kadagiti rikna ti di pannakaikari? Isu daytoy: Laglagipenyo a ni Jehova a Dios ken ni Jesu-Kristo ammoda a nalap-ittayo gapu iti natawidtayo a kinaimperpekto. Maawatanda a ditay makarukod a naan-anay kadagiti nalinteg a pagannurotan. (Salmo 51:5; Roma 3:23; 5:12, 18; Santiago 3:2) Ngarud isuda saanda a mangnamnama ti dakdakkel kadatayo ngem ti maipaaytayo. Kumitkitada kadagiti nasasayaat a puntotayo, saan a kadagiti pagkapuyantayo. Insaludsod ti salmista: “No sika, O Jehova, mingmingam koma dagiti kinadangkes, O Jah, siasino koma ti makapagtakder?” (Salmo 130:3) Maapresiaryo nga awan kadatayo ti makapagtakder. Babaen iti daton a subbot ni Jesu-Kristo, nupay kasta, siaasi a maikkannatayo ni Jehova ti nadalus a takder agpapan pay dagiti kinaimperpektotayo. (1 Juan 2:2; 4:9, 10) Magun-odantayo “ti pammakawan dagiti basbasoltayo”​—ket gapu itoy matulongantay a mangparmek ti aniaman a rikna ti kinaawan-kuentana​—“mayanuurot iti kinabaknang ti di kaikarian a kinamanangaasina.”​—Efeso 1:7.

Matmatanyo a kastoy. Dagiti tattao a kaay-ayoda unay dagiti ar-aramid ti arte agusarda ti adu a panawen a mangritubar ti naperperdi unay a paintings ken dadduma pay nga ar-aramid ti arte. Kas pangarigan, idiay Nasional a Galeria ti Londres, Inglatera, idi ti maysa nga addaan iskopeta nadadaelna ti maysa a cartoon ni Leonardo da Vinci a ti pategna ket £20 milion (agarup $32 milion, U.S.) awan nangisingasing a gapu ta ti drawing ket naperdin, daytat’ rebbeng a maibellengen. Nangrugi a dagus ti panangipasubli iti dayta 487-añosen nga obra maestra. Apay? Agsipud ta daytat’ nasudi iti mata dagiti managayat ti arte.

Saankayo aya a napatpateg ngem ti maysa a drawing iti tisa ken uging? Kadagiti mata ti Dios pudno a napatpategkayo​—agpapan pay kasta unay pannakadadaelyo gapu kadagiti natawid a kinamanagbasol. (Salmo 72:12-14; Mateo 20:28) Ni Jehova a Dios, ti nasigo nga orihinal a Namarsua ti natauan a pamilia, aramidenna ti aniaman a nesesita a mangipasubli iti kinaperpekto dagiti miembro dayta a pamilia a situtulok a mangabrasa ti kinadungngona.​—Idiligyo ti Aramid 3:21; Roma 8:20-22.

Abrasaen ti Di Kaikarian a Kinamanangaasi

Surotenyo ti ulidan ni apostol Pablo. Dakkel ti panangapresiarna iti kinamanangaasi ti Dios iti naasi a panangpakawanna kenkuana gaput’ napalabas a babbabakna agraman ti agtultuloy a panangtulongna iti pannakidangadangna a mangparmek iti maulit-ulit a kinakapuyna. (Roma 7:15-25; 1 Corinto 15:9, 10) Pinalinteg ni Pablo ti panagbiagna ken kasta met a ‘ginubgubatna ti bagina ken inturongna kas adipen’ tapno makapagtalinaed iti dalan nga inanamongan ti Dios. (1 Corinto 9:27) Saanna a pinalubosan ti bagina, buyogen iti managbasol a pisikal ken emosional a pagannayasanna, a mangiturong kenkuana kas maysa nga adipen.

Awatenyo ti di kaikarian a kinamanangaasi ti Dios, ket bay-anyo a daytat’ mangiturong kadatayo iti panagbabawi. (Roma 2:4; 2 Corinto 6:1) No dagiti napalabas a kinadakes ti mangriribuk kadakayo, palintegenyo ida ket kalpasanna mamatikayo iti kari ni Jehova a pakawanennakayto. (Isaias 1:16-18; Aramid 2:38) No ti maulit-ulit a kinakapuy saplitennakayo, itultuloyyo ti mangdangadang kadakuada. Agkararag a sipapasnek maipaay iti tulong ni Jehova a mangparmek kadakuada bayat nga itaklinyo met ti bagiyo iti asina. (Salmo 55:22) Iti panangadawna ti bukodna a kapadasan, imbalakad ni Frank: “No asinoman ti sagpaminsan a mapaay iti pannakidangadangna kontra iti maysa a dakes nga ugali, saanna koma a matmatmatan dayta kas naan-anayen, pinal a pannakapaay no di ket, kas apagbiit laeng a panagsanud.” No adda dadduma a mangnayon kadagiti problemayo a mangbiruk ti ad-adu ngem ti maipaayyo, laglagipenyo a ti Dios ti pagreggetanyo nga ay-ayuen, saan a dagiti tattao.​—Galacia 1:10.

Iti pannakidangadangyo nga agaramid ti nalinteg, agannadkayo kontra “kadagiti kinasikap” ni Satanas, dagidiay makunkuna a “dagiti dakes a gannuat ti Diablo.” (Efeso 6:11, Reference Bible, footnote; Today’s English Version) Usigenyo ti dua kadagiti “dakes a kinasikap” nga usarenna a pangpadpadas a mangilibak kadakayo kadagiti gunggona ti di kaikarian a kinamanangaasi.

Dagiti “Dakes a Kinasikap” ni Satanas

Aprobetsaren ti Diablo ti rikna ti di pannakaikarkari tapno padasennakayo nga iyadayo iti Dios. Ni Satanas ti naggubuayan ti basol a nangdadael kadakayo idi damo. Ita mabalin a padpadasenna nga iparegta ti rikna nga awan kuentayo iti imatang ti Dios, kas impadpadas ni Bildad nga aramiden ken Job. (Job 25:4-6; Juan 8:44) Manon a panaggugubat ti naab-abak gapu ta dagiti soldado simrekda ti pannakidangadang a napakapuyen ti riknada! Gapuna, dikay palubosan ni Satanas a pakapuyennakayo. (Efeso 6:10-13) Gapu ta sipupuotkayo kadagiti gannuat ni Satanas daytat’ rebbeng a mangpasaranta kadakayo a makidangadang nga ad-adda pay a maipaay iti nalinteg.​—2 Corinto 2:11.

No sagpaminsan mapaladingitkayo kadagiti maysa wenno dadduma pay a pannakaupay, siguraduenyo a dikay ‘malmes iti aglablabes a liday.’ (2 Corinto 2:7) Nagkomento ni Dr. Claire Weekes maipapan ti pagannayasan ti dadduma a palubosanda dagiti napalabas a pannakapaay a manglapunos kadakuada: “Ti panangipalubos iti napalabas a basol a mangparalisado ti agdama nga ar-aramid ket isut’ makadadael a panagbiag.”​—Kitaenyo ti Aramid 3:19.

No maragpattay amin a naan-anay dagiti pagannurotan ti Dios, daytantot’ maikari a kinamanangaasi kenkuana no itdenna kadatayo dagiti bendision nga inkarina. Ngem ni Jehova a Dios ken ni Jesu-Kristo pakpakitaandatayo ti kinamanangaasi a “di kaikarian.” Ilawlawag ti A Greek-English Lexicon of the New Testament, ni J. H. Thayer, ti kaiyulogan ti sao nga inusar ni apostol Pablo a mangdeskribir iti daytoy a kualidad ti Dios: “Ti sao a [khaʹris] naglaon iti ideya ti kinaasi a mangipaay iti maysa ti saan a maikari kenkuana.” Awan ar-aramidtayo a maikari ti bendision ti Dios. Daytat’ kas kinuna ni Pablo, maysa a di kaikarian a kinamanangaasi. No sipapasnekkayo a mangar-aramid iti amin a kabaelanyo iti uneg dagiti limitasionyo a mangtungpal kadagiti obligasionyo iti Dios, maragsakankay koman a mangar-aramid iti dayta. Saan nga agkiddaw ni Jehova iti dakdakkel kadakayo.

Ngem, silalagipkay pay koma, iti sabali pay a “dakes a kinasikap” ni Satanas. Allilawenna dagiti dadduma a panunoten a mabalinda a gundawayan ti di kaikarian a kinamanangaasi ti Dios, a mabalinda a laisen ti kinaasina. Siaayat a pakawanen ni Jehova dagiti pagkapuyantayo, ngem dina kayat a sawen mabalintayon nga isardeng ti panangparmek kadakuada. Dineskribir ni Pablo ti dadduma a “nangipayat babaen kadagiti saksakada iti Anak ti Dios ket . . . inumsida ti espiritu ti di kaikarian a kinamanangaasi.” (Hebreo 10:29) Dagitoy ti nangipakita ti kinaawan respeto kadagiti nalinteg a prinsipio ken sitatangsit nga inumsida dagiti linlinteg ti Dios, nga inkabildat’ bagbagida a saanen a mapasubli. Ti kabsat ni Jesus iti ina a ni Judas, a nakakita iti peggad nga iparparang dagita a disipulo ni Satanas, nagsurat: “Ta adda dadduma a tattao a simrekda [iti kongregasion] a di nadnadlaw, . . . nadangkes a tattao, a pagbalinenda a derrep ti di kaikarian a kinamanangaasi ti Diostayo.”​—Judas 4.

Mabalin nga allilawen ni Satanas dagiti kakasta a panunoten a mabalinda ti sipapakinakem nga agaramid iti kinadakes ket sadanto dawaten ti pammakawan ti Dios iti basolda. Ngem saan a pakawanen ni Jehova dagita a sipapakinakem a managsalungasing ti linlintegna. Isu ti “aglaplapusanan iti kinaimbag a siaayat” kadagidiay pagreggetanda ti agserbi kenkuana aginggat’ kabaelanda agpapan pay kinaimperpektoda. “Ket iti uray kaano dina ilaksid iti dusa” no daytat’ kasapulan.​—Exodo 34:6, 7.

Mabalinyo ti Magunggonaan Manipud Di Kaikarian a Kinamanangaasi

Makaliwliwa a maammuan a ni Jehova saannakay laeng a matmatan iti imperpekto, nadadael a kasasaadyo. Ammona no aniat’ pagbalinanyo inton dagiti makaisubli a pannakabalin ti daton a subbot ni Jesus ket maiyaplikarton a naan-anay. Agkararag ngarud a sitatalek ken Jehova, kas inaramid ni salmista David. “Kaasiannak, O Dios,” kuna ni David, “kas mayannurot iti kinamanagayatmo. Kas mayannurot iti karuay dagiti nasnekan a kaasim punasem dagiti kinasalungasingko. Bugguannak iti amin a kinadakesko, ket ugasannak iti basolko. Ta ammok dagiti salungasingko, ket ti basolko kanayon nga adda ditoy sanguanak. Ilingedmo ta rupam kadagiti basbasolko, ket punasem dagiti amin a kinadakesko. . . . Ti nadudog ken sibabawi a puso, O Dios, saanmonto a laisen.”​—Salmo 51:1-3, 9, 17.

Mabalin a dagiti salungasing ken babak kanayonda nga adda iti sanguananyo. No maminsan mabalin a ti riknayo ket kas iti anak a bayanggudaw nga insalaysay ni Jesus. Idi nagsubli daytoy nga agtutubo a lalaki idiay balayda kalpasan ti nakababain a panangibellengna ti tawidna kadagiti ganggannaet a luglugar, inyikkisna ken amana: “Diak maikarin a managan ti anakmo”! (Lucas 15:21) Daytoy nga agtutubo, nupay kasta, ket addaan umiso a kababalin. Saanna a linaksid ti kinamanangaasi ni amana wenno pinadpadas a tagibassiten dayta. Gapuna ni amana ti siaayat a nangawat ti panagsublina iti sangakabbalayan. (Lucas 15:20-24) Maragsakan ni Jehova a mangaramid ti kasta met laeng kadagiti tattao a managbasol a sipapasnek a mangpadas a mangaramid ti pagayatanna.​—Salmo 103:8-14; Isaias 55:7.

Saan a pinalubosan ni Frank dagiti rikna ti di pannakaikari a manglapunos kenkuana. Inabrasana ti di kaikarian a kinamanangaasi ti Dios, ket itan agserserbin kas ministerial nga adipen iti maysa a kongregasion dagiti Saksi ni Jehova. “Aglagtoakon gaput’ rag-o itatta,” kunana, “no pampanunotek ti naaramidan ni Jehova a Dios ken ni Jesu-Kristo ken ti aramidendanto pay nga agpaay kaniak!”

[Dagiti Footnote]