Report Dagiti Manangiwaragawag ti Pagarian
◻ KUNA ni apostol Juan: “Saantay koma a pagayat ti sao ken saan met ti dila, no di ket ti aramid ken ti kinapudno.” (1 Juan 3:18) Kunan Jesus nga ‘ayatentayo ti kaarrubatayo a kas iti bagbagitayo.’ (Mateo 22:39) Ti panangipakita ti ayat babaen ti aramid irekomendarna ti kinapudno, kas ipakita ti sumaganad a kapadasan manipud Britania.
Idi binisita ni Pauline ni nanangna, nga addaan multiple sclerosis, awan pulos sabali nga adda sadiay. Ngem iti daytoy nga okasion, idi isut’ simrek iti balay, mangmangngegna ti makina a paglaba nga agan-andar ken adda maysa idiay ngato nga agus-usar ti vacuum cleaner. “Aniat’ mapaspasamak, asinot’ adda ditoy?” insaludsodna ken nanangna. Inlawlawag ni nanangna nga immay dagiti Saksi ni Jehova iti ruanganna, nakitada ti parikutna, ket dimmaw-asda tapno tumulong. Idi nalpasdan ti trabaho iti balay ken nakaisaganadan ti makan, nagtugawda ket kinunada: “Sisasaganakan aya?” “Sisasagana iti ania?” inyimtuod ni Pauline. Inlawlawag ni nanangna nga isut’ immanamong iti maysa a panagadal ti Biblia. Agduadua ni Pauline iti panagtalinaedna, ngem yantangay isut’ naggapu iti adayo, gapuna insaludsodna no mabalinna met ti makiraman iti panagadal. Tinagiragsakna unay dayta ta inyurnosna ti iyaayna iti dayta met laeng nga aldaw kada lawas tapno mabalinnat’ regular a tumabuno. Idi agangay, maysa a gayyem ti nangkuyog kenkuana, ket itan isuda a duan ti nabautisaran. Kas resulta daytoy orihinal a panagadal, sangapulo a miembro ti isu met laeng a sangakabbalayan nagbalindan a Saksi ni Jehova! Wen, tulong babaen “iti aramid”!
Ti Pastor Idiay New Guinea Inabrasana ti Kinapudno
◻ Idi kaaldawan ni Jesus sumagmamano a papadi ti nangakseptar ti sursuro ni Jesus. Uray met dagiti nasingpet panagpuspusona a klero itatta kastat’ ar-aramidenda, kas ipakita ti kapadasan manipud kadagiti kabambantayan ti New Guinea, nga impadamag ti manangaywan ti sirkito. Insalaysayna: “Maysa nga edukado nga agtutubo a lalaki, a pastor ti Pentecostal, ti mangibangbangon ti bassit a simbaan a dumna bassit iti Kingdom Hall. Maysa a kabsat a lalaki iti dayta a kongregasion ti nangaskasaba kenkuana, ket isut’ nainggayyeman. Di nagbayag kalpasan daytoy, binisitak ti kongregasion ket nakipagian iti kabsat a lalaki iti baba laeng ti kalsada manipud balay ti pastor. Iti umuna a rabii kalpasan ti isasangpetko, immay daytoy nga agtutubo a lalaki iti balaymi nga addaan Biblia, agraman ti dakkel a grupo manipud kongregasionna. Aminda kayatna a mangngegan ti mensahe ti Pagarian. Adut’ insalsaludsodna, ket ti panagpapatang dimmanon inggana iti tengngat’ rabii. Kada rabii iti bisitak, isu ken dagiti dadduma nga interesado immayda tapno masungbatan ti salsaludsodda. Isut’ inawisko iti asamblea sirkito iti sumaganad a lawas, ket isut’ timmabuno a kadua ti kabsat nga immuna a nangasaba kenkuana. Intultuloy daytoy a lalaki ti panagadalna ti Biblia, pinanawannan ti Iglesia Pentecostal, ket itan maysan a regular nga agibumbunannag ti naimbag a damag.”
Pudno unay, pagayatan ti Dios “nga isuamin a kita dagiti tattao maisalakan koma ket dumtengda iti umiso a pannakaammo ti kinapudno.”—1 Timoteo 2:4.