“Naragsak dagiti Mannakikappia”
IDI 1901 ti Premio a Nobel Agpaay ti Talna, a naidiaya iti damdamona, ket pinagranudan da Jean-Henri Dunant, nangipasdek ti Red Cross, ken ni ekonomista a Frédéric Passy. Nanipud idin daytat’ naidiayan iti 69 a daras, 55 a daras kadagiti 71 a nagduduma nga indibidual, agmaymaysa wenno agkakadua, ken 14 a daras kadagiti 16 a grupo wenno organisasion. Dadduma a grupo nangabakda iti dayta iti nasursurok pay ngem maminsan, kas ti International Red Cross Committee (idi 1917, 1944, ken 1963) ken ti Office of the United Nations High Commissioner for Refugees (1954 ken 1981). Nalawag a gaput’ kinakurang dagiti maikari nga umawat, nagkedked ti komite ti papremio a Nobel a mangidiaya iti dayta iti 19 a daras.
Kas panunoten ti maysa, kaaduan kadagiti nangabak ti premio ket isuda dagiti estadista, diplomatiko, wenno tattao a mabalin konektado iti politika. Ngem uray met dagiti periodista, hurado, sociologo, ekonomista, ken manangreporma a sosial immaw-awatda metten iti dayta. Uray dagiti sientista, a maysa kadakuadan ni Linus Pauling idi 1962 ken ni Andrey Sakharov idi 1975, napadpadayawanda metten, kas met kadagiti papangulo ti panagobra, a kalatakan ni Lech Walesa idi 1983. Ken idi 1970 ti premio naited iti eksperto ti agrikultura a ni Norman E. Borlaug.
Ti immuna a persona ti relihion a nakaitedan ti premio ket isu ti Sueko a Luterano nga arsobispo a ni Nathan Söderblom, a napili iti 1930. Idi 1946 ti Metodista a laigo ken ti ebanghelisador a ni John R. Mott pinagranudanda ti premio, a sinaruno idi 1952 ni teologo ken pilosopo a ni Albert Schweitzer ken idi 1958 babaen ti Belgica a klero a ni Dominique Georges Pire. Idi 1964 ti napili ket isut’ pangulo ti kalintegan sibil ken ministro a Baptist a ni Martin Luther King, Jr.
Ngem kadagiti nabiit pay a tawtawen, dakdakkel ti paset ti relihion iti panangragragpat ti lubong iti talna. Iti panangsalimetmet itoy a pagannayasan, tallo kadagiti maudi a siam nga indibidual a nakaidiayaan ti Premio a Nobel Agpaay ti Talna ket narelihiusuanda a tattao: ti Katoliko a madre a ni Mother Teresa ti Calcutta idi 1979, ti Anglicano nga obispo a Desmond Tutu ti Sud Africa idi 1984, ket idi napan a tawen ti naidistierro a Budista a “dios-ari” ti Tibet, ti Dalai Lama.
Pudno a kinuna ni Jesu-Kristo: “Nagasat dagiti mamagkakappia.” (Mateo 5:9, King James Version) Ngem dagiti kadi narelihiusuan a panagregget—a Katoliko man, Protestante, Budista, wenno dadduma pay—nga agserbi kas mamagkakappia mabalangatandanto ti panagballigi?
Ibaga ti Biblia kadatayo a daytoy agdama a dakes a lubong a naisina iti Dios ket dinto pulos aglak-am ti agnanayon a talna, maysa a banag a dinto mabaliwan ti narelihiusuan a pannakairaman kadagiti ar-aramid ti ayat, sosial, ken napolitikaan a ganuat ti lubong. Babaen ti panangsukat kadagiti agdama a gobierno babaen iti Pagarianna iti sidong ni Kristo Jesus, a “Prinsipe ti Kappia,” iti din agbayag ti Namarsua a mismo bendisionannanto ti manamati a sangatauan iti talna.—Isaias 9:6, 7; 57:21; Salmo 46:9; Daniel 2:44.
Dagiti tattao a mannakikappia a mangbigbig itoy a kinapudno ken isurotdat’ panagbiagda a maiyannurot iti dayta ket pudno a naragsakdanto. Kas panangiyebkas ti New World Translation kadagiti sasao ni Jesus: “Naragsak dagiti mannakikappia.”