Sisusungdo a Pannakipagtrabaho ken Jehova

“O Dios, sika insuronak nanipud kina-agtutubok, ket agpapan ita impalpalawagko dagiti nakaskasdaaw nga ar-aramidmo.”​—SALMO 71:17.

1. Apay a maikunatayo a ti trabaho ket sagut a naggapu ken Jehova?

MAYSA kadagiti sagut ti Dios iti tao isu ti trabaho. Kadagiti orihinal a nagannak kadatayo, da Adan ken Eva, kuna ni Jehova: “Punnuenyo ti daga ket iturayanyo dayta.” Daytat’ makakarit a naituding a trabaho ngem daytat’ kabaelan nga aramiden ti maysa. Ti kasapulan a pisikal ken mental a panagregget parang-ayennat’ rag-o ti panagbiagda, a nalablabes ngem iti aniaman a napasaran dagiti an-animal a kaduada iti naindagaan a pagtaenganda.​—Genesis 1:28.

2, 3. (a) Aniat’ nagbalinan iti trabaho kadagiti adu itatta, ken apay? (b) Ania a gundaway a panangaramid ti naisangsangayan a trabaho ti masapul nga usigentayo?

² Uray iti imperpekto a kasasaadtayo, ti “nadagsen a trabaho” a mangibunga ti “kinaimbag” ket “sagut ti Dios,” kas insurat ni Salomon a masirib a tao. (Eclesiastes 3:13) Kaskasdi kasapulan nga okuparen ti tao ti isip ken bagina. Ti kaawan ti trabaho nakalkaldaang. Kaskasdi, saan amin a trabaho ket makaay-ayo wenno napateg. Iti adu, ti trabaho ket makauma, rimsua gaput’ regget nga agbiag.

³ Nupay kasta, adda talaga makagunggona a trabaho a pakaawisan amin a makiraman. Ngem adu dagiti bumusbusor ken problema a parmeken dagidiay makiraman iti dayta. Apay nga importante a makakualipikartayo itoy a trabaho? Kasanotay nga aramiden dayta? Sakbay a sungbatan dagitoy a saludsod, umuna nga intay usigen:

Iti Siasinot’ Pagtartrabahuantayo?

4. Ania a kita ti trabaho ti nangyeg ti rag-o ken pannakapnek ken Jesus?

⁴ Kuna ni Jesu-Kristo: “Ti taraonko isu ti panangaramidko iti pagayatan ti nangibaon kaniak ken panangturpos ti aramidna.” (Juan 4:34) Ti sisusungdo a panagtrabaho a maipaay ken Jehova ti nangted dakkel a rag-o ken pannakapnek ken Jesus. Daytat’ nangted kenkuana ti panggep iti biag, ket iti ngudo ti tallo-ket-kagudua-a-tawen a ministeriona, maikunana a sipupudno iti nailangitan nga Amana: “Siak indayawka ditoy daga, naturposko ti aramid nga intedmo nga aramidek.” (Juan 17:4) No kasano a ti pisikal a taraon ket makapapigsa, kasta met ti trabaho nga addaan naespirituan a pategna. Impaganetget ni Jesus daytoy iti naminsan pay nga okasion idi nga imbalakadna: “Agtrabahokayo, saan a gapu iti taraon a mapukaw, no di ket gapu iti taraon a mataginayon a maipaay iti biag nga agnanayon.” (Juan 6:27) Maisupadi, ti trabaho a di nabunga iti naespirituan mangiturong ti pannakaupay ken patay.

5. Asino ti bimmusor iti naimbag a trabaho nga inaramid ni Jesus, ken apay?

⁵ “Ni Amak agingga ita agar-aramid, ket agar-aramidak met.” Inturong ni Jesus daytoy a sasao kadagiti Judio a mangbabbabalaw kenkuana gapu ta iti aldaw ti Sabbath inagasanna ti maysa a lalaki a masakiten iti 38 a tawtawen. (Juan 5:5-17) Nupay ni Jesus ar-aramidenna ti aramid ni Jehova, madi a bigbigen dagiti narelihiusuan a bumusbusor dayta a kinapudno ket aramidenda amin a kabaelanda a mangpasardeng kenkuana. Apay? Gapu ta naggapuda ken amada, a ni Satanas a Diablo, daydiay kanayon a mangbusbusor iti aramid ni Jehova. (Juan 8:44) Gapu ta ni Satanas ‘mapagbalinna ti bagina kas anghel ti lawag,’ nga us-usaren ti “amin nga allilaw ti kinadakes,” kasapulantayo ti naespirituan a pannakaawat ken nalawag a panagpanunot a makailasin iti ar-aramid a gapuananda. Ta no saan, mabalin a matakkuatantaytot’ bagbagitayo nga agar-aramid a maibusor ken Jehova.​—2 Corinto 11:14; 2 Tesalonica 2:9, 10.

Dagiti Bumusbusor nga Agtigtignay

6. Apay a dagiti apostata “managsiksikapda”? Iyilustraryo.

⁶ Dadduma, kas sumagmamano kadagiti apostata itatta, ti sitatraidor nga agar-aramid kas dagiti ahente ni Satanas a mangpakapuy iti pammati dagiti kabbaro a naitimpuyog a miembro ti kongregasion Kristiano. (2 Corinto 11:13) Imbes a basta usaren laeng ti Biblia kas pangibatayan kadagiti pudno a sursuro, ipamaysada ti panangpadpadas nga uyawen ti New World Translation of the Holy Scriptures, a kasla ketdin agpampannuray a naan-anay dagiti Saksi ni Jehova iti dayta a pangsuportarda. Ngem saan a pudno daytoy. Iti kadakkelan a paset ti maysa a siglo, dagiti Saksi inusarda a nangnangruna ti King James Version, ti Romano Katoliko a Douay Version, wenno aniaman a bersion nga adda iti pagsasaoda, tapno maammuan ti kinapudno maipapan ken Jehova ken ti pangpanggepna. Ken inusarda dagitoy dadaan a bersion iti panangiwaragawag ti kinapudno maipapan iti kasasaad dagiti natay, ti relasion ti Dios ken ti Anakna, ken no apay a bassit nga ipastoran laeng ti mapan idiay langit. Dagiti de adal a tattao ammoda met nga itultuloy nga us-usaren dagiti Saksi ni Jehova ti nagadu a patpatarus ti Biblia iti sangalubongan a panag-ebanghelioda. Nanipud 1961, nupay kasta, tinagiragsakda met ti panangusar ti New World Translation, buyogen ti naisurot iti tiempo, umiso a patarusna ken nasayaat a pannakabasana.

7. (a) Apay a tinallikudan ni Jesus ti adu nga agkunkuna a manamati kenkuana? (b) Apay a nasken nga ipangag ti balakad idiay 1 Juan 4:1?

⁷ Kuna ni Jesus nga ilibaknanto ti adu nga agkunkuna a mamati kenkuana. Annugotenna a mabalin a nagipadtoda, nangparuarda kadagiti sairo, ken “nagaramid[da] ti adu a datdatlag” iti naganna. Kaskasdi, ilasinna dagitoy kas ar-aramid ti “kinadakes.” (Mateo 7:21-23) Apay? Gapu ta saanda nga agar-aramid ti pagayatan ti nailangitan nga Amana ken awan serserbida no maipapan ken Jehova a Dios. Nakaskasdaaw, uray gayam dagiti kasla namilagruan, nga ar-aramid itatta mabalin a namunganay iti kangrunaan a manangallilaw, a ni Satanas. Ni apostol Juan, a nangisurat ti umuna a pangkaaduan a suratna nasurok nga 60 a tawtawen kalpasan ti ipapatay ken panagungar ni Jesus, namalakad a dagiti Kristiano rebbeng a “di[da] patien dagiti amin a naipaltiing a sasao, no di ket suoten[da] dagiti naipaltiing a sasao no nagtaudda iti Dios.” Masapul a kasta met ti aramidentayo.​—1 Juan 4:1.

Di Makagunggona nga Ar-aramid

8. Kasanot’ rebbeng a panagriknatayo kadagiti ar-aramid ti lasag?

⁸ Uray no saantay makibibiang kadagiti di nabunga a naespirituan nga ar-aramid, dagiti nagbannogantayo awan serserbida no agtultuloyda a serserbian dagiti tartarigagay ti managbasol a lasag. Kuna ni apostol Pedro nga umanayen ti aldaw a panagar-aramidtayo “iti pagay-ayatan dagiti nasnasion . . . iti panagbiag ti kinaderrep, dagiti tarigagay nga aglablabes, dagiti panagbarbartek, dagiti kinabuklis, dagiti aglablabes a daydaya, ken dagiti makarimon a panagrukbab kadagiti ladladawan.” (1 Pedro 4:3, 4) Di kaipapanan daytoy, siempre, nga amin a dedikado a Kristiano ita ket nagar-aramidda kadagita, ngem kayatna a sawen a ti kababalin dagidiay nagar-aramiden ti kasta rebbeng a sipapartak a nagbalbaliwdan bayat a rimmang-ay ti naespirituan a panagkitada. Ti lubong ab-abienna ida gaput’ pannakakumberteda; namnamaen laeng a kasta. Ngem, masapul nga agbalbaliwda no kayatdat’ agbalin a nasungdo a katrabaho iti serbisio ni Jehova.​—1 Corinto 6:9-11.

9. Aniat’ maadaltayo manipud kapadasan ti Saksi a nangrugi nga agsanay kas kumakanta ti opera?

⁹ Inikkannatay ni Jehova ti adu a sagsagut a pagragsakantayo, nairamanen ti musika kadagita. Nupay kasta, yantangay “ti lubong adda iti babaen ti pannakabalin ti managdakdakes,” a ni Satanas a Diablo, saan aya nga iraman daytoy ti lubong ti musika? (1 Juan 5:19) Wen, ti musika mabalin nga agbalin a nasikap a silo, kas natakkuatan ni Sylvana. Isut’ naaddaan gundaway nga agsanay idiay Francia kas kumakanta iti opera. “Kaskasdi a napigsat’ tarigagayko nga agserbi ken Jehova,” inlawlawagna. “Tagtagiragsakek idi ti panag-auxiliary payunir ken ninamnamak a mapagtunosko dagitoy dua a bambanag iti biagko. Ngem ti umuna a problema a masapul a sanguek iti panangsurotko iti karerak isut’ imoralidad. Idi damo, dagiti kakaduak matmatmatandak a kas udong no saanak a makiraman iti narugit a sasao ken ulidanda. Iti kamaudianan, ti narugit nga aglawlaw ti nangrugi a mangbibineg kaniak, a mangipabus-oyen kadagiti bambanag a kagura ni Jehova. Maysa kadagiti maestrak ti nangidagadag kaniak a pagbalinek a relihionko ti panagkantak, ket nasursuruanak nga agbalin nga agresibo idiay entablado ken mangpanunot a nalalaingak ngem iti uray siasino. Amin daytoy ti namagsikor kaniak. Idi agangay, masapul a saganaak ti espesial nga audition. Nagkararagak ken Jehova a pagbalinenna koma a nalawag kaniak ti dalan a rumbeng a papanak. Nupay nagsayaat ti panagkantak ken adda panagtalek ti riknak, saanak a maysa kadagidiay napili. Idi agangay, naammuak no apay​—dagiti resulta ket sililimed a naikeddeng gayamen a nabayag sakbay ti panagsalip. Ngem naaddaanak ti nalawag a sungbat iti kararagko ket naikeddengko a panawanen ti entablado ti opera tapno mangisuro ti panagkanta idiay ilimin.” Daytoy a kabsat a balasang nangasawa kalpasanna ti maysa a panglakayen iti kongregasion Kristiano, nga agpadpadada itan nga agserserbi a sisusungdo a mangiyadelantar ti intereses ti Pagarian.

10. Aniat’ konklusionyo manipud sasao ni Jesus idiay Juan 3:19-21?

¹⁰ Kuna ni Jesus: “Ta amin nga agaramid ti dakes guraenna ti lawag ket saan nga umay iti lawag, di la ket ta dagiti aramidna mababalaw.” Iti kasumbangirna, “ti agaramid iti pudno umay iti lawag, tapno dagiti aramidna maiparangarang a maaramidda a maiyannurot iti Dios.” (Juan 3:19-21) Anian a bendision ti panagaramid a maitunos iti pagayatan ken panggep ni Jehova! Ngem tapno maaramidan a sibaballigi dayta, masapul a palubosantay a kanayon a masukimat dagiti ar-aramidtayo iti lawag ti Sao ti Dios. Ditay pay pulos lakay unay ken nikaanoman saantay pay nga atrasado unay a mangbaliw iti wagas ti panagbiagtayo ken tapno awaten ti awis nga ibaklay ti nagpateg a serbisio ni Jehova.

Ti Panagaramid ti “Naimbag nga Ar-aramid” Itatta

11. Aniat’ sursuroten dagiti adu kas “naimbag nga ar-aramid,” ken apay a dayta ket mabalin nga agturong iti pakaupayan?

¹¹ Ti aramid a maikari itatta masapul nga isarmingna ti kinaganat ti tiempotayo. Adu a napasnek a tattao umanamongda ken inokuparda ti bagbagida kadagiti aramid a masansan makunkuna kas “naimbag nga ar-aramid,” nga ar-aramidenda a pakagunggonaan ti kaaduan ti sangatauan wenno agpaay iti maysa nga espesipiko a ganuat. Kaskasdi, anian a makapaupay daytoy a kita ti aramid! Idiay Britania, ti CAFOD (Catholic Fund for Overseas Development), a nangireport ti kampaniana maipaay iti tulong iti bisin, ti nagkuna: “Tallo a tawen iti napalabas . . . minilmilion a pounds ti naur-or kas tulong. Rinibo a biag dagiti naisalbar. Ita dagitoy a biag agpegpeggadda manen . . . Ngem apay? Aniat’ dakes a napasamak?” Iti panangitultuloynat’ pannalaysayna, inlawlawag ti CAFOD Journal a ti naunday a parparikut nikaanoman saanda a naparmek ken “dagiti kuarta a kasapulan unay a maipaay iti panangparang-ay ti tao ket nausarda a mangparubrob ti panaglalaban [guerra sibil].” Awan duadua, a nakangkangngegkayon ti umas-asping a rikna nga inyebkas dagiti mananglimos a grupo nga agar-aramid ti umas-asping a trabaho.

12. Aniat’ kakaisuna a sungbat kadagiti parikut a naipasango iti lubong itatta?

¹² Ti bisin ket maysa a naganat a problema. Kaskasdi, asino dagiti nakailasin kadagiti didigra ti bisin ken gubat itatta kas mangtungtungpal iti padto ni Jesu-Kristo, a mangitudtudo iti panungpalan iti agdama a sistema dagiti bambanag? (Mateo 24:3, 7) Asino dagiti nangipablaak iti ebidensia a nanginaig kadagitoy a pasamak iti panagsakay dagiti uppat a nakakabayo a nakalawlawag a nailadawan iti libro ti Biblia nga Apocalipsis, kapitulo 6? Di nagbalbaliw, dagiti Saksi ni Jehova sisusungdo nga inaramidda dayta itoy a pagbasaan. Apay? Tapno ipakita nga awan aniaman a maaramidan ti tao nga agpaut a remedio. Di kayat a sawen daytoy a dagiti Kristiano ket aleng-alengda kadagiti parparikut iti lubong. Adayo a kasta. Mannakipagriknada met ken aramidenda amin a kabaelanda a mangpalag-an ti panagsagaba. Kaskasdi, sirerealistiko a sanguenda ti kinapudno a no awan nasantuan nga ibaballaet, dinto pulos maresolbar dagiti parikut ti lubong. Kas dagiti napanglaw, dagitoy a parikut agtalinaedda no mapalubosanto pay met laeng nga agtultuloy ni Satanas kas agturay itoy a lubong.​—Marcos 14:7; Juan 12:31.

Ti Kapapatgan a Trabaho

13. Aniat’ naganat unay a trabaho itatta, ken asinodat’ mangar-aramid iti dayta?

¹³ Ti kagaganatan a kasapulan itatta ket isut’ panangikasaba ti naimbag a damag a ti Pagarian ni Jehova a Dios dandaninan sukatan ti amin a nailubongan a gobierno ket iyegna ti pakabang-aran nga il-iliwen dagiti amin a tattao a managbuteng iti Dios. (Daniel 2:44; Mateo 24:14) Pinagbalin ni Jesu-Kristo ti panangikaskasaba iti nailangitan a Pagarian kas ti kangrunaan a panggepna iti biag, nupay ti panangasabana ket limitado idiay daga ti Palestina. Itatta, sangalubonganen ti nadanon daytoy a panangasaba, kas kuna ni Jesus a maaramid. (Juan 14:12; Aramid 1:8) Ti pannakiraman, uray iti bassit laeng, iti trabaho ti Dios, ket maysa a pribilehio a di maartapan. Dagiti lallaki ken babbai, natataengan ken agtutubo, a pulos saanda a tinagtagainep nga agbalinda a manangaskasaba ti naimbag a damag ket addadan iti sanguanan iti trabaho a panag-ebanghelio nga ar-aramiden dagiti Saksi ni Jehova itatta. Kas ken Noe ken ti pamiliana, sisusungdoda nga ar-aramiden ti trabaho ti Dios a ti bilin naggapu Kenkuana, ket gapu itoy iti sidong ti pigsana, kas pakpakauna iti panungpalan daytoy a sistema dagiti bambanag.​—Filipos 4:13; Hebreo 11:7.

14. Kasano a ti panangaskasaba ket makaispal-biag ken maigiddato iti dayta maysa a salaknib?

¹⁴ Ti panangaskasaba dagiti Saksi ni Jehova kadagitoy maudi nga al-aldaw ket makaispal-biag kadagidiay dumngeg ken agtignay iti naimbag a damag a mangngeganda. (Roma 10:11-15) Pannalaknib met dayta kadagidiay mangaskasaba. Babaen ti panagbalin nga interesado a sipapasnek a mangtulong kadagiti tattao nga addaan dakdakkel a parparikut ngem kadatayo, mabalin a datayto ti di unay maseknan kadagiti mismo a parparikuttayo. Ammotayo a daytoy a lubong a bumabbaban dagiti estandartena ket kayatna a bumagaytayo kadagiti pamay-anna. Gapuna ti panangpunno ti is-isiptayo kadagiti pampanunot ti Dios bayat ti panangaskasabatayo ket ad-adda pay ngem makapapigsat’ pammati; daytat’ agpaay iti kasayaatan nga interesestayo. Kas panagkuna ti maysa a Saksi: “No diak padasen a baliwan dagiti tattao a maasitgak, mabalin a siak ti baliwanda!”​—Idiligyo ti 2 Pedro 2:7-9.

Panagtrabaho a Kadua ti Kongregasion

15. Ania dagiti responsabilidad a naiyakar kadagiti katulongan a papastor itatta, ken kasanot’ rebbeng a panagrikna dagiti lallaki a miembrot’ kongregasion sigun iti 1 Timoteo 3:1?

¹⁵ No umay dagiti kabbaro nga interesado iti kongregasion, umayda iti panangaywan ti Naindaklan a Pastor, a ni Jehova a Dios, ken ti Naimbag a Pastorna, a ni Jesu-Kristo. (Salmo 23:1; Juan 10:11) Dagitoy nailangitan a Pastor nairepresentarda ditoy daga babaen kadagiti nasungdo a katulongan a papastor ti arban, dagiti lallaki a nadutokan iti uneg dagiti kongregasion. (1 Pedro 5:2, 3) Ti panangiggem ti kasta a saad ket nasudi a pribilehio kadagitoy maudi nga al-aldaw. Ti trabaho dagiti pastor ket nadagsen, a saan laeng a ti panangidaulo ti panangisuro iti kongregasion ken panag-ebanghelio ti ramanenna no di ket ti panangsalaknib pay met iti arban manipud kadagiti naespirituan manangalun-on ken ti pananglaban kadagiti kas bagio a kasasaad ti lubong a pagbibiagantayo. Awanen ti napatpateg pay a trabaho a mabalin a ragpaten dagiti lallaki a miembro ti kongregasion ngem ti panangtulong a mangaywan iti naespirituan a pagimbagan dagiti kameng ti lumawlawa a kongregasion Kristiano.​—1 Timoteo 3:1; idiligyo ti Isaias 32:1, 2.

16. Kadagiti ania a pamay-an a makapagtitinnulong dagiti Kristiano a papastor iti maysa ken maysa?

¹⁶ Ditay koma liplipatan, nupay kasta, a dagita a papastor ket tattaoda met, nga addaan nagduduma a personalidad ken pagkapuyan kas iti dadduma iti arban. Nupay ti maysa nalaing iti maysa nga aspeto ti panangipastor, ti sagsagut ti sabali mabalin makagunggona iti kongregasion manipud naiduma nga anggulo. Ti ar-aramidda kas papanglakayen a Kristiano agtitinnulongda iti maysa ken maysa a mangpabileg iti kongregasion. (1 Corinto 12:4, 5) Nikaanoman saan koma a sumrek ti espiritu ti panagsisinnalisal kadakuada. Sangsangkamaysa nga agtrabahoda koma a mangsaluad ken mangiyadelantar kadagiti intereses ti Pagarian, “nga itayagda dagiti im-imada a nasungdo” iti panagkararag ken Jehova, a biruken ti bendision ken panangiwanwanna kadagiti amin a panagpapatang ken desisionda.​—1 Timoteo 2:8.

17. (a) Ania nga obligasion ti adda kadatayo? (b) Ania a bambanag ti masapul a liklikantayo tapno maitungpaltay a nawadwad dagiti obligasiontayo?

¹⁷ Nanayonan ti kinaganat ti trabaho a panangaskasaba ta ti panungpalan ti imperio ni Satanas asidegen. Gaput’ kaadda kadatayo ti kinapudno a Sao ni Jehova a Dios, kas dagiti Saksina, addaantay ti obligasion a mangisaknap ti naimbag a damag iti amin a gundaway. Ti agdama a trabaho aglaplapusananen a mamagbalin kadatayo nga ukopado, aginggat’ panungpalan. Ditay koma palpalubosan ti bagitayo a maikapis babaen iti hedonistiko, imoral a panagsapsapul ti ragsak wenno mapadagsenan iti materialismo. Saantay koma a mairaman iti panangpugpugto a panagpampanunot, a pagsusuppiatan ti sasao, ta daytoy ket agbalin nga awan pagimbaganna ken mangibus ti tiempo. (2 Timoteo 2:14; Tito 1:10; 3:9) Idi dagiti adalan sinaludsodanna ni Jesus, “Apo, itan ti panangbangonmo manen ti pagarian ti Israel?” binaliwan ni Jesus ti turong ti isipda iti adda a nasken a trabaho, a kunkunana: “Dakayto ti saksik sadi Jerusalem ken iti isuamin a Judea ken Samaria ken agingga iti ungto ti daga.” Dayta a bilin dimmanon agingga itoy nga aldaw.​—Aramid 1:6-8.

18. Apay a ti pannakipagtrabaho ken Jehova makagunggona unay?

¹⁸ Ti pannakipagtrabaho ken Jehova, a mangaskasaba a kadua ti sangalubongan a kongregasionna itatta, mangyeg ragsak, pannakapnek, ken pudpudno a panggep iti biagtayo. Daytat’ gundaway a pangiparangarangan ti tunggal managayat ken Jehova ti debosion ken kinasungdona kenkuana. Daytoy a trabaho agraman dagiti adu nga aspetona ket dinton maulit a pulos. Babaen ti pananginanama a silalawag iti biag nga agnanayon iti masanguanan, sapay koma ta sisusungdotay nga itultuloy ti “mangipaay iti Dios ti sagrado a serbisio a buyogen ti nadiosan a buteng ken panagraem,” agpaay iti pakaidayawanna ken agpaay iti pannakaisalakantayo.​—Hebreo 12:28.

Aniat’ Sungbatyo?

◻ Manipud ania a trabaho ti nakagun-odan ni Jesus ti rag-o ken pannakapnek?

◻ Asinoda dagiti bumusor iti trabaho ni Jehova, ken apay?

◻ Kasano a mapagdinnilig dagiti nailubongan a “naimbag nga ar-aramid” ken iti panangikaskasaba ti naimbag a damag ti Pagarian ti Dios?

[Ladawan iti panid 18]

Imbaon ni Jesus dagiti adalanna a mapan mangaskasaba