Masarakanyo ti Kinabaknang a Nasudsudi Ngem Balitok!
DAGITI kinapudno idiay Biblia maiyaspingda iti balitok, pirak, wenno dadduma pay a nalmeng a gamgameng. Nupay mabalin a dikay pay pulos nagsapsapul ti literal a balitok wenno pirak, mabalin nga ammoyo a ti panangaramid iti dayta kasapulanna ti adu a narigat a panagbannog ken kinapinget. Ket masansan a dagiti agsapsapul maipasangoda kadagiti pannakaupay.
Nupay kasta, ti kasta a pannakaupay saan a mapasamak no sapulenyo dagiti nalmeng a gamgameng iti Biblia. Anagenyo daytoy makaparegta a garantia: “No isu birukem a kas pirak, ken tontonem a kas nalmeng a gamgameng, iti kasta maawatamto ti panagbuteng ken ni Jehova, ken masarakamto ti pannakaammo iti Dios.” (Proverbio 2:4, 5) Ngem masapul nga agsukimatkayo.
“Sukimatem ket Kitaem”
“Sukimatem ket kitaem a manipud idiay Galilea awan ti tumaud a mammadto.” Isu daytoy a pammagbaga ti inted dagiti sumagmamano a Judio a Fariseo idi umuna a siglo ken Nicodemo, a maysa met a Fariseo. “Sukimatem ket kitaem.” Pudno a nagsayaat a pammagbaga. Posible ti panangsukimat ken panangsapul ti kinapudno—banag a nasudsudi ngem balitok.
Ngem, iti dayta partikular a kaso, dagidiay nangted iti pammagbaga a “sukimatem ket kitaem” dida nagtignay a siuumiso. Kasano a kasta?
“Dagiti kangrunaan a papadi ken dagiti Fariseo binaonda dagiti opisiales a mangtiliw ken Jesu-Kristo. Gapu ta nasdaawanda unay iti wagas a panangisursurona, nagsubli dagiti opisiales nga ima-ima. Gapu itoy, insaludsod dagiti Fariseo kadakuada: “Napayaw-awankayo met aya?” Nagsao ni Nicodemo ket kinunana: “Ukomen aya ti lintegtayo ti tao no dina umuna a denggen ken ammuen ti aramidenna?” Dagitoy a sasao tinignayda ti pammagbaga a “sukimatem ket kitaem.”—Juan 7:32, 45-52.
Kasano a napaay dagiti papadi ken dagiti Fariseo? Saanda nga ammo wenno binigbig a nupay ni Jesus dimmakkel idiay Galilea, isut’ naiyanak idiay Betlehem. Impadto ni mammadto a Mikias: “Kenka [Betlehem] rummuarto ti maysa nga umay kaniak nga agbalin nga agturay iti Israel.” (Mikias 5:2) Gapuna napaay dagidiay natatan-ok a lallaki a mangsukimat ken kumita kadagiti kredensial ni Jesus kas maysa a mammadto, daydiay agbalinto nga agturay iti Israel. Daytoy ti nangiturong kadagiti nakalkaldaang a nagtungpalan, ket iyilustrarna no kasano kapateg ti panangsukimat ken panangala ti intero a kinapudno maipapan kadagiti bambanag. Ngem kasanot’ masansan a pannakamatmat ti kinapudno?
Nagamporan ti Kinapudno
“Ti puro a kinapudno, kas ti puro a balitok, nasarakan a di maiyanatup a maisirkular, gapu ta nasukalan dagiti tattao nga ad-adda a kumbiniente a gamporan ti kinapudno ngem ti pananggugor ti bagbagida,” kuna ti maika-19 siglo a mannurat. Anian a kina-agpayso pay latta dagitoy a sasao maipapan iti nailubongan a tay-ak ti relihion! Iti likudan dagiti eksena daytoy a pananggampor iti kinapudno isu “ti ama ti kinaulbod,” ni Satanas a Diablo. (Juan 8:44; Apocalipsis 12:9) Us-usarenna ti ulbod a relihion tapno gamporan ti pudno a sursuro kadagiti napapateg a saludsod kas kadagitoy: Asino ti Dios? Aniat’ relasion ni Jesus kenkuana? Aniat’ pagtungpalanto ti daga ken ti sangatauan?
Dagiti papadi ken dagiti Fariseo nakapagsukimatda koma ket nasarakanda ti kinapudno. Nasarakanda koma ti kinabaknang a nasudsudi nga adayo ngem balitok. Wen, nagun-odanda koma ti intero a kinapudno maipapan ken Jesus babaen ti ‘panagdengngeg kenkuana ken panangammo iti ar-aramidenna,’ kas insingasing ni Nicodemo. No koma napasnekda a nangaramid iti daytoy, awan duadua nga inlawlawag koma ni Jesus dagiti bambanag kadakuada, kas inaramidna kadagiti adalanna. (Marcos 4:34) Ngem sadinot’ pakasarakantayo ti puro a kinapudno itatta? Adda kadi aniaman a garantia nga agballigitayo a mangsukimat ken manggun-od ti intero a kinapudno?
[Ladawan iti panid 4]
Nagun-odan koma dagiti pangulo ti relihion ti intero a kinapudno maipapan ken Jesus babaen ti ‘panagdengngegda kenkuana’