Sumursurotkay Aya Kadagiti Instruksion?
TI NAAYAT nga ama sursuruanna dagiti annakna tapno naballigida iti biag ken naragsakda inton dadakkeldan. Ket dagiti ubbing nga agayat ken agraem kadagiti dadakkelda akseptarenda dagita a pannursuro agsipud ta ammoda a daytat’ agpaay a pagimbaganda. Kasta met, ti naayat a nailangitan nga Amatayo, a ni Jehova, ik-ikkanna dagiti ad-adipenna ti pannakaiwanwan a mangyeg balligi kadakuada ken ragsak iti panagbiagda. Gapu itoy, nasken a suroten dagiti pannursuro nga ipapaay ti Dios kadatayo babaen iti Saona, ti Biblia, ken ti naindagaan nga organisasionna.
Iti Uneg ti Pamilia
Addada nadumaduma a paset a pakaipapaayantayo kadagiti pannursuro wenno instruksion. Ti maysa ket iti uneg ti pamilia. Ti panagasawa ken ti pamilia addaandat’ nadiosan a namunganayan. Kuna ti Biblia a ti Dios ti nangkasar iti umuna a natauan a paris ket imbagana nga aganakda. (Genesis 1:27, 28; 2:22-24) Ti Namarsua impaaynat’ instruksion para kadagiti amin a miembro ti pamilia maipapan kadagiti annongenda. Kas pangarigan, ti asawa a lalaki ken ama isut’ ulo ti sangakabbalayan, a kayatna a sawen isut’ addaan ti responsabilidad a mangted ti pannursuro, taraon, kawes, paglinongan, salaknib, ken disiplina. Isu met ti agaramid kadagiti nasken a desision ti pamilia. Kas asawa a lalaki, rebbeng a mangipakita met ti konsiderasion iti asawana ken padayawanna kas narasi a damili. (Efeso 5:22, 23; 1 Timoteo 5:8; 1 Pedro 3:7) Ti asawa a babai masapul nga agpasakup ken lakayna, ipakitana ti nauneg a panagraem, ken agbalin kas katulongan ken komplemento kenkuana. Ken dagiti Kasuratan kunana a dagiti annak masapul nga agtulnogda kadagiti dadakkelda.—Genesis 2:18; Efeso 6:1-3; 1 Pedro 3:1, 2.
Aniat’ mapasamak no dagitoy nga instruksion dida maipangag? Rumsua ti di pagkikinnaawatan ken susik no dagiti asawa a lalaki agkurangda ti konsiderasion kadagiti assawada, ken no dagiti assawa a babbai ket bassit ti ipakitada a panagraem iti kinaulo ni lakayda. Kinapudnona, dagita a bambanag pinatauddat’ panagsisina ti adu a pagassawaanen. Ti kinasukir ken iyaalsa dagiti annak nangyeg dakkel a ladingit kadagiti adu a nagannak. Masansan, adu a nagannak ti mapabasol gaput’ saanda a panangpadpadakkel kadagiti annakda iti umiso a panangdisiplina, ket daytat’ mangparurod kadakuada.—Efeso 6:4.
Nupay dagiti agtartrabaho iti kagimongan, dagiti sikologo, ken dadduma ituktukonda ti nakaad-adu a suhestion no kasanot’ panangtaming kadagiti parparikut ti pamilia, awanen ti balakad a mas epektibo ngem ti pannursuro a maipapaay idiay Biblia babaen iti Namarsua ti pamilia. Ti panangsurot kadagitoy mangyeg ti pudpudno a ragsak ken pannakapnek.—Salmo 19:7-9.
Iti Kongregasion
Rebbeng a surotentayo ti instruksion nga it-ited ti Ulo ti kongregasion Kristiano, a ni Jesu-Kristo, babaen “ti matalek ken naannad nga adipen,” ti nadutokan a kalasugan ti organisasion ti Dios ditoy daga. (Mateo 24:45-47; Efeso 5:23) Tapno maaddaan ti talna ken panagkaykaysa iti kongregasion, amin dagiti miembrona masapul nga agtignayda a sangsangkamaysa kadagiti naited a pannakaiwanwan. Kas pangarigan, dagidiay mangidadaulo ti panangisuro iti kongregasion ken mangtultulong kadagiti dadduma a tattao masapul nga agtalinaedda kadagiti pannakaiwanwan nga inawatda manipud organisasion ni Jehova. Daytoy ti makatulong iti kinaepektibo ti trabahoda. Dagiti instruksion mabalin a maipapan ti pannakiraman iti panangaskasaba, no kasanot’ panangtaming kadagiti problema iti uneg ti kongregasion, no kasanot’ panangted ti balakad ken pammaregta, no kasanot’ panangliwliwa kadagiti malmaldaang, ken dadduma pay. Addada met panangiwanwan no kasanot’ panagsagana kadagiti makaisuro ken makapabileg a panaggigimong para kadagiti isuamin a naitimpuyog iti kongregasion Kristiano.—Aramid 20:20; Roma 12:6-8; Galacia 6:1; 1 Tesalonica 3:1-3.
Dagiti panglakayen, wenno dagiti manangaywan, ti kongregasion, nangnangruna a rebbeng nga ipakitada ti nasayaat nga ulidan iti daytoy a banag. Ti Bagi a Manarawidwid agipatpatulod kadagiti instruksion a rebbeng a suroten a siaannad ken simamatalek dagiti panglakayen. Rebbeng nga ibagayda ken iyaplikarda dagiti instruksion sigun kadagiti lokal a sirkumstansia. Masapul nga intay laglagipen a daydiay mangiturturong ti kongregasion Kristiano ket isu ni Jesu-Kristo. Maaw-awatanna a naan-anay dagiti kasapulan dagiti amin a kongregasion iti intero a lubong, ket isut’ mangmangted kadagiti kasapulan a pammaregta ken tulong. Gapuna, dagiti panglakayen rebbeng a saanda nga agalikaka a mangiyaplikar ti aniaman a panangiwanwan nga inawatda manipud teokratiko nga organisasion ti Dios. Agserbi daytoy kas nagsayaat nga ulidan para kadagiti amin nga adda iti tunggal kongregasion ken tulonganna ida nga agkaykaysa iti nagbabaetanda ken iti dadduma pay iti Nakristianuan a panagkakabsat iti intero a daga.—Aramid 15:1-31; Hebreo 13:7; Apocalipsis 5:6.
Dagiti Naragsak a Resulta
No ti manangbangon mangipatakder ti dakkel a pasdek, surotenna a siaannad ti plano dagiti arkitekto tapno ti ibangonna agpaut. Kadagidi naranggas nga al-aldaw sakbay ti Layus, nabilin ni Noe a mangibangon ti daong. Naibaga kenkuana no kasanot’ panangaramid iti dayta ken no asino a tattao ken an-animal ti iserrekna iti dayta tapno makalasat iti um-umay a Layus. Kasanot’ panagtignay ni Noe? Kuna ti Biblia: “Kasta ti inaramid ni Noe kas maiyanatup iti amin nga imbilin ti Dios kenkuana. Kasta ti inaramidna.” Ni laeng Noe ken dagidiay kakaduana iti uneg ti daong ti nakalasat iti Layus. (Genesis 6:5, 13-22; 7:23) Ita, agbibiagtayon kadagiti panawen nga umas-asping unay iti kaaldawan ni Noe, ket gapu itoy a rason ti Dios talipuposennanto amin a tattao a managdakdakes. Ibaga ti Biblia kadatayo no ania dagiti addang nga intay alaen no kayattayo ti mairaman kadagiti makalasat.—Mateo 24:37-39; 2 Pedro 3:5-7, 11.
Gapu itoy, awatentay koma nga addaan panangapresiar ken iyaplikartayo dagiti instruksion nga ipapaay ni Jehova babaen iti naisurat a Saona ken ti naindagaan nga organisasionna. Ti panangaramid iti daytoy iyegna ti balligi ken rag-o kadatayo ket ispalenna met ti biagtayo.