Ti Nadalus a Pagsasao Pinagkaykaysana ti Dakkel nga Umariwekwek a Managdaydayaw
TI INTED-DIOS a nadalus a pagsasao ket maysa a puersa a maipaay ti Nakristianuan a panagkaykaysa. Ti pammaneknek iti dayta ket nalawag kadagiti amin a timmabuno ti kumbension dagiti Saksi ni Jehova a naangay idiay Akinlaud a Berlin manipud Martes aginggat’ Biernes, Hulio 24 ingganat’ 27, 1990, ta adda dagiti Saksi manipud 64 a nagduduma a pagilian.
Idi naangay dagiti “Nadiosan a Debosion” a Kumbension Distrito idiay Poland bayat ti kalgaw ti 1989, rinibo a delegado ti naggaput’ Russia ken Czechoslovakia, ngem sumagmamano gasut laeng dagiti naggaput’ Akindaya nga Alemania. Anian a panagbalbaliw ti napolitikaan a situasion ti sangalubongan nanipud idin! Itatta, ti pattapatta a 30,000 a delegado manipud Akindaya nga Alemania nakitaripnongda kadagiti Saksi idiay Olympia Stadium iti Akinlaud nga Alemania. Ti kumbension ket gagangay kadagiti ginasgasut a naangay kadagiti dadduma a paset ti lubong, a kaaduanna manipud Huebes aginggat’ Domingo.
Iti panglukat a palawagna a panangabrasa iti Martes, insalaysay ti tserman ti paset a naaramid dagiti kumbension nanipud 1919 iti panangtulong kadagiti Saksi ni Jehova a rumang-ay iti panagsao ti nadalus a pagsasao. Daytoy a kumbension nakatulong met kadagiti amin a timmalantan a mangparang-ay ti abilidadda nga agsao ti nadalus a pagsasao ken agbiag babaen iti dayta. Pinalagipanna dagiti delegado a babaen iti mismo a panagkawkawesda ken panagug-ugalida, iparangarang ti ili ni Jehova ti panagrang-ay a naaramidanda iti panagsao ti nadalus a pagsasao.
“Nadalus a Pagsasao Agpaay ti Amin a Nasnasion”
Maiyanatup unay, ti kangrunaan a palawag ti kumbension intampoknat’ naikuna a tema. Daytat’ naibatay iti Sofonias 3:9, a nangikarian ti Dios: “Iti kasta itdekto kadagiti il-ili ti nadalus a pagsasao, tapno isuda amin awaganda koma ti nagan ni Jehova, tapno agserbida a situtunos kenkuana.” Ti nadalus a pagsasao ramanenna ti umiso a pannakaawat ken panangipateg ti kinapudno maipapan iti Dios ken ti pangpanggepna. Ni laeng Jehova ti makaipaay iti daytoy babaen ti nasantuan nga espirituna. Ti ayat iti kinapudno ti rebbeng a manggutugot iti panangadal ti nadalus a pagsasao, a daytat’ libre manipud amin a moral a kinarugit.
Mainayon pay, ti panagsao iti nadalus a pagsasao saan laeng a basta panagusar ti sumagmamano a bokabulario. Imbes ketdi, ti wagas a panagbiagtayo masapul a maitunos iti aggubuay iti bibbibigtayo. Kinaagpaysuanna, ti tono ti bosestayo, langa ti rupatayo, ken dagiti panagkumpas importanteda met, ta isarsarmingdat’ naguneg kadatayo. Tapno masalimetmetan ti agsaksaknap a nadalus a pagsasao, masapul a maaddaantayo ti di agbaliwbaliw a programa ti panagadal ken regular nga itatabuno kadagiti gimgimong ti kongregasion.
Panangsursuro ti Nadalus a Pagsasao
Kas impaganetget ti maysa a palawag iti malem ti Martes, ti panangsursuro ti nadalus a pagsasao kayatna a sawen “Panagrang-ay Manipud Pagdamdamuan Aginggat’ Kinanataengan.” Ti panagdakkel nasken no kayattayo ti agtultuloy a rumang-ay iti naespirituan. Kaipapanan dayta ti pananggundaway kadagiti amin a probision a maipaay ti naespirituan a panagadelantar ken inaldaw a panangiyaplikar kadagiti prinsipio ti Biblia.
Tapno lumaing iti nadalus a pagsasao, masapul a datay ti “Nasursuruan ken Jehova,” paulo ti simposium iti agsapat’ Huebes. Impakita ti umuna a nagpalawag no kasano a daytoy ti ‘Inyulidan ni Jesu-Kristo.’ A ni Jesus nasursuruan ken Jehova ket nabatad manipud kadagiti sasao ken tigtignayna. Gapuna kayattay a tuladen no kasanot’ panangisurona. Ket no kasano a ni Jesus kanayon a nagpasakup iti pagayatan ni Amana, kasta met koma kadatayo.
Ti sumaganad a tallo a nagpalawag impakitada no kasanot’ panangisursuro ni Jehova babaen ti gimgimong ken dagiti asamblea. Magunggonaantayo manipud kadagiti lima a gimong ti kongregasion ket awan komat’ liwliwayantayo uray maysa kadakuada. Tunggal gimong ket nasken nga agpaay iti naespirituan nga irarang-aytayo. Sursuruannatay met ni Jehova babaen kadagiti programa ti asamblea sirkito, kumbension distrito, ken espesial nga aldaw ti asamblea tayo. Tapno magunggonaan kadagitoy amin, masapul nga agimdengtayo a naimbag ken kalpasanna tungpalen dagiti intay naadal.
Daytoy a simposium ket sinaruno ti palawag a “Panagsakripisio Maipaay iti Personal a Panagadal.” Tapno maaddaan tiempo iti dayta, masapul nga ipangagtayo ti balakad idiay Efeso 5:15, 16 a mangalat’ tiempo manipud kadagiti basbassit pategna a bambanag.
Ti lohikal a kalat ti panagadaltayo ti nadalus a pagsasao isut’ dedikasion ken bautismo. Daytoy a kinapudno ti naitampok iti palawag a “Bautismo Kadagidiay Agad-adal ti Nadalus a Pagsasao.” Daytoy a pagsasao iturturongna dagiti adu iti dedikasion ken bautismo. Nupay kasta, masapul a ti maysa agtultuloy kalpasanna a mangsurot ti padron ni Jesus babaen ti sireregta a panangikaskasaba ti naimbag a damag, panangikawes ti baro a personalidad, ken isisina manipud ti lubong.
Natangken a Naespirituan a Taraon
Naragsakan met dagiti kumbensionista nga immawat ti natangken a naespirituan a taraon a naibatay kadagiti kaitungpalan dagiti naimpadtuan a drama. Iti malem ti Huebes, dua a palawag ti naibasar kadagiti tema a naadaw manipud padto ni Ezequiel. Ti umuna, “Ti Nailangitan a Karuahe ni Jehova Agab-abante,” insalaysaynat’ aglaplapusanan, nadayag, nakaam-amak a nailangitan a lugan nga agtartaray iti kapegges ti kimat. Iladladawannat’ nailangitan nga organisasion ni Jehova, a pagsaksakayan ti Dios a ta siaayat a mangidirihir iti tunggal tignayna, nga us-usarenna dayta a pangitungpal ti pangpanggepna. Ni Ezequiel iladladawanna ti napulotan ti espiritu a natda, nangnangruna nanipud 1919. Nangnangruna nanipud 1935 nga isudat’ kinaduaanen ti “dakkel nga umariwekwek.”—Apocalipsis 7:9.
Ti sumaganad a palawag napauluan “Makigiddan iti Makitkita nga Organisasion.” Awan duaduan a ti makitkita nga organisasion ti Dios ket makigidgiddan iti nailangitan nga arig karuahe nga organisasionna. Kas inaramid ni Ezequiel, dagiti ad-adipen ni Jehova itatta masapul nga agtulnogda a mangitungpal iti naimpadtuan a bilin kadakuada agpapan pay panangiyaleng-aleng, pananglalais, wenno ibubusor. Ti pannakigiddan ti mangiturong kadagiti adu a bendision itattan ken biag nga agnanayon idiay napartak ti iyaasidegna a baro a lubong ti Dios.
Iti agsapa ti Biernes, naipaay met ti natangken a naespirituan a taraon babaen kadagiti tallo a palawag a naibatay iti Isaias kapitulo 28. Ti umuna kadagitoy impakitana dagiti nainget a termino a dagiti naespirituan a mammartek ti kadaanan nga Israel ken Juda iladladawanda dagiti naespirituan a mammartek ti Kakristianuan. Ket no kasano a dagiti immuna naglak-amda kadagiti nadagsen a pannusa ni Jehova, kasta met dagidiay adda iti Kakristianuan.
Ti simmaganad a palawag, a napauluan “Ti Kamangda—Maysa a Kinaulbod!,” naglaon ti nainget a pakdaar: No kasano a ti panagtalek ti Juda iti Egipto napaneknekan a barengbareng a pagkamangan, kasta met ti pannakitulag ti Kakristianuan kadagiti napolitikaan a pannakabalin iti kaaldawantayo. Ti maikatlo a palawag iti Isaias kapitulo 28, “Mamakdaar a Kanayon iti Karkarna nga Aramid ni Jehova,” ket naiturong iti ili ti Dios. Ti aramiden ni Jehova iti Kakristianuan ket nainkalintegan a naawagan karkarna, ta daytat’ umay kas naan-anay a kellaat kenkuana. Itatta, ni Jehova ti balangat ti kinadayag iti bassit a bunggoy dagiti napulotan a Kristiano ken iti nasurok nga uppat a milionen a “sabsabali a karnero.” (Juan 10:16) Ti nagpalawag nagpatingga babaen kadagiti makatignay a sasao: “Sapay koma ta ti regtatayo, determinasiontayo, ken kinasungdotayo ti makatulong iti agnanayon a pakaidayawan ni Jehova, a Diostayo!”
Ti Panagsao ti Nadalus a Pagsasao Kaipapanannat’ Panangipakita ti Ayat a Nainkabsatan
Iti malem ti Biernes naipaganetget kadagiti kumbensionista a ti panagsao ti nadalus a pagsasao kaipapananna ti “Pananglaglagip ti Ul-ulila ken dagiti Balo iti Rigatda.” Dagiti ubbing nga awanan ama matulonganda babaen ti panangawat ti personal a pannakasanay. Maipakitatayo ti konsiderasion kadagiti balo babaen kadagiti naasi a sasao a pammaregta, babaen ti panangiraman kadakuada kadagiti Nakristianuan nga ar-aramid ken sosial a tartaripnongtayo, ken babaen ti panangted material a tulong kadakuada no maikarida ken pudpudno nga agkasapulanda. Impakita dagiti interbio no kasano a maaramidan dagitoy a bambanag.
Iti malem ti Huebes, maysa pay a makaparagsak-puso a palawag ti nangipakita no “Kasanot’ Panangaywan dagiti Kristiano iti Maysa ken Maysa.” Addaan nasayaat a rekord dagiti Saksi ni Jehova iti panangaywan iti maysa ken maysa, nangnangruna no dumteng dagiti didigra kas kadagiti bagio ken ginggined, no kasapulan ti panagsurat kadagiti opisiales, wenno no addada dagiti lokal a pagkasapulan. Ngem no rumsua dagiti pakarigatan gapu ti natauan a kinaimperpekto, rebbeng nga iyaplikartayo dagiti prinsipio a nairaman iti balakad ni Jesus iti Mateo 5:23, 24 ken Mt 18:15-17. Nangnangruna no daytat’ maipapan iti negnegosio dagiti kakabsat a kasapulan ti panagraem iti agsumbangir ken panangipakita ti ayat tapno awan amo wenno kadagiti empleado ti manggundaway a siaagum iti naespirituan a relasion.
Ti Panagsao ti Nadalus a Pagsasao Kaipapananna ti Panangaluad ti Ug-ugalitayo
Ti pannakasapul ti panangaluad ti ug-ugalitayo ket naiyulit-ulit a naipaganetget. Gapuna, ti umuna a nagdiskurso iti malem ti Martes nagpalawag iti tema a “Panagdengngeg ken Panangsalimetmet ti Sao ti Dios.” Impakitana nga addada dua a kangrunaan a rason a timmalantantayo kadagiti kumbension: tapno mangala ti umiso a pannakaammo ken tapno magutugot nga agtignay iti dayta a pannakaammo.
Ti umuna a palawag iti agsapa ti Mierkoles impasangonat’ makasukisok a saludsod “Ni Kristo ‘Ginurana ti Kinadakes’—Gurguraenyo Met Aya?” Saan nga umdas ti panagayat ti kinalinteg. Masapul a guraentay met ti kinadakes tapno maaddaantay ti nadalus a konsiensia, tapno mataginayon ti nasayaat a relasion ken Jehova, tapno malisian ti panangyeg pakaumsian ti naganna, ken tapno maliklikan ti panangapit kadagiti bunga ti kinadakes—ti panagrupsa ken ipapatay.
Ti sisisinged a nainaig iti dayta a tema isut’ sumaganad a palawag, a napauluan “Laksidenyo dagiti Nailubongan nga Ar-arapaap, Surotenyo dagiti Kinapudno ti Pagarian.” Ni Satanas, Eva, ken dagiti nagbasol nga anghel sinurotda amin ti ar-arapaapda a nagturong ti pannakadadaelda. Dagiti nailubongan nga ar-arapaap, a buklen dagiti materialistiko a tagtagainep wenno dagidiay maipapan kadagiti maiparit nga ar-aramid, agresulta iti panagbaliw ti kapampanunotan no di pay ket kadagiti nakaro a biddut. Tapno maparmek dagitoy nga ar-arapaap, masapul a surotentayo dagiti kinapudno ti Pagarian babaen ti panagad-adal, panagkarkararag, itatabuno kadagiti gimong, ken ministerio iti publiko.
Tapno maaddaan nalinteg a panagbiag kas Kristiano, masapul met nga intay ipangag ti balakad a naited iti malem ti Mierkoles iti palawag a “Dakayo a Kristiano—Agbiagkayo Sigun iti Pinansial a Kabaelanyo.” Ti pannakapaay a mangaramid iti daytoy ket sigurado a maaddaan kadagiti makadangran nga epekto agpadpada iti pisikal ken espiritual. Ti kurso ti kinasirib isut’ panangmedmed kadagiti naagum a tartarigagay ti maysa babaen ti saan a pannakailumlom kadagiti utang ken babaen ti panagplano iti realistiko a badyet ken panangsalimetmet iti dayta. Kasapulantay a sukayen iti amin a tiempo ti nadiosan a debosion. Buyogen ti pannakapnek, daytoyen ti dakkel a gunggona.—1 Timoteo 6:6-8.
Ti pateg ti panangsaluad ti pannakilangenlangentayo naitampok met iti palawag iti Martes a “Ti Gagayyemyo Gagayyem Kadi ni Jehova?” Ti gagayyemtayo ket rebbeng a dagiti Kristiano a nangikawesen ti kas ken Kristo a personalidad ken nareregta iti panangaskasaba. Dagiti am-ammotayo a taga lubong saanda a gagayyem ti Dios, ket saantay a mabalin ti makitimpuyog kadakuada a ditay madangran. Uray iti uneg ti kongregasion, masapul met a napilitayo no kayattayo a dagiti pannakitimtimpuyogtayo ket pudno a makapabileg.
Ti napalabas a balakad maipapan ti ug-ugali naipaganetget a silalawag babaen iti moderno-aldaw a drama. Daytat’ napauluan “Panangsaranget kadagiti Nasikap nga Aramid ti Diablo.”
Ti Balakad ti Nadalus a Pagsasao kadagiti Pamilia
Kasapulan unay ti naipalawag iti Mierkoles a “Nagannak—Tungpalen dagiti Annongenyo!” Dagiti nagannak a mismo masapul nga ammoda ti pagayatan ti Dios ken ar-aramidenda dayta iti amin a kabaelanda. Masapul nga iyukuokda ti Sao ti Dios kadagiti annakda. Mainayon pay, saan nga umdas ti basta panangitugot kadagiti annak iti Nakristianuan a panaggigimong ken iti tay-ak ti ministerio. Masapul a masursuruanda nga ayaten ni Jehova ken tapno makitada ti praktikal a kinasirib iti panagaramid kadagiti nadiosan a bambanag.
Simmaruno ti simposium iti “Ti Pamilia iti Kaaldawantayo.” Ti umuna a nagpalawag impakitana a ti pamilia ket namunganay iti Dios. Masapul a dagiti amma isasaoda a naimbag ti maipapan kadagiti naespirituan a bambanag. Dagiti ina masapul a naimbagda nga agtagibalay, ket masapul a dagiti annakda ipakitadat’ panagraemda ken Jehova babaen ti pannakitunosda kadagiti dadakkelda.
Ti sumaganad a nagpalawag impakitana a ti pamilia ket “Rarauten dagiti Kabusor.” Dagiti rigat ti panagbiag mangparparmekda. Aglaplapusanan kadagiti panggedan dagiti sulisog nga agaramid ti dakes, ken dagiti presentasion iti pagiwarnakan a napnuan iti kinaranggas, maiparit a sekso, ken pangallukoy iti materialismo. Masapul a mangrugi a nasapa ti panangisuro, ken kasapulan ti kinagaget tapno maparmek dagiti nailubongan nga impluensia. Masapul ti naimbag a panangusar kadagiti nateokratikuan nga al-alikamen nga ipapaay ti Watch Tower Society.
Ti sumaganad a palawag, a maipapan ti ‘Pannakaispal ti Pamilia nga Agturong iti Baro a Lubong,’ ad-adda manen a nangipaganetget ti serioso a responsabilidad dagiti nagannak. Ti panangsanay kadagiti annak masapul a maaramidan a sipapasnek unay. Naited dagiti nasayaat a balakad maipapan kadagiti panagadal ti Biblia iti pamilia ken no aniat’ adalen, a ti panggepna amin isut’ panangdanon ti puspuso dagiti annak. Babaen laeng iti dayta a manamnama dagiti nagannak ken annak a maitalimeng iti baro a lubong kas pamilia.
Ti nangted ti nasayaat a balakad a maipaay iti situasion ti pamilia a pakasarakan dagiti adu a Saksi iti bagida isut’ palawag a “Pannakibagay iti Uneg ti Nasinasina a Sangakabbalayan.” Dagidiay adda kadagita a sirkumstansia nabalakadanda a dida koma mapukawan ti namnama a ti di mamati ket addanto aldaw nga agbalinda a manamati. Mangbusbos ti panawen a kadua ti di mamati nga asawa ken ipasiguroyo a mairukodkayo kadagiti amin a kasapulan iti Kristiano nga asawa. Makagun-odkay ti tulong manipud kadagiti panglakayen wenno nalabit manipud dadduma nga adda kadagiti nasinasina a sangakabbalayan.
Ti Panangisasao ti Nadalus a Pagsasao kadagiti Sabsabali
Maiyanatup unay, naipaay ti dakkel nga atension iti panangusar kadagiti gundaway a mangisuro ti nadalus a pagsasao kadagiti sabsabali. Gapuna, iti agsapa ti Mierkoles nangngeg dagiti kumbensionista ti palawag nga “Usarenyo a Sisisirib ti Napateg a Tiempoyo.” Tapno maaramid dayta masapul nga ikeddengtay dagiti ipangpangrunatayo, a maitunos iti Mateo 6:33, a kunana: “Itultuloyyo, ngarud, a biruken nga umuna ti pagarian ken ti kinalintegna.” Ramanen dayta ti panangilasin ti panawen a maipaay iti personal a panagadal ti Biblia, itatabuno kadagiti amin a gimong, ken panagbalin a regular iti tay-ak ti ministerio. Daytoy sapulenna ti panangala ti panawen manipud kadagiti di unay nasken nupay makaay-ayo met nga ar-aramid. Sumagmamano a pananginterbio ti nangipakita no kasanot’ panangar-aramid dagiti dadduma iti daytoy.
Ditay koma liplipatan a datayo ket Saksi ni Jehova. Iti malem ti Huebes, sumagmamano a demostrasion ti nangiyunayunay iti dayta a punto iti tema nga “Itultuloyyo a Sawen ti Nadalus a Pagsasao iti Kada Okasion.” Impakita dagitoy a demostrasion no kasano a maaramidan daytoy iti panangasaba iti lansangan, iti di pormal a panangasaba, ken babaen iti panagusar ti telepono. Ti awan-agumna a panagayat ken Jehova a Dios ken iti padatayo a tattao tignayennatayo nga agsao ti nadalus a pagsasao iti tunggal gundaway.
Ti nainaig unay itoy a tema isut’ sumaganad a presentasion, “Dagiti Bendision kadagidiay Di Agpampambar.” Maisupadi unay iti Kakristianuan isu ti sangalubongan a mangisursuro nga organisasion dagiti Saksi ni Jehova. Sinaggaysa, masapul a sarangtentay amin a panangparigat, kas kadagiti opisial nga ibubusor, nasaknap a kinaaleng-aleng, ken parparikut ti panagbiag. Dagiti demostrasion a naibatay iti libro a Panakirinnason Manipud kadagiti Kasuratan impakitana no kasano a mabalin a parmeken dagitoy a panangparparigat.
Ti nangiparegta met ti naganetget a panangaskasaba isut’ drama ti Biblia a Panangaramid a Sireregta iti Pagayatan ti Dios. Impakitana no kasanot’ kinaregta ni Jehu maipaay iti nagan ni Jehova ken anian a nagpateg ti intay panangipakita ti umas-asping a kinamaingel ken regta iti trabaho ti Dios.
Dagiti Baro a Ruar iti Kumbension
Addada dua a naisangsangayan a nairuar iti Ingles ken Aleman bayat ti kumbension. Ti umuna kadagitoy a publikasion ket naiyam-ammo a nainaig iti palawag a napauluan “Panangispal ti Biagyo Babaen ti Dara—Kasano?” Umuna imbaga ti nagpalawag dagiti risgo a nainaig kadagiti panangiyalison ti dara. Imbagana a nagadu dagiti kasukat ti dara a mangsupusop gaput’ pukaw iti dara. Ngem umadayo dagiti Saksi ni Jehova iti dara saan a gapu ta daytat’ di nasalun-at no di ket gapu ta ti panangakseptar iti dayta ket di nasantuan. Umadayoda, saan a gapu ta ti dara mabalin a narugitan, no di ket gapu ta daytat’ nasudi iti Dios. Ti dara a pudpudno a makaispal-biag isut’ makasubbot a dara ni Jesu-Kristo. Kas pangserra pinaragsak ti nagpalawag dagiti amin managdengngegna babaen iti panangipakitana ti 32-panid a broshur a Kasano nga Ispalen ti Dara ti Biagyo?
Ti maikadua a nagpateg a nairuar ket nainaig iti palawag a “Sapulenyo ni Jehova, Dakayo a Tattao.” Masansan, dagiti tattao saanda a sapsapulen ti Dios. Ti kaadda dagiti adu a nagduduma a relihion idemostrana no kasanot’ pannakaiyaw-awan ti panagsapul ti tao iti Dios gapu ta linaksidda ti Saot’ Dios. Kas makita iti reporttayo ti Memorial kada tawen, minilmilion ti masapul a tulongan tapno alaendat’ takderda ken Jehova. Ipakita ti Isaias 55:6, 7 a talaga a ni Jehova ti naayat ken manangngaasi a Dios, sidadaan a “mamakawan iti nawadwad.” Kas dagiti Saksina, naikkantayo ti nadalus a pagsasao tapno matulongantay met dagiti dadduma a tumipon kadatayo nga agserbi a situtunos ken Jehova.
Itatta, ti ili ni Jehova naipasango iti maysa a karit gapu ti napuskol a panagakar-akar dagiti populasion. Kas resultana, amin a kita ti relihion ket ak-akuenen dagiti tattao kadagiti teritoriatayo. Tapno matulongantayo dagiti Hindu, Budista, Shintoista, ken dagidiay adda kadagiti adu a dadduma pay a relihion, impaay ti Sosiedad ti nagpintas a 384-panid a libro a Ti Panangbiruk ti Sangatauan iti Dios. Autoritatibo nga imparang dayta dagiti pamunganayan a sursuro dagiti kangrunaan a relihion iti ruar ti Kakristianuan. Ngem tuntonen met dayta ti rekord ti ulbod a relihion iti las-ud ti Kakristianuan. Daytoy a libro mabalinna nga iwayaan ti pannakairugi dagiti panangyadal ti Biblia kadagiti tattao a mangan-annurot iti adu a nagduduma a relihion.
Ti Palawag Publiko ken dagiti Pangserra a Komento
“Agkaykaysakayo Babaen ti Nadalus a Pagsasao” ti paulo ti palawag publiko iti Biernes. Impakita ti nagpalawag a nupay tallo ribo a nagduduma a pagsasao itan ti agserserbi kas lapped iti panagkaykaysa, ti nadalus a pagsasao ket maysa a nabileg a mamagkaykaysa a puersa. Daytat’ nangsaluad kadagiti Saksi ni Jehova a maibusor kadagiti errado ti taga Babilonia, nakaisuro kadakuada ti panagraem iti kinasanto ti biag ken ti dara, ken nakatulong kadakuada nga agbiag babaen kadagiti prinsipio ti Biblia a nanggunggona kadakuada iti naespirituan ken nainlasagan. Amin masapul a maseknanda maipapan iti panagadal ken panagsao ti nadalus a panagsasao, ta dagidiay laeng mangar-aramid ti kasta ti makalasat iti Armagedon. Awan panawenen a mataktak iti panangipangag ti balakad idiay Sofonias 2:1-3.
Kalpasan ti sumagmamano a nasasayaat a Nainkasuratan a balakad iti pannakasapul nga “Agsalukag Maipapan iti Kararag,” immay ti pangserra a komento a naibatay iti tema a “Pannagna a Maitunos iti Nadalus a Pagsasao.” Ti bilang itan dagiti magmagna a maitunos iti nadalus a pagsasao ket pudno nga umad-adu. Ket ti panangipateg iti nadalus a pagsasao impakita dagidiay timmabuno kadagitoy a kumbension babaen iti kinadalus, kinaurnos, ken organisasional a panagtutunosda. Dagiti kabbaro a naiyimprenta a pagbasaan ti makatulong kadagiti amin a Saksi ni Jehova a mangisaknap nga ad-adda nga epektibo iti nadalus a pagsasao.
Ti maudi a nagpalawag ti kumbension impalagipna kadagiti isuamin ti pannakasapul ti panagibtur. Impamatmatna a kas resulta daytoy a kumbension, amin ti napabileg koma iti determinasionda nga umadelantar. Kalpasanna isut’ nagpatingga babaen kadagiti sasao a: “Sapay koma ta agtultuloytayo a magna a maitunos iti inted-Dios a nadalus a pagsasao tapno maipadayagtayo ti naayat a nailangitan nga Amatayo, a ni Jehova a Dios, itan ken iti agnanayonen!”
[Kahon iti panid 26]
Ti kangatuan a bilang ti timmabuno iti kumbension idiay Akinlaud a Berlin ket 44,532, ken 1,018 ti nabautisaran. Inabutna ti 19 minutos para kadagiti kandidato ti bautismo a sipipila a rimmuar iti Olympia Stadium, ket kabayatanna adda awan ressatna a panagsisipat. Adda espesial a lugar para kadagiti Ingles-pagsasaona a delegado. Agarup 6,000 kadagitoy ti nakangngeg iti intero a programa iti pagsasaoda. Iti daytoy a kumbension, adda met 4,500 a taga Polandia; bayat ti dua a tengngat’ aldaw nga or-oras, dagiti miembro ti Bagi a Manarawidwid nangtedda kadagiti ababa a palawag a pakagunggonaanda.
[Dagiti ladawan iti panid 24, 25]
1. Olympia Stadium, Akinlaud a Berlin
2. Naiyimprenta a programa ti kumbension
3. Dua gasut a bus ti nangiyeg kadagiti delegado manipud Akindaya nga Alemania
4. Naragsak dagiti kumbensionista a Polako nga immawat kadagiti nairuar a pagbasaan
5. Pinaraniag dagiti dekorasion a sabsabong ti buya
6. Ni A. D. Schroeder, maysa kadagiti miembro ti Bagi a Manarawidwid nga adda iti programa idiay Akinlaud a Berlin