Salimetmetan ti Pammati ken Naimbag a Konsiensia
Dagiti Tampok Manipud Umuna a Timoteo
AGARUP idi tawen 56 K.P., pinakdaaran ni apostol Pablo dagiti panglakayen ti kongregasion ti Efeso a rummuarto kadakuada “dagiti narawet a lobo” ket “agsaoda kadagiti nakas-ang a bambanag tapno guyugoyenda dagiti adalan a sumurot kadakuada.” (Aramid 20:29, 30) Iti sumagmamano pay a tawen, nakaronto unayen ti apostata a sursuro a gapu itoy indagadag ni Pablo ken Timoteo nga isut’ makigubat a naespirituan iti uneg ti kongregasion tapno maitalimeng ti kinadalus dayta ken tulongan dagiti kapammatian nga agtalinaed iti pammati. Daytat’ kangrunaan a rason no apay nga insurat ni Pablo ti umuna a suratna ken Timoteo manipud Macedonia idi agarup 61-64 K.P.
Nasursuruan ni Timoteo maipapan kadagiti annongen dagiti panglakayen, ti intuding-Dios a pagsaadan dagiti babbai, dagiti kualipikasion dagiti panglakayen ken ministerial nga ad-adipen, ken dadduma pay a bambanag. Dagita a sursuro makagunggonada met itatta.
Pammatigmaan iti Pammati
Nanglukat ni Pablo maipapan ti balakad a salimetmetan ti pammati ken naimbag a konsiensia. (1Ti 1:1-20) Pinaregtana ni Timoteo nga agtalinaed idiay Efeso ken “ibilin[na] kadagiti dadduma a dida mangisuro ti sabsabali a sursuro.” Agyaman unay ni Pablo iti ministerio a naituding kenkuana, a binigbigna nga isut’ nagtignay iti kinakuneng ken kinakurang ti pammati idi indadanesna dagiti paspasurot ni Jesus. Binilin ti apostol ni Timoteo a makidangadang iti naespirituan a pannakidangadang, a “salimetmetan ti pammati ken naimbag a konsiensia” ket di agbalin a kas kadagidiay “narbada maipapan iti pammati.”
Balakad iti Panagdaydayaw
Sumaganad, nangbalakad ni Pablo kas “mannursuro kadagiti nasnasion iti pammati ken kinapudno.” (2:1-15) Dagiti karkararag maipaayda kadagidiay adda ti nangangato a saad tapno dagiti Kristiano agbiagda a sitatalna. Pagayatan ti Dios nga isuamin a kita dagiti tattao maisalakanda koma, ket ti maysa a napateg a sursuro a ta ni Kristo “intedna ti bagina a katupag a subbot gapu kadagiti adu.” Impakita ni Pablo a rebbeng a ti babai agkawes a naemma ken saanna nga iturayan ti lalaki.
Rebbeng a ti kongregasion agbalin nga organisado unay. (3:1-16) Gapuna imbinsabinsa ni Pablo dagiti kualipikasion dagiti manangaywan ken ministerial nga ad-adipen. Manipud kadagiti bambanag nga insurat ti apostol, maammuan ni Timoteo no kasanot’ panagtignayna iti kongregasion, “a maysa nga adigi ken sadiri ti kinapudno.”
Inikkan met ni Pablo ti personal a pammalakad ni Timoteo tapno matulongan a makapagannad kadagiti ulbod a sursuro. (4:1-16) Kadagiti maud-udi a panawen dadduma suminadanto iti pammati. Ngem babaen ti panangsaluad ti bagina ken ti sursurona, ni Timoteo ‘maisalakannanto ti bagina ken dagidiay dumngeg kenkuana.’
Immawat met ni Timoteo ti balakad iti pannakilangen kadagiti indibidual, agtutubo man wenno lallakay. (5:1-25) Kas pangarigan, maitutop a sagana ti maipaay para kadagiti babbaketen a balo nga addaan nasayaat a Nakristianuan a pakasarsaritaan. Imbes nga agidanondanonda, dagiti ub-ubing a balo mangasawada koma ken aganakda. Dagiti panglakayen a mangidaulo iti nasayaat a pamay-an maikkanda koma ti doble a dayaw.
Nadiosan a Debosion nga Addaan Pannakapnek
Ti balakad maipapan ti nadiosan a debosion ti namagpatingga ti surat ni Pablo. (6:1-21) “Ti nadiosan a debosion nga addaan pannakapnek” ket dakkel a gunggona, ngem ti determinasion a bumaknang mangiturong iti pakapukawan ken pakadadaelan. Ni Pablo inggunamgunamna ken Timoteo a makirupak iti nasayaat a pannakidangadang ti pammati ken ‘petpetanna a siinget ti biag nga agnanayon.’ Tapno mapetpetan a naimbag dayta pudpudno a biag, masapul a dagiti nabaknang “imalditda ti inanamada saan a kadagiti kinabaknang a pagduaduaan, no di ket iti Dios.”
[Kahon/Ladawan iti panid 30]
Maisalakan Babaen iti Panagpasngay: Saan a salsalaysayen ni Pablo ti pannakaisalakan iti biag nga awan inggana no di ket ti umiso nga akem ti nasantuan a babai idi nga insuratna: “Isu maisalakanto iti panagpasngayna kadagiti annak, no agtalinaed iti pammati ken ayat ken kinadalus ken kinanakman.” (1 Timoteo 2:11-15) Babaen iti panagpasngay, panangaywan kadagiti annakna, ken panangtaming ti maysa a sangakabbalayan, ti babai ket ‘maisalakan’ manipud ti panagbalinna a manangidanondanon ken mannakibibiang iti ar-aramid ti dadduma a tattao. (1 Timoteo 5:11-15) Dagiti trabahona iti uneg ti balay tumulong iti serbisiona ken Jehova. Siempre, amin a Kristiano rebbeng nga annadanda ti kababalinda ken usarenda a nainsiriban ti panawenda.—Efeso 5:15, 16.