Agtalinaed a Nasalun-at iti Pammati!
Dagiti Tampok Manipud Tito
DAGITI kongregasion Kristiano iti Mediteraneo nga isla ti Creta agkasapulanda ti espiritual nga atension. Siasino ti makatulong kadakuada? Ay ket, isu ti katrabaho ni apostol Pablo a ni Tito! Isu ket natured, kualipikado a mangisuro, naregta kadagiti naimbag nga ar-aramid, ken nasalun-at iti pammati.
Binisita ni Pablo ti Creta iti nagbaetan ti umuna ken maikadua a pannakaibaludna idiay Roma. Imbatina ni Tito iti isla tapno palintegenna dagiti dadduma a bambanag ken tapno mangdutok kadagiti panglakayen ti kongregasion. Ni Tito maawagan met tapno tubngarenna dagiti ulbod a mannursuro ken tapno mangipaay ti nasayaat nga ulidan. Amin dagitoy ti impanayag ni Pablo iti suratna ken Tito, a mabalin a naipatulod manipud Macedonia idi nagbaetan ti 61 ken 64 K.P. Ti panangiyaplikar ti balakad ti apostol tulonganna dagiti agdama-aldaw a manangaywan ken dagiti pada a manamati tapno agbalinda a natured, naregta, ken nasalun-at iti naespirituan.
Ania ti Kasapulan kadagiti Manangaywan?
Kasapulan idi ti panangdutok kadagiti manangaywan ken panangtaming kadagiti dadduma a serioso a bambanag. (1:1-16) Tapno madutokan kas maysa a manangaywan, ti maysa a lalaki masapul nga awan pakababalawanna, mapagulidanan iti bagbagina ken iti pamiliana, managpadagus, balanse, ken managteppel. Isut’ mangisuro no ania ti pudno ken tapno mangbalakad ken tubngarenna dagidiay mangiyeb-ebkas kadagiti kumunkontra a kapanunotan. Kasapulan ti tured agsipud ta masapul a mapagulimek dagiti nasukir a tattao iti uneg ti kongregasion. Nangnangruna a pudno daytoy kadagidiay mangal-alagad ti panagkugit, ta pinadakesda ti intero a sangakabbalayan. Nainget a pannubngar ti kasapulan tapno dagiti kongregasion makapagtalinaedda a nasalun-at iti naespirituan. Itatta, dagiti Kristiano a manangaywan kasapulanda met ti tured iti panangtubngar ken panangbagbaga, a pampanunotenda ti panangparang-ay ti kongregasion.
Iyaplikar ti Makapasalun-at a Sursuro
Ni Tito kasapulan a mangisuro kadagiti sursuro a makapasalun-at iti naespirituan. (2:1-15) Dagiti lallakay masapul a mapagulidananda no iti kinatimbeng, kinatakneng, kinamanakem, pammati, ayat, ken kinaanus. Dagiti babbaket masapul a “nasingpetda iti panagbiagda.” Kas “mannursuro ti naimbag,” matulonganda dagiti agtutubo a babbai a maaddaan ti umiso a panangmatmat kadagiti annongenda kas assawa a babbai ken inna. Dagiti agtutubo a lallaki masapul a managparbengda, ken dagiti adipen masapul a paiturayanda kadagiti appoda iti wagas a mangarkos ti sursuro ti Dios. Amin a Kristiano masapul a pagtalawanda ti kinadakes ket agbiagda a buyogen ti kinamanagparbeng iti daytoy a sistema dagiti bambanag bayat nga ur-urayenda ti pannakaiparangarang ti Dios ken ni Kristo Jesus, “isu nga inyawatna ti bagina gapu kadatayo tapno subbotennatay iti amin a kinadakes ken manggugor a maipaay kenkuana met laeng ti maysa nga ili a kukuana, a naregta kadagiti naimbag nga ar-aramid.” Babaen ti panangiyaplikar ti kasta a makapasalun-at a sursuro, ‘arkosantayo met ti sursuro ti Dios.’
Ti pangserra a balakad ni Pablo parang-ayenna ti naespirituan a salun-at. (3:1-15) Nasken ti panangipakita ti umiso a panagpasakop kadagiti agtuturay ken ti panangpatanor ti kinarasonable. Dagiti Kristiano addaandat’ inanama ti agnanayon a biag, ket masapul a maipaganetget dagiti sasao ni Pablo tapno maparegtada a mamagtalinaed kadagiti pampanunotda iti naimbag nga aramid. Dagiti awan-mamaayna a panagsalsaludsod ken riri maipapan ti Linteg masapul a liklikan, ket ti mangitantandudo ti maysa a sekta masapul a laksiden kalpasan ti pannakapakdaarna ti mamindua. Bayat nga iyaplikar dagiti panglakayen ti kasta a balakad itatta, isuda ken dagiti padada a manamati makapagtalinaeddanto a nasalun-at iti pammati.
[Kahon/Ladawan iti panid 22]
Saan a Patagabo iti Arak: Nupay dagiti babbai saanda a mabalin nga isuro dagiti lallaki iti kongregasion, dagiti natataengan a kakabsat a babbai mabalinda nga isuro dagiti agtutubo a babbai iti pribado. Ngem tapno epektiboda iti daytoy a banag, dagiti babbaket masapul nga ipangagda dagiti sasao ni Pablo: “A dagiti babbaket nasingpetda iti panagbiagda, saanda a mamadpadakes, saanda a patagabo iti adu nga arak, mangisursuroda kadagiti nasayaat a bambanag.” (Tito 2:1-5; 1 Timoteo 2:11-14) Gaput’ pannakaseknan kadagiti epekto ti panaginum, dagiti manangaywan, ministerial nga ad-adipen ken nataengan a babbai rebbeng a managparbengda, a saanda a managinum iti adu nga arak. (1 Timoteo 3:2, 3, 8, 11) Amin a Kristiano masapul a liklikanda ti panagbarbartek ken kasapulan nga idianda ti uminum kadagiti inumem a de alkohol bayat nga ar-aramidenda ti “nasantuan a trabaho“ ti panangikasaba ti naimbag a damag.—Roma 15:16; Proverbio 23:20, 21.