No Apay a ti Nakristianuan a Panagdayaw Natantan-ok
Dagiti Tampok Manipud Surat kadagiti Hebreo
NI Jehova a Dios inyurnosna dagiti natan-ok a langlanga ti panagdayaw idi nga imbaonna ti Anakna, ni Kristo Jesus, ditoy daga. Pudno unay dayta gapu ta ni Jesus, ti Nangbangon ti Kinakristiano, ket natantan-ok ngem dagiti anghel ken ni mammadto a Moises. Ti kinapadi ni Kristo ket natan-ok unay no maidilig kadagiti Levita iti kadaanan nga Israel. Ken ti daton ni Jesus ket natantan-ok nga amang ngem dagiti an-animal a naidaton iti sidong ti Linteg Mosaiko.
Dagitoy a bambanag nailawlawagda iti surat kadagiti Hebreo. Nalawag a kasla insurat ni apostol Pablo daytoy idiay Roma idi agarup 61 K.P. ket impatulodna kadagiti manamati a Hebreo idiay Judea. Kadagiti immuna a tiempo, dagiti Griego ken Asiatiko a Kristiano paneknekanda a ni Pablo ti nagsurat, ket daytoy suportaran agpadpada ti nauneg a pannakaawat wenno pannakakabesado ti mannurat iti Hebreo a Kasuratan ken ti panagusarna iti lohikal a panagbuangay, isuda a gagangay iti apostol. Mabalin nga inikkatna ti naganna gapu ti panagilem dagiti Judio kenkuana ken agsipud ta isut’ am-ammo kas “apostol kadagiti nasion.” (Roma 11:13) Ita intay usigen dagiti natan-ok a langlanga ti Kinakristiano, kas naipanayag iti surat ni Pablo kadagiti Hebreo.
Ni Kristo Natantan-ok Ngem dagiti Anghel ken ni Moises
Immuna a naipakita isut’ natan-ok a posision ti Anak ti Dios. (1:1–3:6) Dagiti anghel agruknoyda kenkuana, ken ti naarian a turayna agpannuray iti Dios. Gapuna, mangipaaytay koma ti naisalsalumina nga atension iti no ania ti naisao babaen ti Anak. Mainayon pay, laglagipentay koma a nupay ti tao a Jesus nababbaba ngem dagiti anghel, isu naitan-ok kadakuada ket naikkan ti panagturay iti mapagnaedan a daga nga umay.
Ni Kristo Jesus natantan-ok met ngem ni Moises. Kasano a kasta? Bueno, ni Moises maysa laeng nga adipen iti balay ti Dios idiay Israel. Nupay kasta, ni Jehova insaadna ni Jesus nga agaywan iti dayta intero a balay, wenno kongregasion dagiti tattao ti Dios.
Dagiti Kristiano Sumrekda iti Panaginana ti Dios
Ti apostol sumaganad nga impakitana a posible ti iseserrek iti panaginana ti Dios. (3:7–4:13) Dagiti Israelitas a nawayawayaan manipud pannakakayaw idiay Egipto napaayda a simrek iti dayta gapu ta nagsukirda ken nagkurangda ti pammati. Ngem mabalinantayo ti sumrek iti dayta a panaginana no sanayentayo ti pammati iti Dios ken situtulnog a surotentayo ni Kristo. Ngarud, imbes a basta ngilinen ti linawas a Sabbath, tagiragsakentayto iti inaldaw dagiti nababaknang a bendision iti pannakaaddat’ inana manipud amin a managimbubukodan nga ar-aramid.
Ti iseserrek iti panaginana ti Dios ket maysa a kari iti saona, isu a “natadtadem ngem uray ania a kampilan a dua ti tademna, ken dumanon nga agingga iti paglalasinan ti kararua ken ti espiritu.” Aramidenna a kasta gapu ta umuneg tapno ilasinna dagiti motibo ken kababalin, tapno paglasinenna dagiti nainlasagan a tartarigagay ken panagpampanunot. (Idiligyo ti Roma 7:25.) No ti “kararuatayo,” wenno biag kas maysa nga indibidual, ket napakuyogan iti nadiosan nga “espiritu,” wenno pakinakem, mabalinantayo ti sumrek iti panaginana ti Dios.
Ti Natan-ok a Kinapadi ken Tulag
Sumaruno nga impakita ni Pablo ti kinatan-ok ti kinapadi ni Kristo ken ti baro a tulag. (4:14–10:31) Ti awan-basolna a ni Jesu-Kristo addaan asi kadagiti managbasol a tattao gapu ta, kas kadatayo, isut’ nasuot iti amin a pamay-an. Mainayon pay, isut’ dinutokan ti Dios a “padi nga agnanayon, kas iti kinapadi ni Melkisedec.” Maisupadi kadagiti nangato a papadi a Levita, ni Jesus ik-ikutanna ti maysa a di agrupsa a biag ket ngarud dinan kasapulan ti kasukat iti trabahona a panangisalakan. Dinan kasapulan ti agidaton kadagiti datdaton nga animal, ta indatonna ti mismo a natan-ok unay nga awanan-tulaw a bagina ken simrek idiay langit nga addaan ti pateg ti darana.
Ti baro a tulag, a napasingkedan babaen ti dara ni Jesus, ket natantan-ok ngem ti Linteg ti tulag. Dagidiay adda iti baro a tulag addaandat’ linlinteg ti Dios kadagiti puspusoda ken tagiragsakenda ti pannakapakawan dagiti basbasol. (Jeremias 31:31-34) Ti panagyaman iti daytoy tignayenna ida a mangaramid ti publiko a panangipaduyakyak ti inanamada ken tapno makitaripnong kadagiti padada a manamati. Maisupadi kadakuada, dagidiay gaggagaraenda ti agbasol awanen aniaman a daton a mabalin a maipaay kadagiti basbasolda.
Ti Pammati Napateg!
Tapno magunggonaan manipud natan-ok a baro a tulag, kasapulantay ti pammati. (10:32–12:29) Kasapulantay met ti panagibtur no kayattay ti umawat iti inkari ni Jehova. Kas maysa a pammaregta tapno makapagibtur, addaantayo ti ‘kasta unay a kaadu’ a saksi sakbay ti panawen Kristiano nga adda iti aglawlawtayo. Nangnangruna, nupay kasta, nga amirisentayo ti naan-anay a dalan ni Jesus iti sidong ti panagsagaba. Aniaman a rigat nga impalubos ti Dios a mapasarantayo mabalin nga iti maysa a pamay-an mamatmatan a kas maysa a disiplina a mangpataud ti natalna a bunga ti kinalinteg. Ti kinamapagtalkan dagiti karkari ni Jehova padakkelenna koma ti tarigagaytayo a mangipaay ti sagrado a serbisio kenkuana “a buyogen ti nadiosan a buteng ken panagraem.”
Inleppas ni Pablo ti suratna babaen kadagiti pammagbaga. (13:1-25) Ti pammati tignayennatayo koma a mangiparangarang ti nainkabsatan nga ayat, kinamanagpadagus, lagipen dagiti pada a manamati nga addaan rigat, padayawen ti panagasawa, ken “mapnekkayo koma iti adda kadakayo.” Tuladentayo koma ti pammati dagidiay mangipangpangulo ti kongregasion ken agtulnogtayo kadakuada. Mainayon pay, liklikantayo ti apostasia, sagabaen dagiti pannakauy-uyaw a sinagaba ni Jesus, “kankanayon nga idatontayo iti Dios ti daton ti panagdaydayaw” ken itultuloy nga aramiden ti naimbag. Dagiti kakasta a kababalin ket paset met ti natan-ok a langa ti pudno a Kinakristiano.
[Kahon/Ladawan iti panid 24]
Nadumaduma a Bautismo: Dagiti paspaset ti panagdayaw idiay tabernakulo ti Israel ramanenna “laeng dagiti makmakan ken in-inumen ken nadumaduma a bautismo.” (Hebreo 9:9, 10) Dagitoy a bautismo isu dagiti ritual a panagbuggo a kinalikaguman ti Linteg Mosaiko. Dagiti baso a narugitan ket nabbuguanda, ken dagiti seremonial a panagdalus inramanna ti pananglaba kadagiti pagan-anay ken panagdigos. (Levitico 11:32; 14:8, 9; 15:5) Dagiti papadi nagbuggoda, ken amin a bambanag a maaramat kadagiti pinuoran a datdaton ket nabugguanda iti danum. (Exodo 29:4; 30:17-21; Levitico 1:13; 2 Cronicas 4:6) Ngem dagiti “nadumaduma a bautismo” saanna nga iraman dagiti ritualistiko a ‘panangbuggo kadagiti kopa, pitsel, ken gambang a baseha’ a nakaugalian dagiti dadduma a Judio kabayatan ti tiempo a dimteng ti Mesias; kasta met a ti Hebreo 9:10 saanna a tuktukoyen ti pammautisar iti danum nga inaramid ni Juan a Mammautisar wenno ti bautismo dagidiay mangisimsimbolo ti dedikasionda iti Dios kas Kristiano.—Mateo 28:19, 20; Marcos 7:4; Lucas 3:3.