Dagiti Saludsod Manipud Kadagiti Managbasa

◼ Sawen ti Job 33:24 ti “maysa a pangsubbot” a nasarakan ni Job, a nangipalubos kenkuana a mangliklik ken patay. Asino dayta agbalin a pangsubbot ken Job?

Awan natauan a pangsubbot a daton ti intukon ni Job idi, ngem ti Dios inabbonganna, wenno pinakawanna, dagiti babak ni Job.

Adu a riribuk ti pinataud ni Satanas para ken ni Job, agraman “kadagiti naut-ot a busbusali manipud iti dapan ti sakana agingga iti kuppokuppona.” Nakaay-ay-ay ti kasasaad ni Job a ni baketna ti nangidagadag kenkuana nga “idiam ti Dios ket matayka.” Uray met ni Job pinampanunotna no nasaysayaat ti ipapatay ngem ti kasta a panagsagsagaba.​—Job 2:7-9; 3:11.

Idi agparang a kasla matayen ni Job, tiningiting ni Eliu ti karkarna a kasasaad ni Job ket nangted pakaibatayan ti namnama, a kunkunana: “Ti lasagna marunaw a di makitan . . . Ken ti kararuana umadani iti dariwangwang, ket ti biagna kadagiti mangdadael. No makikadua koma kenkuana ti maysa a mensahero, a pannakangiwatna, maysa kadagiti sangaribo, tapno mangiparangarang iti tao no ania ti nalinteg a maipaay kenkuana, no kasta isu nakaasi kenkuana ket kunana, ‘Isu ti ispalem iti yuulogna idiay dariwangwang! Nakasarakak iti maysa a pangsubbot! Ti lasagna nasalsalibukagto ngem iti lasag ti maysa nga ubing.’”​—Job 33:21-25.

Ammotayo nga impaay ni Jesu-Kristo ti perpekto a natauan a biagna kas katupag a subbot nga agpaay ti imperpekto a tattao. Ti datonna ti nangtimbang iti napukaw ni Adan, a nangipaay ti kasapulan a gatad a mangiyeg ti pannakawayawaya manipud basol. (Roma 5:12-19; 1 Timoteo 2:5, 6) Nupay kasta, saan a daytoy laeng ti kakaisuna a pannakausar ti “subbot” idiay Biblia. Ti sao a Hebreo a masarakan idiay Job 33:24 ket kangrunaan a kaipapananna ti “pangabbong.” (Exodo 25:17) Idi makilanglangen ti Dios iti kadaanan nga Israel, isut’ addaan urnos a panangabbong kadagiti basbasol​—dagiti daton a pangabbong ti basol, a mangpalinteg kadagiti bambanag iti nagbaetan ti tao ken iti Dios.​—Exodo 29:36; Levitico 16:11, 15, 16; 17:11.

Iti immun-una, nupay kasta, siaayat ti Dios a nangawat kadagiti daton kas ebkas ti panagyaman wenno panangidawat ti pammakawan ken anamong. (Genesis 4:3, 4; 8:20, 21; 12:7; 31:54) Naawatan ni Job ti pateg dagita a datdaton. Mabasatayo: “Ket bimmangon a nasapa iti bigat ket nangipaay kadagiti datdaton a mapuoran kas mayalubog iti bilangda amin [nga annakna a lallaki]; ta ni Job kinunana, ‘mabalin a nagbasol dagiti annakko a lallaki ket inlunodda ti Dios kadagiti puspusoda.’ Kasta ti inaramid a kankanayon ni Job.” (Job 1:5) Yantangay pinadasna nga ay-ayuen ti Dios ken nalawag nga addaan napakumbaba nga espiritu, dagiti datonna ti addaan pateg iti imatang ti Dios.​—Salmo 32:1, 2; 51:17.

Ngem iti kamaudianan nagsakit ni Job a kasla mamagpeggad ti biagna. Adda met di umiso a panangmatmatna ti kinalintegna, gapuna a kasapulan ti pannakatubngarna, nga isut’ impaay ni Eliu. (Job 32:6; 33:8-12; 35:2-4) Kuna ni Eliu a di kasapulan nga agtultuloy ni Job iti nakalkaldaang a kasasaadna agingga ken patay ken iti dariwangwang (Sheol, wenno ti gagangay a tanem). No agbabawi ni Job, makasarakto ti “maysa a pangsubbot.”​—Job 33:24-28.

Di rebbeng a panunotentayo a ti “subbot” ket kayat a sawen ni Eliu ti maysa a tao idi a matay a gapu ken Job. Gapu kadagiti daton a nakairuamanen dagiti pudno a managdaydayaw nga idatdaton, daydiay kita ti subbot nga isingsingasing ni Eliu iti kaso ni Job ket mabalin a maysa nga animal a daton. Makapainteres, ta ti Dios iti kamaudianan imbagana kadagiti tallo a manangbabalaw a kakadua ni Job: “Idatagyo gapu kadakayo ti daton a mapuoran; ket ni adipenko a Job ikararagannakayo.” (Job 42:8) Aniaman ti langa dayta a subbot, ti kangrunaan a punto ni Eliu a ta mabalin a maabbongan dagiti babak ni Job ket aglak-am kadagiti maipaayna a gunggona.

Daytat’ napasamak. Ni Job ‘nagbabawi iti tapuk ken dapdapo.’ Kalpasanna ania? “Ket ni Jehova imbaw-ingna ti pannakakayaw ni Job . . . Iti kasta ni Jehova binendisionanna ti naud-udi a tungpal ni Job a nangnangruna ngem idi panangrugina . . . Ket kalpasan daytoy ni Job nagbiag bayat iti sangagasut ket uppat a pulo a tawen ket nakitana dagiti annakna a lallaki ken dagiti annak a lallaki dagiti annakna a lallaki​—agingga iti maikapat a kaputotan.” Ikabilyon, a ti subbot saanna a winayawayaan ni Job manipud basol, ket idi agangay isut’ natay. Kaskasdi, ti pannakaiyatiddag ti biagna paneknekanna a, sieepektibo, ‘ti lasagna nasalsalibukag ngem ti lasag ti maysa nga ubing, ket nagsubli kadagiti al-aldaw ti kinaubingna.’​—Job 33:25; 42:6, 10-17.

Dagita a bendision nga immay manipud panangiyaplikar ti limitado a pangsubbot ken Job nagserbi kas pamalatpatan kadagiti aglaplapusanan a bendision nga umapay iti manamati a sangatauan idiay baro a lubong. Sa, ti naan-anay a gunggona iti daton a subbot ni Jesus magun-odanto, a mangikkat nga agnanayonen kadagiti makadadael nga epekto ti basol ken kinaimperpekto. Anian a rason ti addanto kadatayo a maipaay iti “sirarag-o a panagpukkaw,” kas kinuna ni Eliu!​—Job 33:26.