Ti Biag ken Ministerio ni Jesus

Naitabon iti Biernes, Awan-Naggianna a Tanem iti Domingo

ITAN malemen ti Biernes, ken ti Sabbath ti Nisan 15 mangrugin iti ilelennek ti init. Ti bangkay ni Jesus nakabitin a silulupaypay iti istaka, ngem dagiti dua a tulisan iti sibayna sibibiagda pay. Ti malem ti Biernes ket naawagan Panagsagana agsipud ta isu daytoy ti tiempo a panagisagana dagiti tattao iti kanen ken panangiringpas kadagiti sabali pay a trabaho a masapul nga aramiden aginggat’ kalpasan ti Sabbath.

Ti Sabbath a mangrugi iti mabiiten ket saan a basta regular a Sabbath (ti maikapito nga aldaw ti lawas) ngem maysa met a doble, wenno “dakkel,” a Sabbath. Maawagan a kastoy agsipud ta ti Nisan 15, nga isut’ umuna nga aldaw ti pito-aldaw a Piesta Dagiti Di-Nalebaduraan a Tinapay (ken kanayon a maysa a Sabbath, uray no ania nga aldaw ti iyuumayna), agtinnag iti isu met la nga aldaw kas ti regular a Sabbath.

Sigun ti linteg ti Dios, dagiti bagi saan a mabalin a panawan a sibibitin iti istaka iti agpatnag. Gapuna dagiti Judio indawatda ken Pilato a ti pannakapapatay dagidiay mapapatay mapapardas koma babaen ti panangtukkol kadagiti saksakada. Dagiti soldado, ngarud, tinukkolda dagiti saksaka dagiti dua a tulisan. Ngem yantangay agparang a natayen ni Jesus, saan a natukkol dagiti sakana. Daytoy tungpalenna ti kasuratan: “Uray maysa a tulangna saanto a matukkol.”

Nupay kasta, tapno maikkat panagduadua a talaga a natayen ni Jesus, maysa kadagiti soldado dinuyokna ti bakrangna iti pika. Ti pika simmalput iti pusona, ket dagus a rimmuar ti dara ken danum. Ni apostol Juan, a maysa a nakasaksi, insuratna a daytat’ nangtungpal ti sabali pay a kasuratan: “Kitaendanto ti sinalputda.”

Presente met iti panangpapatay isu ni Jose manipud siudad ti Arimatea, maysa a mabigbig a miembro ti Sanedrin. Nagkitakit nga umanamong iti tignay ti nangato a pangukoman maibusor ken Jesus. Ni Jose ket kinapudnona maysa nga adalan ni Jesus, nupay nagbuteng a nangiyam-ammo iti bagina a kasta. Itan, nupay kasta, isu naaddaan tured ket napan ken Pilato tapno kiddawenna ti panangalana ti bagi ni Jesus. Pinaayaban ni Pilato ti centurion, ket kalpasan a pinaneknekan ti opisial a natayen ni Jesus, inteden ni Pilato ti bangkay.

Ni Jose innalana ti bagi ket binungonna iti nadalus a lupot a naingpis kas panagsagana iti tabon. Isut’ tinulongan ni Nicodemo, sabali pay a miembro ti Sanedrin. Napaay met ni Nicodemo a nangipalgak ti pammatina ken Jesus gaput’ buteng a mapukawna ti saadna. Ngem itan nangikuyog iti maysa a balkot nga aglaon ti agarup tallopulo ket tallo a kilos ti mirra ken aloes. Ti bagi ni Jesus nabungon iti luplupot nga aglaon kadagitoy a bangbanglo, a kas ugali dagiti Judio a mangisagana kadagiti bangkay a maitabon.

Kalpasanna naikabil ti bagi iti baro a tanem ni Jose a nakali iti bato iti minuyongan nga adda iti asideg. Kamaudiananna, maysa a dakkel a bato ti naitulid iti ruangan ti tanem. Tapno mairingpas ti panangitabon sakbay ti Sabbath, nakaparpardas ti pannakaisagana ti bagi. Ngarud, ni Maria Magdalena ken ni Maria nga ina ni Santiago a Basbassit, a nalabit timmulong iti panagisagana, nagawidda a sidadaras tapno mangisaganada ti ad-adu pay a bangbanglo ken nabanglo a lana. Kalpasan ti Sabbath, panggepda a sapsapoan pay ti bagi ni Jesus tapno mataginayon dayta iti at-atiddug a tiempo.

Iti sumaruno nga aldaw, nga isut’ Sabado (ti Sabbath), dagiti panguloen a papadi ken dagiti Fariseo napanda ken Pilato ket kinunada: “Apo, malagipmi a daydi manangulbod kinunana idi sibibiag pay, ‘Inton malpas ti tallo nga aldaw agungarakto.’ Ibilinmo ngarud a mabantayan koma ti tanem agingga iti maikatlo nga aldaw, di la ket ta dagiti adalanna umayda ket takawenda ket kunaenda kadagiti tattao, ‘Nagungar kadagiti natay!’ ket ti pannakaallilaw a maudi dakdakesto ngem iti immuna.”

“Adtoy ti pagbantayenyo,” insungbat ni Pilato. “Inkayo ket aywananyo iti kasayaatan nga ammoyo.” Gapuna napanda ket inaywananda ti tanem babaen panangitimbreda iti bato ken panangikabilda kadagiti soldado a Romano nga agbantay.

Iti agsapa ti Domingo ni Maria Magdalena, ni Maria nga ina ni Santiago, agraman da Salome, Juana, ken dadduma pay a babbai, nangikuyogda ti bangbanglo idiay tanem tapno sapsapoanda ti bagi ni Jesus. Iti dalanda kinunada iti maysa ken maysa: “Asino ti mangipaay kadatayo ti pannakaligsay iti daytay bato iti ruangan ti tanem?” Ngem idi makadanonda, naammuanda a nagginggined ket ti anghel ni Jehova inligsayna ti bato. Dagiti agbantay pimmanawdan, ket awanen naggian ti tanem! Mateo 27:57–28:2; Marcos 15:42–16:4; Lucas 23:50–24:3, 10; Juan 19:31–20:1; 19:14; 12:42; Levitico 23:5-7; Deuteronomio 21:22, 23; Salmo 34:20; Zacarias 12:10.

◆ Apay a ti Biernes naawagan Panagsagana, ket ania ti “dakkel” a Sabbath?

◆ Aniada a kasuratan ti natungpal mainaig iti bagi ni Jesus?

◆ Aniat’ pakaibiangan da Jose ken Nicodemo iti pannakaitabon ni Jesus, ket aniat’ pakainaiganda ken Jesus?

◆ Aniat’ kiniddaw dagiti papadi ken Pilato, ket kasanot’ isusungbatna?

◆ Aniat’ napasamak iti agsapa ti Domingo?