Makidanggay nga Agabante iti Nailangitan a Karuahe ni Jehova
“Ket sawemto kadakuada dagiti sasaok, uray dumngegdanto wenno madidanto.”—EZEQUIEL 2:7.
1, 2. Ania a naarian a karuahe ti nakita ni Ezequiel, ket aniat’ naibaga kenkuana?
TI NAILANGITAN a karuahe ni Jehova agtaktakder itan iti sanguanan dagiti ad-adipenna. Buyogen dagiti mata ti pammati, makitkitadan ti naarian a pagsakayan ti Soberano nga Apoda. Isut’ nadayag, nakaskasdaaw, natan-ok.
2 Ti isu met laeng a naarian a karuahe nagsardeng iti sanguanan ni Ezequiel a mammadto ti Dios iti sirmata agarup 2,600 a tawtawen ti napalabasen. Manipud itoy mangkarkargat’ trono a karuahe—ti nailangitan nga organisasion dagiti naespirituan a parparsua ti Dios—ni Jehova intedna ken Ezequiel daytoy dramatiko a bilin: “Dagiti annak nasabrakda ken nabangadda—siak ibaonka kadakuada, ket kunamto kadakuada, ‘Kastoy ti kuna ni Soberano nga Apo Jehova.’ Ket isuda, uray dumngegdanto wenno madidanto—ta isuda nasukirda a balay—nupay kasta ammodanto nga addan mammadto kadakuada.”—Ezequiel 2:4, 5.
3. Ni Ezequiel addaan ania a moderno-aldaw a katupag?
3 Determinado ni Ezequiel a nangitungpal dayta a trabaho, nga agserserbi kas kakaisuna nga instrumento iti nadiosan nga ima. Umas-asping, ti Dios addaan itan ti kakaisuna nga organisasional nga instrumento a tengtenglenna. Ti klase Ezequiel, ti napulotan a natda, isut’ adda iti panangidaulo iti trabaho a panangited maudi a pammaneknek, a kadua ti “dakkel a bunggoy” dagiti “sabsabali a karnero” a nagkaykaysa iti panangsuportar kadakuada. (Apocalipsis 7:9, 10; Juan 10:16) Isuda amin “maymaysada nga arban,” nga iturturong ida ti Naimbag a Pastor, ni Jesu-Kristo, iti sidong ti kinasoberano ti naindaklan a Nakasakay ti Karuahe, ni Jehova a Dios.
4, 5. Kasanot’ pannakapaadda ti makitkita nga organisasion ti Dios, ket aniat’ napasaranna maitunos ti Isaias 60:22?
4 Iti sidong ti panangidalan ni Jehova, daytoy sangalubongan nga organisasion dimmakkel manipud bassit a pangrugian tapno agbalin a maysa a nabileg nga ahensia para ti pannakaiwaragawag ti bilin nga “agbutengkay iti Dios ket isu dayawenyo, ta dimteng ti oras a panangukomna.” (Apocalipsis 14:7) No kasano a ni Ezequiel dina pinatanor wenno dinutokan bagbagina kas mammadto, kasta met a ti makitkita nga organisasion ti Dios dina pinataud wenno dinutokan ti bagbagina. Isut’ di timmaud gaput’ pagayatan ti tao wenno panagreggetna. Ti nadiosan a Nakasakay ti Karuahe isut’ nangpaadda iti daytoy nga organisasion. Napabileg babaen ti espiritu ti Dios ken tultulongan dagiti nasantuan nga anghel, napasaran dagiti tattao ni Jehova ti kasta a dramatiko nga iyaadu a “ti kabassitan nagbalin a maysa a napigsa a nasion.”—Isaias 60:22.
5 Nasuroken nga 4,000,000 a Saksi ni Jehova ti mangiwarwaragawag ti mensahe ti Pagarian iti 212 a dagdaga. Natipontiponda iti nasurok a 63,000 a kongregasion a nabuangay kadagiti sirkito ken distrito. Dagiti nalalawa a sanga nga opisina ken pagimprentaan agan-andardan iti sidong ti panangidalan ti Manarawidwid a Bagi kas sentro ti hedkuarter nga organisasion. A kasla maymaysada a persona, amindat’ agab-abante, a mangikaskasaba ti naimbag a damag, nga iyad-adalan dagidiay dumngeg, nga agibangbangonda kadagiti paggigimongan. Wen, ti makitkita nga organisasion ni Jehova makidangdanggay nga umabante iti nailangitan a karuahe ken ti Nakasakay kenkuana.
6. Aniat’ iraman ti pannakidanggay nga agabante a kadua ti makitkita nga organisasion ti Dios?
6 No maysakay kadagiti Saksi ni Jehova, makidangdanggaykayo kadi nga agabante a kadua ti makitkita nga organisasion ti Dios? Ti panangaramid iti dayta ket saan laeng a basta itatabuno kadagiti gimong ken panangbusbos tiempo iti ministerio. Kangrunaanna, ti pannakidanggay isut’ panagrang-ay ken naespirituan a panagdakkel. Iramanna dayta ti positibo a panangmatmat, panangipasdek kadagiti umiso nga iyun-una, ken makigidgiddan iti panawen. No makidangdanggaytayo nga agabante a kadua ti nailangitan a karuahe ni Jehova, ti kabibiagtayo ket makitunos iti mensahe nga intay iwarwaragawag.
7. Apay nga usigen ti kababalin ni Ezequiel kas mammadto ti Dios?
7 Iti banag a pannakidanggay nga agabante, dagiti moderno-aldaw nga ad-adipen ni Jehova adut’ maadalda manipud ulidan ni Ezequiel. Nupay naisangsangayan pannakadutokna kas mammadto babaen ken Jehova, kaskasdi ni Ezequiel addaan kadagiti rikna, pannakaseknan, ken kasapulan. Kas pangarigan, kas maysa nga agtutubo a naasawaan a lalaki, isut’ nagsagaba iti ladingit ti pannakapukawna ti asawana ken patay. Kaskasdi, dina pulos napukaw ti panangmatmatna iti trabahona kas mammadto ni Jehova. Babaen panangusig no kasano a nagtignay ni Ezequiel kadagiti dadduma pay met a bambanag, mapatibkertay dagiti bagbagitayo a makidanggay nga agabante a kadua ti makitkita nga organisasion ti Dios. Daytoy ti mamagbalin kadatayo a makidanggay nga agabante iti makitkita nga organisasionna.
Ti Trabaho Naawat ken Naitungpal
8. No maipapan ti trabahona, ania nga ulidan ti impasdek ni Ezequiel?
8 Ni Ezequiel nangipasdek ti nasayaat nga ulidan babaen panangawatna ti trabahona ken panangitungpal dayta. Nupay kasta, kasapulan ti panagtulnog ken tured tapno maitungpal dayta, ta mabasatayo: “Ket sika anak ti tao, dika agbuteng kadakuada; ket kadagiti sasaoda dika agamak, uray pay kalkalunay ken kaskasumba addada koma kenka ket agnaedka iti nagtengngaan dagiti manggagama. Dika mabuteng kadagiti sasaoda, wenno agkullayaw iti panangkitada, ta isuda nasukirda a balay. Ket sawemto kadakuada dagiti sasaok, uray dumngegdanto wenno madidanto, ta nasukirda unay. Ngem sika, anak ti tao, denggem ti sawek kenka. Saanka koma a nasukir a kas dayta nasukir a balay.”—Ezequiel 2:6-8.
9. Babaen panangaramid laeng ti ania a siwawayawaya ni Ezequiel manipud panagbasol iti dara?
9 Ni Ezequiel saan koma a managaleng-aleng wenno managbuteng, a kasapulanna ti kankanayon a maidurduron tapno itungpalna ti trabahona. Isut’ siwawayawaya laeng iti panagbasol ti dara no situtulok ken situtured a sawenna dagiti sasao ni Jehova. Naibaga ken Ezequiel: “Ngem no sika pakdaaram ti managdakdakes ket isu dinto agbalbaliw iti kinadakesna wenno iti dakes a dalanna, isu matayto iti kinadangkesna; ngem sika, maispalmonto ti kararuam.”—Ezequiel 3:19.
10. Kasano a pinaneknekan ti klase Ezequiel ti panagbalinna kas ti mammadto?
10 Kas iti kaso ni Ezequiel, ti napulotan a klase Ezequiel inawatda ti inted-Dios a trabahoda ken intungpalda dayta. No Saksinatay ni Jehova, laglagipentay koma a ti biagtayo ken ti biag dagiti sabsabali agpannuray iti panagtulnogtayo. (1 Timoteo 4:15, 16) Ti tunggal Saksi kasapulannat’ makidanggay nga agabante a kadua ti organisasion ni Jehova. Dinatayto igalut ti Dios iti karuahena ket guyodennatayo. Ti kinaaleng-aleng ken ti managduadua a puso ipababana ti Nakasakay ti Karuahe. Gapuna bagbagaannatay ti makitkita nga organisasion ni Jehova nga ikabiltay dagiti nadiosan nga intereses iti sentro ti panagbiagtayo. Ti di agbalbaliw a tignay iti kasta a pammagbaga pagtalinaedennatayo a makiaddang iti organisasion ti Dios ket ipangpangrunana ti sagrado a ministeriotayo a nangatngato ngem ti rutina, ti mekanikal. Pudno unay, dagiti tattao ni Jehova a sangsangkamaysa iparangarangda ti naisalsalumina a debosion. Ti pasettayo kas indibidual isut’ panangtaginayon ti napardas a pannakidanggay.
Naipapuso dagiti Sasao ti Dios
11. Aniat’ ulidan nga impasdek ni Ezequiel no maipapan ti sasao ti Dios?
11 Nangipasdek met ti nasayaat nga ulidan ni Ezequiel babaen panangipapusona kadagiti sasao ti Dios. Kas naibilin, kinnanna ti inted-Dios a rolio, wenno lukot. “Ket adda iti ngiwatko a kas iti diro ti kinasam-itna,” kinuna ni Ezequiel. Nupay ti lukot ket napno kadagiti “un-unnoy ken sangsangit ken ay-ay-ay,” daytat’ nasam-it ken Ezequiel agsipud ta inapresiarnat’ dayaw a mangirepresentar ken Jehova. Maysa a nasam-it a kapadasan para iti mammadto ti panangitungpal ti inted-Dios nga annongenna. Kinuna ti Dios kenkuana: “Anak ti tao, dagiti amin a sasao a sawekto kenka, awatem ita pusom ket imdengam kadagita pagdengngegmo.” (Ezequiel 2:9–3:3, 10) Dagidiay a sirmata pinagbalinna ni Ezequiel a sipapanunot iti kasta unay no ania ti impalubos ti Dios a pakiramananna ken pinatibkerna ti pannakirelasionna ken Jehova.
12. Aniat’ inaramid ni Ezequiel iti nasursurok ngem dua a dekada ti serbisio ti kinamammadto?
12 Naikkan ni Ezequiel kadagiti sirmata ken mensahe agpaay iti nagduduma a pangpanggep ken managdengngeg. Masapul a siaannad a dumngeg ket kalpasanna agsao ken agtignay kas naisuro. Naipanayag kenkuana a progresibo dagiti baro nga impormasion ken pampamay-an kabayatan ti agarup 22 a tawen ti serbisio ti kinamammadto. No dadduma nagsao ni Ezequiel iti naisangsangayan pannakabalikasna a mensahe. Kadagiti sabali pay a tiempo, isut’ nagusar ti pantomime (panangipakaammot’ mensahe babaen panaggunay ti bagi wenno rupa), kas ti panagiddana iti sango ti maysa a baldosa a mangisimsimbolo ti Jerusalem. (Ezequiel 4:1-8) Ti ulidanna kadagiti personal a bambanag, kas ti tignayna iti ipapatay ti asawana, naglaon met ti mensahe. (Ezequiel 24:15-19) Isut’ masapul a makibagay iti agdama, a kankanayon nga ipresentarna ti umiso a mensahe ken alaennat’ umiso a panagtignay iti umiso a tiempo. Ni Ezequiel naigalut iti nasinged, progresibo a panagtrabaho a pannakirelasion ken Jehova.
13. Kasano a maibangontayo ti nasinged a pannakirelasion ken Jehova?
13 Umas-asping, tapno maibangon ken mataginayon ti nasinged a pannakirelasion ken Jehova kas padana nga agobra, masapul nga ipapusotayo ti Sao ti Dios. (1 Corinto 3:9) Ti pannakidanggay nga agabante a kadua ti makitkita nga organisasion ni Jehova iti daytoy a banag kasapulanna a makigiddantayo iti panagayus ti naespirituan a taraon a maipapaay iti umiso a tiempo. (Mateo 24:45-47) Ti “nadalus a pagsasao” ket agtultuloy a lumawlawa. (Sofonias 3:9) No laeng makigidgiddantay iti panawen a mabalinantay ti sumungbat a situtulnog iti panangidalan ti Nakasakay ti Karuahe.
14, 15. Ania a rutina ti kasapulan iti panangtaginayon ti panagdadanggay nga impasdek ti organisasion ti Dios?
14 Iti dayta a kalat, kasapulantayo ti nasayaat a rutina ti personal a panagkararag, pribado a panagadal, ken pannakiraman iti nasantuan a ministerio iti naimbag a damag. (Roma 15:16) Lagipenyo ti ulidan ni Ezequiel iti pannanganna ti lukot a naglaon ti mensahe ti Dios. Kinnan ni Ezequiel ti intero a lukot, saan a paset dayta. Dina innala ken pinili ti sangkabassit a mabalin a nasaysayaat iti personal a panagramanna. Umas-asping, ti personal a panagadaltayo ti Biblia ken dagiti Nakristianuan a publikasion naiyurnos koma tapno makigiddantayo a sipapardas iti panagayus ti naespirituan a taraon, ket makiramantay koma iti amin a naidiaya iti naespirituan a lamisaan, agraman nauuneg a kinapudno.
15 Mangar-aramidtay kadi ti nainkararagan a panagregget tapno maalatay ti anag ti nakired a taraon? Ti pannakigiddan a sipapardas sapulenna a ti pannakaamo ken pannakaawattayo ket iti labes koma ti pagdamdamuan a sursuro, ta mabasatayo: “Ta tunggal maysa a mangaramat iti gatas awan padpadasna iti sao ti kinalinteg, ta isu maysa nga ubing. Ngem ti taraon a nakired maipaay kadagiti tattao a nataenganen, dagidiay a gapu iti pannakaasaasda dagiti riknada nairuamdan a mangilasin ti naimbag ken dakes.” (Hebreo 5:13, 14) Wen, ti panangaramid ti naespirituan a panagrang-ay ket nasken a paset iti panangtaginayon ti napardas a panagdadanggay nga impasdek ti organisasion ti Dios.
Di Malappedan iti Kinaawan Interes
16, 17. Kasano a nakibagay ni Ezequiel iti kinaawan interes, pananguy-uyaw, ken kinaawan tignay?
16 Nangipasdek met ni Ezequiel ti nasayaat nga ulidan babaen panagtulnog ken di panangpalubos iti bagina a lappedan ti kinaawan interes wenno pananguy-uyaw. Umas-asping, babaen pannakidanggay iti panagrang-ay ti nadalus a pagsasao, mabalintay ti maitunos iti direksion nga innala ti naarian a Nakasakay ti Karuahe. Gapuna nakabalantayo nga agtungpal kadagiti bilinna, mapapigsa tapno di malappedan babaen ti kinaawan interes wenno pananguy-uyaw dagidiay a pangibagaantayo ti mensahe ti panangukom ni Jehova. Kas ken Ezequiel, pinakdaarannatay nga immun-una ti Dios a dadduma a tattao bumusordanto, a natangken panagul-ulo ken panagpuspusoda. Dadduma didanto dumngeg agsipud ta dida kayat ti agimdeng ken Jehova. (Ezequiel 3:7-9) Kaskasdi dadduma managinsisingpetdanto, kas kunaen ti Ezequiel 33:31, 32: “Ket umayda kenka, a kas ti iyaay ti umili, ket agtugawda iti sanguanam a kas ti ilik; ket denggenda dagiti saom ngem saanda ida a tungpalen, ta kadagiti ngiwatda iyebkasda dagiti naderrep a tartarigagay ket ti pusoda mapan a sumurot iti gunggonada. Ket, adtoy! maipaay kadakuada sika ti kas naimnas a kansion, ti maysa nga addaan makaay-ayo a timekna ken makatokar a naimbag iti pagtokaran. Ta mangngegda dagiti saom, ngem saanda ida a tungpalen.”
17 Anianto ti ibungana? Inayon ti Eze 33 bersikulo 33: “Ket intono daytoy mapasamak—adtoy! umay—mabigbigdanto nga adda idi mammadto iti nagtengngaanda.” Dagidiay a sasao ipanayagda a ni Ezequiel di simmuko gaput’ kinaawan sungbat. Ti kinaawan interes dagiti dadduma di namagbalin kenkuana a managaleng-aleng. Dumngeg man dagiti tattao wenno saan, nagtulnog iti Dios ket riningpasna ti trabahona.
18. Ania a salsaludsod ti mabalin a maisaludsodyo iti bagbagiyo?
18 Ti makitkita nga organisasion ni Jehova iwarwaragawagnan nga ad-adda pay nga amin koma ket agbutengda iti Dios ken dayawenda. Agib-ibturkay kadi no babalawendakayo gaput’ panangalayo ti natured a takder iti panangted pammaneknek iti Pagarian, iti panagbalinyo a naimbag iti estilo ti panagbiagyo? Agtaktakderkayo kadi a sititibker no dakayo ti puntiria ti panangpilpilit gaput’ diyo panangawat ti dara, saan a panagdayaw kadagiti emblema ti pagilian, saan a panangrambak kadagiti nailubongan a pipiesta?—Mateo 5:11, 12; 1 Pedro 4:4, 5.
19. No maipapan ti panangidalan, aniat’ aramidentayo no makidangdanggaytayo a sipapardas a kadua ti nailangitan a karuahe ni Jehova?
19 Daytoy a kurso ket di nalaka, ngem dagidiay agibtur aginggat’ panungpalan maisalakandanto. (Mateo 24:13) Babaen tulong ni Jehova, ditayto palubosan dagiti tattao ti lubong a pagbalinendatayo a kas kadakuada ket ipanawdatayo iti pannakidanggay a sipapardas iti nailangitan a karuahe ni Jehova. (Ezequiel 2:8; Roma 12:21) No makidangdanggaytayo a sipapardas iti kasla karuahe nga angheliko nga organisasion, alistotayto nga agtungpal kadagiti panangidalan ken panangisuro nga inawat babaen ti makitkita nga organisasion ti Dios. Ipaay ni Jehova no aniat’ kasapulantayo tapno masaranget dagiti panangatake iti pammatitayo, tapno mataginayontay ti panangpetpettayo iti Sao ti Dios, ken tapno agtalinaed a sikikita dagiti matatayo kadagiti naespirituan a kinapudno a naisentro iti Naarian a Nakasakay ti nailangitan a karuahe.
Natignay tapno Makidanggay a Sipapardas
20. Aniat’ sumagmamano a bambanag nga inrekord ni Ezequiel a mangtignay koma kadatayo a makidanggay a sipapardas?
20 Ti sirmata ni Ezequiel tignayennatay koma a makidanggay a sipapardas. Saanna laeng nga inwaragawag ti panangukom ti Dios iti Israel ngem inrekordna pay dagiti padto ti pannakaisubli. Intudo ni Ezequiel Daydiay maaddaan ti legal a kalintegan nga agari iti trono ni Jehova iti naituding a panawen. (Ezequiel 21:27) Ti Naarian nga Adipen, ni “David,” tiponennanto manen dagiti tattao ti Dios ket ipastoranna ida. (Ezequiel 34:23, 24) Nupay gubatento ida ni Gog ti Magog, ispalento ida ti Dios, ket dagiti kabusorna mapilitandanto a ‘mangammo ken Jehova’ uray agturongdan iti pannakadadael. (Ezequiel 38:8-12; 39:4, 7) Kalpasanna tagiragsakenton dagiti adipen ti Dios ti awan patinggana a biag iti maysa a sistema ti nadalus a panagdayaw nga iramanna ti naespirituan a templo. Dagiti danum ti biag nga agayus manipud santuario isudantot’ gubuayan ti pannakataraon ken pannakaagas, ket maysa a tawid a daga mabingayto agpaay pakabendisionanda.—Ezequiel 40:2; 47:9, 12, 21.
21. Apay a ti akem ti moderno-aldaw a Saksi ni Jehova dakdakkel ngem ken ni Ezequiel?
21 Anian a panagrag-o ni Ezequiel a nangirekord kadagidiay a padto! Kaskasdi, dakdakkel pay ti akem dagiti moderno-aldaw a Saksi ni Jehova. Agbibiagtayon iti tiempo a dadduma kadagidiay a padto matungtungpaldan. Kinapudnona, aktibo a makiramramantayo kadagiti sumagmamano a kaitungpalan. Babaen iti wagas ti panagbiagtayo, ipakpakitatayo kadi kas indibidual ti napigsa a pammatitayo a ni Jesus agturturayen kas Daydiay addaan legal a kalintegan? Kumbinsidotayo kadin a mismo nga iti mabiiten santipikarenton ni Jehova ti bagina ket ispalenna iti baro a lubongna dagidiay a makidangdanggay a sipapardas iti organisasionna? (2 Pedro 3:13) Ti kasta a napigsa a pammati, a napakuyogan kadagiti aramid ti pammati, iparangarangna a pudno a makidangdanggaytayo nga agabante a kadua ti nailangitan a karuahe ni Jehova.
Itultuloy ti Makidanggay nga Agabante
22. Aniat’ maaramidan tapno maliklikan dagiti pakasingaan tapno mataginayon ti nalawag a naespirituan a panagmatmat?
22 Kas ‘umig-iggem iti arado,’ masapul a ditay koma tumaliaw a sigagagar iti aniaman a banag nga idiaya ti lubong. (Lucas 9:62; 17:32; Tito 2:11-13) Gapuna parmekentayo ti aniaman a pagannayasan nga agurnong kadagiti gameng ditoy daga, ket pagtalinaedentay a simple dagiti matatayo, a sikikita iti Pagarian. (Mateo 6:19-22, 33) Ti panamagbalin a simple ti panagbiagtayo, nga ikkaten dagiti nailubongan a dadagsen sadinoman a posible, tulongannatayto a makidanggay a sipapardas iti organisasion ni Jehova. (Hebreo 12:1-3) Dagiti pakasingaan pagkudrepenna ti sirmatatayo ti nailangitan a karuahe ken ti Nakasakay kenkuana. Ngem babaen tulongna, mataginayontayo ti nalawag a naespirituan a panagmatmat, kas inaramid ni Ezequiel.
23. Aniat’ kasapulan nga aramiden dagiti matalek a Saksi iti pagimbagan dagiti kabbaro?
23 Ti paset ti responsabilidadtayo kas Saksi ni Jehova iramanna ti panangtulong kadagiti adu a kabbaro a makidanggay a sipapardas iti nailangitan a karuahe ti Dios. Idi 1990 agangay 10,000,000 ti timmabuno iti Memorial ti ipapatay ni Jesu-Kristo. Nupay adu kadagitoy nga indibidual tumabtabunodan ti sumagmamano a Nakristianuan a gimong, kasapulanda a makita ti kinapateg ti panagrang-ay a kadua ti makitkita nga organisasion ni Jehova. Kas dagiti matalek a Saksi, matulongantay ida babaen ti espiritu nga intay ipakita ken ti intay ited a pammaregta.
24. Aramidentay koma ti ania kadagitoy kangitingitan a panawen?
24 Dagitoyen dagiti kangitingitan a panawen. Babaen matmata ti pammati, nakitatayon ti nailangitan a karuahe a nagsardeng iti sanguanantayo. Ti naarian a Nakasakay ti Karuahe inikkanna ti makitkita nga organisasionna ti trabaho a panangaskasaba kadagiti nasion tapno, iti pagnguduan, maammuandanto no siasino ni Jehova. (Ezequiel 39:7) Aramidenyo ti kasasayaatan itoy naindaklan a gundaway a makiraman iti panangalangon ti kinasoberano ti Dios ken ti pannakasantipikar ti nasantuan a naganna babaen ti pannakidanggay nga agabante a kadua ti nailangitan a karuahe ni Jehova.
Kasanot’ Panangsungbatyo?
◻ Impasdek ni Ezequiel ti ania nga ulidan no maipapan ti trabahona?
◻ Aniat’ kaipapanan ti pannakidanggay nga agabante a kadua ti organisasion ti Dios?
◻ Kasanot’ panangmatmat ni Ezequiel ti sasao ni Jehova?
◻ Kasanotay a suroten ti ulidan ni Ezequiel iti pannakibagay iti kinaawan interes?
◻ Ania komat’ mangtignay kadagiti adipen ni Jehova a makidanggay nga agabante a kadua ti nailangitan a karuahena?
[Dagiti ladawan iti panid 15]
Aniat’ kasapulan tapno makidanggay nga agabante a kadua ti nailangitan a karuahe ni Jehova?
[Ladawan iti panid 16]
Inapresiar ni Ezequiel dagiti inted-Dios a pribilehiona. Kastakayo kadi?