Agtalinaed a Nabileg iti Pammati!
Dagiti Tampok Manipud Umuna a Pedro
DAGITI Saksi ni Jehova sangsanguenda dagiti nadumaduma a pakasuotan, wenno pakasubokan ti pammatida. Kadagiti sumagmamano a dagdaga, ti trabahoda a panangikasaba ti Pagarian maar-aramid iti sidong ti nakaro a pannakaidadanes. Iti likudan amin dagitoy ken dadduma pay a panagregget a mangdadael ti relasionda iti Dios ket isu ni Satanas a Diablo. Ngem saanto nga agballigi, ta ni Jehova patibkerenna dagiti ad-adipenna—wen, nabileg iti pammati.
Ni apostol Pedro naaddaan pribilehio a ‘mangpabileg kadagiti kakabsatna’ a “napagladingit gapu kadagiti nadumaduma a pannakasulisog.” (Lucas 22:32; 1 Pedro 1:6, 7) Inaramidna a kasta iti umuna a suratna, a naisurat idi agarup 62-64 K.P. manipud Babilonia. Iti dayta ni Pedro binalakadanna, liniwliwana ken pinaregtana dagiti Kristiano a Judio ken Gentil, a tinulonganna ida a mangsaranget kadagiti panangraut ni Satanas ken agtalinaed a “nabileg iti pammati.” (1 Pedro 1:1, 2; 5:8, 9) Itan ta ti Diablo bassiten ti tiempona ken nakasiksikap unay dagiti irarautna, sigurado a dagiti tattao ni Jehova magunggonaanda manipud napaltiingan a sasao ni Pedro.
Panagbiag a Naibatay iti Nadiosan a Prinsipio
Nailangitan man wenno naindagaan ti namnamatayo, dayta koma ti mangtulong kadatayo nga agibtur kadagiti pakasuotan ken agtignay iti nadiosan a wagas. (1:1–2:12) Ti namnama iti maysa a nailangitan a tawid pagrag-oenna dagiti napulotan iti sidong dagiti pakasuotan, a pudno a pakagugoran ti pammatida. Kas maysa a naespirituan a balay a naibangon iti pammuon ni Kristo, agidatonda kadagiti naespirituan a datdaton a makaay-ayo iti Dios ken pataknengenda dagiti panagbibiagda a pakaidayawan ti Dios.
Ti pannakilangentayo kadagiti padatayo a tattao mayannurot koma kadagiti nadiosan a prinsipio. (2:13–3:12) Impakita ni Pedro nga agpaituraytay koma kadagiti natauan nga agtuturay. Dagiti ad-adipen agpaiturayda kadagiti appoda, dagiti babbai kadagiti assawada. Ti nadiosan a kababalin ti maysa a Kristiano nga asawa a babai mabalin nga iturongna ti saan a manamati nga asawana iti pudno a pammati. Ket ti maysa a manamati nga asawa a lalaki ‘padayawanna koma ti asawana kas iti baso a narasrasi.’ Amin a Kristiano ipakitada koma ti panagmaymaysa iti rikna, maaddaan nainkakabsatan a panagdidinnungngo, aramiden ti naimbag, ken surotenda ti talna.
Ti Panagibtur Mangipaay kadagiti Bendision
Ti panagibtur dagiti pudno a Kristiano iti rigat ibungananto dagiti bendision. (3:13–4:19) No agsagabatayo maigapu ti kinalinteg, naragsaktay koma. Mainayon pay, yantangay nagsagaba ni Kristo iti lasag tapno iturongnatay iti Dios, saantayo koman nga agbiag a maigapu kadagiti nainlasagan a tartarigagay. No ibturantayo dagiti pakasuotan a simamatalek, makiramantayto iti dakkel a panagrag-o iti pannakaipanayag ni Jesus. Ti pannakaumsi gaput’ nagan ni Kristo, wenno kas ad-adalanna, paragsakennatayo koma agsipud ta paneknekanna nga adda kadatayo ti espiritu ni Jehova. Gapuna bayat nga agsagabatayo a maitunos iti pagayatan ti Dios, italektayo dagiti bagbagitayo kenkuana ken itultuloy nga aramiden ti naimbag.
Kas Kristiano, kasapulan nga aramidentayo dagiti annongentayo a simamatalek ken agpakumbabatayo iti mannakabalin nga ima ti Dios. (5:1-14) Dagiti panglakayen masapul nga ipastoranda ti arban ti Dios a situtulok, ket amintayo itaklintay koma dagiti pakadanagantayo ken Jehova, a bigbigentayo nga isut’ pudno a maseknan kadatayo. Kasapulantayo met a busoren ti Diablo ket saantayo a maup-upay, ta dagiti kakabsattayo sagabaenda met dagiti isu met laeng a pakarigatantayo. Kankanayontay koma a laglagipen a ni Jehova a Dios patibkerennatayo ken pagtalinaedennatayo a nabileg iti pammati.
[Kahon/Ladawan iti panid 30]
Arkos dagiti Babbai: Kas balakad kadagiti Kristiano a babbai, ni Pedro kinunana: “Ti arkosyo saan koma a ti arkos iti ruar, ti panagsallapid ti buok ken ti panangikapet kadagiti alahas a balitok wenno ti naarkos a pagan-anay, ngem ti tao a makin-uneg iti puso maarkosan iti kawes a mataginayon ti maysa a nakem a naemma ken natalna, isu a dakkel ti pategna iti imatang ti Dios.” (1 Pedro 3:3, 4) Kabayatan ti umuna a siglo K.P., dagiti pagano a babbai masansan addaanda kadagiti naarte nga estilo ti buok a sallapidenda dagiti atiddog a buokda kadagiti napammarang a disenio ken arkosanda iti balitok dagiti sinallapid a buokda. Mabalbalin, adu dagiti nagaramid iti kasta a kas pammalangguad—banag a saan a Nakristianuan. (1 Timoteo 2:9, 10) Nupay kasta, saan nga amin a pagarkos ket di umiso, ta inraman ni Pedro ti “panagkawes iti makinruar a pagan-anay”—nalawag a maysa a kasapulan. Nagusar met dagiti ad-adipen ti Dios kadagiti alahas idi ugma. (Genesis 24:53; Exodo 3:22; 2 Samuel 1:24; Jeremias 2:32; Lucas 15:22) Nupay kasta, ti maysa a Kristiano a babai nainsiriban a liklikanna dagiti naparammag nga arkos ken naderrep a panagkawkawes ken naannad koma a ti panagusar kadagiti kosmetiko ket maiparbeng. Ti kayat a sawen ti apostoliko a balakad ket ti maysa a babai ipangpangrunana koma, saan a ti makinruar, no di ket ti makin-uneg a pagarkos. Tapno pudpudno a makaay-ayo, agkawes koma a sieemma ken addaan iti panagpampanunot ti maysa nga agbuteng iti Dios.—Proverbio 31:30; Mikias 6:8.
[Credit Line]
Israel Department of Antiquities and Museums; Israel Museum/David Harris