Ti Panangbiruk ti Sangatauan iti Dios

APAY, kas Saksi ni Jehova, a naited kadatayo ti “nadalus a pagsasao”? Sigurado, saan a tapno tagikuaentay a kabukbukodan dayta. Ket saan met a tapno tagiragsakentayo ti nanam-ay nga estilo ti panagbiag nga umasping iti nakapuy, mannakikompromiso a tigtignay ti Kakristianuan. Imbes ketdi, dayta ket tapno ‘amin awaganda koma ti nagan ni Jehova, tapno agserbida a situtunos kenkuana.’ (Sofonias 3:9) Wen, ti nadalus a pagsasao iramanna ti panagtrabaho a situtunos kadagiti minilion a Kristiano a kakabsattayo a lallaki ken babbai​—manipud amin a rasa, nasion, ken pagsasao​—a simamatalek a mangikaskasaba ti naimbag a damag sakbay a dumteng ti panungpalan.​—Marcos 13:10; Roma 13:11; Apocalipsis 14:6, 7.

Ti panangaskasabatayo itatta no dadduma mangisango kadagiti karkarna a karit. Apay a kasta? Kabayatan daytoy maika-20 a siglo, adda reprep a panagalis dagiti tattao gapu ti gubgubat, pannakairurumen, rigat ti ekonomia, ken gaput’ sabsabali pay a rason. Kas imbungana, dagiti tattao iti adu a pagsasao ken relihion immakarda kadagiti kultura a naiduma iti bukodda a kultura. Gapuna, dadakkel a komunidad dagiti Hindu, Budista, ken Muslim immakarda iti Akinlaud a lubong. Bayat nga iranudtayo ti nadalus a pagsasao iti binalay-balay, masabattayo dagitoy a tattao. No dadduma marirotayo agsipud ta nagbassitan ti ammotayo iti narelihiusuan a nalikudanda. Aniat’ maaramidantayo iti dayta?​—Idiligyo ti Aramid 2:5-11.

Kasanotay nga iranud ti kinapudno iti maysa a Muslim wenno Judio? Kasanot’ pannakaigiddiat ti maysa iti sabali? Ania a talaga ti pammati ti Hindu? Apay a dagiti Sikh agisuotda ti turbante? Ania ti nasantuan a libroda? Kasano a naiduma ti Budista manipud Hindu? Aniat’ pammati dagiti Shintoista a Hapones? Mamatpati kadi iti Dios dagiti Taoists nga Insik wenno Confucianista?a Kasanot’ pannakaigiddiat ti Orthodox a Judio manipud Repormado a Judio wenno Konserbatibo a Judio? Tapno madanon daytoy dakkel a panagduduma dagiti tattao, umuna amin masapul a matarusantay ti punto de vistada ket kalpasanna ammuen no kasanotay nga iturong ida iti pudno a Dios, ni Jehova, iti naasi ken naintaktikaan a pamay-an.​—Aramid 17:22, 23; 1 Corinto 9:19-23; Colosas 4:6.

Tapno matulongantay a maaddaan ti nalawlawag a pannakaawat iti dadduma a relihion, dagiti sursuroda, ken dagiti historikal a nalikudanda, ti Watch Tower Society inruarna kabayatan dagiti 1990 a “Nadalus Pagsasao” a Kumbension iti intero a lubong ti baro a publikasion a napauluan Ti Panangbiruk ti Sangatauan iti Dios. Nakabalan iti daytoy nga instrumento, nalalaingtayto a mangaskasaba kadagiti tattao iti di-Kristiano a lubong kasta met kadagidiay adda iti Kakristianuan.

Maysa a Praktikal nga Instrumento

Daytoy 384-panid a libro naglaon ti 16 a kapitulo a mangisalaysay ti historia ti panagsapsapul ti sangatauan iti Dios iti napalabasen nga innem a ribo a tawtawen. Sungbatanna ti ginasgasut a salsaludsod maipapan kadagiti relihion ti lubong. Adtoy ti pangarigan ti sumagmamano kadagita: Ania dagiti bambanag a masansan mangdeterminar ti relihion ti maysa a tao? Apay awan dakdakesna a sukimaten ti dadduma a pampammati? Ania dagiti pagaspingan ti Romano Katolicismo ken Budismo? Aniat’ akem ti mitolohia iti adu a relihion? Apay mamati ti adu a tattao iti salamangka, espiritismo, ken astrolohia? Apay nakaad-adu ti dios ken diosa dagiti Hindu? Kasanot’ pannakaigiddiat dagiti Sikh kadagiti Hindu? Asino ni Buddha, ken aniat’ insursurona? Apay a ti Shinto kangrunaanna maysa a relihion a Hapones? Apay a dagiti Judio addaandat’ insao kasta met ti naisurat a linteg? Kasanotay nga ammo a ni Kristo ket saan a sarsarita laeng? Kasano a ti Koran naiduma iti Biblia? Apay a kunaen dagiti Katoliko a ni Pedro ti immuna a papa? Apay a simmina ni Katoliko a padi a Luther manipud Iglesia Katolika Romana?

Nganngani awan inggana ti salsaludsod, ket daytoy a publikasion ipempenna dagiti sungbat tapno mas epektibotay iti panangaskasaba kadagiti tattao nga addaan kadagitoy nagduduma a narelihiusuan a nalikudan. Bigbigen ti libro nga adu a tattao addaanda ti kabukbukodan a relihion kasta met a ti relihion ket personal a banag. Kaskasdi, idiay panid 8, kunana: “Bale manipud pannakayanaktayo impaagsep dagiti nagannak ken kakabagian dagiti relihiuso ken moral nga ideya iti isiptayo. Kas resultana, masansan a surotentayo dagiti relihiuso a kapanunotan dagiti nagannak ken appotayo.” Kaipapananna dayta a “kaaduanna impiliandatayo iti relihiontayo. Nagpannuray latta daytan iti lugar ken tiempot’ pannakayanaktayo.”​—Idiligyo ti Filipos 3:4-6.

Ti libro pataudenna ngarud ti nainkalintegan a saludsod. “Rasonable kadi nga ipapan a ti relihion a naipilit kadatayo idi mayanaktayo talaga nga isut’ interamente a kinapudno?” Gapuna, tunggal tao ket maparegta a mangusig iti dadduma a relihion nga addaan silulukat nga isip. Kas naikuna idiay panid 10: “Ti pannakatarus ti punto de vista ti sabali a tao agturong iti nabagbagas a komunikasion ken panagsasarita dagidiay nagdudumat’ pammatida.” Itultuloyna: “Pudno, dagiti tao napalalot’ panagsusuppiatda gaput’ relihiuso a pammatida, ngem awan gapu a guraentayo ti maysa maipuon la ta nagpaiduma ti punto de vistana.”​—Mateo 5:43, 44.

Maysa a pamunganayan a saludsod a rumsua iti intero a libro ket, Adda aya di matay a kararua iti tao a makalasat ti ipapatayna ken agturong idiay sabali a biag? Iti nagduduma a langa, nganngani amin a relihion isursuroda dayta a kapanunotan. Kas kunaen Ti Panangbiruk ti Sangatauan iti Dios (panid 52): “Gaput’ panangbirukna iti Dios, pinetpetan ti tao uray eppes a pammati, ket naulaw gaput’ arapaapna iti imortalidad. . . . Ti pammati iti imortal a kararua wenno umarngi iti dayta isut’ naipatawid kadatayo bayat dagiti milenio.” Dagiti dadduma pay a saludsod ket: Adda kadi lugar nga impierno a pakatutuokan dagiti kararua? Ania ti pudno a namnama dagiti natay? Maymaysa kadi ti Dios, wenno adu kadi ti dios?​—Genesis 2:7; Ezequiel 18:4.

Pakaibatayan ti Panangyadal ti Biblia

Iti kronolohikal nga urnos ti itataudda iti buya ti lubong, ti libro salaysayenna ti panagrang-ay dagiti kangrunaan a relihion ti sangatauan​—Hinduismo, Budismo, Taoismo, Confucianismo, Shinto, Judaismo, Kinakristiano, Kakristianuan, ken Islam. Iti tunggal kapitulo dagiti nasantuan a libro dagitoy a relihion nakutarda tapno asinoman a napasnek a manamati mausigna a mismo dagiti nakutar. Para ti kapitulo iti Islam, nausar dagiti tallo a nagduduma a patarus ti Koran iti Ingles. Ti kaudian a patarus ti Jewish Publication Society iti Tanakh​—A New Translation of Holy Scriptures ket nakutar iti kapitulo ti Judaismo.​—Idiligyo ti Aramid 17:28; Tito 1:12.

Ania met ti agpaay kadagiti ateista ken agnostiko? Ti kapitulo 14 salaysayenna ti moderno a di panamati iti Dios ken no apay a dagiti Saksi ni Jehova ammoda nga adda ti Dios. Iti tunggal kapitulo, ti managbasa maiturong iti Biblia. Gapuna, iti panangusar daytoy publikasion, Ti Panangbiruk ti Sangatauan iti Dios, nasaysayaat pannakakabaltayo a mangirugi ti panangyadal ti Biblia kadagiti tattao iti tunggal pammati wenno kadagidiay agkunkuna nga awan pammatida. Tratuenna ti tunggal relihion a sirerespeto ken sitataktika, ngem pataudenna dagiti salsaludsod a mangiturong ti maysa a tao ken Jehova ken iti kinapudno. Kadagidiay sipapasnek a mangbirbiruk iti Dios, daytoy a libro ket pudnonto a bendision.​—Salmo 83:18; Juan 8:31, 32; 2 Timoteo 3:16, 17.

Dagiti makaisuro a kahon nairamanda iti tunggal kapitulo. Kas pangarigan, idiay panid 226 ken 227, adda kahon iti “Judaismo​—Relihion nga Addaan Nadumaduma a Timek” a mangilawlawag kadagiti kangrunaan a dibision a masarakan iti pammati a Judaismo. Iti sidong ti “Hinduismo​—Panangbiruk ti Pannakaluk-at,” adda kahon idiay panid 116 ken 117, “Hinduismo​—Sumagmamano a Dios ken Diosa.” Mangted daytoy ti listaan ti sumagmamano laeng kadagiti nasurok a 330 a milion a didiosen a daydayawen dagiti Hindu. Mamati kadi dagiti Budista iti Dios kas pannakaawat ti Akinlaud a lubong iti dayta a termino? Ti kahon a “Budismo ken ti Dios” idiay panid 145 sungbatanna dayta a saludsod. Ti libro addaan met ti praktikal nga indese a maipaay ti nadaras a pagreperensiaan kadagiti kangrunaan a tema. Ti bibliograpia dagiti prinsipal a gubuayan a nausar iti panagsirarak ket pakaibatayan met ti kanayonan a panangbasa no ti maysa tarigagayanna ti ad-adu pay a detalye.

Ti libro addaan ti nasurok a 200 a retrato ken ladladawan, ngem dagitat’ saan a basta pangpapintas laeng. Tunggal ladawan ket addaan makaisuro a punto a mangipaay kanayonan a panangilawlawag iti relihion a mapagsasaritaan. Kas pangarigan, idiay panid 238 adda agsasaruno a retrato a mangiladawan ti dadduma kadagiti pangngarig nga insuro ni Jesus. Iti sabali pay a paset, adda agsasaruno a lima a retrato a mangiladawan ti nagduduma nga aspeto ti ministerio ni Kristo​—dagiti milagrona, ti panagbalbaliw langana, ti sakripisio ti ipapatayna, ken ti panangbilinna kadagiti adalanna a mangaskasaba iti amin a lubong.

Idiay panid 289 adda agsasaruno a retrato a makapainteres kadagiti Muslim. Ipanna ti managbuya idiay Mecca, idiay dakkel a moske a pakasarakan ti Kaaba ken kalpasanna iti aktual a nangisit a bato a daydayawen dagiti Muslim. Ti nagduduma a panagdayaw iti Budismo nailadawan idiay panid 157. Paginteresanto met a kitaen dagiti Hindu ti retretrato dagiti nalatak a diosda a Ganesa ken Krishna idiay panid 96 ken 117.

Napagkonsultaran dagiti kualipikado a Kristiano a ministro iti intero a lubong tapno magun-odan ti espesialisado nga iyaadani iti tunggal kangrunaan a relihion. Kas pangarigan, naggapu manipud Israel dagiti napateg a material para kadagiti kapitulo iti Judaismo ken ti pammati a Baha’i. Siaannad nga inusig dagiti Saksi iti pagpagilian a Muslim dagiti linaon ti kapitulo iti Islam. Ti napateg a panangilawlawag kadagiti Hindu, Sikh, ken Jain naggapu manipud India. Sinigurado dagiti ministro iti Dumaya a ti kapitulo iti Shinto ket umiso, ken nangtedda met ti balakad maipapan ti Budismo, Taoismo, ken Confucianismo.

Gaput’ naannad a panangsaklaw ti libro ti tunggal relihion, dagidiay addaan iti dayta iti pagsasaoda makairugidanto kadagiti panangyadal ti Biblia iti kapitulo a mayanatup iti narelihiusuan a nalikudan ti tunggal tao. Kalpasanna mabalin a kayatdanto ti umakar iti kapitulo maipapan ti itataud ti umuna a Kinakristiano ken dagiti rason iti panamati a ni Kristo isut’ pudno a Pannakabagi ti Dios, ti nausar a mangiyadani ti sangatauan iti Dios. Addada kapitulo a mangilawlawag no kasano a dimteng ti apostasia, a nangibunga ti adu a dibision ken sekta iti Kakristianuan. Ti maudi a dua a kapitulo ipakitada no kasano a naipasubli ti pudno a panagdaydayaw kadagiti maudi nga al-aldaw ken no ania ti adda iti mabiiten a masanguanan agpaay iti Babilonia a Dakkel, ti sangalubongan nga imperio ti ulbod a relihion ni Satanas. Kalpasan dayta, naitampok ti baro a lubong ken namnama ti Biblia iti panagungar.​—Juan 5:28, 29; 12:44-46; 14:6; Apocalipsis 21:1-4.

Pudno a matulongan daytoy a publikasion ti adu iti intero a lubong nga umadani iti Dios, kas kinuna ni Santiago iti kapitulo 4 ti suratna, iti San 4 bersikulo 8: “Umadanikayo iti Dios, ket isu umasidegto kadakayo. Dalusanyo dagiti im-imayo, dakayo a managbasol, ket guguranyo dagiti puspusoyo, dakay a nagkadua ti nakemyo.” Wen, kas kunaen ni Isaias: “Sapulenyo ni Jehova, dakayo a tattao, ita ta masarakan pay. Umawagkayo kenkuana ita ta asideg pay.”​—Isaias 55:6; Juan 6:44, 65.

Sapay koma ta amintayo agtultuloy a maiturong iti umiso a direksion, nga agturong iti Soberano nga Apo ti uniberso, ni Jehova a Dios. Ken babaen ti tulong daytoy a publikasion, Ti Panangbiruk ti Sangatauan iti Dios, tulongantayo dagiti rinibribo pay nga agdayaw ken Jehova “iti espiritu ken kinapudno.” (Juan 4:23, 24) Sapay koma ta agtultuloytayo a mangsapul kadagiti agbirbiruk ti kinapudno ken ibaga kadakuada ti maipapan ti Dios ti kinapudno, ta, pudno unay, isut’ masarakan pay!

[Footnote]

[Dagiti ladawan iti panid 17]

Biniruk ti tao ti Dios iti adu a pamay-an

[Ladawan]

Dagiti napasnek a Katoliko agturongda ken Maria

[Ladawan]

Dagiti Hindu agdaydayawda iti karayan ti Ganges

[Credit Line]

Harry Burdich, Transglobe Agency, Hamburg

[Ladawan]

Dagiti napeklan a Judio agus-usarda ti supot dagiti lukot ti kararag

[Credit Line]

GPO, Jerusalem

[Ladawan]

Dagiti lallaki a Muslim agperegrinoda idiay Mecca

[Credit Line]

Camerapix

[Ladawan]

Adu ti agdaydayaw ken Buddha

[Dagiti ladawan iti panid 18]

Nagusar ni Jesus kadagiti pangngarig tapno matulongan dagiti tattao a mangsapul ti pudno a Dios

[Credit Line]

Pictorial Archive (Near Eastern History) Est.

[Credit Line]

Pictorial Archive (Near Eastern History) Est.

[Credit Line]

Pictorial Archive (Near Eastern History) Est.