Magnakayo kas Pada a Katulongan iti Kinapudno
Dagiti Tampok Manipud Maikadua ken Maikatlo a Juan
TI PANNAKAAMMO iti kinapudno ket maysa a pakailasinan a tanda dagiti managdaydayaw ken Jehova. (Juan 8:31, 32; 17:17) Ti pannagna iti nadiosan a kinapudno ket nasken iti pannakaisalakan. Ken dagiti ad-adipen ti Dios masapul nga agbalinda a katulongan iti kinapudno.
Ti maikadua ken maikatlo a napaltiingan a sursurat ni apostol Juan sawenda ti “pannagna iti kinapudno.” (2 Juan 4; 3 Juan 3, 4) Imparegta met ti maikatlo a Juan ti kooperasion kas “katulongan iti kinapudno.” (3 Juan 5-8) Mabalbalin, dagiti surat agpadpada a naisuratda idiay wenno asideg ti Efeso idi agarup 98 K.P. Ngem ti ibagada ket makagunggona iti ili ni Jehova itatta.
Ti Maikadua a Juan Ipaganetgetna ti Kinapudno
Immuna nga impaganetget ti Maikadua a Juan ti kinapudno ken ayat ken namakdaar maibusor “ti antikristo.” (Bersikulo 1-7) Naiturong ti surat iti “napili nga ina,” nalabit maysa nga indibidual. Ngem no daytat’ naipatulod iti maysa a kongregasion, dagiti “annakna” ket napulotan-espiritu a Kristiano a “pinili” ti Dios agpaay ti nailangitan a biag. (Roma 8:16, 17; Filipos 3:12-14) Nagrag-o ni Juan nga addada sumagmamano a “magmagna iti kinapudno” ken mangbusbusor ti apostasia. Kaskasdi, kasapulanda ti agannad maibusor “ti antikristo,” a mangiliblibak a naglasag ni Jesus. Dagiti Saksi ni Jehova itatta ipangagda dagiti kasta a pakdaar maibusor ti apostasia.
Sumaruno a nangted balakad ni Juan iti pannakilangen kadagiti apostata ket kalpasanna inleppasna iti maysa a personal a kalikagum ken dagiti kablaaw. (Bersikulo 8-13) Babaen ti kasta a trabaho kas ti panangaskasaba, isu ken dagiti sabsabali pay napataudda ti bunga nga agresulta iti pannakumberte dagidiay a nakaipatulodan ti surat. Babaen laeng ti ‘panangigagada’ iti bagbagida nga “awatenda ti maysa a gunggona a naan-anay,” a nalawag nga iramanna ti nailangitan a “korona” nga agur-uray kadagiti matalek a napulotan. (2 Timoteo 4:7, 8) No siasinoman ‘a di agtalinaed iti sursuro ni Kristo’ umay kadakuada, dida koma ‘pulos awaten kadagiti pagtaenganda wenno uray mangkablaaw kenkuana’ tapno maliklikan ti pannakairaman kadagiti “dakes nga ar-aramidna.” Kalpasan panangipanamnamana nga umayto ken makisao a rupan-rupa kadagiti padana a manamati, nagpatingga ni Juan kadagiti kablaaw.
Ti Maikatlo a Juan Ipaganetgetna ti Kooperasion
Ti Maikatlo a Juan ket naiturong ken Gayo ken immuna nga impabigbigna ti ar-aramidenna agpaay kadagiti padana a manamati. (3Ju Bersikulo 1-8) Ni Gayo ket “magmagna iti kinapudno” babaen panagtalinaedna iti intero a bagi dagiti Nakristianuan a sursuro. Isu met ti “mangar-aramid ti matalek a trabaho” iti panangtulong kadagiti bumisbisita a kakabsat. Insurat ni Juan: “Addatayo . . . iti sidong ti obligasion a mangpasangbay kadagiti kakasta a tattao a buyogen ti kinamanagpadagus, tapno datayo koma ti katulongan iti kinapudno.” Ipapaay dagiti Saksi ni Jehova ti umas-asping a kinamanagpadagus kadagiti agdaldaliasat a manangaywan itatta.
Kalpasan panangidiligna ti dakes a kababalin ni Diotrefes iti kababalin ni Demetrio, inleppas ni Juan ti suratna. (Bersikulo 9-14) Ti agsapsapul-dayaw a Diotrefes nangipakita ti kinaawan panagraem ken Juan ken pinadpadasna pay a pagtalawen manipud kongregasion dagidiay umaw-awat kadagiti kakabsat a buyogen kinamanagpadagus. Maysa a managan Demetrio ti naisitar kas nasayaat nga ulidan, nupay kasta. Namnamaen ni Juan a makita ni Gayo iti mabiit ket nagleppas babaen kadagiti kablaaw ken maysa a kalikagum a tagiragsaken ni Gayo ti talna.
[Kahon/Ladawan iti panid 30]
Iti Papel, Pluma, ken Tinta: Tinarigagayan ni Juan a sarungkaran “ti napili nga ina” imbes nga isuratna dagiti adu a bambanag kadakuada “iti papel ken tinta.” Imbes nga itultuloyna ti agsurat ken Gayo “iti tinta ken pluma,” ninamnama met ti apostol nga isut’ makitana iti mabiit. (2 Juan 1, 12; 3 Juan 1, 13, 14) Ti Griego a sao a naipatarus a “pluma” (kaʹla·mos) tuktukoyenna ti baston wenno runo ken mabalin a maipatarus a “pagsurat a runo.” Kadagiti Griego ken Romano, ti runo a pluma ket natarid ken naiwa a kas kadagiti dutdot a pagsurat iti naud-udi a panawen. Ti Griego a sao a meʹlan, a naipatarus a “tinta,” ket neuter a porma ti maskulino nga adhetibo a meʹlas, kayatna a sawen “nangisit.” Kadagiti kadaanan a tinta, ti kolor ket karbon a nangisit—dayta man ket maysa a porma ti nangisit a banag a maala manipud maur-uram a langis wenno kayo, wenno maysa a nasileng nga uging manipud nateng wenno animal a gubuayan. Masansan, dagiti tinta ket naidulinda a kas dagiti namaga a pedaso ti kayo wenno tinapay, a binabasa ti mannurat ken iyaplikarna babaen ti pinselna wenno runo. Ti papel kadagidi nga al-aldaw ket maysa a naingpis a material a naaramid kadagiti pedaso a naala manipud mula a papiro. Dagiti immuna a Kristiano inusarda ti kasta a papel kadagiti sursurat, lukot, ken kodigo.