Agannad Kadagiti Apostata!
Dagiti Tampok Manipud Surat ni Judas
DAGITI ad-adipen ni Jehova masapul a “guraenda ti dakes” ken “salimetmetanda ti naimbag.” (Roma 12:9) Ni Judas a mannurat ti Biblia tinulonganna dagiti sabsabali nga aramidenda daytoy iti suratna a naipatulod manipud Palestina mabalin nga idi agarup 65 K.P.
Inawagan ni Judas ti bagbagina “nga adipen ni Jesu-Kristo, ngem kabsat ni Santiago.” Daytoy a Santiago nalawag nga isu ti mabigbig a kabsat ni Jesu-Kristo iti ina. (Marcos 6:3; Aramid 15:13-21; Galacia 1:19) Ni Judas a mismo ngarud ket kabsat ni Jesus iti ina. Nupay kasta, mabalin a pinanunotna a di nasayaat no dakamatenna daytoy a nainlasagan a singgalut, yantangay ni Kristo ket maysa idin a naipadayag nga espiritu a persona idiay langit. Ti surat ni Judas ket direkta no iti panangted balakad a mangtulong kadatayo a “mangsalimetmet ti naimbag” ken agannad kadagiti apostata.
“Makidangadangkayo a Sibibileg”
Nupay inranta ni Judas ti agsurat maipapan ti pannakaisalakan nga ik-ikutan dagiti Kristiano a pada-pada, nakitana a nasken a balakadanna dagiti managbasana a “makidangadangda a sibibileg gapu iti pammati.” (Bersikulo 1-4) Apay? Agsipud ta nakastrek dagiti dakes a tattao iti kongregasion ken ‘pinagbalinda ti parabur ti Dios a pambar iti kinaderrepda.’ Sikakamali a pinanunotda a mabalinda a salungasingen dagiti linteg ti Dios ken kaskasdi agtalinaed a kameng ti ilina. Sapay koma ta ditay iyawat dagiti bagbagitayo iti kasta a dakes a panagrasrason ngem kankanayon a suroten ti kinalinteg, nga agyaman ta gapu iti dara ni Jesus siaasi nga inugasan ti Dios ti basbasoltayo.—1 Corinto 6:9-11; 1 Juan 1:7.
Dagiti Pakdaar a Naited Kadatayo
Nasken ti panagannad maibusor kadagiti sumagmamano a kababalin, ug-ugali, ken tattao. (Bersikulo 5-16) Agsipud ta dadduma nga Israelitas a naispal manipud Egipto nagkurangda ti pammati, nadadaelda. Dagiti anghel a pinanawanda ti nakaisigudanda a kasasaad “naikabilda kadagiti agnanayon a pannakaibalud iti yan ti [naespirituan a] sipnget agingga iti panangukom ti naindaklan nga aldaw.” Ti nakaro nga imoralidad ti nangiyeg “ti dusa ti apuy nga agnanayon” iti Sodoma ken Gomorra. Gapuna, kanayontay nga ay-ayuen ti Dios ken pulos a di panawan “ti dana ti biag.”—Salmo 16:11.
Maisupadi ken ni Miguel nga arkanghel, a di nangiyeg uray panangukom maibusor ti Diablo babaen panagipato a sitatabbaaw, dagiti nadangkes a tattao tinabbaawanda dagiti “naipadayag,” nalawag a dagidiay addaan dayag nga impaay kadakuada ti Dios ken ni Kristo kas napulotan a papanglakayen. Ditay koma mangipakita ti kinaawan panagraem iti inted-Dios nga autoridad!
Dagiti dakes nga ulidan ni Cain, Balaam, ken Core ket sinurot dagiti nadangkes a tattao. Mangtedda ti naespirituan a peggad a maiyasping kadagiti batbato a nailemmeng iti uneg ti danum ken kas da la ul-ulep nga awan danumda ken natay, dagiti naparut a kaykayo a di makapataud ti aniaman a makagunggona. Dagidiay nga apostata ket managtanabutobda met, managreklamo, ken ‘manangpasablog kadagiti tattao gapu iti magunggonada.’
Itultuloyyo ti Mangsaranget
Sumaruno a nangipaay ni Judas ti balakad iti panangsaranget kadagiti dakes nga impluensia. (Bersikulo 17-25) Addadanto dagiti managuy-uyaw “iti maudi a tiempo,” ket dagiti pudno a Kristiano masapul nga ibturanda ida ken dagiti manglalais a sasaoda itatta. Tapno masaranget dagiti kakasta a dakes nga impluensia, masapul a papigsaentayo ti bagbagitayo iti “kasasantuan a pammatitayo,” agkakarag buyogen ti nasantuan nga espiritu, ken agtalinaed iti ayat ti Dios, bayat nga ur-urayen ti pannakaiyebkas ti asi ni Jesus.
Nalawag nga iti akem dagiti ulbod a mannursuro, nangipaay dagiti nadangkes a tattao kadagiti dadduma ti panagduadua. (Idiligyo ti 2 Pedro 2:1-3.) Ket aniat’ kasapulan dagiti managduadua? Ay ket, ti naespirituan a tulong tapno masalbar ida manipud “apuy,” ti agnanayon a pannakadadael! (Mateo 18:8, 9) Ngem dagiti nadiosan dida kasapulan a pagbutngan ti kasta a pagtungpalan, ta salakniban ida ni Jehova manipud “pannakaitibkol” iti basol ken ti pannakadadael nga agur-uray kadagiti apostata.
[Kahon iti panid 31]
Nailemmeng a Batbato: Pinakdaaran ni Judas dagiti padana a Kristiano maipapan kadagiti ‘nailemmeng a batbato iti uneg ti danum kadagiti pagdadayaanda iti ayat.’ (Judas 12) Manglimlimo nga agayat kadagiti manamati, dagiti kakasta nga apostata arigda dagiti natadem a batbato iti uneg ti danum a mabalin a mangrebba kadagiti barko wenno mangsugat ken mangpapatay kadagiti aglanglangoy. Dagiti pagdadayaan iti ayat mabalin a dagidiay panagpiesta a sadiay dagiti Kristiano a narang-ay iti material awisenda dagiti napanglaw a padada a manamati. Ti Ama ti Simbaan a ni Chrysostom (347?–407 K.P.) kinunana: “Nagtitiponda amin iti maymaysa a pagpiestaan: dagiti nabaknang nangiyegda kadagiti probision, ket dagiti napanglaw ken dagidiay pobre a naawis, ket nagpiestada amin a sangsangkamaysa.” Aniaman ti kasisigud dagiti immuna a panagdadayada iti ayat, ti pakdaar ni Judas tinulonganna dagiti matalek nga agannad kadagiti ‘nailemmeng a batbato’ ti apostata a mangibunga ti naespirituan nga ipapatay. Nupay di naibilin kadagiti Kristiano a maaddaanda kadagiti panagdadaya iti ayat, ket dida met maar-aramid itatta, dagiti tattao ti Dios tultulonganda ti maysa ken maysa iti material kadagiti panawen ti panagkasapulan ken pudno nga addaanda ti nakaay-ayat a panagtitimpuyog.