Ti Biag ken Ministerio ni Jesus

Dagiti Maudi a Panagparang, ken ti Pentecostes 33 K.P.

ITI maysa a tiempo inyurnos ni Jesus ti pannakitaripnong kenkuana dagiti amin a 11 nga apostolna iti maysa a bantay idiay Galilea. Nalawag a napakaammuan met dagiti dadduma nga adalan maipapan ti taripnong, ket ti dagup a nasurok a 500 a tattao ti nagguummong. Anian a nagragsak a kumbension daytoy idi nga agparang ni Jesus ken mangrugi a mangisuro kadakuada!

Kadagiti dadduma a bambanag, inlawlawag ni Jesus iti dakkel a bunggoy nga inted kenkuana ti Dios ti amin nga autoridad idiay langit ken ditoy daga. “Inkayo ngarud,” imbalakadna, “ket pagbalinenyo nga ad-adalan dagiti amin a nasion, a bautisaranyo ida iti nagan ni Ama, ken ti Anak, ken ti nasantuan nga espiritu, nga isursuroyo kadakuada nga aywananda dagiti isuamin a banag nga imbilinko kadakayo.”

Panunotenyo dayta! Lallaki, babbai, ken ub-ubbing amin inawatda daytoy isu met laeng a trabaho a pannakiraman iti panagaramid-adalan. Padpadasento a pasardengen dagiti bumusbusor ti panangaskasaba ken panangisuroda, ngem liniwliwa ida ni Jesus: “Adtoy! Addaak kadakayo nga agnanayon agingga iti panungpalan ti sistema dagiti bambanag.” Agtalinaed ni Jesus a kadua dagiti paspasurotna babaen ti nasantuan nga espiritu, tapno tulonganna ida a mangiringpas ti ministerioda.

Nagparang ni Jesus a sibibiag kadagiti adalanna iti periodo nga 40 nga al-aldaw kalpasan panagungarna. Kadagitoy a panagparangna, binilinna ida maipapan ti Pagarian ti Dios, ket impaganetgetna no ania dagiti responsabilidadda kas ad-adalanna. Iti maysa nga okasion nagparang pay iti kabsatna iti ina a ni Santiago ket kinumbinsirna daytoy dati a di manamati a pudno nga Isu ti Kristo.

Bayat nga adda pay laeng dagiti apostol idiay Galilea, nalawag a binilin ida ni Jesus nga agsublida idiay Jerusalem. Idi a nasarakanna ida sadiay, kinunana kadakuada: “Dikay pumanaw sadi Jerusalem, no di ket urayenyo pay ti kari ti Ama, a nangngegyo kaniak; a ni Juan, pudno, nangbautisar iti danum, ngem dakayo mabautisarankayto iti nasantuan nga espiritu iti saan nga adu nga aldaw manipud ita.”

Kamaudiananna nakisarak manen ni Jesus kadagiti apostolna ket inturongna ida iti siudad ti Betania, a masarakan iti akindaya a rangkis ti Bantay dagiti Olivo. Nakaskasdaaw, agpapan amin nga imbagana maipapan ti mabiiten nga ipapanawna a mapan langit, kaskasdi a patienda pay a ti Pagarianna maipasdekto ditoy daga. Gapuna inimtuodda: “Apo, itan ti panangbangonmo manen ti pagarian iti Israel?”

Imbes a korehirenna manen ti di umiso a panangipagarupda, insungbat laeng ni Jesus: “Saan a maibatang kadakayo ti panangammo kadagiti aldaw wenno kadagiti tiempo nga intalimeng ti Ama iti pannakabalinna a bukbukod.” Kalpasanna, naminsan pay nga impaganetgetna ti trabaho a masapul nga aramidenda, kinunana: “Umawatkayto ti pannakabalin inton umay kadakayo ti nasantuan nga espiritu, ket dakayto ti saksik sadi Jerusalem ken iti isuamin a Judea ken Samaria ken agingga iti ungto ti daga.”

Ket bayat a kitkitaenda pay laeng, nangrugi a naipangato ni Jesus, ket kalpasanna isut’ inlinged ti ulep manipud panagkitada. Kalpasan panangikkatna ti nainlasagan a bagina, isut’ immulin sadi langit kas maysa nga espiritu a persona. Bayat a kumitkita dagiti 11 iti tangatang, 2 a lallaki a nagkawes ti puraw nagparang iti sibayda. Dagitoy naglasag nga anghel inimtuodda: “Lallaki a taga Galilea, apay agtatakderkayo a kumitkita iti langit? Daytoy Jesus a naipangato sadi langit nanipud kadakayo kasta met umayto kas ti pannakakitayo nga ipapanna sadi langit.”

Ti wagas a panangpanaw ni Jesus ti daga ket awanan publiko a kinaariwawa ken dagiti laeng matalek a pasurotna ti umim-imatang. Gapuna agsublinto iti isu met laeng a wagas​—awanan publiko a kinaariwawa ken dagiti laeng matalek a pasurotna ti makaawat a nagsublin ket nangrugin iti kaaddana iti turay ti Pagarian.

Bumabbaba itan dagiti apostol iti Bantay dagiti Olivo, binallasiwda ti Ginget ti Kidron, ket naminsan pay a simrekda iti Jerusalem. Nagtalinaedda sadiay kas panagtulnog iti bilin ni Jesus. Sangapulo nga aldaw kalpasanna, idiay Judio a Piesta ti Pentecostes 33 K.P., bayat nga agarup 120 nga adalan ti nagtataripnong iti maysa nga akingngato a siled idiay Jerusalem, maysa a danarudor a kasla panagpuyupoy ti napigsa unay nga angin bigla a pinunnona ti intero a balay. Nagparang dagiti dildila a kasla apuy, a nagdisso iti tunggal maysa kadagidiay presente, ket dagiti adalan nangrugida amin nga agsao iti nadumaduma a pagsasao. Isu daytoy ti pannakaiparukpok ti nasantuan nga espiritu nga inkari ni Jesus! Mateo 28:16-20; Lucas 24:49-52; 1 Corinto 15:5-7; Aramid 1:3-15;2:1-4.

◆ Kadagiti siasino a nangipaay ni Jesus ti pammakada a bilbilin iti maysa a bantay idiay Galilea, ket ania dagitoy a bilin?

◆ Ania a panangliwliwa ti impaay ni Jesus kadagiti adalanna, ken kasano nga agtalinaed kadakuada?

◆ Kasano kabayag a nagparang ni Jesus kadagiti adalanna kalpasan ti panagungarna, ket ania ti insurona kadakuada?

◆ Iti siasino a tao, nalawag a saan a maysa nga adalan sakbay ti ipapatay ni Jesus, ti nagparangan ni Jesus?

◆ Naaddaan ni Jesus ti ania a dua a maudi a pannakisarak kadagiti apostolna, ket ania ti napasamak kadagitoy nga okasion?

◆ Kasano a ni Jesus agsublinto iti isu met laeng a wagas a kas ti ipapanawna?

◆ Aniat’ napasamak iti Pentecostes 33 K.P.?