Ti Biag ken Ministerio ni Jesus

Idiay Makanawan nga Ima ti Dios

TI PANNAKAIPARUKPOK ti nasantuan nga espiritu idi Pentecostes ket pammaneknek a ni Jesus nakagtengen idiay langit. Ti sirmata a naited ken adalan nga Esteban di unay nabayag kalpasanna paneknekanna met a dimtengen sadiay. Sakbay a naubor gapu ti matalek a panangaskasabana, impukkaw ni Esteban: “Adtoy! Kitkitaek dagiti langit a silulukat ken ti Anak ti tao nga agtaktakder iti makanawan nga ima ti Dios.”

Bayat nga adda iti makanawan nga ima ti Dios, ur-urayen ni Jesus ti bilin manipud ti Amana: “Agturayka iti tengnga dagiti kabusormo.” Ngem kabayatanna, sakbay nga agtignay maibusor kadagiti kabusorna, ania ti aramiden ni Jesus? Isut’ agturay, wenno agari, kadagiti napulotan nga ad-adalanna, nga idalanna ida iti trabahoda a panangaskasaba ken isaganana ida nga agbalin, babaen panagungar, a kakaduana nga ar-ari iti Pagarian ni Amana.

Kas pangarigan, pinili ni Jesus ni Saulo (iti naud-udi pagaammo iti Romano a nagan, a Pablo) tapno idaulona ti trabaho a panagaramid-adalan iti dadduma a dagdaga. Ni Saulo ket naregta iti Linteg ti Dios, ngem inallilaw dagiti relihiuso a papangulo a Judio. Kas resultana, saan laeng nga inanamongan ni Saulo ti pannakapapatay ni Esteban ngem napan pay idiay Damasco agraman autorisasion manipud ti kangatuan a padi a ni Caifas tapno iyegna a siaaresto idiay Jerusalem ti asinoman a lallaki ken babbai a masarakanna a paspasurot ni Jesus. Nupay kasta, bayat a ni Saulo adda iti dalanna, bigla a linakub ti naraniag a lawag, ket napasag iti daga.

“Saulo, Saulo, apay idadanesnak?” inimtuod ti maysa a timek manipud di makita a gubuayan. “Asinoka, Apo?” sinaludsod ni Saulo.

“Siak ni Jesus, nga idadanesmo,” immay ti sungbat.

Imbaga ni Jesus ken Saulo, a binulsek ti namilagruan a lawag, a sumrek idiay Damasco ket aguray kadagiti bilin. Kalpasanna nagparang ni Jesus iti sirmata ken Ananias, maysa kadagiti adalanna. Maipapan ken Saulo, kinuna ni Jesus ken Ananias: “Daytoy a tao ket napili a baso maipaay kaniak a mangipan ti naganko kadagiti nasnasion ken dagiti ar-ari ken dagiti annak ti Israel.”

Pudno unay, babaen ti tulong ni Jesus, ni Saulo (maawagan itan kas Pablo) ken dadduma pay a manag-ebanghelio nakitada ti dakkel a balligi ti trabahoda a panangaskasaba ken panagaramid-adalan. Kinapudnona, agarup 25 a tawen kalpasan panagparang ni Jesus kenkuana iti dalan nga agturong idiay Damasco, insurat ni Pablo a ti “naimbag a damag” ti “naikaskasaban iti amin a sangaparsuaan iti baba ti langit.”

Kalpasan ilalabas ti adu pay a tawtawen, nangipaay ni Jesus ti agsasaruno a sirmata iti ay-ayatenna nga apostol, ni Juan. Babaen kadagitoy a sirmata nga inladawan ni Juan iti libro ti Biblia nga Apocalipsis, isu, kinapudnona, nagbiag tapno makitana ti panagsubli ni Jesus iti pannakabalin ti Pagarian. Kinuna ni Juan a “babaen ti pannakapaltiing” isut’ naipan iti tiempo ti “aldaw ti Apo.” Ania daytoy nga “aldaw”?

Ti naannad a panangadal kadagiti padto ti Biblia, agraman ti mismo a padto ni Jesus maipapan ti maudi nga al-aldaw, ipalgakna a ti “aldaw ti Apo” nangrugi iti napateg iti historia a tawen 1914, wen, kabayatan daytoy a kaputotan! Gapuna nagsubli a di makita ni Jesus idi 1914, nga awan ti publiko nga ariwawa ken dagiti laeng matalek nga ad-adipenna ti makaammo iti panagsublina. Iti dayta a tawen, ni Jehova inikkanna ni Jesus ti bilin nga agturay iti tengnga dagiti kabusorna!

Iti panagtulnog ti bilin ni Amana, dinalusan ni Jesus dagiti langlangit manipud ken Satanas ken dagiti demoniona, nga intappuakna ida iti daga. Kalpasan pannakakitana iti daytoy a napasamak iti sirmata, nangngeg ni Juan ti nailangitan a timek a mangiwarwaragawag: “Ita immayen ti pannakaisalakan ken ti pannakabalin ken ti pagarian ti Diostayo ken ti panagturay ni Kristona!” Wen, idi 1914 nangrugin nga agturay ni Kristo kas Ari!

Anian a naimbag a damag daytoy kadagiti managdaydayaw ni Jehova idiay langit! Nabalakadanda: “Agrag-okayo, dakayo a langlangit ken dakayo nga agnaed kadakuada.” Ngem ania ti kasasaad para kadagidiay adda ditoy daga? “Asikayo pay daga ken baybay,” intuloy ti timek manipud langit, “ta ti Diablo immulog kadakayo, nga addaan dakkel a pungtot, nga ammona a bassiten ti tiempona.”

Addatayon iti dayta ababa a tiempo. Agdaman a mapaglalasinlasin dagiti tattao no sumrekda iti baro a lubong ti Dios wenno no sagabaenda ti pannakadadael. Ti kinapudnona ket, maus-usigen ti bukodyo a pagtungpalan babaen ti no kasanot’ isusungbatyo iti naimbag a damag ti Pagarian ti Dios a maikaskasaban iti intero a daga iti sidong ti panangiwanwan ni Kristo.

No maturposen ti panamaglalasin kadagiti tattao, agtignayton ni Jesu-Kristo kas Ahente ti Dios tapno ikkatenna manipud iti daga ti intero a sistema dagiti bambanag ni Satanas ken amin dagidiay a mangsupsuportar iti dayta. Turposento ni Jesus daytoy panangikkat ti amin a kinadakes idiay gubat a maawagan iti Biblia nga Har–Magedon, wenno Armagedon. Kalpasanna, ni Jesus, ti kadakkelan a Persona iti uniberso a maikadua ken Jehova a mismo, tiliwennanto ni Satanas ken dagiti demoniona ket ibaludna ida iti sangaribo a tawen iti “mangliwengliweng nga abut,” kayatna a sawen, maysa a kasasaad ti kasla natay a kinaawan aramid. Aramid 7:55-60; 8:1-3; 9:1-19; 16:6-10; Salmo 110:1, 2; Hebreo 10:12, 13; 1 Pedro 3:22; Lucas 22:28-30; Colosas 1:13, 23; Apocalipsis 1:1, 10; 12:7-12; 16:14-16; 20:1-3; Mateo 24:14; 25:31-33.

◆ Kalpasan iyuuli ni Jesus idiay langit, sadinot’ pakasarakan kenkuana, ken aniat’ ur-urayenna?

◆ Kadagiti siasino nga agturay ni Jesus kalpasan iyuulina idiay langit, ken kasano a naiparangarang ti panagturayna?

◆ Kaano a nangrugi ti “aldaw ti Apo,” ken ania ti napasamak iti pangrugianna?

◆ Ania a panamaglalasin ti maar-aramid itan a mangapektar a mismo kadatayo, ken iti ania a pakaibatayan a maar-aramid daytoy a panaglalasinlasin?

◆ Inton maturpos daytoy a panamaglalasin, ania a paspasamak ti sumaruno?