Ti Biag ken Ministerio ni Jesus

Turposen ni Jesus ti Amin a Kiddawen ti Dios

INTON ti Mannakigubat-Ari a ni Jesu-Kristo ikkatenna ni Satanas ken ti dakes a lubongna, anian a panagrag-o ti addanto! Mangrugin iti kamaudianan ti natalna a Sangaribo a Tawen a Panagturay ni Jesus!

Iti sidong ti panangidalan ni Jesus ken dagiti kakaduana nga ari, dagiti makalasat iti Armagedon dalusandanto dagiti nadadael nga imbati dayta nalinteg a gubat. Mabalbalin, agipasngayto met dagiti naindagaan a makalasat iti annak iti maysa a tiempo, ket makiramanto dagitoy iti nakaay-ayat a trabaho iti panangsukay iti daga a pagbalinen a maysa a nangayed a kasla parke a minuyongan.

Inton agangay pagungarenton ni Jesus dagiti adu a milion manipud kadagiti tanemda tapno tagiragsakenda daytoy napintas a Paraiso. Aramidennanto daytoy kas kaitungpalan ti mismo a pammasigurona: “Ti oras umay inton amin dagidiay adda kadagiti tanem a pakalaglagipan . . . rummuardanto.”

Mairaman kadagidiay pagungaren ni Jesus isunto ti dati a managdakdakes a natay iti sibayna idiay kayo a pagtutuokan. Lagipenyo nga inkari ni Jesus kenkuana: “Pudno kunak kenka ita nga aldaw, Makipaggiankanto kaniak idiay Paraiso.” Saan, dayta a tao dinto maipan idiay langit tapno agturay kas ari a kadua ni Jesus, wenno agbalinto manen ni Jesus a tao ket agbiag iti Paraiso a daga a kaduana. Imbes ketdi, makipaggianto ni Jesus iti dati a managdakdakes iti kaipapanan nga Isut’ mangpagungarto kenkuana iti biag idiay Paraiso ket kitaenna a dagiti kasapulanna, agpadpada iti pisikal ken naespirituan, ti maaywanan, kas naiyilustrar iti daytoy a panid.

Panunotenyo dayta! Iti sidong ti naayat nga atension ni Jesus, ti intero a natauan a pamilia​—dagiti makalasat iti Armagedon, dagiti annakda, ken rinibribo a milion a mapagungar nga agtulnog kenkuana​—agturongdanto iti natauan a kinaperpekto. Ni Jehova, babaen ti naarian nga Anakna, ni Jesu-Kristo, agnaedto iti sangatauan iti naespirituan. “Ket,” kas kunaen ti timek manipud langit a nangngeg ni Juan, “punasennanto ti amin a lulua kadagiti matada, ket awanton ni patay, awanto metten ti sasaibbek wenno sangsangit wenno rigrigat.” Awanton ti tao ditoy daga nga agsagaba wenno agsakit.

Iti pagnguduan ti Sangaribo a Tawen a Panagturay ni Jesus, ti kasasaad ket kaslanto ti orihinal a pinanggep ti Dios idi imbagana iti immuna a natauan a pagassawaan, da Adan ken Eva, nga agaduda ket punnuenda ti daga. Wen, mapnonto ti daga iti nalinteg a rasa dagiti perpekto a tattao. Daytoy ket gapu ta maiyaplikarton iti tunggal maysa dagiti gunggona ti subbot a daton ni Jesus. Awanton ti ipapatay gapu iti basol ni Adan!

Ngarud, naturposton ni Jesus ti amin a kiniddaw kenkuana ti Dios. Gapuna, iti pagpatinggaan ti sangaribo a tawen, iyawatnanton ti Pagarian ken ti naperpekto a natauan a pamilia iti Amana. Ruk-atanton ti Dios ni Satanas ken dagiti demoniona manipud ti mangliwengliweng nga abut ti kasla natay a kinaawan aramid. Iti ania a panggep?

Bueno, iti pagnguduan ti sangaribo a tawen, kaaduan kadagidiay agbibiagen iti Paraiso isudanto dagidiay napagungar a di pay pulos nasuot ti pammatida. Sakbay ipapatay, dida pulos naam-ammuan dagiti panggep ti Dios iti kasta dida naiparangarang ti pammati kadakuada. Ngarud, kalpasan pannakapagungar ken pannakaisuroda kadagiti kinapudno ti Biblia, nakalaklaka para kadakuada idiay Paraiso, nga awan ti aniaman nga ibubusor, ti agserbi iti Dios. Ngem no maikkan ti gundaway ni Satanas a mangpasardeng kadakuada nga agserbi iti Dios, agtalinaedda ngata a nasungdo iti sidong ti suot? Tapno maibanag daytoy a saludsod, maparuk-atanto ni Satanas.

Ti paltiing a naited ken Juan ipalgakna a kalpasan ti Sangaribo a Tawen a Panagturay ni Jesus, agballiginto ni Satanas a mangpatallikud ti di ammo a bilang dagiti tattao nga umadayo manipud panagserbi iti Dios. Ngem kalpasanna, inton maturposen ti maudi a suot, ni Satanas, dagiti demoniona, ken amin dagidiay napagballigianna nga inallilaw madadaeldanton iti agnanayon. Iti sabali a bangir, dagiti naan-anay a nasubok, nasungdo a makalasat agbiagdanto tapno tagiragsaken dagiti bendision ti nailangitan nga Amada kabayatan ti kinaagnanayon.

Nalawag, inaramid ni Jesus, ken agtultuloyto nga aramidenna, ti napateg nga akem iti panangiringpas kadagiti nadayag a panggep ti Dios. Anian nga engrande a masanguanan ti tagiragsakentayo kas resulta ti amin a nagapuananna kas naindaklan a nailangitan nga Ari ti Dios! Kaskasdi, ditay malipatan ti amin nga inaramidna bayat nga isut’ maysa a tao.

Situtulok nga immay ni Jesus ditoy daga ket insuronatayo maipapan ti Amana. Malaksid daytoy inyulidanna dagiti nasudi a kualidad ti Dios. Matignay dagiti puspusotayo no usigentayo ti nakaskasdaaw a tured ken kinalalakina, ti di madaegan a kinasiribna, ti nalaing nga abilidadna kas mannursuro, ti awanan buteng a panangidaulona, ken ti naasi a kinamanagayat ken empatiana. No lagipentayo no kasano a nagsagaba a di mailadawan idi nga impaayna ti subbot, a gapu laeng iti dayta magun-odantayo ti biag, sigurado a matignay ti puspusotayo buyogen ti apresasion para kenkuana!

Pudno unay, anian a tao ti nakitatayo iti daytoy a panangadal ti biag ni Jesus! Nalawag a makita ken aglaplapusanan ti kinatan-okna. Matignaytayo a mangipukkaw kadagiti sasao ti gobernador ti Roma a ni Poncio Pilato: “Adtoy! Ti tao!”

Babaen ti panangawattayo ti subbot a sakripisiona, ti dadagsen ti basol ken ipapatay a natawid manipud ken Adan ti maikkat kadatayo, ket agbalin ni Jesus kas ti “Agnanayon nga Amatayo.” Amin a manggun-od ti agnanayon a biag masapul nga alaenda ti pannakaammo saan laeng nga iti Dios ngem kasta met iti Anakna, ni Jesu-Kristo. Inanamaenmi a ti panangbasbasa ken panangadalyo iti daytoy a serye dagiti artikulo iti biag ken ministerio ni Jesus natulongannakayo iti panangala ti kasta a makaited-biag a pannakaammo! 1 Juan 2:17; 1:7; Juan 5:28, 29; 3:16; 17:3; 19:5; Lucas 23:43; Genesis 1:28; 1 Corinto 15:24-28; Apocalipsis 20:1-3, 6-10; 21:3, 4; Isaias 9:6.

◆ Anianto ti naragsak a pribilehio dagiti makalasat iti Armagedon ken dagiti annakda?

◆ Asinodanto agraman dagiti makalasat iti Armagedon ken dagiti annakda ti mangtagiragsak ti Paraiso, ket iti ania a kaipapanan a ni Jesus makipaggian kadakuada?

◆ Anianto ti kasasaad iti pagpatinggaan ti sangaribo a tawen, ket anianto ti aramiden ni Jesus kalpasanna?

◆ Apay a maruk-atanto ni Satanas manipud mangliwengliweng nga abut, ket kalpasanna anianto ti mapasamak kenkuana ken amin dagiti mangsurot kenkuana?

◆ Kasano nga agbalin ni Jesus nga “Agnanayon nga Amatayo”?