Report Dagiti Manangiwaragawag ti Pagarian

Nagtalekda ken Jehova

DAGITI Saksi ni Jehova ket binilin ida ni Jehova a mangikasaba ti naimbag a damag ti Pagarian iti isuamin a lubong tapno dagiti tattao iti amin a nasion maaddaanda iti gundaway a mangammo maipapan iti baro a lubong ti Dios. Iti dadduma a pagilian, masansan gapu iti panangsugsog dagiti klero ti Kakristianuan, maparparitan ti trabahotayo. Kasta ti kaso iti maysa a pagilian idiay Africa. Ngem dagiti Saksi ni Jehova sadiay aramidenda ti kas iti inaramid ni Ari David. Kinunana: “Agtalekak iti Dios. Diakto agbuteng.” (Salmo 56:11) Ti kapkapadasan dagiti kakabsattayo iti dayta a daga ipakitada nga agtalekda ken Jehova ken agtultuloyda iti napateg a trabahona.

Maysa a Saksi nga agtartrabaho kas pangulo iti maysa nga eskuelaan nagtalinaed iti panagtulnog iti “Dios kas agturay imbes a kadagiti tao,” ket impakaammona ti neutralidadna kadagiti aramid ti Estado. (Aramid 5:29) Kasta unay ti pannakakabkabilna ket ninamnamada a maukom kas maysa a mangliliput. Tunggal maysat’ nangipagarup nga isut’ mapapatay. Ti Saksi, nupay kasta, ket nagtalek ken Jehova. Nagtalinaed a matalek ket inlawlawagna dagiti nalinteg a rason iti takderna. Ti resultana? Isut’ nawayawayaan ken napagsubli iti ilina, a sadiay dagiti ahente ti Estado a nangkabil kenkuana nagpakawanda. Daytoy matalek a Saksi ket naisubli iti trabahona a panangisuro ken naipangato iti posision kas inspektor dagiti eskuelaan!

Ti koordinetor iti maysa nga eskuelaan pinagtalawna ti maysa a mangisursuro a Saksi. Maysa a bulan kalpasanna inawat daytoy a koordinetor ti libro a Mabalinyo ti Agbiag nga Agnanayon iti Paraiso Ditoy Daga manipud maysa nga espesial payunir ket immanamong iti panagadal ti Biblia. Kalpasan pannakakompletona ti kapitulo 6, isut’ naglusulos kas koordinetor iti eskuelaan, ket isu ken ti asawana rinuggiandan ti tumabuno iti amin a gimong dagiti Saksi ni Jehova. Maysa a bigat ti Domingo ti napagtalaw a mangisursuro siaayat a nagsiddaaw a makakita iti lalaki a nangpatalaw kenkuana ken iti pannakaammona nga isut’ adda iti dalan nga agturong iti panagbalinna a maysa a naespirituan a kabsat.

Sabali pay a kapadasan manipud isu met laeng a pagilian iyilustrarna no kasano a dagiti Saksi ni Jehova ipasagepsepda ti panagraem kadagiti urnos ni Jehova ken agtrabahoda iti panamagtalinaed iti organisasion a nadalus. Maysa nga espesial payunir nga agtartrabaho iti adayo a teritoria napadasanna ti adu a pannakabusbusor. Yantangay isut’ naggapu iti sabali a tribo ken rehion, dagiti kabusor ti kinapudno kayatda a papanawen manipud iti bario. Nupay kasta, ti pangulo iti bario inlawlawagna ti naimbag a kababalinna ken dagiti nasayaat a resulta ti ministeriona ket dina ipalubos ti pannakapapanawna. Napaliiw ti pangulo a nanipud pay isasangpet ti espesial payunir, padpadayawanen dagiti tattao dagiti agtuturay babaen ti panagbayadda kadagiti buisda ken panangaramidda ti trabaho iti kalsada ti komunidad iti maminsan ti makalawas.​—Roma 13:1, 7.

Kalpasanna, iti maysa a rabii ti sabali pay a Saksi ti nasukalan a makiab-abig iti maysa a di-Saksi a babai. Naadda ti eskandalo, ket naayaban ti espesial payunir iti saklang ti pangulo, a nangtubngar kenkuana, a kunkunana: “Adtoy ti kabsatmo a nasukalan iti pannakiabig. Dakayo a Saksi ni Jehova awan pakaidumaanyo kadagiti dadduma a relihion.” Ti espesial payunir, nupay kasta, inlawlawagna: “Nupay imperpektokami, naidumakami iti dadduma a relihion agsipud ta saanmi a pabpabus-oyan ti tigtignay dagidiay nakaaramid ti nadagsen a basbasol.”

Ti Saksi a nakiabig ket naibalud ken nagbayad iti multa. Kasta met, isut’ nailaksid manipud iti kongregasion kas maysa a di agbabbabawi a managbasol. Daytoy a tignay pinagsiddaawna ti pangulo ket pinasardengna dagiti ngiwat dagidiay a nangrabrabak kadagiti Saksi ni Jehova. Imbaga ti pangulo: “Dikay agsao ti dakes maipapan kadagiti Saksi ni Jehova. Adda kadakuada ti kinapudno. Ti kasta a tignay ket di ar-aramiden dagiti dadduma a relihion.”

Dagiti matalek a Saksi iti dayta a daga surotenda ti pammagbaga ti Salmo 37:3: “Agtalekka ken Jehova ket aramidem ti naimbag; agnaedka ditoy daga, ket makilangenka iti kinamatalek.” Agtalektayto kadi ken Jehova kas inaramid dagitoy a Kristiano?