Dagiti Saludsod Manipud Kadagiti Managbasa
◼ Ania daydiay “ti naimbag” a di maaramid ni apostol Pablo, kas dinakamatna idiay Roma 7:19?
Pamunganayanna, tuktukoyen ni Pablo ti dina pannakaaramid kadagiti amin a naimbag a bambanag a naibalabala iti Mosaiko a Linteg. Daytat’ imposible para ken Pablo ken kadagiti isuamin, uray kadatayo, gapu iti kinaimperpekto ken kinamagbasol. Ngem ditay agpulkok. Ti daton ni Kristo ti nanglukat ti dalan maipaay iti pammakawan ti Dios ken ti nasayaat a takder Kenkuana.
Mabasa iti Roma 7:19: “Ta ti naimbag a panggepek diak aramiden, ngem ti dakes a diak panggepen isu ketdi ti ar-armidek.” Ipakpakita ti konteksto nga agsasao ni Pablo kangrunaanna maipapan iti “naimbag” iti pannakaawat no ania ti nakiddaw iti Linteg. Idiay Ro 7 bersikulo 7 kunana: “Basol aya ti Linteg? Nikaanoman! Ta diak koma nailasin ti basol no saan a gapu iti Linteg; ken, kas pangarigan, diak met koma nabigbig ti panagagum no saan koma a kinuna ti Linteg: ‘Dika agagum.’” Wen, pinagminar ti Linteg a gapu ta dida maannurot a naan-anay dayta, amin a tao ket managbasol.
Intultuloy a kinuna ni Pablo nga isu idi ti “nagbiag nga awanan linteg.” Kaano dayta? Bueno, idi isut’ adda iti lomo ni Abraham sakbay nga impaay ni Jehova ti Linteg. (Roma 7:9; idiligyo iti Hebreo 7:9, 10.) Nupay imperpekto ni Abraham, di pay idi naited ti Linteg, isu nga di pay idi napalagipan iti kinamanagbasolna gapu iti pannakapaayna a mangsalimetmet kadagiti adu a bilinna. Kayat kadi a sawen dayta nga apaman a naited ti Linteg ken impabigbigna ti kinaimperpekto ti tao, daytat’ namataud kadagiti dakes a resulta? Saan. Intuloy ni Pablo: “Iti kasta, iti biangna, ti Linteg ket nasantuan, ken ti bilin ket nasantuan ken nalinteg ken naimbag.”—Roma 7:12.
Siputanyo a dineskribir ni Pablo ti Linteg kas “nasantuan” ken “naimbag.” Kadagiti sumaganad a bersikulo, inlawlawagna a “daydiay a naimbag”—ti Linteg—ti nangipabigbig nga isut’ managbasol, ket daytoy a basol ti namagbalin kenkuana a maikari iti ipapatay. Insurat ni Pablo: “Ti naimbag a panggepek diak aramiden, ngem ti dakes a diak panggepen isu ketdi ti ar-aramidek. Ngem no, ita, aramidek ti diak pinanggep, saanen a siak ti agar-aramid kenkuana, no di ket ti basol nga agnaed kaniak.”—Roma 7:13-20.
Iti daytoy a konteksto, ngarud, saan nga agsasao ni Pablo maipapan iti pangkaaduan a kinaimbag, wenno naasi nga ar-aramid laeng. (Idiligyo iti Aramid 9:36; Roma 13:3.) Isut’ nagadaw kangrunaanna iti panangaramid (wenno di panangaramid) kadagiti bambanag a maitunos iti naimbag a Linteg ti Dios. Sakbayna isut’ sireregta a nangalagad iti relihion a Judio ken—maidilig kadagiti dadduma—isu ti “di mapabasol.” Nupay kasta, nupay iti panunotna isut’ matalek nga adipen iti dayta a naimbag a Linteg, isut’ kaskasdi a di nakapagtulnog a naan-anay iti dayta. (Filipos 3:4-6) Ti Linteg impanayagna dagiti perpekto a pagalagadan ti Dios, a nangipakita iti apostol nga iti lasagna isut’ maysa pay laeng nga adipen ti linteg ti basol ken iti maitutop nga ibungana, dusa ti ipapatay.—Roma 7:25.
Dagiti Kristiano ita ket awanda iti babaen ti Mosaiko a Linteg, ta daytat’ nailansan iti kayo a pagtutuokan. (Roma 7:4-6; Colosas 2:14) Kaskasdi bigbigentayo a naimbag a daytat’ saan a makapadagsen a linteg a basta lipatentay lattan. Saan, kadagiti pamunganayanna ti Linteg ket naimbag. Addaantayo ngarud ti rason a mangbasa kadagiti libro ti Biblia a naglaon iti Linteg ken adalen no ania ti kiniddawna iti Israel. Asidegen ti panangaramid iti dayta dagiti Saksi ni Jehova iti intero a daga, iti panangaramidda ti linawas a panagbasada ti Biblia.
Bayat a basaentayo ti Linteg, kasapulantay nga iyaplikar dagiti prinsipio a naibatay kadagiti nagduduma a pagannurotan ken kadagiti gunggona a nagun-odan ti ili ti Dios bayat a nagreggetanda a suroten dagidiay a naimbag a bilin. Rebbeng a bigbigentayo, met, nga imperpektotayo ket ngarud ditay kabaelan a suroten a naan-anay ti naimbag a maadaltayo manipud Sao ti Dios. Ngem bayat a makiruprupaktayo maibusor iti linteg ti basol, makapagrag-otayo iti namnama ti pannakaispal babaen ti panangiyaplikar iti daton ni Kristo maipaay kadatayo.