Dagiti Kararag a Sigurado a Masungbatan
ADDA dagiti kararag a sigurado a masungbatan. Ti anagda ket nairaman iti pagtuladan a kararag nga inted ni Jesu-Kristo kadagiti pasurotna idi kunana: “Agkararagkayo, ngarud, a kastoy: ‘Amami nga addaka sadi langit, masantipikar koma ti naganmo. Umay koma ti pagariam. Maaramid koma ti pagayatam, kas sadi langit, kasta met ditoy daga.’”—Mateo 6:9-13.
Dagidiay a sasao ti pagtuladan a kararag ni Jesus ti naulit-uliten iti minilion a daras. Nupay saan a ninamnama ni Kristo ti basta panangibalikas laeng dagiti adalanna ti kasta a kararag, dagiti kiddawda a mangiyeb-ebkas kadagiti umasping a rikna ti sigurado a masungbatan. (Mateo 6:7, 8) Gapuna, aniat’ kaipapanan ti panangsantipikar iti nagan ti Dios? Apay nga ikararag ti iyaay ti Pagarianna? Apay nga idawat ti pannakaaramid ti pagayatanna?
“Masantipikar Koma ti Naganmo”
Ni Jehova, “ti Kangatuan iti amin a daga,” isut’ inawagan ni Jesus kas “Amami nga adda sadi langit.” (Salmo 83:18) “Pinutot” ti Dios dagiti Israelitas babaen ti panangwayawayana kadakuada manipud pannakaadipen idiay Egipto ken babaen ti iseserrekna iti maysa a tulag ti pannakibagi kadakuada. (Deuteronomio 32:6, 18; Exodo 4:22; Isaias 63:16) Ita, dagiti napulotan a Kristiano addaanda ti naayat a panangikabilangan ken Jehova kas ti Amada. (Roma 8:15) Ket dagiti kakaduada, nga addaan naindagaan a namnama, ti agkararg met ken Jehova kas ti Amada.—Juan 10:16; Apocalipsis 7:1-9.
Ngem apay nga ikararag ti pannakasantipikar ti nagan ti Dios? Bueno, manipud iyaalsa ti immuna a pareha idiay minuyongan ti Eden, nalaisen ti nasantuan a nagan. Kas sungbatna iti kasta a kararag, iwalinto ni Jehova amin dagiti pannakalais a naiturong iti pakalaglagipan a naganna. (Salmo 135:13) Aramidenna daytoy babaen ti panangikkatna ti kinadakes ditoy daga. Maipapan iti dayta a panawen, kuna ni Jehova babaen ken mammadto nga Ezequiel: “Ket itan-okkonto ti bagik ken pagsantuekto ti bagik ken ipakaammokto ti bagik iti imatang dagiti adu a nasion; ket maammuandanto a siak ni Jehova.”—Ezequiel 38:23.
Ni Jehova a Dios ket nasantuan ken nadalus. Rebbeng ngarud a masantipikar ti naganna, wenno maisina kas nasantuan. Iparangna ti kinasantona babaen ti panagtignayna a mangsantipikar iti bagina iti sango ti intero a sangaparsuaan. (Ezequiel 36:23) Dagidiay nga agtarigagay iti anamongna ken biag nga agnanayon masapul a bigbigenda ni Jehova buyogen ti panagamak ken santipikarenda ti naganna babaen ti panangsalimetmetda iti dayta kas naiduma ken natantan-ok ngem iti aniaman. (Levitico 22:32; Isaias 8:13; 29:23) Tumutop unay, imbaga ni Jesus kadagiti pasurotna nga agkararagda: “Masantipikar koma ti naganmo” wenno, “masalimetmetan koma a sagrado; maibilang koma a nasantuan.” Makasiguradotayo a sungbatan ti Dios daytoy a paset ti pagtuladan a kararag ni Jesus.
“Umay Koma ti Pagariam”
Kuna met ni Jesus kadagiti pasurotna nga agkararagda: “Umay koma ti pagariam.” Dagiti kararag iti iyaay ti Pagarian ti Dios ti sigurado a masungbatan. Ti Pagarian ket isu ti soberano a turay ni Jehova kas naiyebkas babaen ti nailangitan a Mesianiko a gobierno kadagiti ima ti Anakna, ni Jesu-Kristo, ken dagiti naitimpuyog a “sasanto.” (Daniel 7:13, 14, 18, 22, 27; Isaias 9:6, 7) Nabayagen a napaneknekan dagiti Saksi ni Jehova manipud kadagiti Kasuratan a naitronon ni Jesus kas nailangitan nga Ari idi tawen 1914. Apay, ngarud, a ti maysa rebbengna nga ikararag ti “iyaay” ti Pagarian?
Ti panangikararag iti iyaay ti Pagarian kinaagpaysuanna ket kaipapananna ti panangkiddaw a daytat’ umay maibusor kadagiti amin a sumupsupring iti nadiosan a turay ditoy daga. Iti din agbayag “ti pagarian [ti Dios] . . . burakburakennanto ken ibusennanto amin dagitoy [naindagaan] a pagpagarian, ket isu agtalinaedto iti agnanayon.” (Daniel 2:44) Daytoy a pasamak ti mangnayonto ti pannakasantipikar iti nasantuan a nagan ni Jehova.
“Maaramid Koma ti Pagayatam”
Innayon pay nga insuro ni Jesus kadagiti pasurotna nga agkararagda: “Maaramid koma ti pagayatam, kas sadi langit, kasta met ditoy daga.” Daytoy ket maysa a kiddaw nga agtignay koma ni Jehova maitunos iti pagayatanna para iti daga. Umasping daytoy iti salaysay ti salmista: “Aniaman a nagayatan ni Jehova daytat’ inaramidna kadagiti langlangit ken iti daga, kadagiti baybay ken kadagiti amin a yuyeng. Isu a mamagpangato kadagiti alingasaw manipud kadagiti pungto ti daga; isu a mamagkimat a maipaay iti tudo; isu a mangparuar iti angin kadagiti pagidulinanna, isu a nangdanar kadagiti inauna nga annak sadi Egipto, annak ti tao man wenno animal. Isu a nangibaon kadagiti pagilasinan ken datdatlag iti tengngayo, O Egipto, ken Faraon ken kadagiti amin nga ad-adipenna; isu a nangkabil kadagiti adu a nasnasion, ken nangpapatay kadagiti nabileg nga ar-ari.”—Salmo 135:6-10.
Ti panangikararag a maaramid koma ti pagayatan ni Jehova ditoy daga ket maysa a kiddaw nga itungpalna koma dagiti panggepna maipaay iti daytoy a globo. Iraman daytoy ti agnanayon a pannakaikkat dagiti bumusbusor kenkuana, kas iti panangikkatna kadakuada iti bassit a rukod idi unana a tiempo. (Salmo 83:9-18; Apocalipsis 19:19-21) Dagiti kararag iti pannakaaramid ti pagayatan ni Jehova iti intero a daga ken ti uniberso ti sigurado a masungbatan.
Inton Agturay ti Pagarian
Imbes a ti kinadakes a nangsalput itan iti natauan a kagimongan, aniat’ manamnama inton agturay ti Pagarian ti Dios ken inton maaramiden ti nadiosan a pagayatan ditoy daga kas idiay langit? Sigun ken apostol Pedro, “adda baro a langlangit ken maysa a baro a daga nga ur-urayentayo kas maiyannurot iti kari [ti Dios], isuda a pagtaengan ti kinalinteg.” (2 Pedro 3:13) Dagiti “baro a langlangit” isuda dagiti nalinteg nga agturturay a pannakabalin—ni Jesu-Kristo ken dagiti 144,000 a kakaduana a makipagtawid iti nailangitan a Pagarian. (Roma 8:16, 17; Apocalipsis 14:1-5; 20:4-6) Ti “maysa a baro a daga” ket saan a sabali manen a naindagaan a globo. Imbes ketdi, daytat’ maysa a nalinteg a kagimongan dagiti tattao nga agbibiag ditoy daga.—Idiligyo ti Salmo 96:1.
Iti sidong ti turay ti Pagarian, mapagbalinto ti daga a maysa a sangalubongan a paraiso. (Lucas 23:43) Matagiragsakto ngaruden dagiti amin a natulnog a sangatauan ti pudpudno a talna ken talged. (Salmo 72:1-15; Apocalipsis 21:1-5) Agbalinkayo a maysa kadagidiay naragsak a bunggoy no nasungdokayo a manangikampania iti Mesianiko a turay kadagiti natulnog a naindagaan nga iturayanna. Dagiti manangikampania iti kasta a turay sirereggetda nga agkararag maipaay ti pannakasantipikar ti nagan ni Jehova, para iti iyaay ti Pagarianna, ken agpaay ti pannakaaramid ti pagayatanna. Dagiti napasnek nga ararawda ti sigurado a masungbatan.