Dagiti Ilustrasion​—Tulbek iti Panangdanon Kadagiti Puso

AGTARTARAY ni David maipaay iti biagna. Ti kabusorna isu ni Saul, ti napulotan nga ari ti Israel. Nupay kasta, napnuan gura ni Saul ken David, a pinadakkel ti imun. Iti makapapatay a tarigagayna, nangikuyog itan ti ari kadagiti 3,000 a soldado. Gapu ta basbassitda, naglemmeng ni David ken dagiti lallakina iti uneg ti maysa a gukayab idiay let-ang.

Bayat a nagaarak da David ken dagiti lallakina iti kasipngetan, nakaskasdaaw ti panagbalbaliw ti kasasaad. Simrek ni ari Saul iti daytoy a gukayab tapno agpaksay. Siuulimek nga immasideg ni David iti awan gawayna a kabusorna, a siiiggem ti igam. Ngem iti pannakakellaat dagiti lallaki ni David, dina pinapatay ti ari. Pinigisna laeng ti gayadan ti lambon ni Saul. Maladingitan uray ti panangaramidna laeng iti daytoy, kunana: “Di maipato, iti biangko, iti panangmatmat ni Jehova, nga aramidek daytoy a banag iti apok, ti pinulotan ni Jehova, nga unnatek ti imak maibusor kenkuana, ta isu ti pinulotan ni Jehova.”​—1 Samuel 24:1-6.

Daytoy a salaysay ti Biblia isurona ti maysa a nauneg a leksion maipapan panagraem iti inted-Dios nga autoridad. Danonenna met ti puso, nalabit mas epektibo pay ngem ti direkta a balakad. Kasta ti bileg dagiti salaysay a nairekord iti Sao ti Dios agpaay a pakasursuruantayo.​—Roma 15:4.

Maitunos unay, pagreggetan dagiti Saksi ni Jehova ti ad-adda pay ngem ti mangidatag kadagiti kinapudno no ikasabada ti naimbag a damag, mangikonduktada kadagiti panagadal ti Biblia, mangipaayda kadagiti Nainkasuratan a palawag, wenno mangasabada iti impormal. Pagreggetanda a danonen dagiti puso babaen ti panangisalaysayda kadagiti kapadasan ken panagusar kadagiti ilustrasion. Ilawlawag ti Giya ti Teokratiko nga Eskuelaan ti Panagministro a libroda: “Dagiti ilustrasion pagagarenna ti interes ken itampokda dagiti napateg nga idea. Gutugotenda ti panagpampanunot ti maysa ken pagbalinenda a nalaklaka ti pannakaawat kadagiti baro a kapanunotan. Dagiti nasayaat-pannakapilina nga ilustrasion pagtipunenna ti pannakaawis ti kinasirib ken ti emosional a pannakatignay. . . . No dadduma, ti ilustrasion mabalin a mausar tapno maliklikan ti panangidumduma wenno panangkanunong.”a​—Panid 169.

Iti librona nga Essentials of Public Speaking, inlawlawag ni Warren DuBois: “Palubosan a ti mannurat wenno managbitla iyebkasna dagiti ideana kadagiti tignay wenno sao dagiti tattao, ket maaddaan biag ken maris uray ti kalilideman a tema.” Ngarud, ti pananginayon ti biag ken maris iti maysa a mensahe a naraniagen ken makaited-biag ti sigurado a mangtulong kadagiti Kristiano a ministro a mangdanon ti puso.

Dagiti Mangisuro nga Ilustrasion

Ania a kita ti ilustrasion ti kasasayaatan? Kaadduanna, daydiay naibatay iti banag a nalaka a masurotan dagiti managimdeng. Nangituyang ni Jesus iti naimbag nga ulidan iti daytoy a banag. Iti Sermonna idiay Bantay, nagsao ni Jesus kadagiti banag a kas iti asin, pagsilawan, ken dagiti tumatayab. (Mateo 5:1–7:29) Kas pangarigan, ammo ti amin ti maipapan kadagiti pagsilawan a mangpuor iti lana ti olibo ken no dadduma maipan kadagiti pagiparabawan ti silaw. No kasta, naawatan la ketdi dagiti pasurot ni Jesus a rebbeng nga isuda komat’ manangawit iti naespirituan a lawag idi kunana kadakuada: “Saan a gangtan dagiti tao ti maysa a silaw, sada ikabil iti sirok ti maysa a salop, no di ket iti pagsilawan, ket lawaganna ti isuamin nga adda iti balay. Kasta koma ti panaglawag ti silawyo iti sanguanan dagiti tao, tapno makitada dagiti naimbag nga aramidyo ket dayawenda koma ni Amayo nga adda sadi langit.” (Mateo 5:15, 16) Dagiti saan a komplikado nga ilustrasion a maitutop iti tema ti tumulong kadagiti Kristiano a ministro a mangpalitnaw kadagiti idea ken sursuro ti Biblia.

Nalabit a dagiti kapipigsaan nga ilustrasion ni Jesus ket naisentroda kadagiti tao. Usigenyo dagidiay nairekord idiay Lucas kapitulo 15 ken 16. Dinillaw dagiti eskriba ken Fariseo ni Jesus gapu iti panangawatna kadagiti managbasol ken agsingsingir ti buis. Iti isusungbatna, isut’ nangisalaysay kadagiti makatignay nga estoria maipapan kadagiti tao. Isut’ nagsao maipapan iti pastor a nakapukaw iti maysa a karnerona, ti babai a nakasarak iti napukawna a drakma, ti nagawid a bayanggudaw nga anak, ken ti nakillo a mayordomo.

Dagiti realistiko nga ilustrasion ken kapkapadasan ti pudno a biag ket kasapulan ti maysa a Kristiano a ministro. Kas pangarigan, paliiwenyo no kasano a ni Alexander H. Macmillan, a nagdaliasat iti adayo kas managpalawag iti publiko iti 60 a tawen, inlawlawagna ti kinapudno maipapan kadagiti natay. Sakbay unay ti ipapatay ti amana, a mamati a saan a pulos a matay ti kararua, kastoy ti pannakisarita ni Macmillan kenkuana:

“Inyimtuod kaniak ni tatangko ti direkta a saludsod: ‘Anakko, nalidayakto kadi idiay tanem bayat ti panagur-urayko iti panangrugi ti pagarian iti trabahona a panangpunno itoy daga ti kinaperpekto?’

“Daytat’ maysa a saludsod a saan a dagus a masungbatan ti maysa nga agtutubo iti kapkapnekan ti maysa a natataengan a tao a di pulos naadaan ti kasta a linia ti kapanunotan.

“Iti isusungbatko isut’ inimtuodko: ‘Tatang, nakaturogkay kadi a naimbag idi rabii?’

“Insungbatna, ‘Wen, anakko, kalpasan ti panangted kaniak ti doktor iti tabletas a pagpaturog.’

“‘Nalidayka kadi idi nakaturogka?’

“‘Saan, saanak a naliday. Sapay koma ta nakaturogak a kankanayon, iti kasta awan mariknak nga ut-ot.’”

Idin imbasa ni A. H. Macmillan ken tatangna ti Job 14:13-15 ken 3:17-19 ket kunana: “Nakitayo, tatang, dagiti natay ket addada iti nargaan a turog ken awan ammoda bayat iti dayta a kasasaad, gapuna kasano koma a nalidayda?”

Anian nga epektibo a panangisuro! No maysakayo a Saksi ni Jehova, mabalinyo met ti agusar kadagiti kasuratan ken ilustrasion tapno magutugotyo ti panunot ken puso.

Panangsapul kadagiti Ilustrasion

Ngem sadino ti pakasarakanyo kadagiti epektibo nga ilustrasion wenno kapkapadasan ti pudno a biag? Adut’ mabalin a mairuar manipud pempen ti personal a kapadasanyo. Kas pangarigan, kasapulanyo kadi nga iparang dagiti bendision ti pammati, ti bileg ti kararag, wenno ti rag-o ti ministerio? No maysakayo a dedikado a Kristiano, nalabit makaisalaysaykayo kadagiti nagduduma a pasamak ti biagyo a mismo. Mabalin a makangngegkayo kadagiti naimbag a kapadasan iti gimong ti kongregasion wenno no makipatpatang kadagiti pada a Kristiano. Wenno mabalin a makabasakayo iti makaparegta a kapadasan idiay Yearbook of Jehovah’s Witnesses. Kinapudnona, ti Watch Tower Publications Index ipatuldona dagiti naiyimprenta a kapadasan manipud aglawlaw ti lubong.

Kasanoyo nga isalaysay a siiepektibo ti maysa a kapadasan? No maminsan, ti panangpataud iti maysa a rukod ti panaggagar tulongannakayo a mangala ti atension dagiti managimdengyo. Mabalinyo nga irugi ti maysa a kapadasan babaen ti panagkuna a: “Maysa a payunir ti nakaadal iti umuna a gundaway no kasano a bendisionan ni Jehova dagidiay agtalek kenkuana.” Dagdagus, dagiti managimdengyo panunotenda no ania dagiti bendision a tinagiragsak ti amin-tiempo a manangikasaba ti Pagarian. Siguruenyo a maibagayo kadakuada.

Padasenyo nga isalaysay ti maysa a kapadasan kadagiti bukodyo a sao. Mangipaaykayo kadagiti detalye, ta ti panangaramid iti daytoy nayunanna ti gagar iti maysa nga estoria. Babaen ti panangipinta iti nalawag a ladawan dagiti kasasaad baeten kadagiti sasao, nalaklakayo a matignay dagiti managimdengyo. Ngem siguruenyo a saankayo unay a naigamer iti panagistoria a dida maaw-awatan no apay nga isalsalaysayyo ti kapadasan. Kasta met, liklikanyo ti panaglabes, ta nupay pagbalinen daytoy ti estoria nga ad-adda a makapainteres, ipababana met dayta ti dayawyo. Iti isu met la a gapu, adaywanyo ti panangibaga kadagiti sarsarita wenno panangisalaysay kadagiti kapadasan a di mapatalgedan.

Panangpabiag iti Biblia

Dagiti makaisuro unay a kapadasan masarakan a mismo idiay Biblia. Kas pangarigan, amangan no kayatyo nga ipakita iti maysa nga estudiante ti Biblia wenno managdengngeg a kabaelan dagiti ubbing ti mangala iti natibker a takder ken Jehova. Mabalinyo nga ikeddeng nga usaren ti salaysay iti di nainaganan a balasitang a nakisao iti asawa ni Naaman maipapan ken mammadto ni Jehova a ni Eliseo. Umuna, basaenyo ti salaysay idiay 2 Ar-ari 5:1-5. Kalpasanna mabalinyo nga isaludsod: “Kasano karikut iti panagkunam para iti daytoy a balasitang ti panangtaginayonna ti kinatarnawna iti Dios idiay daga ti ulbod a panagdayaw? Saanna kadi a kinasapulan ti tured tapno makaallukoy maipapan ken Jehova ken ti mammadtona?”

Ti nasakbay a panagsirarak ti mabalin a nakatulong kadakayo tapno mabiagyo ti salaysay. Mabalin a nakasarakkayo kadagiti makatulong nga impormasion iti sidong dagiti paulo a NAAMAN, SYRIA, ken ELISHA idiay Watch Tower Publications Index. Dagiti pagallatiwan a reperensia idiay New World Translation of the Holy Scriptures ti mabalin a nangiturong kadakayo manipud salaysay idiay 2 Ar-ari sadiay Salmo 148:12, 13, a sadiay mabasatayo: “Babbaro man ken babbalasang, lallakay ken ub-ubbing. Idaydayawda koma ti nagan ni Jehova, ta ti naganna laeng ti di magaw-at. Ti dayagna naringringbaw ngem ti daga ken dagiti langlangit.” Anian a pammaregta agpaay kadagiti agtutubo tapno ibagada ti sao ti Dios buyogen ti kinatured!​—Aramid 4:29-31.

No maysaka a Kristiano a ministro, ‘saluadam ti pannursurom’ iti daytoy a banag. (1 Timoteo 4:16) Saanmo la a basta ibaga ti kinapudno​—iyilustrarmo dayta. Pagbalinem a nabagas ken aduan kaipapanan dagiti salaysay ti Biblia. Agusar kadagiti maitutop a kapadasan ken ilustrasion. Pamay-an dagitoy tapno madanon ti puso.

[Footnote]

[Ladawan iti panid 29]

Kas ken Jesus, dagiti agdama-aldaw a Kristiano a ministro mabalinda ti agusar kadagiti nabagas nga ilustrasion tapno maiyallatiwda ti mensaheda ken madanonda dagiti puso