Ti Kinapapa Impasdek ni Kristo?
“ITI nagbaetan ni Pedro, ti immuna nga Obispo ti Roma, ken ti agdama a papatayo, ni Juan Paulo II, dayta ti pagtarayan ti kaatiddog ti linia dagiti natan-ok a papa—nasurok a 260, kinapudnona.” Kastat’ kuna ni Katoliko a prayle nga Anthony Foy idiay The Southern Cross, maysa a linawas a Katoliko a magasin ti makin-abagatan nga Africa. Ituloyna: “Iti daytoy di napugsat a linia dagiti papa a sitatalek a maitudotayo, no makiddaw a paneknekantayo a ti Iglesia Katolika ket impasdek ni Jesu-Kristo.”
Maibagatayo kadi a buyogen panagtalek a daytoy nga atiddog a linia dagiti papa ket nangrugi ken apostol Pedro? Sigun iti Katoliko a teolohia, uppat a papa, da Lino, Anacleto, Clemente I, ken ni Evaristo, dagiti maikunkuna a nangsandi ken Pedro agingga iti tawen 100 C.E. Dakamaten ti Biblia ti maysa a Kristiano a managan Lino a nagnaed idiay Roma. (2 Timoteo 4:21) Nupay kasta, awan banag a mangisingasing a ni Lino, wenno asinoman, ket simmandi a papa ken Pedro. Ni apostol Juan, a nangisurat iti lima a libro idiay Biblia iti maudi a dekada ti umuna a siglo, awan nanginaiganna iti asinoman kadagiti adda iti ngato a maaw-awagan simmandi ken Pedro. La ketdi, no adda man sumandi ken Pedro, saan kadi a ti nainrasonan a mapili ket isu koma ni Juan a mismo?
No maipapan iti panangipagarup a ni Pedro ti immuna nga obispo ti Roma, awan pammaneknek nga uray binisitana man la koma dayta a siudad. Kinapudnona, iyebkas a mismo ni Pedro nga insuratna ti immuna a suratna idiay Babilonia. (1 Pedro 5:13) Ti panangirason dagiti Katoliko nga inusar ni Pedro ti “Babilonia” kas panangilimed iti Roma ket awan nakaibatayanna. Ti pudno a Babilonia ket adda pay laeng idi panawen ni Pedro. Kasta pay met, addaan idi ti Babilonia iti nalawa a Judio a sakop. Yantangay dinutokan ni Jesus ni Pedro nga ipamaysana ti panangasabana kadagiti nakugit a Judio, agpapada a nainrasonan ngarud a patien a binisita ni Pedro ti Babilonia gapu iti daytoy a panggep.—Galacia 2:9.
Siputanyo, met, a di pulos innaig ni Pedro ti bagina kas aniaman a natantan-ok ngem iti maysa kadagiti apostol ni Kristo. (2 Pedro 1:1) Awan pakasarakan idiay Biblia nga isut’ naawagan kas “Nasantuan nga Ama,” “Katan-okan a Papa,” wenno “Papa” (iti Latin, papa, nadungngo nga awag para iti “Ama”). Imbes ketdi, isut’ sipapakumbaba a kimpet kadagiti sasao ni Jesus idiay Mateo 23:9, 10: “Ket awan koma ti naganenyo ti amayo itoy rabaw ti daga, ta maymaysa ti Amayo, Isu nga adda sadi langit. Ket dikay met koma maawagan ti ‘manangidaldalan,’ ta maymaysa ti manangidalanyo nga isu ni Kristo.” Saan nga inawat ni Pedro ti pannakadayaw. Idi ti Romano a senturion a ni Cornelio “nagparintumeng iti sakaananna ket nagrukbab kenkuana . . . , isut’ pinatakder ni Pedro, a kunkunana: ‘Tumakderka; siak met taoak laeng.’”—Aramid 10:25, 26.
No maipapan kadagiti 260 a maipagarup a papa, inaklon ni padi a Foy: “Adu ti di maikari iti nangato a saadda.” Iti panangpadasna nga ikalintegan daytoy, inyebkas ti New Catholic Encyclopedia: “Ti nasken maipapan iti kaadda ti mangituray ket ti saad, saan a ti personal a kababalin ti tunggal papa. Mabalin a kas maysa a tao isut’ nagbalin a santo, maysa a gagangay, wenno uray pay naranggas.” Ngem patienyo kadi nga usaren ni Kristo ti kakasta a tattao a mangirepresentar kenkuana?
Uray kasta, ti panangipapilit a ti kinapapa ket impasdek ni Jesus ket saan a masuportaran idiay Biblia. Sigun iti Encyclopedia of Religion, uray dagiti moderno a Katoliko nga eskolar umannugotda nga “awan direkta a biblikal a pammaneknek nga impasdek ni Jesus ti kinapapa kas maysa a mataginayon a saad iti uneg ti simbaan.”